ভারতকী প্রধানমন্ত্রী

প্রধান মন্ত্রীনা রাজকোতকী অতকোত্তা নৌনা শাখিবা মাতুশ্রী কে.দি.পি. মলতিস্পিসিএলিতী হোস্পিতালদা ঙসি চৎখ্রে। হোস্পিতাল অসি শ্রী পতেল সেবা সমাজনা শেন্নবনি। মসিনা হাই-এন্দ মেদিকেল ইক্বিপমেন্ত ফংহনবগা লোয়ননা লমদমসিগী মীয়ামদা মালেমগী থাক্তা লাইয়েংবগী খুদোংচাবসু পীগনি। গুজরাতকী মুখ্য মন্ত্রী, শ্রী ভুপেন্দ্রভাই পতেল, কেন্দ্র মন্ত্রী, শ্রী পর্শোত্তম রুপালা, দাঃ মনশুখ মন্দাবিয়া, দাঃ মহেন্দ্র মুঞ্জাপারা, পার্লিয়ামেন্তকী মেম্বর, গুজরাত সরকারগী মন্ত্রী অমসুং সন্ত সমাজকী মেম্বরশিংনা ঙসিগী থৌরমদা শরুক য়াখি।

প্রধান মন্ত্রীনা ঙসি তিনখিবা মীয়ামদা ৱা ঙাঙবদা হোস্পিতাল অসি শঙ্গাবদা মহাক্না নুংঙাইবা ফাওই হায়না ফোংদোকখি। হোস্পিতাল অসি সাউরাস্ত্রাগী হকশেলগী সেবা হেন্না ফগৎহন্নবনি হায়না মহাক্না হায়খি। মসিগী হোস্পিতাল অসিদি মীয়ামগী পুন্সি কন্নবা হোৎনবগী পান্দমগা লোয়নবা সরকার অমসুং লন্নাইগা খুৎশম্নবগী খুদম অমনি।

এন.দি.এ. সরকারনা চহি ৮ মায় পাক্না মপুং ফারকপা অসিদা প্রধান মন্ত্রীনা মীয়াম্বু মহাক্কী মফমদা লৈবাক সেবা তৌনবা খুদোংচাবা পীবগীদমক্তা থাগৎপা ফোংদোকখি। মমালৈবাক্কী সেবাগী চহি ৮ মপুং ফারকপা মতমদা মহাক্না গুজরাত্তা লৈবা ফংবসি য়াম্না নুংঙাইবা ৱাফম্নি হায়না মহাক্না ফোংদোকখি। মহাক্কী মফমদা লৈবাক সেবা তৌবগী খুদোংচাবা অমসুং ‘সন্সকার’ পীবীবগীদমক্তা মহাক্না গুজরাত মীয়ামগী মমাংদা কোক নোনখি। মসিগী সেবা অসিদি ঐখোয়গী চৎনবী, ঐখোয়গী লৈবাক্কী চৎনবী, অমদুং বাপু অমদি পতেলগী চৎনবীদা য়াওরবনি হায়না মহাক্না হায়খি। লৈবাক অসিদা ইকায়বা নংহনগদবা অরানবা থবক অমত্তা হৌখিবা চহি ৮দা লৈবাক অসিদা পাংথোকখিদে হায়না মহাক্না হায়খি। চহিশিং অসিদা লাইরবগী ‘সেবা’, ‘সুহাসন’ অমসুং ‘গরীব কলয়ান’দা খ্বাইদগী অহেনবা মিৎয়েং চঙখি। সবকা সাথ, সবকা বিকাস, সবকা বিশ্বাস, সবকা প্রয়াসকী মন্ত্রনা লৈবাক চাউখৎপগী শাফু পীখি হায়না মহাক্না মখা তাখি।

নুংশিজরবা বাপু অমসুং সর্দার পতেলনা লাইরবা, দলিত, শোত্থরবা, ত্রাইবেল অমসুং নুপীশিংগী মপাঙ্গল হাপ্পগী মঙলান মঙলমখি হায়না প্রধান মন্ত্রীনা ফোংদোকখি। স্বচ্ছতা অমসুং স্বস্থনা লৈবাক্কী ৱাখল্লোনগী শরুক ওইবা ভারত অমগী মঙলান। স্বদেশি ওইবা ৱারোইশিনশিংনা মপাঙ্গল লৈহনবা শেন্মিৎলোন লৈবা ভারত অমা বাপুনা পাম্লম্মি হায়না প্রধান মন্ত্রীনা হায়খি। ইমুং করোর ৩ হেনবগী পক্কা য়ুম লৈরে, ইমুং করোর ১০ হেনববু মপান্দা অমাংবা তৌবদগী মনিং তমহল্লে, ইচে-ইচল করোর ৯ হেনববু চাকখুমগী মৈখুদগী কল্লে, ইমুং করোর ২.৫ হেনবনা মৈ ফংলে, ইমুং করোর ৬ হেনবনা ময়ুমদা তোতি ঈশিং ফংলে অমসুং বেনিফিশরী করোর ৫০ হেনবনা লুপা লাখ ৫ ফাওবগী হেল্থ কভরেজ লেম্না ফংলে হায়না মহাক্না পাউদমখি। হায়রিবশিং অসি শুপ্নগী মশিং নত্তে, মসিদি ঐখোয়গী লৈবাক্কী সেবাগী মনুংদা লাইরবশিংগী পুন্সিদা ইকায় খুম্নজবা লাক্নবা ঐখোয়না খোঙফম চেৎনা হোৎনখিবগী খুদম্নি হায়না মহাক্না হায়খি।

চহি ১০০গী মনুংদা অমুকখক থোকপা শাথীরবা লাইচৎ মনুংদা লাইরবশিংনা মশাগী পুন্সিদা খুদোংচাদবা থেংনহন্দনবা থবক পায়খৎখি হায়না প্রধান মন্ত্রীনা ফোংদোকখি। মখোয়গী জন ধন বেঙ্ক একাউন্ততা শেল হাপখি, লাইরবশিংদা গ্যাস সিলিন্দর লেম্না পীখি অমসুং তেস্তিং তৌবা অমসুং ভেক্সিন কাপ্পগী থৌওংগী মীয়ামগীদমক্তা লেম্না পাংথোকখি।

হৌজিক লান শোক্নবা মতমদসু, ঐখোয়না মীয়ামগী পুন্সি নুংঙাইহন্নবা হোৎনরি হায়না প্রধান মন্ত্রীনা হায়খি। মহাক্কী সরকারনা স্কিমশিংগী সেচ্যুরেসনগী থাক য়ৌনবা হোৎনরি হায়না মহাক্না হায়খি। মীওই খুদিংনা মশাগী ফংফম থোকপা ফংলবা মতমদদি, শেঞ্জা থুমজা নত্ত্রগা অচান মীরাই নাইবগী ৱাফম অমত্তা লৈরোই হায়না মহাক্না মীয়ামগী পুক্নিং চিংশিনখি। অসিগুম্বা হোৎনরিবা কয়ানা লাইরবা অমসুং মিদ্দল ক্লাসকী পুন্সি লাইহনগনি হায়না মহাক্না হায়খি।

প্রধান মন্ত্রীনা গুজরাতীদা ৱা ঙাঙলদুনা, পতেল খুন্নাইবু মীয়ামগী সেবাগীদমক্তা শক্নাইবা থবক পাংথোকপগীদমক্তা থাগৎপা ফোংদোকখি। মহাক্না গুজরাতকী মুখ্য মন্ত্রী ওইরিঙৈগী মতম নিংশিংলদুনা, প্রধান মন্ত্রীনা ইং ২০০১দা গুজরাত মীয়াম্না মহাক্কী মফমদা মখোয়গী সেবা তৌবা ফংবগী খুদোংচাবা পীবা মতমদা, গুজরাত্তা শুপ্নগী মেদিকেল কোলেজ ৯ লৈরম্মি, অদুবু হৌজিক্তি রাজ্যসিদা মেদিকেল কোলেজ ৩০ লৈরে হায়না ফোংদোকখি। “ঐহাক্না গুজরাত অসুং লৈবাক্কী জিলা খুদিংদা মেদিকেল কোলেজ অমমম লৈবা উবা পাম্মি। ঐখোয়না কাংলোন শেমদোকখ্রে অমসুং হৌজিক্তি মেদিকেল অমদি ইঞ্জিনিয়রিং মহৈরোইশিংনা মমালোলদা মহৈ তম্বা য়ারগনি”, হায়না মহাক্না ফোংদোকখি।

ইন্দস্ত্রীগী মতাংদা ৱা ঙাঙবা মতমদা, শ্রী মোদীনা হান্নগী মতমদা ইন্দস্ত্রীশিং অসি বদোদরাদগী বাপী ফাওবা খক্তদা উবা ফংলম্মি, হৌজিক্তি গুজরাতকী মফম খুদিংদা ইন্দস্ত্রী লৈরে হায়না ফোংদোকখি। হাইৱে পাকথোক্লে অমসুং এম.এস.এম.ই.না গুজরাতকী অচৌবা পাঙ্গল ওইরে। ফার্মাস্যুতিকেল ইন্দস্ত্রীসু য়াম্না থুনা চাউখৎলক্লি। সাউরাস্ত্রাগী শক্তাক অসিদি মসিগী মীয়ামগী থৌনা লৈবা লিচৎ-শাজৎনি হায়না মহাক্না হায়খি।

প্রধান মন্ত্রীনা মশাগী ওইবা ৱাফম ফোংদোক্লদুনা, মহাক্না লাইরবা করিনো খঙই, য়ুমগী নুপীশিংনা শেল লৈতবদগী অমসুং ইমুংনা হেন্না অৱাবা তাবা তারে খন্দুনা মশাগী অনাবা লোৎশিন্দুনা অমসুং লাইয়েংদনা লৈবগী মতৌসু মহাক্না খঙই ফোংদোকখি। “ঙসিদি, মমা অমত্তনা লাইয়েংদনা তোকহল্লোই হায়না খোঙফম চেৎপা অদোমগী ইচানুপা অমা দিল্লীদা লৈরবনি। মসিনা মরম ওইরগা, ঐখোয়না পি.এম.জে.এ.ৱাই. হৌদোক্লিবনি”, হায়না মহাক্না হায়খি। মান্নবা ওইনা, হিদাক হোঙনা ফংহন্নবা জন ঔশধী কেন্দ্র লৈরি অমসুং মালেমগী য়োগ নুমিৎসু মীয়াম খুদিংগী হকশেল ফনবগীদমক্তা পাংথোক্লি হায়না প্রধান মন্ত্রীনা মহাক্কী ৱারোল লোইশিনখি।

***