ভারতকী প্রধানমন্ত্রী

ঐহাক্কী নুংশিরবা লৈবাক মীয়াম্বু ঐহাক্না মন কী বাত্তা অমুক্কা হন্না তরাম্না ওকচরি। ঐখোয়না ঙসিগী ৱারী-ৱাতাই হৌদোকপগা লোয়ননা পুক্নিং অমসুং থম্মোইদা ৱাখল কয়া অমা লাক্লি। ঐখোয়না মশেলনা মন কী বাতকী খুত্থাংদা মরী অমা শেমগৎলিবা অসি ৯৯লক শুরবনি। মরিফুতরা মাপল (৯৯)গী মখা চত্থবা অসি য়াম্না অরুবা লাংফম অমা ওই হায়না অয়াম্বনা থাজনৈ। ক্রিকেতকী মশান্নদা “নর্ভস নাইন্তী” হায়বসি য়াম্না লুবা লাংফম অমনি হায়না খন্নৈ। অদুবু ভারত মীয়ামগী মন কী বাতপু লৈরবদি, মসিগা লোয়নরিবা ইথিল অসিদি তোঙানবা মতৌ অমনি। মন কী বাতকী ১০০শুবা তাঙ্কক্কা মরী লৈননা মীয়ামদা থৱাই য়াওবগী মতৌ অমা লৈনবা উবসি য়াম্না নুংঙাইবা ফাওই। ঐহাক্না মেসেজ কয়া অমা ফংলি, ফোনসু তৌরকই। ঐখোয়না ঙসি নিংতম্বগী অমৃত কালগী নুংঙাইবা ফোংদোক্লিবা, অনৌবা ৱারেপ কয়াগা লোয়ননা তুংলমচত্তা চঙশিল্লিবা অসিদা মন কী বাতকী ১০০শুবা তাঙ্কক্কা মরী লৈনবা পাউতাক অমসুং ৱাখল্লোন কয়া অদোমগী মফমদগী তানিংবগী ঐহাক্না লাংতক্নবা ফাওরি। ঐহাক্না অদোমগী পাউতাক কয়া ঙাইজরি। অদোমগী পাউতাক অমসুং ৱাফমশিংনা এপ্রিল ৩০দা পাংথোক্কদৌরিবা মন কী বাতকী ১০০শুবা তাঙ্কক অসি য়াম্না অখন্নবা অমা ওইহনগদৌরিবনি।

ঐহাক্কী নুংশিরবা লৈবাক মীয়াম, অতোপ্পগী সেবাগীদমক্তা মশাগী পুন্সি কত্থোকপা মীওই কয়াগী মতাংদা ঐখোয়না মন কী বাত্তা নৈনরি। মচানুপীগী মহৈ-মশিংগীদমক্তা মশাগী পেন্সন খুদিংমক চাদিং তৌবা মীওই কয়া লৈ, খরা অমনা মশাগী পুন্সিদা তাঞ্জবা শেনফম খুদিংমক অকোয়বগী ফিভম অমসুং থৱাই পানবা জিবশিংগীদমক্তা কত্থোক্লি। ঐখোয়গী লৈবাক অসিদা, মশাগী খন্দনা অতোপ্পগীদমক্তা পীথোকপা, পরমার্থকী মতৌ অসি অদুক্কী ৱাংই, অতোপ্পগী নুংঙাইবগীদমক্তা মশাগী লৈজবী খুদিংমক পীথোকপদা ৱাখল অনিরক শুনা খন্দে। মসিনা মরম ওইরগা, মশাগী পুন্সিবু অতোপ্পগীদমক্তা কত্থোকখিবা শিবী অমসুং দাধিচীগী ৱারী কয়া ঐখোয়না অঙাং ওইরিঙৈদগী হৌনা লিবীদুনা লাক্লিবনি।

মরুপশিং, হৌজিক্কী মোদর্ন মেদিকেল সাইন্সকী মতমসিদা, হকচাং কয়াৎ দান তৌবা হায়বসি অতোপ্পা মীওই অমদা পুন্সি পীবগী য়াম্না মরু ওইবা পাম্বৈ অমা ওইরে। মীওই অমনা লৈখিদ্রবা মতুংদা মশাগী হকচাং অতোপ্পদা দান তৌবা মতমদা, মীওই নিপান্দগী মাপন ফাওবদা অনৌবা পুন্সি অমা পীবগী ওইথোকপা লৈহল্লি। হকচাং কয়াৎ দান তৌবগী মতাংদা লৈবাক অসিদা খঙনরক্লিবা অসি য়াম্না নুংঙাইবা ৱাফম অমনি। ইং ২০১৩দা লৈবাক অসিদা হকচাং কয়াৎ দান তৌবগী থৌওং লিশিং মঙাদগী হন্থনা লৈরম্মি; অদুবু, ইং ২০২২দা মসিগী মশিং অসি লিশিং তরামঙা হেন্না হনগৎখি। হকচাং কয়াৎ দান তৌবা মীওই, মখোয়গী ইমুংশিংনা পুনয়া কয়া অমা তানশিল্লবনি!

মরুপশিং, মসিগুম্বা থবক পাংথোকপা মীওইশিংগী মন কী বাত তাজবা অমসুং লৈবাক মীয়ামদসু তাহনবগী অপাম্বা অমা ঐহাক্না মতম কয়াদগী লৈরক্লি। অদুনা, ঙসিগী মন কী বাত অসিদা য়াম্না নুংশিরবী ইচানুপী, নুংশিরবী এঞ্জেল অসিগী মপাবুং অমসুং মহাক্কী ইমানা ঙসি ঐখোয়গা পুনগদৌরি। মপাবুংগী মমিংনা সুখবির সিংহ সন্ধুজী অমসুং মমাগী মইংনা সুরপ্রীত কাউর কৌই, মখোয় অসি পঞ্জাবকী অমৃতসরদা লৈবনি। মখোয়না থৌনিজবা কয়াগী মতুংদা, লাইফদিবীগুম্না নিংথীবী নুংশিরবা মচানুপী অমা ফংজখি। ইমুংগী মীওইশিংনা মহাকপু য়াম্না নুংশিনা অবাবত কাউর হায়না কৌই। অবাবত হায়বদি অতোপ্পদা তেংবাংবা হায়বনি, অতোপ্পগী অৱাববু নুংঙাইবদা ওন্থোকপীবা হায়বনি। মহাক্না শুপ্নগী নুমিৎ কুন্থ্রা মাপন শুবা মতমদা মহাক্না মালেম অসি থাদোক্তুনা চৎখি। অদুবু, সুখবিরজী, মহাক্কী লোয়নবী সুরপ্রীত কাউর অমসুং মখোয়গী ইমুং মনুংনা ইথিল পীনিংঙাই ওইরবা ৱারেপ অমা লৌখি। ৱারেপ অদুদি, শুপ্নগী নুমিৎ কুন্থ্রা মাপনখক্তা ঙাইরিবী মচানুপীগী হকচাং কয়াৎ দান তৌথোকপা হায়বসিনি। সুখবির সিংহ অমসুং মহাক্কী লোয়নবীনা ঙসি ঐখোয়গা লোয়ননা ফোনগী লাইন্দা হৌজিক লৈরি। মখোয়গা ৱারী অমুক্তা শাসি।

প্রধান মন্ত্রী – সুখবিরজী, নমস্তে।

সুখবিরজী – ইকায় খুম্ননিংঙাই ওইরবা প্রধান মন্ত্রীবু নমস্তে। সত শ্রী অকাল।

প্রধান মন্ত্রী – সত শ্রী অকালজী, সত শ্রী অকালজী, সুখবিরজী, ঐহাক্না ঙসিগী ‘মন কী বাত’ কী মতাংদা ৱাখল খনবা মতমদা অবাবতকা মরী লৈনরিবা হীরম অসি তসেংনা ইথিল য়াম্না পীনিংঙাই ওইবনা ৱাফম অসিমক অদোমগী ইফমদগী তাবনা হেন্না ফগনি খনখি। মসিগী মরমদি, ইমুং অমদা নুপীমচা অমা পোকপা মতমদা মসিনা নুংঙাইবা অমসুং মঙলান কয়া অমা পুরকই, অদুগা ইচানুপী অদুনা নৌনা লৈরোইদবা ওইরবদি মসিনা কয়া য়াম্না অৱাবা পোকহনগনি হায়বসু ঐনা খঙবা ঙম্মি। অদুগা অদোম্না মখা তারকপা লৌরিবা ৱারেপ অদুগী মতাংদা ঐহাক্না মপুং ফানা তাবা পাম্মি।

সুখবিরজী – সর, ইশ্বরনা ঐখোয়গী ইফমদা য়াম্না নুংশিবা অঙাং অমা পীবিখি, লাইফদিবীগুম্না নুংশিবী নুপীমচা অমা ঐখোয়গী ইমুংদা খোংদারকখি। মহাক হেক পোক্লকপগা, মহাক্কী থোপ্তা নর্ব চবুন অমা য়াওরে অমসুং মদুনা মরম ওইরগা মহাক্কী থম্মোইনা চাউবা অশুম-অশুম হেনগৎলক্লে হায়বা ঐখোয়না খঙখি। মশা-মউ অদুক য়াম্না ফবা অঙাং অসিদা অসুক য়াম্না লুবা ফিভম অমগা লোয়ননা পোক্লকপা অদুদা ঐখোয় য়াম্না ঙকপা ফাওখি। মহাক্কী অহানবা পুং ২৪দি মহাক য়াম্না নোর্মেল ওইনা লৈখি। অদুদগী মহাক্কী থম্মোইনা মথৌ তৌবা খঙলেপ লেপখি, মদুদগী ঐখোয়না মহাকপু হোস্পিতালদা খুদক্তা পুখি, দাক্তরনা মহাকপু হিংগৎহনখি, অদুবু মহাক্কী মফমদা করি অশোইবা লৈবগে খঙবদা মতম চঙখি। পীক্লিবা অঙাং অমদা খঙহৌদনা হার্ত অতেক তৌবসিদি য়াম্না চাউবা ৱাফম অমনি। অদুনা ঐখোয়না মহাকপু লাইয়েংনবগীদমক্তা চন্দিগরগী পি.জি.আই.দা পুখি। মহাক্না মফমদুদা লাইয়েংবদা য়াম্না থৌনা ফনা মাইয়োক্নখি। অদুবু, মহাক্কী অদুদি অদুক য়াম্না নৌরবা চহিদুদা লাইয়েংবদা য়াম্না খুদোংচাদবা লাইনা মখল অমা ওইখি। দাক্তরনা মহাকপু কন্নবা য়াম্না হোৎনখি, মহাক্না করিগুম্বা থা ৬ কুম্বা শুবা ওইরবদি, ওপরেসন তৌবা য়াগদরা হায়বা য়েংলম্বা য়াবনি। অদুবু ইশ্বরনা তোঙানবা অমা খল্লম্লে, মহাক্না নুমিৎ ৩৯ শুবা নুমিত্তা হার্ত এতেক অমা অমুক তৌরে হায়না দাক্তরনা হায়, থাজবগী মঙাল লৈশিল্লকত্রে। অশুক য়াম্না নৌরিবী মহাক্না লাইয়েংবগী অৱাবা কয়াবু হঞ্জিন হঞ্জিন্না থৌনা য়াম্না ফনা মাইয়োক্নবা, মহাক্কী অরোইবা মিৎকুপ লাক্লে খনবগা অমুক হিংৎলকপগী মতৌ ঐখোয়না উখিবা অদুদদি মহাক্না ঐখোয়গী নাক্তা লাক্লিবসি মরম অমদি শোইদনা লৈগনি হায়না ঐহাক অমসুং ঐহাক্কী লোয়নবীনা কপ্না কপ্না খন্নখি। দাক্তরশিংনা মখা তাবা করিমত্তা তৌবা ঙম্লরোই হায়রকপা মতমদা মহাক্কী হকচাং কয়াৎ দান করি তৌবগী তৌরোইদোইনো হায়না ঐখোয় অনিনা ৱারেপ লৌখি। মহাক্কী মরমদগী কনাগুম্বা অমগী পুন্সিদা মঙাল পীবা ঙম্বসু য়াই। অদুদগী ঐখোয়না পি.জি.আই.গী এদমিন ব্লোক্কা পাউ ফাওনখি অমসুং মহাক্কুম্বী নৌরিবী অঙাংগী কিদনিখক লৌবা য়াগনি হায়না পাউতাক পীবিরকখি। মপু ইবুংঙোনা ঐখোয়দা থৌনা পীবিখি। গুরু নানক সাহেবকী ৱাখল্লোন্না ঐখোয়বু লমজিংবীখি।

প্রধান মন্ত্রী – অদোম্না গুরু নানক্কী পাউতাকশিংবু পুন্সিদা তসেংনা ইল্লি। সুরপ্রীতজী অদোম লৈবিরিকো? ঐখোয়না মহাক্কা ৱারী শাবা য়াগদরা?

সুখবিরজী – হোই, য়াগনি।

সুরপ্রীতজী – নমস্কার সর, অদোমগা ৱারী শাবা ফংবসি ঐখোয়গীদি য়াম্না চাউথোকচনিংঙাইনি সর।

প্রধান মন্ত্রী – অদোম্না য়াইফরবা থবক অমা পাংথোক্লি, অদুনা লৈবাক পুম্বনা অদোমগী থবক অসিগী মতাংদা খঙলকপা মতমদা, মখোয়সু কনাগুম্বা অতোপ্পা অমগী পুন্সি কনগে হায়দুনা শোইদনা থোক্লক্কনি। অবাবতনা পাংবীরম্বা তেংবাং অসিদি য়াম্না চাউবনি।

সুরপ্রীতজী – সর, ঐখোয়না মসিগুম্বা চাউরবা ৱারেপ লৌবা ঙম্বগী থৌনা লৈরিবা অসিসু গুরু নানক বাদশাহজী বক্সিস অমা শোইদনা ওইগনি।

প্রধান মন্ত্রী – গুরুগী থৌজাল য়াওদনা করিমত্তা ওইথোক্কদবা নত্তে।

সুরপ্রীতজী – য়াম্না চুম্মি, সর।

প্রধান মন্ত্রী – সুখবিরজী, অদোম্না হোস্পিতালদা লৈরিঙৈদা দাক্তরনা নুংঙাইতবা পাউ অসি তম্লবা মতুংদা ফাওবা অদোম অমসুং অদোমগী লোয়নবীনা অসুক য়াম্না চাউরবা ৱারেপ অমা মোং হাদনা লৌবা ঙমখি। ৱাখলবু তংদুয়া লৈতানা লৈহল্লিবা অসিদি গুরুজীগী পাউতাকশিংননি অমসুং অবাবতকী ৱাহন্থোক অসিনসু তসেংনা তেংবাংখিবনি। মসিগী থবক অসি হেক পাংথোকপগা ঐহাক্না পাউ লোইনা তাজনিংই।

সুখবিরজী – সর, প্রিয়া কৌবা ঐখোয়গী ইমুং-মনুংগী মরুপ অমসু মহাক্কী হকচাং কয়াৎ দান তৌখ্রে অমসুং ঐখোয়না মঙোন্দগী ইথিল ফংখিবনি। অদুগা হকচাং অসি ইলিমেন্ত মঙাদা পুনখিগদবনি হায়না ঐখোয়না ফাওখি। কনাগুম্বা মীওই অমা ঐখোয়দগী মতম পুম্বগী চৎখিবা মতমদা মহাক্কী হকচাংবু ঐখোয়না মৈ থাই নত্ত্রগা ফুম্মি, অদুবু মহাক্কী হকচাং কয়াৎ অদু কনাগুম্বা অমদা কান্নগদবা ওইরবদি, মদুদি য়াম্না য়াইফবা থবক অমনি অমসুং ঐখোয়গী ইচানুপীনা ভারতকী খ্বাইদগী নহা ওইবী দোনর অমা ওইরে অমসুং মহাক্কী কয়াৎ অদু অতোপ্পা অমদা মায় পাক্না হাপখ্রে হায়না তম্লকপদা ঐখোয়না য়াম্না চাউথোকচখি। ঐখোয়না হৌজিক্কী চহি অসি য়ৌরবা ফাওবদা ইমা-ইপাগী মিংচৎ পুরকপা ঙমদ্রি, অদুগা অপীকপা অঙাং অমা লাক্লগা ঐখোয়বু মিংচৎপু নুমিৎ কয়া-কয়াগীদমক্তা ৱাংনা পুখৎপীরম্বা অসিদা ঐখোয়না য়াম্না চাউথোকচৈ। মসিনসু মরম ওইরগা, ঐখোয়না ঙসি সরগা হীরম অসিগী মতাংদা ৱারী শারি। ঐখোয় তসেংনা চাউথোকচরে।

প্রধান মন্ত্রী – সুখবিরজী, অদোমগী ইচানুপীগী কয়াৎ অমখক ঙসি হিংলি হায়বা নত্ত্রে। অদোমগী ইচানুপীদি মীওইবা খুন্নাইনা লৈরিবমখৈ হিংহৌরগনি। মহাক্কী হকচাং কয়াৎ অমগী খুত্থাংদা মহাক ঙসিসু হিংলি। মসিগুম্বা য়াইফরবা থবক অসিগীদমক্তা ঐহাক্না অদোম, অদোমগী লোয়নবী অমসুং ইমুংবু থাগৎচরি।

সুখবিরজী – সরবু থাগৎচরি।

মরুপশিং, হকচাংগী কয়াৎ দান তৌবগী খ্বাইদগী নুংঙাইবা ৱাখল্লোন অসিদি মীওই অমনা লৈখিদ্রবা মতুংদসু কনাগুম্বা অমগী পুন্সি কনবা ঙম্বা হায়বসিনি। ওর্গান দোনেসনগীদমক্তা ঙাইদুনা লৈবা মীওইশিংনা মিৎকুপ অমমম ঙাইদুনা লৈবসি কয়া য়াম্না ৱাবগে হায়বা খঙই। মসিগুম্বা তাঞ্জা অসিদা ওর্গান দোনর নত্ত্রগা কেদাভার দোনর অমা ফংবা মতমদা অদুক্কী য়াম্না নুংঙাইবা ফাওই, মহাক্কী মফমদা ইশ্বরমক উবা ফংলে হায়না খল্লিবনি। মপু ইবুংঙোনা পুন্সি পীবগুম্না ঝার্খন্দগী স্নেহলাতা চৌধুরীসু পুন্সি দান তৌখ্রে। চহি ৬৩ শুরবী স্নেহলাতা চৌধুরীনা মহাক্কী থম্মোই, কিদনি অমসুং ফিরাক দান তৌরমখি। ঙসিগী ‘মন কী বাত’ অসিদা মহাক্কী মচানুপা অভিজীত চৌধুরিসু ঐখোয়গী নাক্তা লৈরি। মহাক্কা ৱারী অমুক শারসি।

প্রধান মন্ত্রী – অভিজীতজী, নমস্কার।

অভিজীতজী – প্রনাম, সর।

প্রধান মন্ত্রী – অদোমদি অদোম্বু পোকপীদুনা অদোমগী মফমদা পুন্সি পীরম্বা মমা অমগী মচানি, অদুগা মহাক্না লৈখিদ্রবা মতুংদসু অদোমগী ইমানা অতোপ্পা কয়াদা পুন্সি পীবিরি। অদোম্না মহাক্কী মচা অমা ওইনা য়াম্না চাউথোকচরমগনি।

অভিজীতজী – হোই, ফাওজৈ, সর।

প্রধান মন্ত্রী – ঐখোয়গী ইফমদা অদোমগী ইমাগী মতাংদা খরা তম্বীয়ু, করম্বা তাঞ্জাদা ওর্গান দোনেসন তৌবগী ৱারেপ লৌখিবনো?

অভিজীতজী – ঐহাক্কী ইমা-ইপানা সেরাইকেলা কৌবা ঝার্খন্দগী অপীকপা খুঙ্গং অমদা লৈরম্মি। মখোয়না মমাংগী চহি কুন মঙাদগী অয়ুক খুদিংগী লেপ্তনা ৱাকিং চৎলি। মখোয়গী নুংতিগী পাংথোকপা থৌওংগী মতুং ইন্না, মখোয়না অয়ুক অঙনবা পুং ৪দা থোকই। মোতোর সাইকল থৌবা মীওই অমনা নোংমদি মঙোন্দা থোম্বদগী মহাক খুদক্তা তুখি অমসুং মকোক্তা য়াম্না থীনা শোকখি। ঐখোয়না মহাকপু সেরাইকেলাগী সদর হোস্পিতালদা খুদক্তা পুখৎখি, দাক্তরনা মহাক্কী বেন্দেজ য়েৎপীখি, অদুবু মহাক্কী ঈ থোকপদি লেপখিদে। অদুদগী মহাক গ্যান মাঙখি। ঐখোয়না মহাকপু তাতাগী অচৌবা হোস্পিতালদা অমুক পুখৎখি। মফমদুদা সর্জরী তৌখি, অদুগা পুং ৪৮ ঙাইরবা মতুংদা, মফমদুদা মহাকপু কনবা ঙম্বগী ওইথোকপা খরা ৱাৎকনি হায়রকখি। অদুদগী ঐখোয়না মহাকপু এয়রলিফ তৌদুনা দিল্লীগী এমসতা পুরকখি। মফমদুদা নুমিৎ ৭-৮নিমুক লাইয়েংখি। অদুদগী খরা ফনা উখি, অদুবু মহাক্কী ব্লদ প্রেসর য়াম্না হন্থরকখি। মদুদগী ঐখোয়না মহাক অসি ব্রেন দেথ ওইরে হায়বা খঙবা ঙমখি। মদুদগী ওর্গান দোনেসনগী কাঙলোনশিং দাক্তরশিংনা ঐখোয়দা তাকপীখি। মসিগী মতাংদা ঐখোয়না পাবুংগী মফমদা তম্লমদে, মরমদি ওর্গান দোনেসন কৌবা থৌওং লৈ হায়বসি মহাক্না খঙবা অমসুং লৌশিনবা ঙম্লোই হায়না ঐখোয়না খনবগীনি। মসিগুম্বা থবক খরা খন্নরি হায়বসি ঐখোয়না মঙোন্দা খঙহন্নিংদ্রে। অদুবু, ঐখোয়না ওর্গান দোনেসন তৌবগী মতাংদা মহাক্কী মফমদা হেক তম্বগা মসিদি ঐখোয়গী ইমানা পাম্লম্বনি হায়না মহাক্না হায়রকখি। ঐখোয়গী ইমা অসি হিংলরোই খনবদা ঐখোয় য়াম্না নুংঙাইরমদ্রবনি, অদুবু ওর্গান দোনেসনগী ৱারী শাবা হেক হৌবদগীদি ঐখোয়গী নুংঙাইতবা অদুবু পোজিতিব ওইবা হীরমদা ওনখি অদুদগী ঐখোয়না পোজিতিব ওইবা এতমোস্ফিয়র অমদা চঙশিনখি। মদুগী মতমদুদা, ঐখোয়না নুমিদাংগী পুং ৮দা কাউন্সেল্লিং তৌই। নিনিশুবা নুমিত্তা ঐখোয়না ওর্গান দোনেসন তৌখি। ঐখোয়গী ইমাদি মসিগুম্বা হীরমদা থৱাই য়াম্না য়াওজবনি, মিৎ দোনেসন তৌবগুম্বা সোসিএল এক্তিবিতীদা মহাক্তি মমাংদসু থৱাই য়াম্না য়াওজৈ। মদু ময়ামদু খনবদগী ঐখোয়না অসুক য়াম্না চাউবা থবক পমা পাংথোকপা ঙমখিবনি, অদুগা ঐখোয়গী পাবুংনা হীরম অসিগী মতাংদা লৌবা ৱারেপ অদুনা মসিগী থবক অসি হেন্না লাইহনখিবনি।

প্রধান মন্ত্রী – ওর্গানশিং অদুদগী মীওই কয়ানা কান্নবা ফংখিবগে?

অভিজীতজী – মহাক্কী থম্মোই, কিদনী অনি, ফিরাক অমসুং মহাক্কী মিৎ অনিমক দোনেত তৌখ্রে। অদুনা মীওই মরিনা মশাগী পুন্সি অমুক হন্না ফংখ্রে অদুগা মীওই অনিনা মমিৎ ফংখ্রে।

প্রধান মন্ত্রী – অভিজীতজী, অদোমগী ইমা অমসুং পাবুংবু ঐখোয়না কোক নোনফম থোকই। ঐহাক্না মখোয়বু ইকায় খুম্নজরি, অদোমগী পাবুংনা মসিগুম্বা চাউরবা ৱারেপ লৌবদা ইমুংবু লুচিংখি। মসিদি ইথিল য়াম্না পীবা মতৌনি। মমদি মমানি হায়বসিদা ঐহাক্না থাজবা থম্মি। মমা হায়বসিদি ইথিলগী হৌরকফমসু মশানা ওইজরবনি। মমানা থম্লম্বা চৎনবী অসিদি চারোন খুদিংগী মপাঙ্গল লৈবা হেনগৎলিবনি। অদোমগী ইমাগী খুত্থাংদগী ওর্গান দোনেসনগী ইথিল অসি মালেম পুম্বদা য়ৌরে। মসিগুম্বা শেংলবা অমসুং য়াইফরবা থবক অসিগীদমক্তা ঐহাক্না অদোমগী ইমুং মনুং পুম্ববু ইকায় খুম্নজরি। অভিজীতপু থাগৎচরি অমসুং পাবুংদা ঐখোয়না ইকায় খুম্নবা উৎলকই তম্বীয়ু।

অভিজীতজী – শোইদনা তমজগে, সরবু থাগৎচরি।

মরুপশিং, শুপ্নগী নুমিৎ ৩৯ শুবী অবাবত কাউর ওইরো নত্ত্রগা চহি ৬৩ শুরবী স্নেহলাতা চৌধুরী ওইরো, মখোয়গুম্বা অথোইবা দোনরশিংনা ঐখোয়দা পুন্সিগী মরু ওইবা খঙহল্লি। হকশেল ফবা পুন্সি অমা পাম্বগীদমক্তা ওর্গান দোনর অমগীদমক্তা ঙাইদুনা লৈবা মীওই কয়া অমা ঐখোয়গী লৈবাক অসিদা ঙসি লৈরি। ওর্গান দোনেসন তৌবা লাইহন্নবা অমসুং মসিবু পুক্নিং থৌগৎনবগীদমক্তা চপ মান্নবা পোলিসী অমদা লৈবাক শিনবা থুংবদা থবক পায়খৎলিবা অসিদা ঐহাক্না য়াম্না অপেনবা ফাওরি। থৌওং অসিগী মাইকৈদা, রাজ্যগী দোমিসাইল ওইগদবনি হায়বা কন্দিসন ঐখোয়না লৌথোক্নবা ৱারেপ লৌরে অমসুং অনাবা অমনা লৈবাক্কী রাজ্য অমা হেক্তদা চত্তুনা ওর্গান রিসিব তৌবগী এপ্লিকেসন থাবা য়ারগনি। ওর্গান দোনেসন তৌবগীদমক্তা চহি ৬৫গী মখাদা লৈগদবনি হায়বা অকক্নবা অদুসু লৌথোক্নবা সরকারনা ৱারেপ লৌরে। মসিগুম্বা হোৎনরিবা কয়া অসিগী মরক্তা, ওর্গান দোনরশিংনা মশিং য়াম্না থোকপীরক্নবা ঐহাক্না লৈবাক মীয়ামদা হায়জরি। অদোমগী ৱারেপ অমনা অতোপ্পা মীওই অমগী পুন্সি কনবা ঙমগদৌরিবনি।

ঐহাক্কী নুংশিরবা লৈবাক মীয়াম, হৌজিক অসিদি নবরাত্রীগী মতম্নি। শক্তি নিংবগী মতম্নি। অনৌবা মাইকৈ অমদগী ঙসি থোক্লক্লিবা ভারতকী তৌবা ঙম্বগী মতি অসিদা নুপীগী পাঙ্গলগী অচৌবা থৌদাং য়াওরি। মসিগুম্বা খুদম কয়া অমা হন্দক্তা ইকুই কুইদনা থোকপা হৌরক্লে। এসিয়াগী খ্বাইদগী অহানবা নুপী লোকো পাইলোত, সুরেখা য়াদবকী মতাংদা অদোম্না সোসিএল মীদিয়াদা থেংনরম্লগনি। সুরেখাজীনা, অতোপ্পা রেকোর্দ অমসু থমদুনা, বন্দে ভারত এক্সপ্রেসকী অহানবা নুপী লোকো পাইলোত ওইরবনি। হন্দক্কী থা অসিদা, প্রদ্যুসর গুনীত মোঙ্গা অমসুং দাইরেক্তর কার্তিকি গোঞ্জালবেজনা মখোয়গী দোক্যুমেন্তরী ‘দি ইলিফেন্ত হ্বিস্পরর’না ওস্কার ফংদুনা লৈবাক্কী মিংচৎ পুরকখি। ভাভা এতোমিক রিসর্চ সেন্তরগী ইচল, জ্যোতিরমায়ী মোহন্তীনা লৈবাক্কী ওইনা মায় পাকপা অমসু ফংখ্রে। জ্যোতিরমায়ীনা কেমিস্ত্রী অমসুং কেমিকেল ইঞ্জিনিয়রিংগী লমদা আই.য়ু.পি.এ.সি.দগী অখন্নবা মনা অমা ফংলে। হন্দক্কী চহিগী অঙনবদসু, ভারতকী অন্দর-১৯গী নুপীগী ক্রিকেত তীম্না তি.২০ ৱর্ল্দ কপ লৌদুনা পুৱারী শেমখ্রবনি। অদোম্না রাজনিতীগী লমদা য়েংলুরবদি, নাগালেন্দদা অনৌবা মতম অমা হৌরবনি। নাগালেন্দদা চহি ৭৫গী মনুংদা খ্বাইদগী অহানবা ওইনা, নুপী লেজিস্লেচর অনিনা মীখলদা মায় পাক্তুনা বিধান সভাদা য়ৌরে। মখোয়গী মনুংদগী অমদি, নাগালেন্দ রাজ্যগী মন্ত্রী ওইনসু হাপখ্রে। রাজ্য অসিগী মীয়াম্না নুপী মন্ত্রী অমা ফংবসি হন্দক্কী অসিনা অহানবনি।

মরুপশিং, নুমিৎ খরনিগী মমাংদা, তর্কীদা য়ুহা হাওবদগী অমাং-অতা চাউনা থোকখিবা থৌদোক্তা তর্কীগী মীয়াম্বু তেংবাংনবগীদমক্তা চৎখিবী থৌনা লৈরবী ইচানুপীশিংবুসু ঐহাক্না উন্নরে। মখোয়শিং অসি এন.দি.আর.এফ. কন্তিঞ্জেন্তকী শরুক্নি।

মখোয়গী থৌনা অমসুং স্কিলবু মালেম পুম্বনা থাগৎনরি। ভারতনা য়ু.এন. মিসনগী মখাদা লৈবা পিস্কীপিং ফোর্সতা নুপীখক্তগী ওইবা প্লেতুন অমসু থাখ্রে।

ঙসিদি, লৈবাক্কী ইচানুপীশিংনা আর্ম্দ ফোর্স অহুম্মক্তা মখোয়গী থৌনা ফবগী ফিরাল ৱাংনা পাইহল্লি। গ্রুপ কেপ্তেন শালিজা ধামীনা কোম্বেত য়ুনিত্তা কম্মান্দ এপ্পোইন্তমেন্ত ফংবী অহানবা নুপী এয়রফোর্স ওফিসর ওইরে। মহাক্না চাউরাকপা পুং ৩০০০গী ফ্লাইং এক্সপেরিএন্স লৈ। মান্নবা থৌওং ওইনা, ইন্দিয়ন আর্মীগী কেপ্তেন শিবা চাউহান্না সিয়াচেন্দা থবক তাবী খ্বাইদগী অহানবা নুপী ওফিসর ওইরে। তেম্পেরেচরনা মাইনস সিক্সতী (-৬০) দিগ্রী ওইবা মফমদা মহাক্না থা অহুম লৈগনি।

মরুপশিং, লিস্ত অসি য়াম্না শাংমনবনা মখোয় পুম্নমক্কী মতাংদা ৱারী শাবসি য়াম্না লুরগনি। মখোয়গুম্বী ঐখোয়গী ইচানুপীশিংনা ভারত অমসুং ভারতকী মঙলানশিংদা অনৌবা পাঙ্গল হাপ্লি। নুপীগী পাঙ্গলগী মসিগুম্বা ইনর্জী অসিনা চাউখৎপা ভারতকী ওক্সীজেন ওইরি।

ঐহাক্কী নুংশিরবা লৈবাক মীয়াম, মালেম পুম্বনা ক্লিন ইনর্জী, রিন্যুএবল ইনর্জীগী মতাংদা হৌজিক্কান ৱারী য়াম্না শানরি। ঐহাক্না মালেম শিনবা থুংবগী মীওই কয়া উন্নৈ, ঐখোয়না হীরম অসিদা মশক থোকপা মায় পাকপা ফংলিবা অসিগী মতাংদা মখোয়না ৱারী য়াম্না শাই। অখন্নবা অমা ওইনা, ভারতনা সোলর ইনর্জীগী লমদা চঙশিল্লিবা খোঙজেল অসিমক অসিসু মায় পাকপগী তোপ-তোপ্পা মতৌ অমনি। ভারত মীয়াম্না চহি চা কয়াদগী নুমিৎকা অখন্নবা মরী অমা লৈনদুনা লাক্লি। ঐখোয়না নুমিৎকী মতাংদা খঙবা সাইন্তিফিক ওইবা লৌশিং, নুমিৎ লাৎপগী চৎনবী অসি অতোপ্পা মফমশিংদা থোইদোক্না উবা ফংলোই। লৈবাক্কী মীওই খুদিংনা সোলর ইনর্জীগী মরু ওইবা মমুৎ তানা খঙবা অমসুং ক্লিন ইনর্জীগী লমদা মশাগী শরুক তম্নিংবগী ইথিল লৈবসিদা ঐহাক্না য়াম্না নুংঙাইবা ফাওই। ‘সবকা প্রয়াস’কী ইথিল অসিনা ভারতকী সোলর মিসনবু তুংলমচত্তা পুরিবনি। মহারাস্ত্রগী পুনেগী মসিগুম্বা থৌওং অমনা ঐহাক্কী পুক্নিং চিংশিনখি। এম.এস.আর.-ওলিব হাউজিং সোসাইতীগী মীওইশিংনা সোসাইতীগী থক্নবা ঈশিং, লিফ অমসুং মৈ-থানবগুম্বা কম্মন য়ুতিলিতীশিং অসি সোলর ইনর্জীখক শিজিন্নদুনা চলায়রগনি হায়না ৱারেপ লৌরে। মদুগী মতুংদগী, সোসাইতী অসিগী মীওইশিংনা পুন্দুনা সোলর পেনেল ইন্সতোল তৌনখ্রে। ঙসিদি, হায়রিবা সোলর পেনেলশিং অসিদগী চহি খুদিংগী ওইনা কিলোৱাত হাউর লিশিং ৯০গী মৈ পুথোক্লি। মসিনা থা খুদিংগী লুপা ৪০,০০০ মুক তুংশিনবা ঙম্লে। সোসাইতীগী মীওই খুদিংনা মসিগুম্বা সেভিং অসিদগী কান্নবা য়াম্না ফংনরি।

মরুপশিং, পুনেদা পাংথোকপগুম্না, তোঙানবা জিলা অমা ওইরিবা দামন অমসুং দিয়ুগী মীওইশিংসু য়াম্না অফবা থবক অমা পাংথোক্লি। দিয়ু অসি সোম্নাথকী মনাক্তা লৈ হায়বা অদোম্না খঙলবনি। নুংথিলগী মতমদা তঙাই ফদবা খুদিংগীদমক্তা ক্লিন ইনর্জী ১০০% শিজিন্নবা অহানবা জিলা অসি দিয়ুনা ওইরবনি। দিয়ুগী মসিগুম্বা মায় পাকপা অসিগী মন্ত্রসু সবকা প্রয়াসনি। মৈ পুথোকপগী রিসোর্সশিং অসি মতম অমদা শিংনবা অমনি হায়না খল্লম্মি। অদুবু মীয়াম্না সোলর ইনর্জীবু মসিগী ৱারোইশিন ওইনা খল্লে। মফম অসিদা, সোলর পেনেলশিং অসি অহাঙবা লম অমসুং য়ুম্থক কয়াদা খিল্লি। দিয়ুনা নুংথিলগী মতমদা তঙাই ফদবা মৈগী চাংদগী য়াম্না হেনবা মৈগী চাং অসি সোলর পেনেলশিং অসিগী মতেংদগী পুথোক্লি। মসিগী সোলর প্রোজেক্ত অসিগী খুত্থাংদগী, মৈ লৈবদা চঙগদবা লুপা করোর ৫২মুক্কী শেনফম তুংশিনবা ঙম্লে। অকোয়বগী ফিভমসু মসিনা য়াম্না ঙাক শেনবা ঙম্লে।

পুনে অমসুং দিয়ুদা পাংথোক্লিবা থৌওং অসিগুম্বা থবক কয়াসু লৈবাক্কী তোঙান-তোঙানবা মফমশিংদা পাংথোক্লি, মরুপশিং। ভারত মচাশিংনা অকোয়বগী ফিভম অমসুং মহৌশাগী মতাংদা কয়া য়াম্না লুনা লৌই অমসুং ঐখোয়গী লৈবাক অসিনা তুংগী চারোন-শুরোনশিংগীদমক্তা মিৎকুপ নাহুম শিংনা লৈরি হায়বা থৌওংশিং অসিনা উৎলি। মসিগুম্বা হোৎনজমন খুদিংবু ঐহাক্না থম্মোইনুংদগী থাগৎপা ফোংদোক্লি।

ঐহাক্কী নুংশিরবা লৈবাক মীয়াম, ঐখোয়গী লৈবাক অসিদা, মতম অমসুং ফিভমগী মতুং ইন্না, চৎনবী কয়া থোক্লকই। মসিগুম্বা চৎনবীশিংনা ঐখোয়গী নাৎকী মপাঙ্গল হেনগৎহল্লি অমসুং অনৌবা পাঙ্গল অমা নুমিৎ খুদিংগী হাপ্লি। মসিগুম্বা চৎনবী অমসু থা অমগী মমাংদা কাশীদা হৌদোকখি। কাশী-তমিল সঙ্গমমগী থৌরম মনুংদা কাশী অমসুং তমিলগী মফমশিংগী মরক্তা লৈবা চহি চা কয়া শুরবা পুৱারী অমসুং নাৎকী মরীশিংগী নুংঙাইবা ফোংদোক্লি। ‘এক ভারত, স্রেস্থ ভারত’কী ইথিলনা ঐখোয়গী লৈবাক্কী মপাঙ্গল হেনগৎহল্লি। ঐখোয়না ঐখোয় মশেলগী মতাংদা খঙনবা মতমদা, অমত্তা ওইবগী মসিগুম্বা ৱাখল্লোনগী মরা চেৎশিল্লি। ‘সাউরাস্ত্রা তমিল সঙ্গমম অসি অমত্তা ওইবগী মসিগুম্বা ইথিলগা লোয়ননা মথংগী থাদা গুজরাত্তা পাংথোক্কনি।

সাউরাস্ত্রা তমিল সঙ্গমম অসি এপ্রিল ১৭তগী ৩০ ফাওবা চত্থগনি। গুজরাতকী সাউরাস্ত্রাগা তমিল নাদুগা করি মরী লৈনবগে হায়না মন কী বাত তারিবা মীওই খরনা শোইদনা খল্লমগনি। ঐহাক হায়জগে। চহি চা কয়াগী মমাংদা, সাউরাস্ত্রাগী মীওই কয়া অমনা তমিল নাদুগী তোঙান-তোঙানবা মফমশিংদা খুন্দা লৈতাখি। মখোয়গুম্বা মীওইশিং অসি ‘সাউরাস্ত্রী তমিল’ হায়না ঙসিসু খঙনরি। সাউরাস্ত্রাগী মওং-মতৌ খরা মখোয়গী চাকচা-হৈজা, পুন্সি মহিং অমসুং খুন্নাইগী থৌদোকশিংদা ঙসিসু উবা ফংলি। তমিল নাদুদগী মীওই কয়া অমনা থৌরম অসিগী থাগৎ ৱাহৈগী চিথী কয়া ঐঙোন্দা ইরকই। মদুরাইদা লৈবা জয়াচন্দ্রন্না য়াম্না পেন্দবগী ৱাফম খরা ইরকখি। মহাক্না হায়রি, “চহি লিশিং অমগী মতুংদা, মীওই অমনা সাউরাস্ত্রা-তমিলগী মরীগী মতাংদা খনবীরি অমসুং সাউরাস্ত্রদগী লাক্তুনা তমিল নাদুদা খুন্দা লৈতাখিবা মীওইশিংবু মীয়াম মাঙদা পুথোকপীরি”। জয়াচন্দ্রনগী ৱাখল্লোন অসিমক তমিল ইচিল ইনাও লিশিং কয়াগী খোঞ্জেলনি।

মরুপশিং, ঐহাক্না ‘মন কী বাত’ তারিবা মীওইশিংগী মফমদা অসমগা মরী লৈনবা পাউদম অমত্তা থমজগে। ‘এক ভারত স্রেস্থ ভারত’কী ইথিলবু মসিনসু মপাঙ্গল হাপকনি। ঐখোয়না বীর লচিত বোরফুকানগী ৪০০শুবা মপোক কুমওনগী নুংঙাইবা ফোংদোক্লি হায়বা অদোম্না খঙবীরম্লগনি। থৌনা লৈরবা বীর লচিত বোরফুকান্না অসম্বু ঙকচাও থেকপা মুঘল সলতনেত্তগী গুৱাহাতীবু মনিং তমহনখি। ঙসিদি, লৈবাক অসিনা থৌনা লৈবা লান্মী অসিগী মথৌনাগী মতাংদা খঙবা হৌনরে। লচিত বোরফুকানগী পুন্সিদা য়ুম্ফম ওইবা এসে ইবগী চাংয়েংনাব অমসু নুমিৎ খরনিগী মমাংদা হৌদোকখ্রে। মসিগীদমক্তা মীওই লাখ ৪৫না এসে ইদুনা থাজিল্লকখি তাবদা অদোম্না ঙকপা ফাওগনি। থৌওং অসিনা হৌজিক্তি গিনেস রেকোর্দ অমা ওইরে তাবদা অদোম্না নুংঙাইবসু ফাওগনি। অদুগা খ্বাইদগী নুংঙাইবা অমসুং শিংথানিংঙাই ওইবা ৱাফম অমনা, বীর লচিত বোরফুকানগী মতাংদা ইদুনা থাজিল্লক্লিবা এসেশিং অসি তোঙানবা লোল ২৩দা ইরকখিবনি। অসামিজ লোল নত্তনা, এসে অসিবু ইরক্লিবা অতোপ্পা লোলশিংদি হিন্দি, ইংলিশ, বাঙ্গলা, বোরো, নেপালি, সংস্কৃত অমসুং সন্থালীনি। মসিগুম্বা থৌওং অসিগী শরুক ওইরিবা মীওই খুদিংবু ঐহাক্না থাগৎচনিংই।

ঐহাক্কী নুংশিরবা লৈবাক মীয়াম, কশ্মির নত্ত্রগা শ্রীনগরগী মতাংদা হেক য়ৌরকপদা, ঐখোয়গী ৱাখল্লোন্দা লাকপা খ্বাইদগী অহানবা শক্তমদি মফমসিগী তম্পাক অমসুং দল পাৎনি। ঐখোয় খুদিংনা দল পাত য়েংনিংই। অদুবু, দল পাৎকী অতোপ্পা অখন্নবা মতৌ অমসু লৈ। দল পাত অসি মসিদা হৌরিবা মহাও লৈবা থম্বৌ, “কমল কাক্রি” হায়না খঙনবা অসিগীসু মমিং চৎলি। থম্বৌ অসি লৈবাক্কী তোঙান-তোঙানবা মফমশিংদা তোঙান-তোঙানবা মিংদা খঙনৈ। কশ্মিরদা মসিবু নাদ্রু হায়না কৌই। কশ্মিরগী নাদ্র্যগী দিমান্দ অসি য়াম্না হেনগৎলক্লি। দিমান্দ হেনগৎলক্লিবা অসি য়েংলদুনা, দাল পাত্তগী নাদ্রু থারিবা লৌমীশিংনা এফ.পি.ও. অমা শেম্লে। চাউরাকপা লৌমী ২৫০না এফ.পি.ও. অসিদা য়াওরি। ঙসিদি, এফ.পি.ও.শিং অসিনা মীরম লৈবাক্তা নাদ্রু এক্সপোর্ত তৌবসু হৌরে। লৌমীশিংনা অসিনা নাদ্রুগী কন্সাইনমেন্ত অনি য়ু.এ.ই.দা মতম খরগী মমাংদা থাখ্রে। মসিগুম্বা মায় পাকপা অসিনা কশ্মিরগী মিংচৎ পুরকপখক্তা নত্তনা লৌমী চাম্মা-চাম্মগী শেন্থোকসু হেনগৎহল্লে।

মরুপশিং, লৌউ-শিংউগা মরী লৈনবা কশ্মিরগী মীওইশিংনা মখোয়গী মায় পাকপশিংদা হৌজিক্কান্দি মনমসু নুংশিহল্লি। ঐহাক্না মায় পাকপগী মনক হায়রিবসি করিগীনো হায়না অদোম্না খল্লমগনি? হোইনে, হীরম অসিমক মনমগীনি, মনম নুংশিবগী ৱাফম অমনি। জম্মু অমসুং কশ্মিরগী দোদা জিলাদা ‘ভদরৱা’ কৌবা শহর মচা অমা লৈ। মফমসিগী লৌমীশিংনা চুজাক থাবগী চৎনবীবু দিকেদ কয়াদগী  চত্থদুনা লাক্লি, অদুবু লৌমী খরনা তোঙানবা অয়া তৌবগী মতাংদা খনখি। মখোয়না ফ্লোরিকলচরগী মাইকৈদা মায় ওনশিনখি, লৈ থাবা হৌখি। ঙসিদি, মফমসিগী লৌমী চাউরাকপা লিশিং অনি মখায়না লেবেন্দর থারি। মখোয়বু কেন্দ্র সরকারগী এরোমা মিসনগী খুত্থাংদসু লমজিং লমতাকপীরি। লৌমীশিংগী মসিগুম্বা অনৌবা থৌওংশিং অসিনা মখোয়গী শেন্থোকসু য়াম্না হেনগৎহল্লে, অদুগা ঙসিদি, লেবেন্দরগা লোয়ননা মখোয়গী মায় পাকপগী মনমসু পাক শন্না শন্দোক্লে।

মরুপশিং, কশ্মির, থম্বাল, লৈ অমসুং মনম নুংশিবগী ৱারী শারবদি, থম্বাল মথক্তা ফম্লিবী ইমা শার্দাবু নিংশিংবা হায়বসিদি মহৌশানা তাবনি। ইমা শর্দাগী চাউরবা লাইশঙ অমসু নুমিৎ খরনিগী মমাংদা কুপ্বারাদা শঙ্গাখ্রে। লাইশঙ অসি ঐখোয়না শার্দা পীথতা চৎপা লম্বীমক্তা লৈবনি। লোকেলগী মীয়াম্না লাইশঙ অসি শাবদা মতেং য়াম্না পাংখি। ঐহাক্না জম্মু অমসুং কশ্মিরগী মীয়াম্বু মসিগুম্বা য়ািফরবা থবক্কীদমক্তা থাগৎপা ফোংদোকচরি।

ঐহাক্কী নুংশিরবা লৈবাক মীয়াম, হন্দক্কী ‘মন কী বাত’ অসিগী তাঙ্কক্কী ওইনদি মসিদা লোইরে। ঐহাক্না ‘মন কী বাত’কী মথংগী ১০০শুবা তাঙ্কক্তা অদোমগা অমুক্কা উন্নগনি। অদোম্না ইশাগী পাউতাক পীবিয়ু হায়না ঐহাক্না হায়জরি। হন্দক্কী মার্চ থা অসিদি, হোলিদগী নবরাত্রী ফাওবদা ঐখোয়বু কুহ্মৈ কয়া অমা চিলহল্লে। রামজানগী শেংলবা থাসু হৌখ্রে। শ্রী রাম মবমীগী শেংলবা কুহ্মৈসু মথংগী নুমিৎ খরনিদা হৌরগনি। মসিগী মথংদা, মহাবীর জয়ন্তী, গুদ ফ্রাইদে অমসুং ইস্তরসু লাক্লগনি। এপ্রিল থাদনা, ঐখোয়না ভারতকী শক্নাইরবা মীওই অনিগী মপোক কুমওন অমুক পাংথোক্কনি। শক্নাইরবা মীওই অনি অদুদি – মহাত্মা জ্যোতিবা ফুলে অমসুং বাবাসাহেব অম্বেদকরনি। মখোয় অনিমক্না তাথী তাওই তৌবা অমসুং হন্থবা মিৎয়েং য়েংবগী চৎনবীবু খুন্নাইদগী মুত্থৎখিবদা মমাংদা অমুক্তা পাংথোকখিদ্রিবা থৌদাং লৌখি। ঙসি, ‘নিংতম্বগী অমৃত কাল’ অসিদা ঐখোয়না মখোয়গুম্বা শক্নাইবা মীওইশিংগী মফমদগী তমজদুনা মখোয়দগী ইথিল লেপ্তনা লৌবগী মথৌ তারি। ঐখোয়না ইশাগী থৌদাংবু খ্বাইদগী মমাঙদা থম্বা তাবনি। মরুপশিং, কোরোনাসু মফম খরদা হৌজিক অমুক থোক্লক্লি। মরম অদুনা, অদোম্না চেকশিন থৌরাং লৌগদবনি অমসুং লু-নান্না লৈবগী মতাংদা মুন্না খন্থগদবনি। ঐখোয়না মথংগী থাদা ‘মন কী বাত’কী ১০০শুবা তাঙ্কতা অমুক্কা উন্নরসি। ঐহাক্না পুম্নমক্তগী কায়নবগী য়াথং নিজরি।

থাগৎচরি, নমস্কার!

***