ভারতকী প্রধানমন্ত্রী

১৫শুবা ব্রিক্স মীফমগী নাকলদা, ওগস্ত ২৪,২০২৩ দা জোহেন্সবার্গতা প্রধান মন্ত্রী শ্রী নরেন্দ্র মোদীনা সেনেগালগী রাস্ত্রপতি মেক্কি সোল উনখ্রে।

ললোন-ইতিক অমসুং শেন থাদবা, দিফেন্স অমসুং সেকুরিতি, ইনর্জি, মাইনিং, লৌউ-শিংউ, ফার্মাসিউতিকেল, রেলৱেজ, কেপাসিতি বিল্দিং, নাৎ অমসুং মীগা মীগা লৈনবা মরীশিং য়াওনা হিরম কয়াদা লৈবাক অসিগী মরীশিং চেৎশিনহন্নবা লুচিংবশিংনা কান্নবা ৱাফমশিং খন্নখি।
ভোইস ওফ গ্লোবেল সাউথ সম্মিৎ শরুক য়াবগীদমক অমসুং হৌখিবা চহিদা মহাক্না অফ্রিকান য়ুনিয়ন লুচিংখিবা অদুগীদমক  প্রধান মন্ত্রীনা রাস্ত্রপতি সোল থাগৎখি।

চন্দ্রয়ান মিসন মাইপাকপগীদমক অমসুং জি-২০দা অফ্রিকান য়ুনিয়ন লেংদবা মেম্বর অমা ওইনবা ভারতনা হোৎনরিবা থবকশিংগীদমক রাস্ত্রপতি সোলনা প্রধান মন্ত্রী থাগৎখি। মালেমগী ওইনা চাউখৎপা পুরক্নবা প্রধান মন্ত্রীনা লুচিংদুনা পায়খৎলিবা থবকশিং মহাক্না থাগৎখি অমসুং ভারতনা প্রসিদেন্ত ওইদুনা হন্দক জি-২০ মীফম পাংথোক্কদৌরিবা অসি মাইপাক্নবা মহাক্না য়াইফ-পাউজেল পীখি।

****