ভারতকী প্রধানমন্ত্রী

নোংচুপ বেঙ্গলগী রাজ্যপাল সি.ভি অনন্দ বোস জি, ঐগী মন্ত্রীমন্দলগী মরুপ নিসিথ প্রামানিক জি, জোন বারলা জি, ওপোজিসনগী লুচিংবা সুভেন্ধু অধিকারি জি, সংসদকী ঐগী মরুপ সুকান্ত মজুমদার জি, কুমারি দেবশ্রী চৌধুরি জিল খাগেন মুর্মু জি, রাজু বিস্তা জি, দোক্তর জয়েন্ত কুমার রোই জি, এম.এল.এশিং, অতোপ্পা শক্নাইরবশিং, ইবেম্মাশিং অমসুং ইবুংঙোশিং।

ঙসি ঐ চাগী ফজরবা লমদম অসিদা লাকপদা হরাওই।  ঙসি মফম অসিদা লুপা করোর কয়াগী চাউখৎ-থৌরাংগী প্রোজেকশিং শঙ্গারে অমসুং উরেপ-উয়ুং তম্লে। ঙসিগী প্রোজেকশিং অসি বিকসিত ৱেস্ত বেঙ্গলগী মাইকৈদা থাংজিনবা অহেনবা খোঙথাংনি। হায়রিবা চাউখৎ-থৌরাংগী প্রোজেকশিং অসিগীদমক ঐনা বেঙ্গল অমসুং নোর্থ বেঙ্গলগী মীয়ামদা নুংঙাইবা ফোঙদোকচরি।

মরুপশিং,

নোংচুপ বেঙ্গলগী অৱাংথংবা শরুক অসি অৱাং-নোংপোক্কী থোঙ্গালনি অমসুং য়ুম্নোন্নরিবা লৈবাকশিংগা ললোন-ইতিক পাংথোক্নবা লম্বীশিং ওইরি। মরম অদুনা, রাজ্য অসিগী অৱাংথংবা শরুকশিংগা লোয়ননা নোংচুপ বেঙ্গল চাউখৎহন্নবা সরকারনা মরুওইনা লৌরে। রেল অমসুং লম্বীগী মতমগা চুনবা ম ওংদা শেমগৎপদা তঙাইফদে অমসুং একলাখি-বালুরঘাত, রানিনগর জলপাইগুরি-হালদিবারি অমসুং সিলিগুরি-অলুৱাবারি সেক্সনশিংদা রেল লাইনশিং ইলেক্ত্রিক ফংহনবগী থবক লোইশিল্লে। মসিনা নোর্থ অমসুং সাউথ দিনাজপুর, কুচ বেহার অমসুং জলপাইগুরিগী শরুকশিংদা ত্রেনশিংগী খোঙজেল য়াংখৎলগনি অমসুং সিলিগুরি-সমুকতালা লম্বীনা অনকপা উমংগী শরুকশিংদা পোল্লুসন হন্থরগনি। বারসোই-রাধিকাপুর সেক্সন ইলেক্ত্রিক ফংহনবা অসিনা বিহার অমসুং নোংচুপ বেঙ্গল অনিমক কান্নবা ফংলগনি। রাধিকাপুর অমসুং সিলিগুরিগী মরক্তা অনৌবা ত্রেন চেন্নবা লমথারে। নোংচুপ বেঙ্গলদা রেলৱেজ ফগৎহনবা অসিনা চাউখৎ-থৌরাংগী অনৌবা খুদোংচাবশিং পীগনি অমসুং মীচম মীয়ামগী পুন্সি হিংবদা লাইহনগনি।

মরুপশিং,

ত্রেনশিং অৱাং-নোংপোক য়ৌরকপদা খোঙজেল তপথবা মতম অমা লৈরমখি। অদুবু ঐখোয়গী সরকারনা ভারতকী অতৈ মফমশিংগুম লমদম অসিদা ত্রেনশিং খোঙজেল চপ মানরে অমসুং অনৌবা অয়াংবা ত্রেনশিং চেনবা হৌদোক্লে। মিতালি এক্সপ্রেসনা নিউ জলপাইগুরিদগী ধাক কেন্ত ফাওবা চেন্দুনা বাংলাদেসগা রেল কন্নেক্তিবিতি লৈরে অমসুং বাংলাদেস সরকারগা খুৎশম্নদুনা রাধিকাপুর স্তেসন য়ৌরে।

মরুপশিং,

নিংতম্বা ফংলবা মতুং চহি কয়া ভারতকী নোংপোক থংবা শরুক মীরাইদুনা থমখি। ঐখোয়গী সরকারনা নোংপোক ভারত লৈবাক অসিগী গ্রোথ ইঞ্জিন ওইনা খন্নরি। মরম অদুনা লমদম অসিদা লম্বী-থোং ফগৎনবা মমাঙদা অমুক্তা ওইখিদ্রিবা মওংদা শেন থাদরে। নোংচুপ বেঙ্গলগী চহিগী রেলৱে বজেত লুপা করোর ৪০০০ ওইরম্বা অদু হৌজিক করোর ১৪,০০০দা হেনগৎলে। নোর্থ বেঙ্গলদগী গুৱাহাতি ফাওবা সেমি হায়-স্পিৎ বন্দে ভারত ত্রেন চেল্লে অমসুং অমৃত ভারত স্তেন ৫০০ অমুক হন্না শেমগৎনবা খনগৎপদা হাওরা অমসুং সিলিগুরি য়াওরে। চহি ১০ অসিদা, ঐখোয়না পেসেঞ্জরদগী হৌরগা এক্সপ্রেস স্পিৎ ফাওবগী রেলৱেগী চাউখৎ-থৌরাং পায়খৎলে। ঐখোয়গী অহুমশুবা তার্মদা, মসি সুপরফাস্ত স্পিৎকা লোয়ননা মাঙলোমদা চংশিনগনি।

মরুপশিং,

ঙসি অৱাংথংবা নোংচুপ বেঙ্গলদা লুপা করোর ৩০০০ হেনবগী লম্বীগী প্রোজেক অনি শঙ্গারে। এন.ঐচ-২৭গী ঘোসপুকুর-ধুপগুরি সেক্সন লেন মরি ওইহনবা অমসুং এন.ঐচ-২৭দা ইস্লামপুর বাইপাস লেন মরি ওইহনবা অসিনা জলপাইগুরি, সিলিগুরি অমসুং মাইনাগুরি সহরশিংদা মী চিনবা হন্থহনগনি অমসুং সিলিগুরি, জলপাইগুরি অমসুং অলিপুরদুৱার লমদমশিংদা লম্বী-থোংগী হেন্না ফবা খুদোংচাবশিং ফংহনগনি। দুৱার, দর্জিলিং, গেঙতোক অমসুং মিরিকগুম্বা লমকোয়ফমশিং য়ৌবা লাইহল্লগনি। মসিনা লমদম অসিদা ললোন-ইতিক, উদোগ অমসুং চা থাফমশিং হেন্না চাউখৎহল্লগনি।

মরুপশিং,

নোংচুপ বেঙ্গল চাউখৎহন্নবা কেন্দ্র সরকারনা থবক খুদিংমক পায়খৎলে অমসুং ঙসিগী প্রোজেকশিং অসিগীদমক মীয়ামদা হরাওবা ফোঙদোকচরি। হৌজিক মফম অসিদা থৌরম অমা লোইরে, অদুবু ঐগী ৱা ঙাংবা মফম অসিদা লোইবা নত্তে, ঐগী ৱা ঙাংবা মখা চৎথগনি অমসুং মফম অসিদগী লমহাং অমদা চৎলগনি। অদোমগী থম্মোয় পেনবা অদু ঐ উরে অমসুং অদোমগী থম্মোয় পেনবা অদুগা ৱারি শানরে।

অদোম থাগৎচরি।

****