ভারতকী প্রধানমন্ত্রী

মহাক্কী পুৱারী ওইরবা ইজরেল খোঙচৎ মাংওইননা ভারতকী প্রধান মন্ত্রী নরেন্দ্র মোদীনা ইজরেল হয়োমদা হায়খি, মরূপ-মপাং ওইবগী মরি অসি অনৌবা থাক অমদা পুখৎনবা লৈবাক অনিনা শেম-শারে। ইজরেলনা খুদোংথিবা কয়া মায়োক্নদুনা লাক্লে অমসুং শিংথানীংঙাই ওইনা মায়পাক্লে হায়না মহাক্না মখা তাখি।

লৈবাক মনুংদা অমসুং মপান লৈবাকশিংদা সুপরস্তার অমা ওইরিবা, মীওই বিলিয়ন ১.২গী মহূৎ শীল্লিবা প্রধান মন্ত্রী অমা উনবা হায়বসি তাংনা থোকপা থৌদোক্নি। মরম অদুনা ভারতকী প্রধান মন্ত্রী নরেন্দ্র মোদীগা উনবা হায়বসি অখন্নবা থৌদোক অমনি হায়না লৌই।

পুৱারী ওইরবা খোঙচৎ ওইনা জুলাই ৪দা মোদী ইজরেলদা থুংলগনি, ভারতকী প্রধান মন্ত্রী অমনা ইজরেলদা লাকপা অসি হন্দক্কী অসিনা অহানবনি। লৈবাক অনি অসি পাক-চাউবদা খেন্নরবসু, মখোয়গী মরক্ত লৈনরিবা মরিদি চপ মান্নৈ হায়না মহাক্না লৌই।

মোদী ময়ামদগী তোখায়বা লুচিংবা অমনি। ভারত মচাশিংগী মরক্ত য়াম্না পাম্নবগা লোয়ননা, মহাক্না হায়নীংবশিং হায়দোকপা ঙমই অমসুং মহাক্না পাম্বশিং শেমদোকপা ঙমই। মহাক্না মাংলোমদা পুখৎপা অমসুং মালেমগী মকোক থোংবা লৈবাক অমা ওইহন্নবা হোৎনরি। পান্দমশিং অসি ফংনবা মহাক্না ইজরেলগা চৎমিন্নবা পাম্লি। মসি ইজরেল মচা পুম্নমক্কী  ইকায়খুম্নবা অমা ফংবনি। ভারত মচাশিংনা মহাকপু নুংশি হায়বা মহাক্না খঙই, অদুগা মহাক মায়থিরোই হায়বসু মহাক্না খঙই। মসি মহাক্কী অচৌবা শিংনবা অমনি।

ঐনা মোদীগী ওফিসিয়েল য়ুমদা থুংলবা মতমদা, কেমেরাগী মমাংদা মতম অয়াম্বনা য়াম্না লুবা মীশক অমা ওইনা উবদু য়াম্না চম্বা, মী উবদা নোক্কনি খঙবা মীওই অমা ওইরম্বা ঐনা থেংনখি। মহাক লায়রনা পোকপদগী মশানা কন্না হোৎনজবদগী মহাক্কী মায় পাকপা পুরকখিবগী মহাক্না চাউথোকচখি।

মহাক্কী থাজবা উৎলদুনা মোদীনা মহাক্কী লাইৱা অমা ঐঙোন্দা থিখি, “সরভজন হিতে সরভজন সুখে, সবকা সাথ, সবকা বিকাস।” শম্না ৱাহন্থোক পীরবদা, “মীয়ামগী য়াইফনবা, পুম্নমক্কী কান্নবা ফংনবা, পুম্নমক্কা লোইননা, পুম্নমক চাউখৎমিন্নবা” হায়বনি।

উনখিবা অদুদা, মহাক্না ভারত অমসুং ইজরেলগী মীয়ামগী মরক্ত লৈরিবা অচেৎপা মরি পুথোক্নবা হোৎনখি। লৈবাক অনি অসি থৱায়গী থৱায়নি হায়না মহাক্না থাজৈ। লৈবাক অনি অসিনা ওন্ত্রপ্রনর্শিপ অমসুং অনৌবা পুথোকপগী থৌনা শরুক য়ামিন্নদুনা মরূপ-মপাং ওইবগী মরি অসিগী মশক অমা শেমজরি। মোদী মশামক্না লুচিংদুনা জুলাই ৫দা তেল অবিবতা ভারত মচাশিংগী খোঙচৎ অমা শীন্দুনা মসিগী ৱাখল্লোন অসি লৈহন্নবা মহাক অমসুং মহাক্কী মীয়াম্না হোৎনখি। মসি মহাক্কী খোঙচৎকী য়াম্না মরুওইবা শরুক অমনি হায়না মহাক্না লৌই, মসি মহাক্কী ভারত মচাশিং ইকায়খুম্নবগী মওং অমনি।

ৱাহং : অদোম ইজরেলগী মরমদা করি খঙলবগে? অদোম মমাংদা ইজরেলদা চৎখ্রবরা?

এগ্রিতেক একজিবিসন অমা শরুক য়ানবা ভারতকী রাজ্য গুজরাতকী মুখ্য মন্ত্রী ওইনা ঐ ২০০৬তা অহানবা ওইনা ইজরেলদা চৎখি। চহি ১০ খরা হেনবগী মতুংদা অমুক হন্না ইজরেলদা চৎপদা ঐ হরাওই অমসুং হৌজিক ওইরিবা ইজরেলগী চাউখৎপশিং ঐ উরগনি।

ইজরেলগী মরমদা ঐগী লৈবাক্কী মীয়াম্না খল্লিবশিং অসিদা ঐনা শরুক য়ারি। ভারতনা ইজরেল অসি তেক্নোলোজীগী পুক্কৈ অমসুং অৱাবা কয়া থৌনা ফনা থেংনরিবা লৈবাক অমনি হায়না লৌই। তেক্নোলোজীগী অনৌবা পুথোকপা অয়াম্বগী হৌরকফম ইজরেলগী য়ুনিভর্সিতীশিং অমসুং লেবোরেতোরীশিংদগী ঙাক্তনি অমসুং মদুনা মীওইবা খুন্নাইদা কান্নবা পীরি। অনৌবা পোৎলমশিং অদুগী মনুংদা য়ু এস বি ফ্লাস দ্রাইবতগী হৌরগা চেরী তোমেতোজ ফাওবা য়াওরি। নখোয়গী লৈবাক্না ঈশিং ৱাৎপা লৈবাক অমা ওইরম্বদগী ঈশিং মরাং কাইবা লৈবাক অমা ওইরকপা; নখোয়না নখোয়গী লৈকংলাগী লম শংহনখিবা পুম্নমক অসি অঙকপা ঙাক্তনি। থবকশিং অদুনা ঐগী ৱাখলদা অকনবা মমি তাখি।

ৱাহং : পুৱারী ওইরবা খোঙচৎ অসি চৎনবা অদোম্না করিগী ৱারেপ লৌরিবনো?

লৈবাক অনিগী মরক্ত লৈনরিবা মরি মতম অয়াম্বদা কল্লি। তশেংনা হায়রবদা, চহি কয়া লৈবাক অনিগী মরি পাকথোক-চাউথোরক্লি অমসুং মওং হোংলক্লি। মমাংদা, অৱাংবা থাক্কী খোঙচৎ মতুংদা ঐখোয়গী মরি চেৎশিনহনবা য়াওখ্রে। হৌখিবা চহি অহুম অসিগী মনুংদা চৎথোক-চৎশিন তোইনা পাংথোকপা নহাক্না উরিবদুনি। ২০১৫দা ঐখোয়গী রাষ্ট্রপতিনা ইজরেলদা চৎখিবা অদুগী মমাংদা ভারতকী রাষ্ট্রপতি নৎত্রগা প্রধান মন্ত্রী অমত্তনা ইজরেলদা চৎখিদ্রি। ২০১৬তা রাষ্ট্রপতি রিয়ুবেন রিবলিন্না ভারত্তা লাক্লম্বা অদুনা ভারত্তা লাকপা অনিশুবা ইজরেলগী রাষ্ট্রপতিগী খোঙচৎনি।

“চহি চা কয়া শুরবা ঐখোয়গী লৈবাক অনিগী চেৎলবা মরি অসি লাক্লিবা ঐগী খোঙচৎ অসিনা ঐখোয়বু নীংশিংহল্লে। ঐখোয়গী লৈনরিবা মরি অসি হিরম খুদিংমক্তা মমি তাহনগদবনি অমসুং চাং নাইনা অৱাংবা থাক্ত উনগদবনি হায়বসি ঐখোয়গী মীৎয়েংনি। ঐখোয়গী দিপ্লোমেসীগী মরি লৈনরকপগী চহি ২৫ সুরকপগী থৌরম চহি অসিদা পাংথোকপা মরম্না, লৈবাক অনিগী মরি অসি অনৌবা থাক অমদা পুরকপগী তাঞ্জা অমনি হায়না ঐনা খল্লি।”

ৱাহং : ৱারেপ অসিনা য়ু.এন.দা ইজরেলবু হেন্না শৌগৎপা তারোইদ্রা?

“য়ু.এন.দা ঐখোয়গী ফিবম অসি, ৱাথোক অদুগী অফ-ফত্তা অমসুং ঐখোয়গী থাজবা অমসুং ৱাখল্লোন্দা য়ুমফম ওইগনি। য়ু.এন.দা অফবা ফল পুরক্নবা ইজরেল য়াওনা ঐখোয়গা মরূপ-মপাং ওইরিবশিংগা ঐখোয়গা থবক তৌমিন্নগনি অমসুং ঐখোয়না মরুওই হায়না লৌরিবা থবকশিং পাংথোকমিন্নগনি। য়ু.এন.দা লৈবাক অমত্তা নাইতোম তাহন্নবা ভারতনা হোৎনদে।”

ৱাহং : ভারত অসি নোংচুপ নৎত্রগা নোংপোক্তা পুন্দে হায়না হৌজিক ফাওবা খল্লিবরা?

“ঐখোয়না ‘ভাসুধৈব কুতুমবকম’ হায়বদি ‘মালেম অসি ইমুং অমনি’ হায়বা ফিলোসোফী অসিদা ঐখোয় থাজৈ। নোংপোক অমসুং নোংচুপ অনিমক ঐখোয়না অফবা মওংদা লোইনবা পাম্মি।”

ৱাহং : ইজরেল অমসুং ভারত চপ মান্ননা তেরোরিজম মায়োক্নরিবরা?

“তেরোরিজম অসি মালেমগী অচৌবা লাইচৎ অমনি। ভারত অমসুং ইজরেল অনিমক তেরোরিজমদগী নান্থোকপা ঙমদে। মীচমদা মীহাৎ-মীপুনগী থবক চৎথবশিং মাংহনগদবনি হায়বা অসিদা ঐখোয় চপ চানা শৌগৎলি। ঙমখৈ লান্না তেরোরিজমগী থবক চৎথরকপা অসি ঐখোয়গী অচৌবা শিংনবনি। ঐখোয়গী ঙমখৈ ৱাংমদগী লাকপা মীওইশিংনা ঐখোয়গী লৈবাক্কী অপুনবগী শক্তম থুগায়নবা হোৎনরি। অসিগুম্বা মীথিনগায়শিং অসিনা ঐখোয়গী লৈবাক্কী নহারোলশিং অমসুং লমদম কয়া লান্না লমজিংনবা ধর্ম্মবু খুৎলায় ওইনা লান্না শীজিন্নরি। অকক্নবা ধর্ম্ম অমগা তেরোরিজমগা মান্ননা লৌরোইদবনি। তেরোরিজমগী চৈথেং থেংননবা ভারত অমসুং ইজরেলনা মতেং পাংনগদবনি।”

ৱাহং : মরি অসি নৌনা শেম্বরা নৎত্রগা ফগৎলকপরা?

“ভারতকী প্রধান মন্ত্রী অমনা ইজরেলদা চৎপা অহানবা ওইবনা ঐগী খোঙচৎ অসিগী মশাগী ওইবা মরুওইবা লৈজরি। ঐগী খোঙচৎ অসিনা হিরম কয়াদা লৈনরিবা ঐখোয়গী মরি চেৎশিলহনগনি অমসুং মতেং পীননবা অনৌবা হিরম কয়া থোরক্লগনি হায়না ঐনা চেৎনা থাজৈ।”

ৱাহং : রাষ্ট্রপতি দোনাল্দ ত্রম্পগুম্না জেরুসালেম অমসুং ৱেস্তর্ন ৱার্ল্দা অদোম চৎকদরা ?

“ঐগী খোঙচৎকী মরুওইবা পান্দমদি ভারত অমসুং ইজরেলগী লৈনরিবা মরি ফগৎহনবনি। ঐ শোইদনা জেরুসালেমদা চৎকনি হায়না ঐনা থাজৈ। ঐগী খোঙচৎ অমসুং মসিগী থৌরমশিং অসি শেম-শারবনি, মরম অদুনা তেক্নোলোজী, ইন্নোভেসন, লৌউ-শিংউ অমসুং মহৌশাগী লন ফজনা শীজিন্নবা য়াওনা হীরম কয়াদা ইজরেলগা মতেং পীননবা ঐখোয়না মীৎয়েং থম্লি।”

ৱাহং : জেরুসালেমদা লৈঙাকপদা অদোমগী করি মত লৈবগে? ভারতকী এম্বেসী মসিদা হোংগদরা?

“ইজরেল অমসুং পেলেস্তাইন শান্তি ওইনা লৈমিন্নবা লৈবাক অনি ওইনা লৈহনবগী ৱাফম অসিদা ঐখোয়না থাজৈ। অরোইবা ওইনা য়ানবা পুরকপা মতমদা চৈথেং ফংলবা কাংবুগী অপাম্বশিং অমসুং ৱাখল্লোনশিং ইকায়খুম্নগদবনি। ৱাথোক অসি লোইশিন্নবগী মরুওইবা পাম্বৈদি অৱাবা নংলবা কাংবুগী খুৎতা লৈরে। জেরুসালেমগী য়াওনা পন্দুনা লৈরিবা ৱাথোক খুদিংমক লোইশিন্নবা পাম্বৈ থিবদা ভারতনা অঙম্বা মতেং পাংগনি। তেল অবিবতা লৈবা ঐখোয়গী এম্বেসীদা ৱাহংশিং অসি খন্নখিগনি হায়না ঐনা খল্লি।  জেরুসালেমগী মতাংদা নাকল অনিনা য়ানবা পুরক্লবা মতুংদা ঐখোয়না ৱারেপ অমা লৌগনি।”

ৱাহং : অদোমগী পুন্সি ৱারীদা, লায়রবা মীওই অমা ওইনা হৌরকখি অমসুং কন্না হোৎনবদগী লৈবাক অমগী সরকারগী মকোক ওইরকখিবা অসি য়াম্না নুংঙাইবা অমনি। অদুবু অদোম লায়রনা হৌরক্লবসু, অদোম কেপিতেলিস্তগী থৌওং অসি ফজনা শৌগৎপা অমনি অমসুং মনীংতম্বা শেন্মীৎলোন অমা পাম্মি। মালেমদা থম্লিবা অদোমগী মীৎয়েং অদু অদোম্না শন্দোক্না হায়বীবা য়াগদরা?

“ঐ ইজম অমত্তা থাজদে। ‘পুন্না হিংমিন্নবা অমসুং পুন্না চাউখৎমিন্নবা’ হায়বা পান্দম অসিদা ঐ অমসুং ঐগী সরকারনা থবক তৌরি। ঐখোয়গী নহারোলশিং অসি থবক থিবা মীওইশিং নত্তবা থবক পীবা ঙম্বা মীওইশিং ওইহনবা ঐখোয়গী অপাম্বনি। ঐখোয়গী নহারোলশিংগী লোৎতুনা লৈরিবা ওন্ত্রপ্রনর্শিপ অমসুং অনৌবা পুথোক্নীংবগী থৌনা মিকপ থোকহন্নবা ঐখোয়না মথৌ তাবা পাম্বৈশিং শীজিন্নগনি। থবক অমা শৌগৎনবগী নৎত্রগা য়ানবগী ঐগী নাপচৈ অসি থবক অদুনা ঐখোয়গী মীয়ামদা কয়া য়াম্না কান্নবা পীগদগে হায়বা অদুনা ওইগনি। মসিনা মাংদা থম্লগা থবক পায়খৎপা মতমদা মহৈ চাগনি। মসি ঐগী হৌরকফম রাজ্য নোংচুপ ভারতকী গুজরাত্ত চহি ১৩ মুখ্য মন্ত্রী ওইরিঙৈদা ঐনা উখ্রবনি অমসুং হৌজিক্না খুন্নাইগী থাক্ত ভারতকী ওইনা উরি।”

ৱাহং : লুবা – নানবা ৱাৎলিবা মনুং হঞ্জিনবা অমসুং খুঙ্গংগী মফমশিং অনৌবা তেক্নোলোজীশিং শীজিন্নদুনা ভারতকী খুন্নাই অসি শেমদোক্নবা নহাক্না হোৎনরি । মসিদা ইজরেলনা থৌদাং অমা লৌবা য়াগদরা ?

“শোইদনা য়াগনি। অওনবা পুরক্নবগী খোঙজং অসিদা ইজরেলনা তেক্নোলোজীগী মরূপ অমা ওইগদবনি। ঐখোয়গী মাংজিল থানা পায়খৎলিবা স্কিমশিং ক্লিন গঙ্গা (গঙ্গা তুরেল শেংদোকপগী থবক) অমসুং স্মার্ত সিতীশিংদা ইজরেলগী তৌবা ঙম্বশিংনা কান্নগনি। করিগুম্বা ইজরেলগী অনৌবা পুথোকপশিংনা মখোয়গী পোৎথোকশিং অদু ঐখোয়গী খুঙ্গংগী মীয়াম্না পাম্নগদবা মওংদা পুথোক্লবদি  ঐখোয়গী লৈবাক্কী মীওই লিশিং কয়াগী পুন্সি মহিং ফগৎহনবদা ইজরেলগী তেক্নোলোজীশিং শীজিন্নবা য়াগনি।”

ৱাহং : ললোন-ইতিক, লৌউ-শিংউ অমসুং অতৈ হিরম কয়াদা ইজরেল মচাশিং অমসুং ভারত মচাশিংগী মরক্ত করি খেন্নবা লৈগনি?

“খুন্নাইশিং ওইনা, ভারত অমসুং ইজরেল অনিমক ওন্ত্রপ্রনর্শিপকী অকনবা ৱাখল্লোন্না পুবা ঙাক্তনি। লৈবাক অনিগী ললোন-ইতিক্কী লোনচৎ অসি ইতোপ তোপ্পি অমসুং মখোয় মশাগী তোখায়বা ফিবম অমমম লৈজৈ। মখোয়গী থবক পায়খৎপদা মান্নদবা কয়াদি লৈরম্বা য়াই অদুবু ঐনা খঙবা ভারত অমসুং ইজরেলগী ললোনবশিংনা ঐঙোন্দা হায়বদা মখোয় অনিমক চপ মান্নবা সাইন্তিফিক ওইবা ৱাখল্লোন লৈ।”

ৱাহং : ইজরেল মচাশিং অমসুং ভারত মচাশিংগী মরক্ত করি  অনৌবা মরি লৈনবগে হায়না মতৌ করম্না ঐখোয়না মীচম অমদা শন্দোক্না তাক্কনি?

“ঐখোয়গী মরি অসিনা মখোয়গী পুন্সিদা ইথিল পীবা মরম্না ঐখোয়গী অনৌবা মরি অসি মীচম মীয়াম্না হেন্না থাক ৱাংনা খঙই হায়না ঐনা খল্লি। অনৌবা খোঙথাং অমদা উরিবা ঐখোয়গী মীৎয়েংদা মান্নরমদবা য়াই অদুবু ঐখোয় অনিমক্না অনৌবা খোঙথাং অসিনা ঐখোয়গী খুন্নাইদা লন-থুম অমসুং মগুন হেনগৎহনবা পাম্মি। ইজরেল মচাশিং অমসুং ভারত মচাশিং পোকপদগী হৌনা মাংজিল থাবা মীওই ঙাক্তনি। ঐখোয়না পুন্না পায়খৎমিন্নগদবা থবকশিংদি অনৌবা পুথোক্নীংবগী ৱাখল্লোন অসি ইন্ত্রপ্রিনরগী ৱাখলগা শম্নহনবনি।”

ৱাহং : ভারতনা করম্বা ওন্ত্রপ্রনর  পুশিল্লকপা পাম্বগে ?

“মমাংদগী ইজরেলগা চৎনরক্লবা পুশিল্লকপা – থাদোকখিবগী মরি অদু ঐখোয়না পামদে। ঐখোয়না পাম্লিবসি অরৈবা অমগা অয়োনবা অমগা লৈনরিবা মরি অদুদগী হেনবনি। ‘মেক ইন ইন্দিয়া’দা মীৎয়েং থমদুনা ঐখোয়না তেক্নোলোজীদা য়ুম্ফম ওইবা মরিদা হেন্না থৱায় য়াওই। ‘ক্লিন গঙ্গা’নচিংবা ঐখোয়গী মরুওইবা স্কিমশিংদা ইজরেলগী উদ্যোক্না মরুওইবা থৌদাং লৌরি। ভারতকী  মরুওইবা স্কিমশিংদা মতেং পাংনবগী তুংগী খুদোংচাবা কয়া মরাং কাইনা লৈরি।”

লৌথোকফম