ভারতকী প্রধানমন্ত্রী

ঙসি নিউ দিল্লিদা প্রধান মন্ত্রী শ্রী নরেন্দ্র মোদীনা রাস্ত্রিয়া বাল পুরুস্কার ফংলবা অঙাং ১৭ গা ৱারি শানখ্রে। মনাশিং অদু থৌনা ফবা, ইন্নোবেসন, সাইন্স অমসুং তেক্নোলোজি, শান্নবা অমসুং কলাগী হিরমশিংদা পীবনি।

ইচম চম্না ৱারি শানবা অদুদা, প্রধান মন্ত্রীনা অঙাংশিংগী পুন্সি ৱারিশিং তাখি অমসুং মখোয়গী পুন্সি কন্না হোৎননবা পুক্নিং থৌগৎখি। অইবী নুপীমচা অমগা ৱারি শানখি অমসুং মহাক্কী লাইরিকশিংগী মহাক্না ফংখিবশিংগী মতাংদা খন্নখি, অতোপ্পা মীওইশিং মখোয় মশাগী লাইরিকশিং ইবা হৌরে হায়না নুপীমচা অদুনা পাউখুম পীখি। অতোপ্পা অঙাংশিং ইথিল পীবগীদমক শ্রী মোদীনা মহাক থাগৎপা ফোঙদোকখি।

তোঙান-তোঙানবা লোলশিং ঈশৈ ফজনা শকপা অঙাংশিংগা প্রধান মন্ত্রীগা ৱারি শানখি। শ্রী মোদীনা নুপামচা অমগী ত্রেনিংগী মতাংদা হংবদা, মহাক্না হায়খি মহাক ত্রেনিং তৌরকখিদে অমসুং মহাক লোল মরি হায়বদি হিন্দী, ইংলিস, উর্দু অমসুং কাস্মিরিদা ঈশৈ শকপা ঙম্মী। মহাক মশাগী য়ুতুব চেনেল লৈরে অমসুংআ থৌরমশিংদা ঈশৈ শক্লে হায়না মহাক্না ফোঙদোকখি। প্রধান মন্ত্রীনা নুপামচা অদুগী হৈথোই-শিংথোইবা অদুগীদমক থাগৎপা ফোঙদোকখি।

প্রধান মন্ত্রীনা চেস শান্নরোয় অমগা ৱারি শানখি অমসুং মহাক কনানা চেস শান্নবা তাকপীবগে হায়না হংখি। মহাক্কী মপাদগী অমসুং য়ুতুব চেন্নেলশিং য়েংদুনা চেস শান্নবা তমখি হায়না অঙাং অদুনা পাউদমখি।

২৫শুবা কার্গিল বিজয় দিবস শরুক য়ানবা নুমিৎ ১৩ দা লাদাখকী কার্গিল ৱার মেমোরিএলদগী নিউ দিল্লিগী নেসনেল ৱার মেমোরিএল ফাওবা সাইকল থৌরকখিবা অতোপ্পা অঙাং অমগী মাইপাকপশিং প্রধান মন্ত্রীনা তাখি। নুপামচা অদুনা হায়খি চহি অনিগী মমাংদা, অজাদি কা অমৃত মহোৎসব অমসুং নেতাজি সুভাস চন্দ্র বোসকী ১২৫ শুবা মপোক নুমিৎ শরুক য়ানবা নুমিৎ ৩২ দা কিমি ২৬১২ গী অরাপ্পা মহাক হান্না মনিপুরগী আই.এন.এ ৱার মেমোরিএল, মোইরাংদগী নিউ দিল্লিগী নেসনেল ৱার মেমোরিএল ফাওবা থৌখ্রে। মহাক নোংমদা কিমি ১২৯.৫ সাইক থৌখি হায়না নুপামচা অদুনা প্রধান মন্ত্রীদা পাউদমখি।

মিনিত অমদা সেমি-ক্লাসিকেল দান্স স্পিন ৮০ পাংথোকখিবা অমসুং মিনিত অমদা  সংস্কৃত শ্লোগ ১৩ থিখিবা অমসুং অনিমক অসি য়ুতুব ভিদিওশিং য়েংলগা তমখিবা মালেমগী রেকোর্দ অনি থমখিবা নুপীমচা অমগা প্রধান মন্ত্রীগা ৱারি শানখি।

জুদোদা জাতি থাক্কী সনাগী মেদল ফংলবী নুপীমচা অমগা প্রধান মন্ত্রীগা ৱারি শানখি অমসুং ওলেম্পিক্সতা সনাগী মেদল অমা ফংনবা নুপীমচা অসিগী অনিংবদা প্রধান মন্ত্রীনা মহাক্কী য়াইফ-পাউজেল পীখি।

পার্কিসন দিজিজ লৈরবা অনাবশিংগী মশা মরোমদোম লেংদনা লৈজবা স্পুন অমা শেমখিবা নুপীমচা অমা প্রধান মন্ত্রীগা ৱারি শানখি অমসুং মহাক্না ব্রেনগী চহি তাকপা নমুনা অমসু পুথোকখি। মহাক চহি অনি থবক তৌরকখি অমসুং হিরম অসিদা মখা তানা থিজিন্নিংবগী অপাম্বা লৈরি হায়না মহাক্না প্রধান মন্ত্রীদা ফোঙদোকখি।

কর্নাতিক ঈশৈ অমসুং সংস্কৃত শ্লোগশিং য়ানশিন্নবা হরিকথা শৈরেংগী পর্ফোমেন্স ১০০ পাংথোকপা নুপীমচা কলাকার অমা তারবা মতুংদা প্রধান মন্ত্রীনা মহাক থাগৎপা ফোঙদোকখি।

হৌখিবা চহি অনিদা লৈবাক ৫ গী চীংদোল ৫ কাখিবী নুপীমচা অমগা প্রধান মন্ত্রীগা ৱারি শানখি অমসুং মহাক্না ভারতমচা অমা ওইনা অতোপ্পা লৈবাকশিংদা চৎপদা থেংনখিবা থৌদোকশিংগী মতাংদা নুপীমচা অদুদা প্রধান মন্ত্রীনা হংখি। নুপীমচা অদুনা হায়খি মহাক্না মীয়ামগী নুংশিবা য়াম্না ফংখি। মহাক্না চীং কাবগী মরুওইবা পান্দমদি নুপীমচাশিংদা শক্তি পীবা অমসুং হকচাং ফানা লৈবা পুক্নিং থৌগৎনবনি।

চহি অসিদা নিউ জিলেন্দা পাংথোকখিবা রোল্লর স্কেতিং থৌরম অমদা মালেমগী সনাগী মেদল অমা ফংলকখিবী অমসুং জাতি থাক্কী মেদল ৬ ফংলবী নুপীমচা অমগী ৱারিশিং প্রধান মন্ত্রীনা তাখি। থা অসিদা থাইলেন্দা পাংথোকখিবা চাংদম্নবা অমদা সনাগী মেদল অমা ফংলকখিবী পেরা-এথলেত নুপীমচা অমগী মাইপাকপগী ৱারিশিং প্রধান মন্ত্রীনা তাখি। ৱার্ল্দ রেকোর্দ অমগা থম্বগা লোয়ননা ৱেথলিফতিং চেম্পিয়নশিপশিংদা সনাগী মেদলশিং ফংলবী নুপীমচা অমগী ৱারিশিং প্রধান মন্ত্রীনা তাখি।

বিল্দিং অমা মৈ চাক্লকপদা মীওই কয়া কনখিবা অতোপ্পা নুপামচা অমগী ৱারি প্রধান মন্ত্রীনা তাখি। ঈরোইবদা অতোপ্পা মীওইশিং ইরাক্নবদগী কনখিবা নুপামচা অমগী ৱারিশু প্রধান মন্ত্রীনা তাখি।

প্রধান মন্ত্রীনা নহারোলশিং থাগৎপা ফোঙদোকখি অমসুং মখোয়গী তুংগী থবক-থৌরমশিংগীদমক মখোয়দা য়াইফ-পাউজেলশু পীখি।

***