ভারতকী প্রধানমন্ত্রী

ঙসি প্রধান মন্ত্রী শ্রী নরেন্দ্র মোদীনা লুচিংদুনা, কেন্দ্র অমসুং রাজ্য সরকারশিং শরুক য়াদুনা, আই.সি.তিদা য়ুম্ফম ওইবা মল্তি-মোদাল প্লেতফোর্ম প্রাগাতি (প্রো-এক্তিব গভর্নান্স এন্দ তাইমলি ইমপ্লিমেন্তেসন) গী ৪৫ শুবা মীফম পাংথোকখ্রে।

মীফম অদুদা হন্না য়েংশিনখিবা মরুওইবা প্রোজেক নিপালগী মনুংদা সহরগী চৎথোক-চৎশিনগী মেত্রো প্রোজেক তরুক অমসুং লম্বীগী প্রোজেক অমা অমসুং থর্মেল পৱারগী প্রোজেক অমা য়াওখি। তোঙান-তোঙানবা রাজ্যশিং/য়ু.তিদা পায়খৎলিবা প্রোজেকশিং অসিগী অপুনবা শেনফম লুপা করোর লাখ ১ হেল্লে।

প্রধান মন্ত্রীনা হায়খি মদুদি কেন্দ্র অমসুং রাজ্য থাক্কী সরকারগী ওফিসিএলশিংনা খঙগদবদি প্রোজেকশিং থিন্থবা অসিনা শেন চঙবা হেনগৎহনবা খক নত্তনা প্রোজেক্কী কান্নবশিং মীয়ামদা ফংহন্দ্রে হায়বা অসিনি।

মীফম মনুংদা, বেঙ্ক অমসুং ইন্সুরেন্স সেক্তরগা মরী লৈনবা মীয়াম্না মায়োক্নবা খুদোংচাদবশিং প্রধান মন্ত্রীনা হন্না য়েংশিনখ্রে। খুদোংচাদবশিং কোকহনবদা মতম য়াম্না লৌদনবা অমসুং অৱাবশিং নিংথিনা কোকহন্নবা প্রধান মন্ত্রীনা তকশিনখ্রে।

মীয়াম্না পাম্নবা মীয়ামগী চৎথোক-চৎশিনগী থবক অমা ওইনা মেত্রো প্রোজেকশিং সহরশিংদা হেন্না পায়খৎলকপা অসি খন্নরদুনা, অফবা থবকশিং তম্নবা মেত্রো প্রোজেকশিং পায়খৎলিবা নত্ত্রগা পায়খৎনবা থৌরাং তৌরিবা সহরশিংদগী মখোয়না খঙবশিং শরুক য়ানবা ৱার্কশোপশিং পাংথোক্নবা প্রধান মন্ত্রীনা পাউতাক পীখ্রে।

মীফম মনুংদা, প্রোজেকশিং পায়খৎলিঙৈদা শোকহল্লবা ইমুংশিং মতম চানা খুন্দা-লৈতানবা থবকশিং পায়খৎপগী মরুওইবা প্রধান মন্ত্রীনা ফোঙদোকখ্রে। অসিগুম্বা ইমুংশিং হিংবদা লাইনবা অনৌবা মফমদা অফবা খুদোংচাবশিং পীনবা প্রধান মন্ত্রীনা মখা তানা খঙহনখ্রে।

প্রধান মন্ত্রীনা পি.এম সুর্য়া ঘর মুফ বিজলি য়োজনাশু হন্না য়েংশিনখ্রে। অফবা ভেন্দরগী সিস্তেম অমা শেমগৎতুনা রাজ্যশিং/য়ু.তিশিংদা য়ুম মথক্ত সোলার পেনেলশিং থম্বা হেনগৎহন্নবা মহাক্না পাউতাক পীখ্রে। রুপতোপ সোলার থম্নবা হায়রকপদগী হৌরগা থবক ওইনা পাংথোকপা ফাওবদা চঙবা মতম হন্থহন্নবা মহাক্না পাউতাক পীখি। তাঙ্কক নাইনা খুঙ্গংশিং, তাউনশিং অমসুং সহরশিংদা মপুংফানা পায়খৎনবা রাজ্যশিংদা মহাক্না খঙহনখ্রে।

প্রাগাতিগী ৪৫শুবা মীফম ফাওবদা, লুপা করোর লাখ ১৯.১২ রোমগী প্রোজেক ৩৬৩ হন্না য়েংশিনখ্রে।

***