ভারতকী প্রধানমন্ত্রী

ঐহাক্কী নুংশিজরবা ইরৈবাকচাশিং খুরুমজরি! কোরোনাগী অনিশুবা ৱেবকী মায়োক্তা ভারতমচাশিংনা লান্থেংনরি। মালেমগী অতৈ লৈবাক কয়াগুম্না ভারতসু লাঞ্জং অসিগী মনুংদা অচৌবা অৱাবা কয়া মায়োক্নখি। ঐখোয় কয়ানা ঐখোয়গী মরী-মতাশিং, খঙনা চান্নবশিং কাইনখ্রে। অসিগুম্বা ইমুংশিংগীদমক ঐহাক্না থম্মোই শেংনা অৱাবা ফোঙদোকচরি।

মরুপশিং,

হৌখিবা চহি চামা অসিদা থোকপা খ্বাইদগী অচৌবা লাইচৎনি, খুদোংথিবা অমনি। অসিগুম্বা লাইচৎ অসি হৌজিক্কী মালেম অসিনা অমুক্তা উখিদ্রি অমসুং থেংনখিদ্রি। অসিগুম্বা অচৌবা মালেমগী লাইচৎ অসিগী মায়োক্তা ঐখোয়গী লৈবাক্না হীরম কয়াদা পুন্না লান্থেংমিন্নরি। কোবিদ হোস্পিতাল শাবদগী হৌরগা আই.সি.য়ু. বেদশিংগী মশিং হেনগৎহনখি, ভারতকী ভেন্তিলেতর শাবদগী হৌরগা তেস্তিং লেবকী অচৌবা নেৎৱর্ক অমা শেমখি, কোবিদকী মায়োক্তা লান্থেংননবা হৌখিবা চহি অমা মখাই অসিদা অনৌবা হেল্থ ইনফ্রাস্ত্রকচর অমা শেমখি। সেকেন্দ ৱেবকী মনুংদা এপ্রিল অমসুং মে থাদা ভারত্তা মেদিকেল ওক্সিজেনগী দিমান্দ অঙকপা ফংনা হেনগৎলকখি। ভারতকী পুৱারীদা অশুক য়াম্বা মেদিকেল ওক্সিজেন অমুক্তা মথৌ তাখিদ্রি। মথৌ তারিবা অসি থুংহন্নবা লানগুম্বা থবক তৌখি। সরকারগী লৈরিবা খুৎশু-খুৎলাই পুম্নমক শিজিন্নখি। ওক্সিজেন রেলশিং চেলহনখি, এয়রফোর্স প্লেন শিজিন্নখি, নেভী শিজিন্নখি। অতেনবা মতমগী মনুংদা লিক্বিদ মেদিকেল ওক্সিজেন পুথোকপা শরুক ১০ হেন্না হেনগৎহনখি। মালেমগী কাচিন-কোয়াদগী, মফম খুদিংমক্তগী ফংলিবা খুদিংমক লৌনবা অঙম্বা থাক্তা হোৎনখি। মসিগা মান্নবা মওংদা, তঙাই ফদবা হীদাক-লাংথকশিং পুথোকপা শরুক কয়া হেনগৎহনখি, মীরৈবাক্তা ফংবা হীদাকশিং লৌনবা অঙম্বা থাক্তা হোৎনখি।

মরুপশিং,

কোরোনাগুম্বা শকউদবা অমসুং শকলোন পুবা য়েক্নবগী মায়োক্তা লান্থেংনবদা খ্বাইদগী কান্নরবা খুৎলাই অসি কোবিদ প্রোতোকল ঙাকপা, মাস্ক উপ্পা, গজ অনিগী অরাপ্পা থম্বা অমসুং অতৈ চেকশিল-থৌরম পুম্নমক লৌখৎপনা ওইরি। লাঞ্জং অসিদা বেক্সিন্না ঐখোয়গী ঙাকথোক্নবা চুঙ্গোই অমগুম্বনি। ঙসি মালেম পুম্বদা বেক্সিন পাম্নরক্লিবা অসিগা য়েংনরুবদা পুথোক্লিবা লৈবাকশিং অমসুং বেক্সিন শারিবা কম্পনীশিং মশিং য়াম্না য়ামদে। খন্থদুনা য়েংবীয়ু করিগুম্বা হৌজিক ঐখোয়দা ভারত্তা শাজবা বেক্সিন অসি লৈরমদবা থোক্লবদি ঙসি ভারতকুম্বা অচৌবা লৈবাক অসি করি ফীভমদা লৈরমগনি? অদোমনা চহি ৫০-৬০গী পুৱারী অসি য়েংলুরবদি ভারতনা মীরৈবাক্তগী বেক্সিন লৌবদা দিকেদ কয়া চংখি হায়বা খংবা ঙমগনি। মীরৈবাক্তা বেক্সিনগী থবক লোইরবা ফাওবদা ঐখোয়গী লৈবাক অসিদা বেক্সিনেসনগী থবক হৌবা ঙমখিদে। পোলিয়োগী বেক্সিন ওইরসু, খুঙ্গংদা ঐখোয়না লাই থোকপা হায়না খঙনবা স্মোলপোক্সকী বেক্সিন ওইরবসু, হেপতাইতিস বিগী বেক্সিন ওইরবসু, মখোয়গীদমক ইরৈবাকচাশিংনা দিকেদ কয়া ঙাইখি। ইরৈবাকচাশিংনা ২০১৪দা ঐখোয়দা লৈবাক অসি শেবা তৌজনবা খুদোংচাবা অমা পীখিবা মতমদা ভারতকী বেক্সেনেসনগী কবরেজ অসি ২০১৪দা চাদা ৬০গী ময়া নক্না লৈরমখি। অমসুং ঐখোয়গী ৱাখল্লোন্দা মসি নুংনাংবা পোক্নীংঙাই ওইবা ৱাফম অমা ওইখি। ভারতনা তীকা থাদোকপগী থবক্কী চত্থরিবা খোঙজেল অসিদা চত্থবা তারবদি বেক্সিনেসন কবরেজকী চাদা ১০০গী পান্দম য়ৌবদা লৈবাক অসিনা চহি ৪০ চংখিগনি। ঐখোয়না সমস্যা অসি কোকহন্নবা মিসন ইন্দ্রধনুশ হৌদোকখি। ঐখোয়না খোঙজেল য়াংনা মিসন ইন্দ্রধনুশকী খুত্থাংদা বেক্সিনেসনগী থবক চত্থগনি অমদি লৈবাক অসিদা বেক্সিন মথৌ তাবা মীপুম খুদিংমক বেক্সিন কাপহনগনি হায়না ৱারেপ লৌখি। ঐখোয়না মিসন মোদতা থবক পাইখৎখি অমসুং শুপ্নগী চহি ৫-৬কী মনুংদা বেক্সিনেসনগী কবরেজ অসি চাদা ৬০দগী চাদা ৯০দা হেনগৎখি। ৬০দগী ৯০দা হায়বদি ঐখোয়না বেক্সিনেসনগী খোঙজেলসু হেনগৎহনখি অমসুং হীরমশিংসু হেনগৎহনখি।

ঐখোয়না অঙাংশিংব শাথিরবা লাইনা কয়াদগী ঙাকথোক্নবগীদমক অনৌবা বেক্সিন কয়াসু ভারতকী বেক্সিনেসন কেম্পেনগী শরুক অমা ওইহনখি। ঐখোয়না মসি পাঙথোকপগী মরমদি ঐখোয়না ঐখোয়গী লৈবাক অসিদা লৈরিবা অঙাংশিংগীদমক ৱাখি, লায়রবশিংগীদমক ৱাখি, ঐখোয়না তীকা থাদোকপা ফংদ্রবা লায়রবশিংগী অঙাংশিংগীদমক ৱাখি। ঐখোয়না চাদা চামাগী বেক্সিনেসন কবরেজ ফংনবা চংশিল্লিঙৈদা কোরোনা ভাইরসনা ঐখোয়বু কোইশিনখি। লৈবাক অসিদা নত্তনা মালেম পুম্বগী মাংদা হৌজিক ভারতনা মাগী য়াম্লবা মীশিং অসি করম্না কনগনি হায়বা অরিবা অকিবা অদু পোকহনখি। অদুবু মরুপশিং, ৱাখল্লোন অদু ময়েক শেংলবা, পোলিসী ময়েক শেংলবা, লেপ্পা লৈতনা হোৎনরবা, অদু ওইরবদি শোইদনা ফলসু ফংগনি। চিংনবা খুদিংমক তুংঙোইনরম্লগা ভারতনা চহি ১গী মনুংদা অমত্তা নত্তনা ভারত্তা শাজবা বেক্সিন অনি লোঞ্চ তৌখি। ঐখোয়গী লৈবাক্না, বিজ্ঞানিকশিংনা ভারত অসি অচৌ-অচৌবা লৈবাকশিংদগী তাদে হায়না উখি। ঙসি ঐহাক্না নখোয়গা ৱারী শাবা মতম অসিদা লৈবাক অসিদা বেক্সিন দোজ করোর ২৩ হেন্না পীখ্রে।

মরুপশিং,

ঐখোয়গী হায়নবা লৈ – বিশ্বাসেন সিদ্ধি: হায়বদি, ঐখোয় ইশাদা থাজবা লৈরবা মতমদতা ঐখোয়না হোৎনরিবা অদুদা মাই পাকপা ঙমগনি। ঐখোয়না ঐখোয়গী বিজ্ঞানিকশিংনা য়াম্না অতেনবা মতমগী মনুংদা বেক্সিন শারক্কনি হায়না মপুং ফানা থাজখি। থাজবা অসিনা মরম ওইরগা ঐখোয়গী বিজ্ঞানিকশিংনা মখোয়গী রিসর্চ ৱর্ক চত্থরিঙৈদা ঐখোয়না লোজিস্তিক্স অমসুং অতৈ শেম-শাবা হৌখি। নখোয়না মুন্না খঙলমগনি মদুদি হৌখিবা চহি হায়বদি চহি অমগী মমাংদা কোরোনাগী কেস লিশিং খরা খক লৈবা মতম অদুদা বেক্সিন তাস্ক ফোর্স শেম্বা হৌখ্রে। ভারত্তা ভারতকীদমক বেক্সিন শারিবা কম্পনীশিংদা সরকারনা মখল খুদিংমক্কী সপ্পোর্ত পীখি। বেক্সিন শারিবশিংবু ক্লিনিকেল ত্রাইএলদা মতেং পাংখি, রিসর্চ অমসুং দিবেলপমেন্তগীদমক মথৌ তাবা ফন্দ পীখি, মাইকৈ খুদিংমক্তা সরকারনা মখোয়গা লোইননা পুন্না চৎমিন্নখি।

আত্মনির্ভর ভারত পেকেজকী মখাদা মিসন কোবিদ সুরক্ষাগী খুত্থাংদা লুপা করোর লিশিং কয়া ফংহনখি। হৌখিবা মতম খরদা লৈবাক অসিদা লেপ্তনা হোৎনরিবা অমসুং কান্না হোৎনরিবা অসিনা মরম ওইরগা লাক্কদৌরিবা মতমশিংদা বেক্সিনগী সপ্লাই হেন্না হেনগৎলগনি। ঙসি লৈবাক অসিদা কম্পনী ৭না তোঙান-তোঙানবা বেক্সিন মখলশিং পুথোক্লি। অহেনবা বেক্সিন অহুমগী ত্রাইএলসু এদভান্স স্তেজতা চত্থরি। বেক্সিন হেন্না ফংহন্নবা অতৈ লৈবাকশিংগী কম্পনীশিংদগীসু বেক্সিনশিং লৈনবগী প্রোসেস খোঙজেল য়াংশিনহনখ্রে। হৌখিবা মতম খরা অসিদা এক্সপর্তশিংনা ঐখোয়গী অঙাংশিংগী মতাংদা নুংনাংবা ফোঙদোক্নরক্লি। মাইকৈ অসিদা বেক্সিন ২গী ত্রাইএল খোঙজেল য়াংনা চত্থরি। মসিগী মথক্তা লৈবাক অসিদা ‘নেজল বেক্সিন’ অমদা রিসর্চ চত্থরি। মসি সিরিঞ্জকী মহুৎ নাতোন্দা স্প্রেনা কাপশিনগনি। করিগুম্বা লৈবাক অসিদা তুংদা লাক্কদৌরিবা মতমশিংদা বেক্সিন অসি মাই পাক্না পুথোকপা ঙম্লবদি ভারতকী বেক্সিন কাপ্পগী কেম্পেন অসিদা চাউনা খুমাং চাউশিনবা ঙমহল্লগনি।

মরুপশিং,

অতেনবা মতমগী মনুংদা বেক্সিন শাবা অসি ঐখোয় মীওইবা খুন্নাইগীদমক অচৌবা মাই পাকপা অমনি।

অদুবু মসিগী মশাগী ওইবা অপনশিংসু লৈ। বেক্সিন শারবা মতুংদসু মালেমগী লৈবাক খরা খক্তদা বেক্সিনেসন হৌখি, অমসুং অয়াম্বনা চাউখৎপা লৈবাকশিংদা খক্তা হৌখি। দবল্যু.ঐচ.ও.না বেক্সিনেসনগী মতাংদা গাইদলাইন থোকখি। বিজ্ঞানিকশিংনা মসিগী মরুওইবা মওং-মতৌ অদু পীখি। অমসুং ভারতনসু অতৈ লৈবাকশিংগী খ্বাইদগী অফবা মওং অদুদা য়ুম্ফম ওইরগা, ৱর্ল্দ হেল্থ ওর্গনাইজেসনগী কাংলোনশিংগী মতুং ইন্না তাঙ্কক নাইবা মওংদা বেক্সিনেসন হৌনবা ৱারেপ লৌখি। কেন্দ্র সরকারনা মুখ্য মন্ত্রীশিংগা লোইননা পাঙথোকপা তোঙান-তোঙানবা মীদফমশিংদগী লাকপা ৱাখল্লোনশিং, পার্লিয়ামেন্তদা তোঙান তোঙানবা দলশিংগী মরুপশিংদগী লাকপা ৱাখল্লোনশিং অদু কুপ্না খন্নখি। মসিগী মতুংদতা কোরোনাদগী হেন্না খুদোংথিগদবা চহি কাংলুপশিংগী মতুং ইন্না প্রাইওরিতী পীবা হায়না ৱারেপ লৌখি। মরম অসিনা হেল্থ ৱর্করশিং, ফ্রান্তলাইন ৱর্করশিং, চহি ৬০গী মথক্কী প্রজাশিং, অনাবশিং লৈবা চহি ৪৫গী মথক্কী প্রজাশিং, মখোয় পুম্নমক্তা বেক্সিন হান্না কাপ্পা হৌখি। করিগুম্বা কোরোনাগী অনিশুবা ৱেবকী মমাংদা ঐখোয়গী ফ্রন্তলাইন ৱর্করশিং অসি বেক্সিন কাপলমদবা থোক্লবদিকরি ফীভম ওইরমগনি হায়বা অদোম খনবা ঙমব্রা? খন্দুনা য়েংবীয়ু, ঐখোয়গী দোক্তরশিং, নর্সিং স্তাফ অসু বেক্সিন কাপলমদবা তারদি করি ওইরমগনি? হোস্পিতালশিং শেংদোক্লিবা ঐখোয়গী ইচিল-ইনাওশিং, এম্ব্যুলেন্স থৌরিবা ঐখোয়গী ইচিল-ইনাওশিং অসি বেক্সিন কাপলমদবা তারবদি করি ওইগনি? হেল্থ ৱর্করশিং মশিং য়াম্না বেক্সিন কাপলম্বনা মরম ওইরগা ঐখোয়না অতৈবু শেবা তৌবা ঙম্বনি অমসুং ইরৈবাকচা করোর কয়াগী পুন্সি কনবা ঙমখিবনি। অদুবু লৈবাক অসিদা কোরোনাগী কেস হন্থরক্লিঙৈ চৈরক অসিদা কেন্দ্র সরকারগী মমাংদা,

তোঙান-তোঙানবা ৱাখল্লোনশিং ফোংদোক্নরকপা হৌরকখি, তোঙান-তোঙানবা দিমান্দশিং তৌবা হৌরকখি। করিগীদমক পুম্নমক ভারত সরকারনা ৱারেপ লৌরিবনো? রাজ্য সরকারশিংগী ওইনা করিগীদমক খাক্ত্রিবনো? হায়না হংবা হৌরকখি। ৱন সাইজ দজ নোৎ ফিৎ ওল হায়বা ৱাফমশিংসু হায়বীখি। সংবিধানগী মতুং ইন্না হকশেল হায়বা অসি মপুং ওইনা রাজ্য হীরম অমা ওইবনা মসি রাজ্য মশাদা শিন্নথোকপনা ফগনি হায়না য়েৎলকখি। মরম অসিদা লৈবাক অসিদা অহৌবা অমা লাকখি। ভারত সরকারনা কম্প্রিহেনসিব গাইদলাইন অমা শেম্লগা রাজ্যশিংদা পীখি, রাজ্যশিংনা মখোয়গী মথৌ তাবা অমদি খুদোংচাবগী মতুং ইন্না থবক তৌবা য়াহনখি। কোরোনাগী কর্ফিয়ু অসি লোকেল লেবেলদা থমহনখি।

মাইক্রো কন্তেনমেন্ত জোন থম্বা, লায়েংবগা মরী লৈনবা শিল-লাংবা, হায়রিবা রাজ্যশিংগী অপাম্বশিং অসি ভারত সরকারনা অয়াবা পীখি।

মরুপশিং,

চহি অসিগী জনুৱারী ১৬তগী হৌদুনা এপ্রিল থা লোইবা ফাওবা চত্থখিবা ভারতকী বেক্সিনেসনগী প্রোগ্রাম অসি কেন্দ্র সরকারগী মীৎয়েং মখাদা চত্থখি। মীপুম খুদিংমক্তা লেম্না বেক্সিন ফংহন্নবা লম্বীদা লৈবাক অসিনা মাং থানা চংশিনখি। লৈবাক অসিগী প্রজানসু চৎনা কাংলোন ঙাক্তুনা মখোয়গী মতম য়ৌরকপদা বেক্সিন কাপখি।  মসিগী চৈরক অসিদা, রাজ্য সরকার কয়ানা বেক্সিনগী থবক অসি দী-সেন্ত্রেলাইজ তৌ অমসুং রাজ্যশিংদা শিন্নৌ হায়না অমুক ফোঙদোক্নরকখি। তোঙান-তোঙানবা ৱাখল্লোন থোরকখি। বেক্সিনেসনগীদমক চহি কাংলুপ করিগীদমক খাইদোক্লিবনো? নাকল অমরোমদনা কনাগুম্বনা চহি খাইদোকপা অসি করিগীদমক কেন্দ্র সরকার খক্তনা লেপ্পিবনো হায়নরখি? অহল ওইরবশিং হান্না করিগীদমক বেক্সিনেসন তৌরিবনো হায়বা খোঞ্জেল কয়া থোরকখি? মখল কয়াগী প্রেসর লাকখি, লৈবাক অসিগী মীদিয়াগী শরুক অমনা মসিবু কেম্পেন অমগুম্না চত্থখি

মরুপশিং,

কয়ারক খন্ন-নৈনরবা মতুংদা রাজ্য সরকারশিংন মশাগী মাইকৈদগী হোৎনবা পাম্মি অদুনা মসিদা করিগীদমক কেন্দ্র সরকারনা অথিংবা পীগদোইনো? অমসুং মসিদা করিগীদমক কেন্দ্র সরকারনা অথিংবা পীগদোইনো? হায়না য়ান্নবা পুরকখি। রাজ্যশিংগী অপাম্বশিং অসি য়েংলগা, মখোয়না হায়জরকপগী মতুং ইন্না চাংয়েং ওইনা জনুৱারী ১৬দগী হৌনা চত্থরিবা সিস্তেমদা অহোংবা অমা পুরকখি। রাজ্যশিংনা মসি পাম্বা তারবদি মখোয়দা থবক অসিগী চাদা ২৫ শিন্নরসি, মখোয়দা পীথোক্লসি হায়না ঐখোয়না খনখি। অসুম্না মে ১দগী থবক অসিগী চাদা ২৫ রাজ্যশিংদা শিন্নথোকখি, মখোয়গী ওইবা মওংদা মখোয়না মসি থুংহন্নবা হোৎনখি।

অসিগুম্বা অচৌবা থবক অমদা করম্বা মখলগী শীংনবশিং থেংনবগে হায়বা অদু মখোয়না ৱাখলদা লাকপা হৌখি, মখোয়না খঙলকখি। মালেম পুম্বদা বেক্সিনেসনগী লৈরিবা তশেংবা ফীভম অসিগী মতাংদা রাজ্যশিংনসু খঙলকখি। অমসুং নাকল অমরোমদা মেদা অনিশুবা ৱেব লাকপা, অনিশুবদনা মীয়াম্না বেক্সিন কাপ্পা হেনগৎলকপা অমসুং অহুমশুবদনা রাজ্য সরকারগী শীংনবশিং অসি ঐখোয়না উবা ফংখি। মেগী অনিশুবা চয়োল শুরকপদা রাজ্য খরনা হান্নগী সিস্তেম অদুনা ফবা হেল্লী হায়না ফোঙনা ফোঙদোক্নরকখি। তপ্না-তপ্না রাজ্য সরকার কয়ানা মসিদা য়ানীংলকখি। বেক্সিনগী থবক অসি রাজ্যশিংদা শিন্নথোক্কদবনি হায়না ধাবি তৌরম্বশিংনা মখোয়গী ৱাখল্লোন অদুদা অহোংবা লাকখি। মতম চানা রাজ্যশিংনা ৱাখল খন্থদুনা মাংদা থোরকপা হায়বা অসি অফবা ৱাফম অমা ওইখি। রাজ্যশিংগী অপাম্বা অসিদা ঐখোয়না ইরৈবাকচাশিংদা অৱাবা পীদনবা, মখোয়গী বেক্সিনেসনগী থবক অসি নীংথিজনা চত্থনবা মে ১গী মমাংদা চৎনরম্বা হায়বদি জনুৱারী ১৬তগী এপ্রিল অরোইবা ফাওবা চত্থখিবা সিস্তেম অদু অমুক হন্না চৎনখি।

মরুপশিং,

ঙসি ভারত সরকারনা রাজ্যশিংদা লৈরিবা বেক্সিনেসনগা মরী লৈনবা থবক্কী চাদা ২৫গী থৌদাং অদুসু লৌরগনি হায়না ৱারেপ লৌখ্রে। মসি লাক্কদৌরিবা চয়োল ২দা শেম-শাবা হৌরগনি। চয়োল অনি অসিদা কেন্দ্র অমসুং রাজ্য সরকারশিংনা পুন্না অনৌবা গাইদলাইনগী মতুং ইন্না মথৌ তাবা অদু শেম-শারগনি। মসিগা চান্ননা চয়োল অনিগী মতুং জুন ২১ অসি মালেমগী য়োগগী নুমিৎসি তারি। জুন ২১, নিংথৌকাবা নুমিৎতগী লৈবাক অসিগী রাজ্য খুদিংমক্তা চহি ১৮গী মথক্কী প্রজা পুম্নমক্কীদমক ভারত সরকারনা রাজ্যশিংদা লেম্না বেক্সিন ফংহল্লগনি। বেক্সিন শারিবশিংদগী বেক্সিন পুথোক্লিবা অদুগী অপুনবগী চাদা ৭৫ ভারত সরকার মশামক্না লৈদুনা রাজ্য সরকারশিংদা লেম্না ফংহল্লগনি। হায়বদি লৈবাক অসিগী রাজ্য সরকার অমত্তনা বেক্সিনগীদমক্তা চাদিং তৌহল্লরোই হায়বনি। হৌজিক ফাওবদা লৈবাক অসিগী মীওই করোর কয়াদা বেক্সিন লেম্না ফংহনখ্রে।

হৌজিক্তি চহি ১৯গী মীওইশিংসু মসিদা য়াওশিল্লগনি। ইরৈবাকচা খুদিংমক্কীদমক ভারত সরকারনা লেম্না বেক্সিন ফংহল্লগনি

লায়রবা, লোৱর মিদল ক্লাস, মিদল ক্লাস নত্ত্রগা অপ্পর ক্লাস ওইরবসু ভারত সরকারগী থৌরাং অসোদা লেম্না বেক্সিন কাপহল্লগনি।  হোয়, ঐখোয়না লেম্না বেক্সিন কাপ্পা পামদবা, লনাই হোস্পিতাল অমদা চৎলগা বেক্সিন কাপ্পা পাম্বা মীওইশিংগীদমকসু খন্নখ্রে। লৈবাক অসিদা শারিবা বেক্সিনগী চাদা ২৫ প্রাইবেৎ সেক্তরগী হোস্পিতালশিংনা হকথেংননা লৌবা ফংলগনি, মসিগী সিস্তেম অসি মখা চত্থখিগনি। প্রাইবেৎ হোস্পিতালনা বেক্সিনগী মমল লেপ্লবা মতুংদা দোজ অমদা মেক্সিম্ম সর্ভিস চার্জ লুপা ১৫০ লৌবা য়ারগনি। মসি য়েংশিন্নবগী থবক অসি রাজ্য সরকারদা অদুমক শিন্নগনি।

মরুপশিং,

ঐখোয়গী সাস্ত্রাশিংদা অসুম্না হায়বীরম্মি – প্রপ্যা আপন্দ না ৱ্যেথতে কদাচিত, উধিয়ম অনু ইচ্ছতি চা প্রমত্তা, মসিগী অর্থদি মীথৌ-মীহেনবশিংনা খুদোংথিবা লাকপদা মাই লৈদুনা চেন্দে মদুগী মহুৎ মখোয়না মাইয়োক্নৈ, কন্না হোৎনৈ অমসুং ফীভম অদুদা মাই পাকপা ঙম্মি। কোরোনাগী মায়োক্তা লান্থেংনবদা ভারতমচা করোর ১৩০ হেনবনা হৌজিক ফাওবদা অমনা অমগী মতেং পাংনদুনা, অয়ুক-নুমিংদাং কন্না হোৎনদুনা চৎমিন্নরি। মতুং তারকপদসু ঐখোয়গী হোৎনমল অমসুং মতেং পাংনবা অসি খক্তনা লেম্বী অদুদা পাঙ্গল হাপকনি। ঐখোয়না বেক্সিন কাপ্পগী খোঙজেল য়াংখৎহনগনি অমসুং বেক্সিনেসন কেম্পেনদা হেন্না পাঙ্গল হাপকনি। ঐখোয়না নীংশিংগদবনু, ভারতকী বেক্সিনেসনগী খোঙজেল অসি ঙসিসু মালেমগী চাউখৎলবা অতৈ লৈবাক কয়াদগী হেন্না খোঙজেল য়াংনা চংশিল্লি। ঐখোয়না শেমখিবা তেক্নোলোজী প্লেৎফোর্ম – কোৱিন অসিগী মতাংদা মালেম পুম্বদা খন্ন-নৈনরি। লৈবাক কয়ানা ভারতকী প্লেৎদোর্ম অসি শিজিন্নবা পাম্বগী অপাম্বা ফোঙদোক্নরক্লি। বেক্সিনগী দোজ খুদিংমক কয়াম মরুওই, দোজ অমমমগা পুন্সি অমগা মরী লৈনৈ হায়বা ঐখোয় পুম্বনা উবা ফংলি। কেন্দ্র সরকারনা রাজ্য খুদিংমক্তা চয়োল খরগী মাংঙোইননা মখোয়দা করম্বা মতমদা দোজ কয়াম য়াম্না ফংগনি হায়বা খঙহন্নবা শেম-শাখ্রে। বেক্সিনগী লৈরিবা চাং অদুগী মতুং ইন্না বেক্সিন অসি কাংলোন মপুং ফানা ঙাক্না চৎতুনা কাপ্লবতদা লৈবাক অসিগী প্রজা খুদিংমক্তা য়ৌহনবা ঙমগনি, মসি সরকার খুদিংমক, মীয়ামগী মীহুৎ খুদিংমক, লৈঙাক পাইরিবা খুদিংমক্না অমত্তা ওইনা থৌদাং লৌমিন্নগদবনি।

নুংশিজরবা ইরৈবাকচাশিং,

বেক্সিনেসনগী মথক্তা ঙসি অতোপ্পা অচৌবা ৱারেপ অমা ঐহাক্না লাউথোকচগে। মমাংগী চহিদা কোরোনানা মরম ওইদুনা লোকদাউন থম্বা তাখি মদুদা প্রধান মন্ত্রী গরিব কল্যান অন্ন য়োজনাগী মখাদা থা ৮ ফাওবা ইরৈবাকচা করোর ৮০ হেনবদা লৈবাক অসিনা লেম্না রসন ফংহনখি। হন্দক্কী চহি অসিদসু অনিশুবা ৱেবনা মরম ওইদুনা মে অমসুং জুনগীদমক য়োজনা অসিগী মখাদা ফংহনখি। ঙসি সরকার অসিনা প্রধান মন্ত্রী গরিব কল্যান অন্ন য়োজনা দিপাৱলী ফাওবদা শাংদোক্নবা ৱারেপ লৌখ্রে। লাইচৎকী মতম অসিদা সরকারনা লায়রবশিংগী মথৌ তাবা খুদিংমক্তা মখোয়গীদমক খোংলোই ওইনা লেপ্পী। হায়বদি নবেম্বর ফাওবা ইরৈবাকচা করোর ৮০ হেনবদা থা খুদিংগী লেপথোক্লবা চাংদা লেম্নবা চেং-হৱাইশিং ফংহল্লগনি। থৌরাং অসিগী পান্দমদি ঐহাক্কী লায়রবা ইচিল-ইনাও অমত্তনা মখোয়গী ইমুং-মনুংবু চরা হেলহনদবা হায়বা অসিনি।

মরুপশিং,

লৈবাক অসিদা হোৎনরিবশিং অসিগী চৈরক অসিদা বেক্সিনগী মতাংদা চীংনবা অমসুং তোকঙাশিং শন্দোকপা হেনগৎলক্লি। ঐহাক্না নখোয়দা ৱাফম অসিগী মতাংদা খরা থমজগে। ভারত্তা বেক্সিন পুথোকপগী থবক হৌখিবদগী হৌনা মীওই খরগী অসিগুম্বা ৱাফমশিং অসিনা মীচম প্রজাগী ৱাখলদা চিংনবশিং পোকহল্লি। ভারতকী বেক্সিন শারিবশিংদা থৌনা হন্নবা অমসুং মখোয়দা মখল কয়াগী অপনবশিং পীনবা থৌরাংশিং চত্থখি। ভারতকী বেক্সিন অসি পুথোরকপা মতমদা তোঙান তোঙানবা পাম্বৈশিংগী খুত্থাংদা চিংনবা অমসুং অকি-তুজুংবা পোকহনখি।  বেক্সিন কাপ্তনবা তোঙান তোঙানবা ৱাফম কয়া শন্দোরকখি। লৈবাক অসিনা মখোয়বু উই। বেক্সিনগী মতাংদা চিংনবা পোকহল্লিবা, তোকঙা শন্দোক্লিবা মীওইশিংনা চমজরবা ইচিল-ইনাওশিংগী পুন্সিদা চাউনা শান্নবীরি।

অসিগুম্বা তোকঙাশিং অসিদগী চেকশিনবা মথৌ তাই। ঐহাক্না খুন্নাই অসিগী ৱাখল লৈরবা মীওইশিং, নহারোলশিংনা বেক্সিনগী মতাংদা এৱের্নেস পীবদা হেনগৎনবা মতেং পাংবীয়ু হায়না মীপুম খুদিংমক্তা হায়জরি। হৌজিক মফম কয়াদা কোরোনাগী কর্ফিয়ু অসি কোমথোরক্লি, অদুবু মসিনা ঐখোয়গী ইরক্তগী কোরোনা চৎখ্রে হায়বদি নত্তে। ঐখোয়না চেকশিনবা মথৌ তারি অমসুং কোরোনাদগী ঙাকথোক্নবা চৎনা কাংলোনশিং চেকশিন্না ঙাক্না চৎপা মথৌ তারি। ঐখোয়না কোরোনাগী লাঞ্জং অসিদগী মাই পাকপা ঙমগনি, ভারতনা কোরোনাবু মাইথিবা পীবা ঙমগনি হায়না ঐহাক্না মপুং ফানা থাজবা থম্লি। য়াইফ-পাউজেল অসিগা লোইননা ইরৈবাকচা পুম্নমকপু ঐহাক্না হন্না-হন্না থাগৎচরি। 

*****