ভারতকী প্রধানমন্ত্রী

ব্রাজিলগী রিও দে জেনিরোদা পাংথোক্লিবা জি-২০ মীফমগী নাকলদা ঙসি প্রধান মন্ত্রী শ্রী নরেন্দ্র মোদীনা য়ুনাইতেদ কিংদমগী প্রধান মন্ত্রী কৈর স্তারমর উনখ্রে। হন্দক্কী অসিনা প্রধান মন্ত্রী অনিগী মরক্তা উনবা অহানবনি। মহাক্না ওফিস পায়রকপদা প্রধান মন্ত্রী মোদীনা প্রধান মন্ত্রী স্তারমর থাগৎপা ফোঙদোকখ্রে। মহাক্কী পুৱারি ওইরবা অহুমলকশুবা ওফিস পায়রকপদা প্রধান মন্ত্রী স্তারমরনা প্রধান মন্ত্রী মোদীগী মফমদা য়াইফ-পাউজেল পীখ্রে।

লৈবাক অনিগী মরীশিং ফিবম ফগৎলকপদা অপেনবা ফোঙদোক্লদুনা, শেন-থুম, ললোন-ইতিক, অনৌবা তেক্নোলোজিশিং, রিছার্স অমসুং ইন্নোবেসন, গ্রিন ফাইনান্স অমসুং মীগা মীগা লৈনবা মরীশিংদা মীৎয়েং থম্বগা লোয়ননা ইন্দিয়া-য়ু.কে কমপ্রেহেন্সিপ স্ত্রাতেজিক পার্তনরশিপ মপাঙ্গল কনখৎহন্নবা প্রধান মন্ত্রীশিংনা মখোয়গী থাজবা অমুক হন্না পীনখ্রে। মখোয়না মালেম অমসুং লমদম লমদমগী ওইবা ৱাফমশিং য়াওনা লৈবাক অনিনা দরকার ওইবা ৱাফমশিং খন্নখ্রে।

অথুবা মতম অমদা ফ্রি ত্রেদ এগ্রিমেন্তগী ৱারি শান্নবা মখা চৎথবগী মরুওইবা অদু লুচিংবা অনিনা খন্নখ্রে অমসুং থোং মান্নবা অমসুং নাকল অনিমক খুদোংচাবা ফংনবা, লৈবাক অনিমক্না য়ানবা পুরক্নবা লেমহৌরিবা ৱাফমশিং খন্ননবা মরুওইবা থৌদাং লৌরিবা কাংবুগী থবকশিংদা মখোয়না থাজবা ফোঙদোকখ্রে অমসুং ফ্রি ত্রেদ এগ্রিমেন্তদা থাজবা থমখ্রে।

লৈবাক অনিগী শেন-থুম অমসুং ললোন-ইতিক্কী মরীশিং চাউখৎলক্লিবা অসি য়েংলগা লৈবাক অনিগী মরক্তা মখা তানা থবক তৌমিন্ননবা খুদোংচাবশিং মরাংকাইনা লৈরিবা অসি খঙলদুনা অমসুং য়ু.কেদা লৈরিবা ভারতমচাশিংগী কন্সুলারগী দরকার ওইবশিং হেন্না ফংহন্নবা মীৎয়েং অমগা লোয়ননা, য়ু.কেগী বেলফাস্ত অমসুং মানচেস্তরদা ভারতকী অনৌবা কন্সুলেতশিং লিংখৎনবা প্রধান মন্ত্রী মোদীনা লাউথোক্লে। লাউথোকখিবা অদু প্রধান মন্ত্রী স্তারমরনা তরাম্না ওকখ্রে।

শেন-থুমগা মরী লৈনবা অরানবা থবকশিং তৌরম্লগা ভারত্তগী য়ু.কেদা লৈরবা মীওইশিংগী ৱাফমশিং প্রধান মন্ত্রী মোদীনা পুখৎখ্রে। য়ুম হোংলকপা অমসুং চৎথোক-চৎশিনগা মরী লেনবা ৱাফমশিং খুমাঙচাউশিনহনবগী মরুওইবা অদু লুচিংবা অনিনা য়ানখ্রে।

ইন্দিয়া-য়ু.কে কমপ্রেহেন্সিপ স্ত্রাতেজিক পার্তনরশিপকী মখাদা য়ানখিবশিং য়াংনা থবক ওইনা পাংথোক্নবা থবক তৌনবা লুচিংবা অনিনা মখোয়গী মিনিস্তরশিং অমসুং সেনিয়র ওফিসিএলশিংদা পাউতাক পীখ্রে। মখা তানা য়াম্না তোইনা ৱারি শানবা অমসুং খন্ন-নৈনবশিং পাংথোক্নবা মখোয়না থাজবা পীনখ্রে।

***