ভারতকী প্রধানমন্ত্রী

মধ্য প্রদেশকী মন্দলাদা পাংথোকপা মীয়ামগী মীফম অমদা ঙসি প্রধান মন্ত্রী শ্রী নরেন্দ্র মোদীনা রাষ্ট্রীয় গ্রাম স্বরাজ অভিয়ান হৌদোকখ্রে। মথংগী চহি মঙাগী ওইবা ত্রাইবেলশিংগী অপুনবা চাউখৎ-থৌরাংগীদমক রোদ মেপ অমা মহাক্না মায়খুম হাংদোকখ্রে।

মন্দলা জিলাগী মনেরীদা মহাক্না ইন্দিয়ন ওইল কোওপরেসনগী এল পি জি বোতলিং প্লান্ত অমা উরেপ উয়ুং তমখ্রে। মহাক্না লোকেল গবর্নমেন্ত দাইরেক্তোরী অমসু হৌদোকখ্রে।

মৈখু চেন্দবা চাকখুম চাদা চাম্মা, মিসন ইন্দ্রধনুশকী মখাদা চাদা চাম্মা তিকা থাবা অমসুং সৌভাগ্য স্কিমগী মখাদা চাদা চাম্মা মৈ ফংহল্লিবা খুঙ্গংশিংগী সর্পঞ্চশিংবু প্রধান মন্ত্রীনা তরাম্না ওকখি।

মধ্য প্রদেশকী মন্দলাদা লৈবাক্কী মফম কয়াদগী লাক্লিবা পঞ্চয়াতী রাজগী মীহুৎশিংগী মফমদা ৱা ঙাংলদুনা প্রধান মন্ত্রীনা মহাত্মা গান্ধীগী গ্রামোদয়দগী রাষ্ট্রোদয় অমসুং গ্রাম স্বরাজ অদু নৌহৌনা নীংশিংখি। লৈবাক অসিগী পঞ্চায়তী রাজ নুমীৎকী তঞ্জা অসিদা মধ্য প্রদেশতা লাকপা ফংজবা অসিদা নুংঙাইবা ফাওই হায়না মহাক্না হায়খি। মহাত্মা গান্ধীনা মতম পুম্নমক্তা খুঙ্গংশিংগী মরুওইবা অদুদা অকনবা ৱাফমশিং থম্বীরম্মি অমদি ‘গ্রাম স্বরাজকী’ মরমদা ঙাংবীরম্মি হায়না মহাক্না মখা তাখি।

খুঙ্গংগী চাউখৎ-থৌরাংগী ৱাফম লাকপা মতমদা বজেৎ অসি মরু ওইরকই হায়না প্রধান মন্ত্রীনা ফোংদোকখি। অদুবু, হৌখিবা চহি খরা অসিদা মসিগা মরি লৈননা অহোংবা খরা লাক্লে হায়না মহাক্না মখা তাখি।

মহাক্না মীয়ামদা মখোয়গী অঙাংশিংগী মহৈ মশিং তম্বদা মীৎয়েং থম্নবা অকনবা ৱাফম থমখি। মখোয়গী অঙাংশিংগী তুংগীদমক মসি তৌদবা য়াদবনি হায়না মহাক্না মখা তাখি।

প্রধান মন্ত্রীনা লৌউ-শিংউগী লমদা সেল্ফ-রিলাইন্সকী মায়কৈদা হোৎননবা অকনবা ৱাফম থমখি। পঞ্চায়ৎকী মীহুৎশিংনা ঈশিং য়োকশিনবদা পুক্নীং চংনবা অমদি ইরিক খুদিংমক য়োক্তুনা থম্নবা তকশিনখি।

শ্রী নরেন্দ্র মোদীনা হুন্দোক্লবা ফৎত-হাওদিবু ইনর্জীদা ওন্থোকপদা নত্তনা ফাইনান্সিয়েল ইনক্লুজনগীদমক জন ধন য়োজনা; ত্রাইবেল কম্যুনিতীশিংদা শক্তি শিন্ননবগীদমক বন ধন য়োজনা; অমসুং লৌমীশিংগী অহেনবা সেল্ফ-রিলাইন্সকীদমক গোবর-ধন য়োজনাগী মরুওইবা অদু পনখি।

কেন্দ্র সরকারনা পায়খৎলিবা অনৌবা খোংথাংশিং অসিনা নুপীগী ঙাক-শেলদা মখা তানা কান্নবা ফংহল্লগনি হায়নসু প্রধান মন্ত্রীনা হায়খি।