ভারতকী প্রধানমন্ত্রী

ঙসি নিউ দিল্লিগী ভারত মন্দাপমদা প্রধান মন্ত্রী শ্রী নরেন্দ্র মোদীনা ৭শুবা ইন্দিয়া মোবাইল কংগ্রেস ২০২৩ হৌদোকখ্রে। এসিয়াদা খ্বাইদগী চাউবা তেলিকোম, মেদিয়া অমসুং তেক্নোলোজি ফোরম অমা ওইরিবা ইন্দিয়া মোবাইল কংগ্রেস(আই এম সি) অসি ‘গ্লোবেল দিজিতেল ইন্নোবেসন’ হায়বা থিমদা ওক্তোবর ২৭তগী ওক্তোবর ২৯,২০২৩ ফাওবা পাংথোক্কনি। মরুওইবা তেক্নোলোজিশিং শেমগৎপা, শাবা অমসুং মপান্দা থাদোকপা লৈবাক অমা ওইনা ভারতকী ফিবম ফগৎহন্নবা আই.এম.সি ২০২৩না পান্দম থম্লি। থৌরম মনুংদা, প্রধান মন্ত্রীনা লৈবাক শীনবা থুংনা লৈরিবা মহৈলোয়শঙশিংদা ‘5G য়ুজ কেস লেবস’ ১০০ পীখ্রে।

প্রধান মন্ত্রীনা হোল ৫তা একজিবিসনসু হাংদোকখি অমসুং য়েংখি। থৌরম অদুদা উদোগকী লুচিংবশিংসু ৱা ঙাংখি। ভারতকী দিজিতেল ইনফ্রাস্ত্রকচর ফগৎহন্দুনা খ্বাইদগী নৌবা তেক্নোলোজি শীজিন্নবা য়োকখৎতুনা নহারোল কয়াগী পুন্সি মহিং ফগৎহনবগীদমক রিলাইন্স জিও ইনফোম লিমিতেৎকী চিয়ারমেন শ্রী অকাস এম. অম্বানিনা প্রধান মন্ত্রী থাগৎপা ফোঙদোকখি। মহাক্না হায়খি দিজিতেল ইন্দিয়া প্রোগ্রাম অসি মীওই খুদিংমক কোনশিনবা, অনৌবা অমসুং তুংকোইনা চৎনবা য়াবা অমা ওইহন্দুনা প্রধান মন্ত্রীনা লৈবাক অসিগী নহারোল মিল্লিয়ন কয়া ইথিল পীরি।

মহাক্না হায়খি জিওনা ভারতকী সর্কুইত ২২দা 5G সেল লাখ ১০ হেন্না খিল্লে অমসুং অপুনবা 5G ফংহনবগী চাদা ৮৫ শরুক য়ারে অমসুং 5G স্তেক অসি ভারতকী লৌশিনা দিজাইন তৌবা, শেমগৎপা অমসুং শাবনি। মীওই মিল্লিয়ন ১২৫ হেন্না শীজিন্নদুনা 5G শীজিন্নবা মকোক থোংবা লৈবাক অহুমগী মনুংদা ভারতনা মকোক্তা লৈরে। প্রধান মন্ত্রীনা লৈবাক অসি অমতা ওইনা পুনশিল্লে, জি.এস.তি অমসুং ভারতকী দিজিতেলগী অওনবা পুরক্লে অমসুং মালেমদা খ্বাইদগী ৱাংবা মীতম শারে। অদোমগী থবকশিংনা ইন্দিয়া মোবাইল কংগ্রেসতা ঐখোয়গী পুক্নিং থৌগৎলে। ভারতকী অমৃত কালদা দিজিতেল ওন্ত্রেপ্রেনিউয়রশিং, ইন্নোবেতরশিং অমসুং স্তার্দঅপশিংনা ভারতকী মঙলানা মঙফাওনহনগনি।

ভারতি ইন্তরপ্রাইজেসকী চিয়ারমেন, শ্রী সুনিল ভারতি মিত্তলনা হায়খি দিজিতেল ইন্দিয়াগী মওংদা প্রধান মন্ত্রীগী পান্দম অসিনা দিজিতেল ইনফ্রাস্ত্রকচর য়াংনা চাউখৎপা ঙমহল্লে। প্রধান মন্ত্রীগী জে.এ.এম ত্রিনিতি পান্দম্না অওনবা পুরক্লে। ভারতকী দিজিতেলগী অওনবা অসি মালেম্না ঙক্নরে। ভারতকী দিজিতেল পব্লিক ইনফ্রাস্ত্রকচর(দি পি আই) অসি মালেমগী লৈবাক কয়ানা কল্লক্নরে।

প্রধান মন্ত্রীগী মঙলানগী অনিশুবা য়ুম্বী অসি মেক ইন ইন্দিয়ানি অমসুং হৌখিবা চহি অমদা মেনুফেকচরিংদা মশক থোকপা থবক কয়া পায়খৎলে। মেনুফেকচরিংদা ভারত মরা তারে। এপ্পলদগী হৌরগা দিজোন, সামসুংদগী তাতা, কম্পেনি খুদিংমক, অপীবা, অচৌবা নত্ত্রগা স্তার্দঅপ ওইগেরা মেনুফেকচরিংদা শরুক য়ারে অমসুং মরুওইনা দিজিতেল ইনফ্রাস্ত্রকচরগী লমদা ভারত মেনুফেকচরিং লৈবাক ওইরক্লে। সহর ৫০০০ অমসুং খুঙ্গং ২০,০০০দা এয়রতেল 5G ফংহনখ্রে অমসুং মার্চ ২০২৪দা মখোয়না লৈবাক শীনবা থুংনা কোনশিনগনি। মসি মালেমদা খ্বাইদগী য়াংনা 5G ফংহনবা অমা ওইরগনি।

অদিত্য বিরলা গ্রুপকী চিয়ারমেন, শ্রী কুমার মঙ্গলম বিরলানা ভারতকী দিজিতেলগী অওনবা পুরকপগীদমক প্রধান মন্ত্রী থাগৎলদুনা হায়খি প্রধান মন্ত্রীগী দিজিতেল ইনক্লুজনগী থবক অসি ‘অন্তয়োদয়া’গী ৱাখল্লোন্দা য়ুম্ফম ওইদুনা মীওই খুদিংমক কান্নবা ফংলে। ভারতকী দিজিতেলগী অওনবা অসি মালেম্না মশক খঙলে। প্রধান মন্ত্রীগী পান্দম্না ইথিল পীদুনা ভারতনা গ্লোবেল সাউথকী লুচিংবা অমা ওইরে। আইদেন্তিতি, পেমেন্ত অমসুং দেতা মেনেজমেন্তগী য়াওনা পব্লিক ইনফ্রাস্ত্রকচরগী লমদা ভারতকী অনৌবা থবকশিং অসি মতৌ তম্নবা লৈবাক কয়া খৌরাংনা ঙাইদুনা লৈরে।

প্রধান মন্ত্রীগী পান্দম ফংনবা প্রধান মন্ত্রীগী মঙলান মঙফাওন্নবা ভোদাফোন আইদিয়া অসি মথৌ মশক খঙবা মরুপ অমা ওইনা থবক পায়খৎলে। প্রধান মন্ত্রীগী লমজিং মখাদা 6Gগুম্বা তুংগী তেক্নোলোজিশিং শেমগৎনবা ভারতনা থৱায় য়াওনা থবক তৌরি। মখোয়না ফজনা শৌগৎপগীদমক মহাক্না সরকার থাগৎপা ফোঙদোকখি।

থৌরম অদুদা তিনখিবা মীয়ামদা ৱা ঙাংবদা প্রধান মন্ত্রীনা হায়খি ২১শুবা চহিচাগী হোংলক্লিবা মতম অসিদা, মীওই করোর কয়াগী পুন্সি অহোংবা পুরক্নবা থৌরম অসিদা শক্তি লৈরে। তেক্নোলোজিগী খোঙজেল অসি য়াম্না য়াংই অমসুং তুংলমচৎ মফম অসিদা অমসুং হৌজিক লৈরে। তেলিকোম, তেক্নোলোজি অমসুং কন্নেক্তিবিগী তুংগী শক্তমশিং উৎনবা থৌরম অসিদা একজিবিসন অমা পাংথোকপা অসি থাগৎলি। 6G, এ.আই, সাইবর সেকুরিতি, সেমিকন্দক্তরশিং, দ্রোন নত্ত্রগা স্পেস সেক্তরশিং, সমুদ্র, গ্রিন তেক নত্ত্রগা অতোপ্পা সেক্তর অমা হেক্তা লৈবাক অসিদা পায়খৎলে। তুংলমচৎ অসি তোঙানবা মশক অমা ওইরগনি অমসুং ঐখোয়গী নহারোলশিংনা তেক্লোলোজিগী অওনবদা মাঙজিল থাবা অসি হরাওনবগী মচাক অমনি।

শ্রী মোদীনা হায়খি হৌখিবা চহিদা ভারত্তা 5G ফংহনখিবা অসিদা মালেমগী অতৈ লৈবাকশিংনা অঙকপা পোক্নখি। 5G মাইপাক্লবা মতুংদা ভারত লেপখিদে অমসুং মসিগী থবক অসি মীওই খুদিংমক্তা ফংহনখি। ভারতনা 5G শীজিন্নবা হৌবদগী, 5G ফংহনবগী তাঙ্কক্তা য়ৌরে। 5G ফংহনবা চহি অমগী মনুংদা, সহরশিংগী চাদা ৯৭ অমসুং অপুনবা মীশিংগী চাদা ৮০ কোনশীন্দুনা 5G বেজ স্তেসন লাখ ৪ শেমগৎখি। মেদিয়ান মোবাইল ব্রোদবেন্দ স্পিৎশিংগী খোঙজেল চহি অমগী মনুংদা শরুক অহুম হেনগৎলে। ব্রোদবেন্দ স্পিৎকী মতাংদা ভারতনা ১১৮শুবা মফমদগী ৪৩শুবা মফমদা হাইগৎলে। ভারতনা লৈবাক অসিদা 5G নেতৱার্ক পাংথোক-চাউথোকহনবতা নত্তনা 6G দা লুচিংবা অমা ওইনবা অকনবা থবক পায়খৎলে। 2Gগী মতমদা ৱাথোক কয়া থোকখি। হৌজিক পাল্লিবা সরকারগী মতমদা 4G ফংহনবা হৌবদা ৱাথোক অমতা লৈখিদে। 6G তেক্নোলোজিদা ভারতনা মাঙজিল থাগনি হায়বগী থাজবা থম্লি।

মহাক্না হায়খি ইন্তরনেত কন্নেক্তিবিতিগী মতাংদা রেঙ্কিং অমসুং মশিং হেনগৎলকপগী মথক্তা স্পিৎ হেনগৎলকপা অসিনা হিংবদা লাইবা হেনগৎহল্লে। কন্নেক্তিবিতি অমসুং স্পিৎ হেনগৎহনবা অসিনা লাইরিক তম্বা, মেদিসিন, তুরিজম অমসুং লৌউ-শিংউদা কান্নবা কয়া পীরে।

গনতন্ত্রগী শক্তিদা ঐখোয়না থাজবা থম্লি। চাউখৎপগী কান্নবা মফম খুদিং অমসুং কাংলুপ খুদিং ফংগদবনি, ভারতকী লন-থুমগী কান্নবা মীওই খুদিংমক ফংগদবনি, মীওই খুদিংমক ইকায়খুম্নবা পুন্সি অমদা হিংগদবনি অমসুং তেক্নোলোজিগী কান্নবা মীওই খুদিংমক ফংগদবনি। মাইকৈ অসিদা ঐখোয় য়াংনা থবক পায়খৎলি। ঐগী ওইনা মসি খ্বাইদগী চাউবা খুন্নাইগী অচুম্বনি। শেল্লেপ ফংহনবা, মচাক-মথুমশিং ফংহনবা অমসুং তেক্নোলোজি ফংহনবা হায়বসি ঐখোয়গী সরকারগী মরুওইবনি।

মহাক্না হায়খি মুদ্রা স্কিমগী মখাদা গরেন্তি য়াওদনা লোন পীরে, অমাংশঙশিং শারে, অমসুং জে.এ.এম ত্রিনিতিগী খুৎথাংদা দি.বি.তি পাংথোক্তুনা মীচম মীয়ামশিং মমাংদা ফংলমদবা হকশিং ফংলে। মসিদা তেলিকোম তেক্নোলোজিনা অচৌবা থৌদাং লৌরি। ভারত নেতনা গ্রাম পঞ্চায়ত লাখ ২ রোম ব্রোদবেন্দ য়ৌহল্লে। অতল তিনকরিং লেব ১০,০০০না অঙাং লাখ ৭৫ রোম অনৌবা তেক্নোলোজিশিং মশক খঙহল্লে। ঙসি হৌদোক্লিবা 5G য়ুজ লেবশিংনা চপ মান্নবা খুদোংচাবশিং পীগনি। হায়রিবা লেবশিং অসিনা নহারোলশিং অচৌবা মঙ মঙনবা ইথিল পীগনি অমসুং মখোয় ফংবা ঙম্নবা মখোয়দা থাজবা লৈহনগনি।

প্রধান মন্ত্রীনা হায়খি হৌখিবা চহি খরদা ভারতকী স্তার্দঅপকী থবকশিংনা মালেমদা শিংথানিঙাই ওইবা মফম অমা কল্লে। মতম চঙদনা ভারতনা য়ুনিকোর্ন ১০০ হেন্না পুথোক্লে অমসুং হৌজিক মালেমদা স্তার্দঅপকী থবকশিংগী মকোক থোংবা লৈবাক অহুমগী মনুংদা অমা ওইরে। ২০১৪গী মমাঙদা ভারত্তা স্তার্দঅপ চা খর খক লৈরমখি অমসুং ঙসিদি মশিং লাখ ১ হেল্লে। লৈবাক অসিদা স্তার্দঅপশিং লমজিংনবা ইন্দিয়ান মোবাইল কংগ্রেসনা ‘এস্পাইয়র’ প্রোগ্রাম অমা হৌদোক্লে অমসুং মসিনা ভারতকী নহারোলশিংদা য়াম্না চাউনা কান্নবা পীগনি। ভারতকী খোঙচৎ অসি নিংশিংদুনা লৈহৌরগনি।

অরিবা তেক্নোলোজিনা মরম ওইদুনা খুদোংচাদবা কয়া মায়োক্নবা মতম অমা লৈখি। মমাঙগী সরকারশিংগী অরিবা থবকশিংনা মরম ওইদুনা শীজিন্নবা য়াদবা মোবাইলগী ৱারি অমা প্রধান মন্ত্রীনা পনখি। মহাক্না হায়খি ২০১৪গী মতুংদা, মীয়াম্না অরিবা তেক্নোলোজি শীজিন্নবা লেপখ্রে অমসুং বেত্তরিশিং শীনবা নত্ত্রগা সিস্তেম রিস্তার্দ তৌবগী থবক অদু অরেম্বা ওইখ্রে। মতম অমদা ভারত মোবাইল মপান্দগী পুশিল্লকপা লৈবাক অমা ওইরমখি, ঙসিদি ভারত মালেমদা মোবাইল শাবা খ্বাইদগী চাউবা অনিশুবা লৈবাক ওইরে। মমাঙগী সরকারশিংদা ইলেক্ত্রোনিক্স মেনুফেকচরিংগী লমদা পান্দম লৈখিদে। ঙসিদি ভারতনা লৈবাক অসিদা শাবা লুপা করোর লাখ ১২ রোমগী ইলেক্ত্রোনিক্সকী পোৎলমশিং মপান লৈবাকশিংদা থাদোক্লে। হন্দক গুগলনা ভারত্তা পিকজেল ফোনশিং শানবা লাউথোকখ্রে। সামসুং ফোল্দ ফাইব অমসুং এপ্পল আইফোন ১৫ লৈবাক অসিদা শারে।

প্রধান মন্ত্রীনা হায়খি মোবাইল অমসুং ইলেক্ত্রোনিক্স মেনুফেকচরিংদা মাইপাকপা অসি মখা তানা লৈহন্নবা হোৎনবা তঙাইফদে। তেক ইকোসিস্তেমদা হার্দৱায়ার অমসুং সোফৱায়ার অনিমক মাইপাক্নবা লৈবাক অসিদা ঐখোয়না মপাঙ্গল কনবা সেমিকন্দক্তর মেনুফেকচরিং সেক্তর অমা শেমগৎপা য়াম্না মরুওই। সেমিকন্দক্তরশিং পুথোক্নবা লুপা করোর লিশিং ৮০গী পি.এল.আই স্কিম অমা পায়খৎলে। ঙসি ভারতকী কম্পেনিশিংগা খুৎশম্নদুনা মালেমগী সেমিকন্দক্তর কম্পেনিশিংনা সেমিকন্দক্তর এশেমব্লি অমসুং তেস্তিংগী লমদা শেন থাদরে। লৈবাক অসিগী দরকার ওইবশিং ফংহনবা খক নত্তনা মালেমগী দরকার ওইবশিং ফংহন্নবা পান্দমদা ভারতকী সেমিকন্দক্তরগী মিসন খুমাঙচাউশিল্লি।

চাউখৎলক্লিবা লৈবাক অমা চাউখৎলবা লৈবাক ওইহনবদা তেক্নোলোজিগী মরুওইবা পল্লদুনা, প্রধান মন্ত্রীনা হায়খি দিজিতেল তেক্নোলোজি চাউখৎপগী লমদা, ভারত চাউখৎলবা লৈবাকশিংগী মনিংদা লৈত্রে। তেক্নোলোজিগী মতেংনা তোঙান-তোঙানবা সেক্তরশিং শম্নহল্লে। পি.এম গাতিশক্তিগুম্বা প্লেতফোর্মশিংদা লোজিস্তিক্স, হকশেলগী লমদা নেসনেল হেল্থ মিসন অমসুং লৌউ-শিংউগী লমদা এগ্রি স্তেক শম্নহল্লে। সাইন্তিফিক রিছার্স, ক্বান্তম মিসন, নেসনেল রিছার্স ফাউন্দেসন, লৈবাক অসিগী মশানা পুথোকচবা দিজাইনশিং য়োকখৎনবা অমসুং তেক্নোলোজি চাউখৎনবা য়াম্লবা শেনফমশিং থাদরে।

সাইবর সেকুরিতি অমসুং নেতৱার্ক ইনফ্রাস্ত্রকচর ঙাক-শেনবগী মরুওইবগী মতাংদা প্রধান মন্ত্রীনা পুক্নিং চিংশিনখি অমসুং জি-২০ মীফমদা মালেমগী ওইনা সাইবরসেকুরিতিগী শিংনবশিংগী মতাংদা খন্নখিবা অদু অমুক নিংশিংখি। সাইবর সেকুরিতিগীদমক মেনুফেকচরিং ভেলু চেন অসি মশাগী ওক্নবা পুথোকচবা অসি য়াম্না মরুওই হায়না পল্লদুনা প্রধান মন্ত্রীনা হায়খি ভেলু চেনদা য়াওরিবা খুদিংমক লৈবাক অসিগী দোমেন, হার্দৱায়ার, সোফৱায়ার নত্ত্রগা কন্নেক্তিবি ওইরবদি মসি অশোই-অঙাম থোক্তনবা শেন্নবা য়াম্না লাইগনি। মালেমগী গনতন্ত্র চৎপা খুন্নাইশিং অশোই-অঙাম থোক্তনবা ইন্দিয়া মোবাইল কংগ্রেসতা খন্নবা দরকার ওই।

প্রধান মন্ত্রীনা হায়খি মমাঙদা অনৌবা তেক্নোলোজি শীজিন্নবগী মতাংদা খুদোংচাবা কয়া মাঙহনখ্রে। ভারতকী আই.তি সেক্তরদা, ভারতনা খ্বাইদগী নৌবা তেক্নোলোজিশিংদা লৈবাক অসিগী হৈথোই-শিংথোইবা উৎখ্রে। ২১শুবা চহিচা অসি ভারতকী ৱাখল্লোন্না লুচিংবগী যুগ অমনি। লুচিংবশিংনা অতোপ্পশিংনা মতুংইল্লক্নবা অনৌবা দোমেনশিং শেমগদবনি। ঙসিদি য়ু.পি.আই অসি দিজিতেল পেমেন্ত সিস্তমদা মালেমগী মাংজিল থারে। নহা ওইরিবা মীওই কয়া লৈবগী অমসুং মপাঙ্গল কনবা গনতন্ত্রগী শক্তি ভারত্তা লৈরে। মাইকৈ অসিদা ইন্দিয়া মোবাইল কংগ্রেসকী নহারোলশিং মাংলোমদা চঙশিনগদবনি। ঙসি ঐখোয়না চাউখৎলবা ভারত অমগী মঙলানা মঙফাউনবা ঙম্নবা, হিরম খুদিংমক্তা লুচিংবশিংনা অওনবা পুরকপা দরকার ওই।

থৌরম অদুদা শরুক য়াখিবশিংগী মনুংদা কম্মুনিকেসন্সকী য়ুনিয়ন মিনিস্তর শ্রী অশ্বিনি বৈষ্ণব, কম্মুনিকেসন্সকী রাজ্য মন্ত্রী শ্রী দেবুসিন চৌহান, রিলাইন্স ইনফোকোম লিমিতেৎকী চিয়ারমেন শ্রী অকাস  এম অম্বানি, ভারতি ইন্তরপ্রাইজেসকী চিয়ারমেন শ্রী সুনিল মিত্তল অমসুং অদিত্য বিরাল গ্রুপকী চিয়ারমেন শ্রী কুমার মঙ্গলম বিরলা য়াওখি।

নুঙগীৱারোল

‘১০০ 5G লেব ইনিসিএতিব’ অসি 5G তেক্নোলোজীগা মরী লৈনবা খুদোংচাবশিং ভারতকী অখন্নবা তঙাইফদবা অমসুং মালেমগী দিমান্দ ফংহন্নবগী পান্দমদা 5G এপ্লিকেসন শাগৎনবা পুক্নিং থৌগৎনবা পান্দম থম্লি। অখন্নবা থৌশিল অসিনা এজুকেসন, লৌউশিংউ, হকশেল, পাৱর, চত্থোক চৎশিন অসিনচিংবশিংগুম্বা সোসিওএকনোমিক সেক্তরশিংদা ইনোভেসন শেমগৎকনি অমসুং মসিনা লৈবাক অসিবু 5G গী মাংজিল থানা শীজিন্নবা লৈবাক অমা ওইহনগনি। থৌশিল অসি লৈবাক অসিদা মসিনা লৈবা অসিদা 6G রেদী ওইরবা একোসিস্তেম অমা শাগৎনবগী মরুওইবা খোঙথাং অমা ওইরি। হেন্না মরুওইনা, থৌশিল অসিনা নেসনেল সেক্যুরিতীদা য়াম্না মরুওইবা অমা ওইরিবা লমদম অসিগী তেলিকোম তেক্নোলোজী শেমগৎনবগী মায়কৈদা খোঙথাং অমা ওইরি।

ইন্দিয়া মোবাইল কংগ্রেস ( আইএম সি) অসি খ্বাইদগী চাউবা তেলিকোম, মীদিয়া অমসুং তেক্নোলোজী ফোরম অমা এসিয়াদা ওইরি অমসুং মসি ওক্তোবর ২৭ দগীনা ২৯, ২০২৩ ফাওবা পাঙথোক্কনি। থৌরম অসিনা তেলিকম্ম্যুনিকেসন অমসুং তেক্নোলোজীদা ভারতকী খুমাং চাউশিনবশিং পুথোক্কনি, স্তার্ত অপশিংবু মখোয়গী অনৌবা পোত্থোকশিং অমসুং পাম্বৈশিং পুথোক্কনি।

‘গ্লোবেল দিজিতেল ইন্নোভেসন’ হায়বা থিম অসিগা লোইননা, IMC ২০২৩না ভারতকী পোজিসনবু খ্বাইদগী নৌবা তেক্নোলোজীশিংগী দিপেলপর, মেন্যুফেকচরর অমসুং এক্সপোর্তর ওইনা মপাঙ্গল কলহন্নবা পান্দম থম্লি। নুমিৎ হুম্নি চত্থগদবা কংগ্রেস অসিনা 5G, 6G, আর্তিফিসিএল ইন্তেলিজেন্স (এ আই)গুম্বা অনৌবা তেক্নোলোজীশিং পুখৎকনি অমসুং সেমিকন্দক্তর ইন্দস্ত্রী, গ্রীন তেক্নোলোজী, সাইবরসেক্যুরিতী অসিনচিংবশিংগী সমশ্যাশিং নৈনগনি।

হন্দক্কী চহি অসিদা আই.এম.সি না ‘এস্পাইয়র’ হায়বা স্তার্ত অপ প্রোগ্রাম অমা হৌদোক্লি। মসিনা স্তার্তঅপ, ইনভেস্তর, অমসুং ইস্তাব্লিস তৌরবা বিজিনেসশিং শম্নহন্দুনা অনৌবা ওন্ত্রপ্রিন্যুরেল ইনিসিএতিব অমসুং কোলাবোরেসন শাগৎহনগনি। আই.এম.সি ২০২৩ অসিদা লৈবাক ২২দগী মীওই লাখ অমা হেনবগা লোইননা সি.ই.ও গী থাক্তা লৈবা দেলিগেত ৫০০০, একজিবিসন ২৩০, স্তার্তঅপ ৪০০, অমসুং অতৈ স্তেকহোল্দরশিংনা শরুক য়াগনি।

Addressing the India Mobile Congress. https://t.co/wY1CG1Hw5A

— Narendra Modi (@narendramodi) October 27, 2023

The future is here and now. pic.twitter.com/vEn9txsuNE

— PMO India (@PMOIndia) October 27, 2023

We initiated the effort to bring 5G connectivity to every Indian citizen. pic.twitter.com/Ew3NGbQPyP

— PMO India (@PMOIndia) October 27, 2023

We are not only rapidly expanding 5G in India, but are also making strides toward establishing ourselves as frontrunners in the realm of 6G. pic.twitter.com/PwIaj6jxpO

— PMO India (@PMOIndia) October 27, 2023

We believe in the ‘power of democratisation’ in every sector. pic.twitter.com/uRys4vlDqb

— PMO India (@PMOIndia) October 27, 2023

India’s semiconductor mission is progressing with the aim of fulfilling not just its domestic demands but also the global requirements. pic.twitter.com/dfNzlyarbX

— PMO India (@PMOIndia) October 27, 2023

Technology is the catalyst that expedites the transition from a developing nation to a developed one. pic.twitter.com/x3ZLShTqma

— PMO India (@PMOIndia) October 27, 2023

The 21st century marks an era of India’s thought leadership. pic.twitter.com/NMQ6iu31Ik

— PMO India (@PMOIndia) October 27, 2023

****