ভারতকী প্রধানমন্ত্রী

ঐহাক্কী নুংশিজরবা ইরৈবাকচাশিং,

ঙসি মার্চকী ২৭, ঙাইহাক্কী মমাংদা, ভারতনা মমাংদা অমুক্তা ফংখিদ্রিবা এচিবমেন্ত অমা ফংবা ঙমখ্রে। ভারতনা ঙসি মশাগী মমিং স্পেস পাৱরগী মনুং চলহনবা ঙমখ্রে।

হৌজিক ফাওবদা মালেমগী লৈবাক অহুম – অমেরিকা, রসিয়া অমসুং চাইনানা এচিবমেন্ত অসি ফংবা ঙমখি। হৌজিক্তি ভারত মরিশুবা লৈবাক ওইরে। হিন্দুস্তান্দা লৈরিবা মীপুম খুদিংমক্কীদমক মসিদগী হেন্না চাউথোকচনীংঙাই মিকুপ অমা লৈতে।
ঙৈহাক্কী মমাংদা ঐখোয়গী বিজ্ঞানিকশিংনা স্পেসতা, কিলোমীতর চাহুম লাপ্না, লো অর্থ ওর্বিৎতা লাইব সেতলাইৎ অমা কাপথখ্রে।

লো অর্থ ওর্বিৎতা লাইব সেতলাইৎ অসি এন্তি-সেতলাইৎ (এ-সেৎ) মিসাইল শিজিন্নদুনা কাপথখি। শুপ্নতগী মিনিৎ অহুমদা, ওপরেসন অসি মায় পাক্না পাংথোকখি।

মিশন শক্তি – মসি য়াম্না লুবা ওপরেসন ওইখি, মসিদা য়াম্না ৱাংবা থাক্কী তেক্নোলোজী মথৌ তাখি। বিজ্ঞানিকশিংনা থমখিবা পান্দম পুম্নমক অদু ফংবা ঙমখ্রে।

ঐখোয় ভারত মচা পুম্নমক্কীদমক মসি চাউথোকচনীংঙাই ৱাফম্নি মদুদি শক্তি অসি ভারত্তা শাজবা এন্তি-সেতলাইৎ (এ-সেৎ) মিসাইল শিজিন্নদুনা এচিব তৌবা ঙমখি।

অহানবা মক্তদা মিশন শক্তিগা মরী লৈনরিবা দি.আর.দি.ও.গী বিজ্ঞানিক পুম্নমক, রিসর্স তৌরিবশিং অমদি অতোপ্পা মরী লৈনবা ওফিসিয়েলশিংবু নুংঙাইবা ফোংদোকচরি। ঙসি অমুক হন্না মখোয়না লৈবাক্কী মীংচৎ হেঙ্গৎহল্লে, ঐখোয়না ঐখোয়গী বিজ্ঞানিকশিংদা চাউথোকচরি।

স্পেস অসি ঙসিদি ঐখোয়গী পুন্সি মহিংগী য়াম্না মরুওইবা শরুক অমা ওইরে। ঙসি ঐখোয়গী নাক্তা সেতলাইৎ কয়া অমা লৈরে, মদুনা তোঙান-তোঙানবা লমশিংগী দিবেলপমেন্তদা মখোয়গী মমল য়াম্লবা থৌদাং লৌরি, খুদম ওইনা লৌউ-শিংউবা, ঙাকশেল, সেক্যুরিতী, দিজাস্তর মেনেজমেন্ত, কমুনিকেসন, ৱেদর, নেবিগেসন, এজুকেসন অসিনচিংবনি।
ঐখোয়গী সেতলাইৎশিংগী কান্নবা অদু লৌমী ওইগেরা, ঙামী ওইগেরা, মহৈরোই ওইগেরা, সেক্যুরিতী ফোর্স ওইগেরা, পুম্নমক্না ফংবা ঙম্লি। অতোপ্পা অমদা মদুনা রেলৱে ওইগেরা, এরোপ্লেন ওইগেরা, ঈশিংগী জহাজশিংগী ওপরেসন ওইগেরা, মফম পুম্নমক অসিদা সেতলাইৎশিং শিজিন্নরি।

মালেম অসিদা স্পেস অমসুং সেতেলাইতকী মগুন অসি হেঙ্গৎলক্কদবা খক্তনি। মসি য়াওদনা পুন্সি মপুং ফাবা ওইথোক্লরোই। অসিগুম্বা ফিভম অসিদা ইক্বিপমেন্তশিং অসি অশোয় অঙাম য়াওহন্দনা ঙাক্তুনা থম্বসু অদুক্কী মতিক মরু ওই।

ঙসিগী এন্তি-সেতলাইৎ (এ-সেৎ) মিসাইল অসি ভারতকী সেক্যুরিতীগী মীৎয়েংদা অমদি ভারতকী চাউখৎ থৌরাংগী খোংচৎকী মীৎয়েংদা লৈবাক অসিবু অনৌবা অচেৎপা অমা পীরগনি। ঐহাক্না ঙসি মালেমগী মীয়ামদসু থাজবা পীজরি মদুদি ঐখোয়না অনৌবা কেপাসিতী ফংলিবা অসি কনাগুম্বা অমত্তগী মায়োক্তা নত্তে। মসিদি খোংজেল য়াংনা মাংলোমদা চংশিল্লিবা হিন্দুস্তানগী ঙাকথোকচনবগী অনৌবা খোংথাংনি।

ভারতনা মতম পুম্নমক্তা স্পেসতা খুৎলাই লমজেম তান্নবগী মায়োক্তা লৈরক্লি অমদি মসিনা পোলিসী অসিদা অহোংবা অমত্তা লৈরোই। ঙসিগী চাংয়েং অসিনা করিগুম্বা মখল অমত্তগী মালেমগী ওইবা আইন নত্ত্রগা য়ানা চেরোল অমত্তা থুগায়খিবা লৈতে। ঐখোয়না অনৌবা থাক্কী তেক্নোলোজী অসি লৈবাক অসিগী প্রজা কোতি ১৩০গী সেক্যুরিতী অমদি মখোয়গী য়াইফনবগীদমক শিজিন্নবা পাম্লি।

লম অসিদা শান্তি অমসুং সেক্যুরিতীগী এতমোসফিয়র শেমগৎনবগীদমক খুৎকন পাঙ্গলবা ভারত অমা ওইবা মথৌ তাই। ঐখোয়গী স্ত্রেতেজিক ওইবা পান্দমদি শান্তি কায়হন্দনা থম্বনি লানগী এতমোসফিয়র শেমগৎপা নত্তে।

নুংশিজরবা ইরৈবাকচাশিং,

ভারতনা স্পেসকী লমদা পায়খৎলিবা থবক অসিগী মরুওইবা পান্দমদি ভারতকী সেক্যুরিতী, ভারতকী ইকোনোমিক দিবেলপমেন্ত অমসুং ভারতকী তেক্নোলোজীদা খুমাং চাউশিনবনি। ঙসিগী মিশন অসি অসিগুম্লবা মংলান অসি শুংশোই শোইদনা ফংনবগী মায়কৈদা মরুওইবা খোংথাং অমনি, মসি য়ুম্বী অহুম অসিগী সেক্যুরিতীগীদমক মথৌ তাখি।
ঙসিগী মাইপাকপা অসি লাক্কদৌরিবা মতমশিংদা সেক্যুর ওইবা লৈবাক, নুংঙাই য়াইফবা লৈবাক অমসুং শান্তি পামজবা লৈবাক অমগী খোংথাং ওইনা য়েংফম থোকই।

ঐখোয়না তুংদা লাক্কদবা চেলেঞ্জ কয়া অমা মায়োক্নবা অমদি ঐখোয়গী মীয়ামগী পুন্সিগী থাক্তা পোজিতিব ওইবা অওনবা পুরক্নবগীদমক অনৌবা থাক্কী তেক্নোলোজী শিজিন্নবা তাবনি। ভারতমচা পুম্নমক্না তুংদা চেলেঞ্জ কয়া অমা মায়োক্নবা মতমদা ইশাবু থাজবা অমদি সেক্যুর ফাউজবা ঙম্বা মদুমক ঐখোয়গী পান্দম্নি।

ঐহাক্না ঐখোয়গী মীয়ামগী এক্তিবিতী, কমিৎমেন্ত, কত্থোকপা অমসুং তৌবা ঙম্বদা মপুং ফানা থাজবা থম্লি। ঐখোয়না চিংনবা লৈতনা অমত্তা ওইনা পুন্দুনা শক্তি লৈবা, নুংঙাই য়াইফবা অমসুং সেক্যুর ওইবা ভারত অমা শেম্লসি।
লৈবাক মীয়াম পুম্নমকপু ঙসিগী অসিগুম্লবা অচৌবা এচিবমেন্ত অসিগীদমক হন্না-হন্না নুংঙাইবা ফোংদোকচরি।
থাগৎচরি।