ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদী ফেব্রুৱারি ২৩ দগী ফেব্রুৱারি ২৫ ফাওবা মধ্য প্রদেস, বিহার অমসুং অসামদা চৎকনি। ফেব্রুৱারি ২৩ দা, মহাক মধ্য প্রদেসকী ছাতারপুর জিলাদা চৎকনি অমসুং নুংথিলগী পুং ২ রোম তাবদা, মহাক্না বাগেশ্বর ধাম মেদিকেল এন্দ সাইন্স রিছার্স ইন্সতিতুৎকী উরেপ-উয়ুং তমগনি। ফেব্রুৱারি ২৪ দা, অয়ুক পুং ১০ রোম তাবদা, প্রধান মন্ত্রীনা ভোপালদা গ্লোবেল ইনভেস্তরস সম্মিৎ ২০২৫ হৌদোক্কনি। মতুংদা, মহাক বিহারগী ভাগলপুরদা চৎকনি অমসুং নুংথিল পুং ২:১৫ রোম তাবদা, মহাক্না বিহারদা তোঙান তোঙানবা চাউখৎ-থৌরাংগী প্রোজেকশিং মীয়ামদা কৎথোক্কনি অমসুং পি.এম কিষানগী ১৯শুবা ইন্সতোলমেন্ত থাদোক্কনি। মখা তানা মহা নুংথিল পুং ৬ রোম তাবদা গুৱাহাতিদা চৎকনি অমসুং মহাক্না গুৱাহাতিদা ঝুমোইর বিনন্দিনি (মেগা ঝুমোইর) ২০২৫ থৌরম শরুক য়াগনি। ফেব্রুৱারি ২৫ দা, চাউরাক্না অয়ুক পুং ১০:৪৫ রোম তাবদা, প্রধান মন্ত্রীনা অসামগী গুৱাহাতিদা এদভানতেচ অসাম ২.০ ইনভেস্তমেন্ত অমসুং ইনফ্রাস্ত্রকচর সম্মিৎ ২০২৫ হৌদোক্কনি। 

মধ্য প্রদেসতা প্রধান মন্ত্রী

প্রধান মন্ত্রীনা ছাতারপুর জিলাগী গরহা খুঙ্গংদা বাগেশ্বর ধাম মেদিকেল এন্দ সাইন্স রিছার্স ইন্সতিতুৎকী উরেপ-উয়ুং তমগনি। শীনফম খুদিংমক্কী মীওইশিংদা অফবা অনা-লায়েংগী খুদোংচাবশিং ফংহন্নবা, কেন্সর হোস্পিতাল অসিনা লায়রবা কেন্সর নারবা মীওইশিংদা লুপা করোর ২০০ হেনবগী লেম্না লায়েংবগী খুদোংচাবা পীগনি অমসুং হোস্পিতাল অসিদা অনৌবা মখলগী মেছিনশিং অমসুং স্পিসিএলিস্ত দোক্তরশিং থমগনি।

প্রধান মন্ত্রীনা ভোপালদা নুমিৎ নিনিগী গ্লোবেল ইনভেস্তরস সম্মিৎ ২০২৫ হৌদোক্কনি। মধ্য প্রদেস অসি মালেমগী ওইনা শেন থাদনবা মরুওইবা মফম অমা ওইনা শেমগৎনবা, মীফম অসিদা দিপার্তমেন্তেল সম্মিৎশিং; ফার্মা অমসুং মেদিকেল দিভাইসশিংগী অখন্নবা সেসনশিং, ত্রান্সপোর্ত অমসুং লোজিসতিক্স, ইন্দস্ত্রি অমসুং স্কিল দিবলপমেন্ত, তুরিজম অমসুং এম.এস.এম.ইশিংগী সেনসনশিং লৈগনি। মীফম অসিদা মালেমগী সেসনশিং হায়বদি গ্লোবেল সাউথ লৈবাকশিংগী কনফরেন্স, লেতিন অমেরিকা অমসুং কেরিবিয়ান সেসন অমসুং খোঙলোয় ওইরবা লৈবাকশিংগী সেসনশিং পাংথোক্কনি।

সম্মিৎ মনুংদা অচৌবা ইন্দস্ত্রিগী একজিবিসনশিং পাংথোক্কনি। ওতো সো পাংথোক্তুনা মধ্য প্রদেসকী ওতোমেতিপকী তৌবা ঙম্বশিং অমসুং গারিগী তুংগী পাম্বৈশিং উৎকনি। তেক্সতাইল অমসুং ফেসন এক্সপোদা রাজ্য অসিগী মমাংঙৈগী অমসুং অনৌবা তেক্সতাইল মেনুফেকচরিংগী হৈথোই-শিংথোইবশিং উৎকনি। “ৱান দিস্ত্রিক-ৱান প্রদক” (ও দি ও পি) ভিলেজদা রাজ্য অসিগী অঙকপা ক্রাফমেনশিপ অমসুং নাৎ অমসুং চৎনবীশিং উৎকনি।

লৈবাক ৬০ হেনবগী মীহুৎশিং, মালেমগী তোঙান-তোঙানবা লুপশিংগী ওফিসিএলশিং, ভারতকী শক্নাইরবা ইন্দস্ত্রিশিংগী লুচিংবশিং অমসুং থৌশিল শেম্বশিং শরুক য়াগনি।

বিহারদা প্রধান মন্ত্রী

লৌমীশিংগী য়াইফনবা প্রধান মন্ত্রীনা থবক কয়া পায়খৎলে। হিরম অসিদা, মহাক্না ভাগলপুরদা মরুওইবা থবক কয়া হৌদোক্কনি। মহাক্না ভাগলপুরদা পি.এম কিষানগী ১৯শুবা ইন্সতোলমেন্ত থাদোক্কনি। লৈবাক শীনবা থুংবগী লৌমী করোর ৯.৭ হেনবনা লুপা করোর ২১,৫০০ হেনবগী শেনফম হকথেংননা ফংলগনি। 

লৌমীশিংনা মখোয়গী পোৎথোকশিং চুনবা মমলদা য়োনবা ফংনবা প্রধান মন্ত্রীনা অখন্নবা মীৎয়েং অমা চঙলে। মসিগী ৱাখল অসিদা, ফেব্রুৱারি ২৯, ২০২০ দা মহাক্না ফার্মর প্রদুসর ওর্গনাইজেসন ১০,০০০ শেম্নবা অমসুং শৌগৎনবা কেন্দ্রগী স্কিম হৌদোকখি অমসুং মসিনা লৌমীশিংগী অপুনবা কৈথেল অমসুং মখোয়গী লৌউ-শিংউগী পোৎথোকশিংদা মতেং পাংলে। চহি ৫ গী মনুংদা, প্রধান মন্ত্রীনা লৌমীশিংদা পীখিবা থাজবা অসি থবক ওইনা পাংথোক্লে, থৌরম মনুংদা লৈবাক শীনবা থুংনা এফ.পি.ও ১০,০০০শুবা শেম্লে।

প্রধান মন্ত্রীনা মোতিহারিদা রাস্ত্রিয়া গোগুল মিসনগী মখাদা শাবা সেন্তর ওফ এক্সলেন্স ফোর ইন্দিজিনিয়স ব্রিদস শঙ্গাগনি। মসিগী মরুওইবা পান্দমশিংগী মনুংদা অৱাংবা থাক্কী আই.ভি.এফ তেক্নোলোজি হৌদোকপা, মখা তানা শন্দোক্নবা অফবা মখলগী ইন্দিজিনিয়ন ব্রিদশিং পুথোকপা অমসুং অনৌবা রিপ্রদক্তিপ তেক্নোলোজিগী লমদা লৌমীশিং অমসুং শীনফম অসিগী মীওইশিং ত্রেনিং পীবা য়াওরি। শঙ্গোম পুথোকপা লৌমী লাখ ৩ গী য়োনফম পীনবা পান্দমদা প্রধান  মন্ত্রীনা বরাউনিদা শঙ্গোম পুথোক্নবা প্লান্ত অমা শঙ্গাগনি।

লম্বী-থোং অমসুং ইনফ্রাস্ত্রকচর ফগৎনবা মহাক্কী পান্দমগা শরুক অমা ওইনা, প্রধান মন্ত্রীনা লুপা করোর ৫২৬ হেনবগী ৱারিসালিগঞ্জ-নাৱাদা-তিলাইয়া রেল সেক্সন অমসুং ইসমাইলপুর-রফিগঞ্জ রোদ ওভর ব্রিজ শঙ্গাগনি।

অসামদা প্রধান মন্ত্রী

অসাম তি ত্রাইব অমসুং অসামগী অদিবাসি ফুরুপকী ফোক দান্স অমা ওইরিবা, ঝুমোইর জগোয়দা মীওই ৮,০০০ না শরুক য়াবা অখন্নবা নাৎকী থৌরম ঝুমোইর বিনন্দিনি (মেগা ঝুমোইর) ২০২৫ থৌরমদা প্রধান মন্ত্রী শরুক য়াগনি। থৌরম অসিদা অপুনবা, নাৎকী চাউথোকচবা অমসুং অসামগী চৎনবীগী ফজবশিং উৎকনি। মেগা ঝুমোইর থৌরম অসিনা চহি ২০০ শুবা চাগী উদ্যোগ অমসুং অসামগী চহি ২০০গী ইন্দস্ত্রিলাইজেসন উৎলি।

প্রধান মন্ত্রীনা গুৱাহাতিদা ফেব্রুৱারি ২৫ দগী ফেব্রুৱারি ২৬ ফাওবা পাংথোক্কদবা এদভানতেচ অসাম ২.০ ইনভেস্তমেন্ত অমসুং ইনফ্রাস্ত্রকচর সম্মিৎ ২০২৫ হৌদোক্কনি। থৌরম অসিদা হৌদোকপগী সেসন য়াওনা, মিনিস্তরশিংগী সেসন ৭ অমসুং থিমেতি সেসন ১৪ লৈগনি। মসিদা রাজ্য অসিগী উদ্যোগকী য়াওল, মালেমগী লৈবাকশিংগা ললোন-ইতিক্কী থবক তৌমিন্নবা, উদ্যোগশিং চাউখৎলকপা, এম.এস.এম.ই সেক্তরদা মীৎয়েং থম্বা একজিবিসন অমা পাংথোক্তুনা রাজ্য অসিগী শেন্মিৎলোনগী ফিবম উৎকনি আমসুং একজিবিতর ২৪০ রোম শরুক য়াগনি।

থৌরম অসিদা মালেমগী লুপশিং, মালেমগী লুচিংবশিং অমসুং ইনভেস্তরশিং, থৌশিল শেম্ববশিং, উদ্যোগকী অখঙ-অহৈশিং, স্তার্দঅপশিং অমসুং মহৈরোয়শিং শরুক য়াগনি।

****