ভারতকী প্রধানমন্ত্রী

দুবাইগী লৈঙাকপা অমসুং উপ-রাস্ত্রপতি, প্রধান মন্ত্রী অমসুং দিফেন্স মন্ত্রী, হিস হাইনেস শৈখ মোহম্মদ বিন রশিদ অল-মক্তুমগী পাউজেলগী মতুং ইন্না প্রধান মন্ত্রী, শ্রী নরেন্দ্র মোদীনা ঙসি ফেব্রুৱারী 14, 2024দা দুবাইদা পাংথোকপা ৱর্ল্দ গবর্নমেন্ত সম্মিত্তা অথোইবা মীথুংলেন ওইনা শরুক য়াখ্রে। “শেপিং দি ফ্যুচর গবর্নমেন্ত” হায়বসিনা থীম ওইবা সম্মিত অসিদা মহাক্না মরু ওইবা ৱারোল থমখি। প্রধান মন্ত্রীনা মসিগুম্বা সম্মিত অমদা ইং 2018দা অথোইবা মীথুংলেন ওইনা মমাংদসু শরুক য়াখ্রবনি। সম্মিত অসিদা মালেমগী লুচিংবা 20না শরুক য়াখি, মখোয়শিং অদুগী মনুংদা রাস্ত্রপতি 10, প্রধান মন্ত্রী 10সু য়াওখি। লৈবাক 120 হেনবগী সরকার অমসুং দেলিগেতশিংনা ঙসিগী মালেমগী মীফম অসিদা শরুক য়াখি।

প্রধান মন্ত্রীনা মহাক্কী ৱারোলদা লৈঙাকপগী থৌওংগী মতৌদা অহোংবা কয়া লাক্লিবা অসিগী মতাংদা মহাক্কী ওইবা ৱাখল্লোন ফোংদোকখি। ‘মিনিমম গবর্নমেন্ত, মেক্সিমম গবর্নেন্স’ হায়বা মন্ত্রদা য়ুম্ফম ওইদুনা ভারত্তা পাংথোকখিবা অহোংবা পুরকপা রিফোর্ম কয়াগী মতাংদা মহাক্না মীয়ামগী পুক্নিং চীংশিনখি। প্রধান মন্ত্রীনা মীয়ামগী য়াইফ য়ুম্বাল, ইনক্লুসিবিতী অমসুং সস্তেনেবিলিতীবু খুমাং চাউশিলহন্নবা লৈবাক অসিনা তেক্নোলোজী শিজিন্নখিবগী এক্সপেরিএন্স শেয়র তৌরদুনা লৈঙাকপগী থৌওংবু হ্যুমেন-সেন্ত্রিক ওইহন্সি হায়বা ৱাফম থমখি। ইনক্লুসিব ওইবা খুন্নাই অমা ফংনবগীদমক্তা মীয়াম্না শরুক য়াবা, লাস্ত মেইল দেলিবরী অমসুং নুপীনা লুচিংদুনা চাউখৎ থৌরাং পুরকপা হায়বসিদা ভারতনা মিৎয়েং চঙখিববু মহাক্না মরু ওইনা পাউদমখি।

মালেমগী ইন্তর-কন্নেক্ততেদ ওইবা মতৌশিং খন্নরুরগদি, তুংগী শিংনবশিং মাইয়োক্নবা ঙম্নবা সরকারশিংনা তেংবাংনদুনা অমনা অমদগী তম্নগদবনি হায়না প্রধান মন্ত্রীনা পুম্নমক্কী পুক্নিং চীংশিনখি। সরকারশিংনা ইনক্লুসিব, তেক-স্মার্ত, ক্লীন অমসুং ত্রান্সপরেন্ত অমদি গ্রীন ওইবনা হৌজিক মতমগী খ্বাইদগী তঙাই ফদবা থৌওংনি হায়না মহাক্না হায়খি। হীরম অসিগা মরী লৈননা, সরকারনা মীয়ামগী সেবা তৌবা মতমদা ইজ ওফ লিবিং, ইজ ওফ জস্তিস, ইজ ওফ মোবিলিতী, ইজ ওফ ইন্নোভেসন অমসুং ইজ ওফ দুইং বিজনেসকী থৌওংশিংদা অহেনবা মিৎয়েং চঙফম থোকই হায়না মহাক্না মখা তাখি। ভারতনা ক্লাইমেত চেঞ্জ এক্সন্দা খোঙফম চেৎলিবা অসিদা পুম্নমক্কী পুক্নিং চীংশিল্লদুনা, মহাক্না ঙসি তিনখিবা মীয়ামগী মফমদা সস্তেনেবল ওইবা মালেম অমা শেম্নবা মিসন লাইফ (লাইফস্তাইল ফোর ইনভাইরনমেন্ত) অসিদা শরুক য়াবীনবা হায়খি।

ভারতনা মমাংগী চহিদা G-20গী লুচিংবা ওইনা মালেম্না মাইয়োক্নরিবা হীরম অমসুং শিংনবা কয়াগী মতাংদা লুচিংবগী থৌদাং লৌখিবা অদুগী মতাংদা প্রধান মন্ত্রীনা শন্দোক্না পাউদমখি। হীরম অসিগা মরী লৈননা, ভারতনা গ্লোবেল সাউথনা চাউখৎ থৌরাংগী মতাংদা মাইয়োক্নরিবা শিংনবা কয়াবু পুম্নমক্না খন্ন-নৈননবগীদমক্তা মালেমগী ফম্বাক্তা পুখৎনবা হোৎনখিবগী মতৌশিংবুসু মহাক্না পাউদমখি। মলতিলেতরেল ইন্সতিত্যুসনশিংনা রিফোর্ম পাংথোকফম থোকই হায়বা ৱাখল্লোনগা লোয়ননা, গ্লোবেল সাউথনা মশাগী ৱারেপ লৌবা মতমদা তেংবাংনবা হেনগৎফম থোকই হায়না মহাক্না হায়খি। ভারতনা “বিশ্ব বন্ধু”গী থৌদাং লৌরিবা অসিদা য়ুম্ফম ওইরগা মালেমগী চাউখৎ থৌরাংগীদমক্তা মখা তানা তেংবাংখিগনি হায়না মহাক্না ফোংদোকখি।

***