ভারতকী প্রধানমন্ত্রী

ঙসি প্রধান মন্ত্রী শ্রী নরেন্দ্র মোদীনা য়ুনাইতেদ স্তেৎ ওফ অমেরিকাগী রাস্ত্রপতি দোনাল্দ ত্রম্পকা তেলিফোন্দা ৱারী শানখ্রে।

রাস্ত্রপতি দোনাল্দ ত্রম্পনা জি-৭কী য়ু.এস.না রাস্ত্রপতি ওইবগী মতাংদা ফোংদোকখি অমসুং ভারত য়াওনা মরুওইবা লৈবাকশিং য়াওহন্নবা হৌজিক লৈরিবা মেম্বরশিং অসিগী মথক্তা অতোপ্পশিং হাপচিন্নবগী মহাক্কী অপাম্বা ফোংদোকখি। মসিগী মতাংদা, য়ু.এস.এ.দা মথংদা পাংথোক্কদৌরিবা জি-৭ মীফমদা প্রধান মন্ত্রী নরেন্দ্র মোদী শরুক য়ানবা মহাক্না চেবাউ পীরকখি।

কোবিদ মতুংগী মালেম অসিদা ওইরক্কদৌরিবা অশেংবা ফিবমশিং অদু খঙদুনা ফোরম অসি পাকথোক-চাউথোক্নবা হোৎনরকলিবা মহাক্কী অফবা অমসুং তুংগী উবা ঙম্বা অদুগীদমক প্রধান মন্ত্রী মোদীনা রাস্ত্রপতি থাগৎখি। প্রধান মন্ত্রীনা হায়খি পাংথোক্কদৌরিবা মীফম অদু মাইপাক্নবা য়ু.এস. অমসুং অতৈ লৈবাকশিংগা থবক তৌমিন্নবদা ভারতনা হরাওগনি।

হৌজিক য়ু.এস.তা মীয়ামগী ইরাং লৈরিবা অসিদা প্রধান মন্ত্রী নরেন্দ্র মোদীনা নুংনাংবা ফোংদোকখি অমসুং ফিবম অদু অথুবদা ৱারোইশিন পুরক্নবা মহাক্কী য়াইফ-পাউজেলশিং পীখি।

লৈবাক অনিগী কোবিদ-১৯গী ফিবমশিং, ভারত-চাইনা ঙমখৈগী ফিবম অমসুং ৱার্ল্দ হেল্থ ওর্গনাইজেসন অমুক হন্না শেমদোকপগী দরকার ওইবগী মতাংদা লুচিংবা অনিনা ৱা তান্নখি।

চহি অসিগী ফেবুৱারীদা মহাক্না ভারত্তা লাক্লম্বা খোঙচৎ অদু রাস্ত্রপতি দোনাল্দ ত্রম্পনা নীংশিংখি। প্রধান মন্ত্রী মোদীনা হায়খি খোঙচৎ অদু নীংশিংদুনা লৈহৌরগনি অমসুং হিরম কয়াদা পুৱারী ওইখি অমসুং নাকল অনিগী মরীদা অনৌবা শক্তম অমা হাপচিনখি।

ৱারী শানবা অদুদা ইন্দো-য়ু.এস.কী অখন্নবা মরী অমসুং লুচিংবা অনিগী মরক্তা মরূপ-মপাং ওইবা অমসুং থাজনবা অদু মমি তাখি।