ভারতকী প্রধানমন্ত্রী

এক্সিলেন্সীশিং,

ঐহাক্না রাস্ত্রপতি মির্জিয়োয়েবপু হন্দক চহি অসিগী শিংননিংঙাই ওইরবা মালেমগী অমসুং রিজনেল এনভাইরোনমেন্ত অসিদা এস.সি.ও.বু মতীক চানা লুচিংবীবগীদমক পুকচেল শেংনা থাগৎচরি।

ঙসিদি, মালেম পুম্বনা লাইচৎকী মতুংদা শেন্মিৎলোন হঞ্জিল্লক্নবা হোৎনরিঙৈ চৈরক অসিদা এস.সি.ও.গী থৌদাং অসি য়াম্না মরু ওইরক্লি। এস.সি.ও. মেম্বর ওইরিবা লৈবাকশিংনা মালেমগী জি.দি.পি.গী চাদা ৩০ শরুক তম্লি, অমসুং মালেমগী মীওই চাদা ৪০দি এস.সি.ও. লৈবাকশিংদা হিংলি। ভারতনা এস.সি.ও. মেম্বরশিংগী মরক্তা হেন্না চাউবা মতেং অমসুং অমগা অমগা থাজনবদা শৌগৎলি। লাইচৎ অমসুং য়ুক্রেনগী লাংফম অসিনা মালেমগী সপ্লাই চেন্দা অকাইবা কয়া অমা থোকহল্লে, মসিনা মরম ওইদুনা মালেম পুম্বসিনা মমাংদা অমুক্তা থেংনখিদ্রিবা এনর্জী অমসুং চীঞ্জাক্কী লাংফম অমা মাইয়োক্নরি। এস.সি.ও.না থাজবা য়াবা, মপাঙ্গল কনবা অমসুং মায়কৈ য়াম্বা সপ্লাই চেন অমা ঐখোয়গী লমদমসিদা শাগৎনবা হোৎনগদবনি। মসিদা হেন্না শম্নবা চঙগনি মসিগী মথক্তা, ঐখোয় খুদিংমক্না অমগা অমগা ফাওদোক ফাওজিন তৌনবগী মপুং ওইবা হক লান্থোক্নগদবনি।

এক্সিলেন্সীশিং,

ঐখোয়না ভারতপু মেন্যুফেকচরিং হব অমা ওইহন্নবা হোৎনবগী লম্বী হেন্না খুমাং চাউশিল্লক্লি। ভারতকী নহা ওইরিবা অমসুং হৈ শিংলবা ৱার্কফোর্সনা ঐখোয়বু মহৌশাদগী চাংদম্নবদা নোপতবা লৈবাক ওইহল্লক্লি। ভারতকী শেন্মিৎলোন অসি চহি অসিদা চাদা ৭.৫ য়ৌনা চাউখৎকনি হায়না পারি, মসি মালেমদা খ্বাইদগী চাউবা শেন্মিৎলোন ওইগদৌরিবনি। ঐখোয়গী মীয়ামগী খনবা চাউখৎপগী মোদেলদা তেক্নোলোজী নীংথিনা শীজিন্ননবা মীৎয়েংসু থম্লি। ঐখোয়না সেক্তর খুদিংমক্তা ইন্নোভেসন শৌগৎলি। ঙসিদি, ভারত্তা ঙসিদি স্তার্তঅপ ৭০,০০০ হেন্না অমসুং য়ুনিকোর্ন ১০০দগী হেন্না লৈরে। ঐখোয়গী খঙজ-হৈজবশিং অসি অতোপ্পা এস.সি.ও. মেম্বরশিংদসু কান্নগনি হায়না লৌজৈ। মসিগীদমক, ঐখোয়না এস.সি.ও. মেম্বর ওইরিবা লৈবাকশিংগা স্তার্ত-অপ অমসুং ইন্নোভেসনগী ওইবা অনৌবা অখন্নবা ৱার্কিং গ্রুপ অমা শাগৎতুনা ঐখোয়গী খঙজ-হৈজবশিং লান্ননবা শেম শারে।

এক্সিলেন্সীশিং,

ঙসিদি মালেম অসিনা অতোপ্পা মরুওইবা শিংনবা অমসু মাইয়োক্নরি – অমসুং মদুদি ঐখোয়গী প্রজাশিংগী ফুদ সেক্যুরিতী পীবা হায়সিনি। সমশ্যা অসিগী ওইথোকপা য়াবা পাম্বৈ অমা হায়রবদি মিল্লেৎ পুথোকপা অমসুং শীজিন্নবা হায়বসিনি। মিল্লেৎশিং অসি য়াম্না ফবা চীঞ্জাক অমা ওইবতা নত্তনা চহি লিশিং কয়াদগী এস.সি.ও. লৈবাকশিংদতা নত্তনা মালেমগী মফম কয়াদা হৌদুনা লাক্লি, অমসুং মসি মহৌশাদগী শীজিন্নরকপা, মচি ওইবা অমসুং মমল তাবা চীঞ্জাক্কী লাংফম অসিবু কোকহনবা ঙম্বা অমসু ওইগনি। ২০২৩গী চহি অসিবু য়ু.এন. ইন্তর্নেসনেল য়র ওব মিল্লেৎস হায়না পাঙথোক্কনি। ঐখোয়না এস.সি.ও.গী মখাদা ‘মিল্লেৎ ফুদ ফেস্তিভেল’ অমা শীন্নবা খন্নগদবনি।

ভারত অসি ঙসিদি মেদিকেল অমসুং ৱেলনেস তুরিজমদা মালেমগী ওইনা খ্বাইদগী পাম্নবা মফম অমা ওইরে। দব্ল্যু.ঐচ.ও. গ্লোবেল সেন্তর ফোর ত্রেদিসনেল মেদিসিনসু এপ্রিল ২০২২দা গুজরাত্তা হৌদোকখ্রে। মসিনা দব্ল্যু.ঐচ.ও.গী অহানবা অমসুং অমত্তা ঙাইরবা ত্রেদিসনেল মেদিসিনগী গ্লোবেল সেন্তর ওইগনি। ঐখোয়না এস.সি.ও. লৈবাকশিংগী মরক্তা মহৌশাগী ওইবা হিদাকশিংদা মতেং পাংনবা হেনগৎহনগদবনি। মসিগীদমক, ভারতনা অনৌবা এস.সি.ও. ৱার্কিং গ্রুপ অমা ত্রেদিসনেল মেদিসিনগী মতাংদা শেম্নবা হোৎনগনি।

ঐহাক্কী ৱারোল লোইশিনজদ্রিঙৈদা, ঐহাক্না রাস্ত্রপতি মির্জিয়োয়েবপু ঙসিগী মীফম অসিবু নীংথিনা শীনবীবগীদমক অমসুং নুংঙাই য়াইফনা তরাম্না ওকপীবগীদমক অমুক্কা থাগৎচরি।

পুম্নমকপু থাগৎচরি!

খঙহঞ্জবা – মসি প্রধান মন্ত্রীগী ৱারোল অদুবু চাউরাক্না হন্দোকচবনি। অশেংবা ৱারোলদি হিন্দিদা পীখি।

***************