ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা সেপ্তেম্বর ২২দা তেক্সাসকী হাওস্তোন্দা পাংথোক্কদৌরিবা অখন্নবা কমুনিতী প্রোগ্রাম ‘হাউদি মোদী’দা অমেরিকাগী রাস্ত্রপতি দোনাল্দ জে. ত্রম্পনা শরুক য়ারগনি হায়বা পাও তাবদা নুঙাইবা ফোংদোকখ্রে। প্রধান মন্ত্রীনা হায়খি মদুদি থৌরম অসিদা অমেরিকাগী রাস্ত্রপতিনা শরুক য়াগদৌরিবা অসি ভারত অমসুং অমেরিকাগী মরক্তা লৈরিবা অখন্নবা মরূপ ওইবগী মরীগী খুদম্নি।

রাস্ত্রপতি ত্রম্পনা থৌরম অসিদা শরুক শরুক য়ৌগদৌরিবা অসি অখন্নবা খুদম অমনি হায়রদুনা প্রধান মন্ত্রীনা হায়খি মদুদি মসিনা ভারত-অমেরিকা লৈবাক অনিগী লৈনরিবা অচেৎপা মরী অদু উৎলে অমদি অমেরিকাগী সমাজ অমসুং ইকোনোমীদা ইন্দিয়ান কমুনিতীগী থৌদাং অদু শকখংবিরে।

ঙসি অয়ুক অঙনবদা, হ্বাইত হাউসনা প্রেস স্তেতমেন্ত অমা ইসু তৌদুনা থৌরম অসিদা দোনাল্দ ত্রম্প শরুক য়ারগনি হায়না ফোংদোকখি।

থৌরম অসিগী মরুওইবদু ফোংদোক্লদুনা প্রেস স্তেতমেন্তদা হায়খি, “মসিনা অমেরিকা অমসুং ভারতকী মীয়ামগী মরক্তা অচেৎপা মরী অদু থৌগৎপা, মালেমগী খ্বাইদগী লীরবা অমসুং খ্বাইদগী চাওবা দেমোক্রেসীশিংগী মরক্তা স্ত্রেতেজিক পার্তনরশিপ অসি অমুক হন্না শোয়দবনি হায়বা, অমসুং মখোয়গী ইনর্জী অমসুং ত্রেদকী মরী হেন্না চেৎশিলহন্নবা অচৌবা তঞ্জা অমা ওইরগনি।”

‘হাউদি মোদী – সেয়ার্দ দ্রিমজ, ব্রাইত ফিচর্স’ কমুনিতী সম্মিৎ অসি অমেরিকাগী তেক্সাসকী হাওস্তনদা লৈরিবা এন.আর.জি. স্তেদিয়মদা সেপ্তেম্বর ২২ নোংমাইজিং নুমীৎতা তেক্সাস ইন্দিয়া ফোরমনা শিন্দুনা প্রধান মন্ত্রী নরেন্দ্র মোদীগীদমক পাংথোক্কদৌরিবা থৌরম অমনি। থৌরম অসিদা মীওই লিশিং য়াঙখৈ হেন্না শরুক য়ারগনি হায়না পান্নরি।

*******