ভারতকী প্রধানমন্ত্রী

য়োর এক্সিলেন্সী, ঐহাক্কী মরূপ রাস্ত্রপতি সোলিহ

ইচল–ইচে অমসুং ইচিল–ইনাওশিং

ঐহাক্কী অনিরক শুবা ওফিস পায়রকপগী অহানবা মপাল লমগী খোংচৎতা অদোমগী নীংথিজরবা লমদম মালদীবতা লাকপগী খুদোংচাবা ফংজবা অসিদা ঐহাক্না নুংঙাইবা ফাওই।

ঐহাক্কী য়াম্না নক্নবা মরূপ ওইরিবা অদোমগা ঐহাক্না অমুক হন্না উনজবগী তাঞ্জা ফংজবা অসিসু নুংঙাইবা ৱাফম অমনি।

তঞ্জা অসিগীদমক অমদি অদোম্না তরাম্না ওকপীরিবা অসিগীদমক ঐহাক্কী তীম অমসুং ঐহাক্কী মায়কৈদগী অদোম অমদি মালদীব সরকারবু থমোই শেংনা থাগৎচরি।

নুমিৎ খরগী মমাংদা ঐখোয়গী লৈবাক অনিমক্না ইদকী কুমহৈ হরাও তয়াম্না পাংথোকখি।

শেংলবা থৌরম অসিগী মশেক মঙাল অদুনা ঐখোয়গী মীয়ামগী পুন্সিদা মতম পুম্নমক্তা ঙালহনবা ওইরসনু হায়না ঐহাক্না য়াইফ–পাওজেল পীজরি।

এক্সিলেন্সী,

ঙসি ঐহাকপু মালদীবকী খ্বাইদগী ৱাংলবা ইকায় খুম্নবা অদু পীনবিদুনা ঐহাক খক্তা নত্তনা ভারত পুম্ববু অনৌবা মিংচৎ অমা পীনবীরে।

নিশান ইজ্জুদ্দীনগী ইকায় খুম্নবীবা অসি ঐহাক্কী ওইনা হরাওনীংঙাই অমদি চাউথোকচনীংঙাইনি। মসি ঐহাক খক্তা নত্তনা লৈবাক অনিগী মরক্তা লৈরিবা মরূপ ওইবা অমদি অচেৎপা মরীবু ইকায় খুম্নবীবনি।

ঐহাক্না মসিবু য়াম্না নোলুক্না অমদি তৌবীমল খঙবা উৎপগা লোইননা ভারত মীয়ামগী মায়কৈদগী তরাম্না লৌশিঞ্জরি।

ঐখোয়গী লৈবাক অনি অসি ভারত মহাসাগরগী ইথক ইপোম্না চহী লিশিং কয়াদগী অচেৎপা পুৱারী অমদি কলচরগী মরীনা পুন্দুনা থম্লি।

মসিগী অচেৎপা মরূপ ওইবগী মরী অসিনা অৱাবা মতমদা ঐখোয়বু লমজিংবীরি।

১৯৮৮দা মপাল লৈবাক্তগী লান্দারপকপা ওইগেরা নত্ত্রগা সুনামীগুম্বা মহৌশানা থোকহনবা মাংহন তাকহনবা ওইগেরা নত্ত্রগা হন্দক্তা থোকখিবা ঈশিংগী অৱাবা ওইগেরা। ভারতনা মতম পুম্নমক্তা মালদীবকীদমক লেপখি অমদি তেংবাংগীদমক খ্বাইদগী মাংজিল থানা চংশিনখি।

মরূপশিং,

ভারত্তা পর্লিয়ামেন্তকী মীখল অমদি মালদীবতা রাস্ত্রপতি অমদি মজলিসকী মীখলশিংনা ঐখোয়গী লৈবাক অনিমক্কী মীয়াম্না তংদু–লৈতাবা অমদি চাউখৎপা পাম্মি হায়বদু ময়েক শেংনা উৎলরে। মসিদা পিপল–সেন্ত্রিক অমসুং ইনক্লুসিব গ্রোথ অমদি অফবা গোবর্নান্সকী ওইবা ঐখোয়গী থৌদাং অদু য়াম্না মরু ওইরি।

হৌজিক ঐহাক্না রাস্ত্রপতি সোলিহগা লোয়ননা য়াম্না মরু ওইবা অমদি কান্নরবা ৱাফমশিং খন্ন–নৈনখ্রে। ঐখোয়না ঐখোয়গী ওইবা কান্নগদবা লমশিং অমদি মালেমগী ওইবা হিরমশিংগা লোয়ননা ঐখোয়গী লৈবাক অনিগী ওইবা তেংবাংদা মমুৎ তানা খন্ন–নৈনখি।

রাস্ত্রপতি সোলিহ, অদোম্না ওফিস পায়রবা মতুংদগী লৈবাক অনিগী ওইবা তেংবাংগী খোংজেল অমসুং মায়কৈদা চাউনা অহোংবা লাক্লে। ২০১৮গী দিসেম্বর থাদা লাকখিবা অদোমগী ভারত খোংচৎ মনুংদা লৌখিবা ৱারেপশিং অদু চেৎনা অমদি মতম চানা পায়খৎলে।

মরূপশিং,

রাস্ত্রপতি সোলিহগী ভারত খোংচৎ মনুংদা লাওথোকখিবা দোলর বিলিয়ন ১.৪গী শেলগী তেংবাং অদুনা হৌজিক হৌজিক দরকার ওইরিবা মালদীবকী শেল–থুমগী অৱাৎপা অদু মেনখৎলে। মদুগা লোয়ননা সোসিয়েল ইম্পেক্তকী অনৌবা প্রোজেক্ত কয়া অমা হৌদোক্লে। অমদি দোলর মিলিয়ন ৮০০গী লাইন ওফ ক্রেদিৎকী মখাদা চাউখৎ থৌরাংগী অনৌবা লম্বীসু হাংদোক্লে।

ভারত অমসুং মালদীবকী মরক্তা দিবেলপমেন্ত পার্তনরশিপ মখা তানা চেৎশিলহন্নবগীদমক ঐখোয়না মালদীবকী মীচম প্রজাশিংদা কান্নবা ফংহনগদবা প্রোজেক্তশিংদা মিৎয়েং থম্লি।

ঙসি ঐখোয়গী লৈবাক অনিগী ওইবা তেংবাংনা মালদীবকী মীচম প্রজাশিংগী পুন্সি মহিংগী মওং–মতৌ পুম্নমক্তা মমি তারি।

● তোঙান–তোঙানবা ইথৎশিংদা ঈশিং অমসুং সেনিতেসনগী খুদোংচাবা;
● স্মোল স্কেল ইন্দস্ত্রীশিংগীদমক মতিক চাবা শেলগী তেংবাং;
● হিথাংফমশিং শেমগৎপা;
● কনফরেন্স অমদি কম্যুনিতী সেন্তরশিং শেমগৎপা;
● ক্রিকেৎ স্তেদিয়ম শেমগৎপা
● খুদক্কী ওইবা অনা–লায়েংগী সর্বিসশিং;
● এম্বুলেন্স সর্বিস;
●  কোস্তেল সেক্যুরিতী ফংহনবা;
● আউৎদোর ফিৎনেস ইক্বিপমেন্তশিং ফংহনবা;
● দ্রগ দিতোক্স সেন্তর;
●  মহৈরোইশিংগী ফেরী;
● লৌউ–শিংউবা অমসুং ঙা য়োকপা;
● রিন্যুয়েবল ইনর্জী অমদি তুরিজম;

অসিগুম্লবা মশিং য়াম্লবা ভারতকী তেংবাংগী প্রোজেক্তশিংনা মালদীবকী মীয়ামদা কান্নবা ফংহল্লে।

ঐখোয়না অদ্দুদা ইনফ্রাস্ত্রকচর দিবেলপ তৌবা অমসুং পুৱারী ওইরবা ফ্রাইদে মোকসপু কঞ্জর্ব তৌবদা মতেং পাংবদা য়ান্নবা পুরক্লে।

লৈবাক অনিমক্কী মীয়ামশিংগী মরক্তা কনেক্তিবিতী হেঙ্গৎহন্নবগীদমক, ঐখোয়না ভারতকী কোচী অমদি মালদীবকী কুলধুফুশী অমদি মালেগী মরক্তা হিগী সর্বিস হৌদোকপদসু য়ান্নবা পুরক্লে।

মালদীবতা রুপে কার্দ চৎনহনবনা ভারতকী লমকোইবশিংগী মশিং হেঙ্গৎহল্লগনি, হিরম অসিদা ঐখোয়না অথুবা মতমদা খোংথাং লৌখৎলগনি।

ঙাকশেলগী তেংবাং হেন্না চেৎশিলহনবদসু খন্ন–নৈনরে।

ঙসি ঐখোয়না অমত্তা ওইনা মালদীব দিফেন্স ফোর্সেসকী কম্পোজিৎ ত্রেনিং সেন্তর অমদি সমুদ্র মপালগী মফমশিং য়েংশিন্নবা রাদর সিস্তেম শঙ্গাখ্রে।

ভারতনা মালদীবকা লৈনরিবা মরীশিংদা অহেনবা পুক্নীং চংলি। ঐখোয়না অমনা অমগা লোয়ননা অচেৎপা পার্তরনশিপ অদু পামলি।

ঐহাক্না অমুক হন্না ফোংদোকচরি মদুদি ভারতনা মালদীবকীদমক পীবা য়াবা তেংবাং পুম্নমক পীগনি।

ঐহাক্না অমুক হন্না রাস্ত্রপতি অমসুং মালদীবকী মীয়াম্বু হরাও তয়াম্না ওকপীবগীদমক থাগৎচরি।

ভারত–মালদীব মরূপ ওইবগী মরী মুৎনাইদ্রবা ওইরসনু।

দিবেহী রাজ্জে আ ইন্দিয়াগে রাহমেথেরীখন অবদহ

থাগৎচরি।