ভারতকী প্রধানমন্ত্রী

ঙসি প্রধান মন্ত্রী শ্রী নরেন্দ্র মোদীনা ভিদিও কনফরেন্সকী খুৎথাংদা ‘বিকসিত ভারত বিকসিত মধ্য প্রদেস’ থৌরমদা ৱা ঙাংখ্রে। থৌরম অদুদা, প্রধান মন্ত্রীনা মধ্য প্রদেস শীনবা থুংনা লুপা করোর ১৭,৫০০ হেনবগী তোঙান-তোঙানবা চাউখৎ-থৌরাংগী প্রোজেকশিং উরেপ-উয়ুং তমখি অমসুং লৈবাক মীয়ামদা কৎথোকখি। প্রোজেকশিং অদুগী মনুংদা য়াওরিবা মরুওইবা সেক্তরশিংদি ইথৈ-লৌখোঙ, পৱার, রেল, লম্বী, ঈশিং পীবা, কোয়লা অমসুং উদোগনি। প্রধান মন্ত্রীনা মধ্য প্রদেসতা সাইবর তেহসিল প্রোজেক হৌদোকখি।

প্রধান মন্ত্রীনা মহাক্কী ৱা ঙাংবা হৌরকপদা মধ্য প্রদেসকী দিন্দোরিদা লম্বীগী খুদোংথিবা অমদা মীওই কয়া লৈখিদবদা অৱাবা ফোঙদোকখি অমসুং হায়খি খুদোংথিবা অদুদা শোক্লবশিং মতেং পীনবা থবক খুদিংমক পায়খৎলে। মসিগী অৱাবা মতম অসিদা ঐনা মধ্য প্রদেসকী মীয়ামগীদমক লেপ্লি।

প্রধান মন্ত্রীনা হায়খি বিকসিত ভারত অমগী ৱাশক্কা লোয়ননা রাজ্য অসিগী লোক সভা অমসুং এশেমব্লি সিত খুদিংমক্তগী মীওই লাখ কয়া থৌরম অসি শরুক য়ারি। হন্দক অতোপ্পা রাজ্যশিংদা মসিগা চপ মান্নবা ৱারেপশিং লৌখ্রে অমসুং লৈবাক অসিগী রাজ্যশিং চাউখৎলবা মতমদা ভারত চাউখৎকনি।

হয়েংদগী মধ্য প্রদেসতা নুমিৎ মপান্নি চৎথগদবা বিক্রমোতসব হৌদোক্কদৌরিবা অসিগী মতাংদা প্রধান মন্ত্রীনা হায়খি থৌরম অসিদা রাজ্য অসিগী নিংথিরবা হেরিতেচগা লোয়ননা হৌজিক পায়খৎলিবা চাউখৎ-থৌরাংগী থবকশিং হরাওবা ফোঙদোক্কনি। উজয়েন্দা লৈরিবা বেদিক ঘরি অসি সরকারনা হেরিতেচ অমসুং চাউখৎপা অনিমক পুন্না পায়খৎপগী খুদম অমনি। বাবা মহাকালগী সহর অসি মতম অমদা মালেম শীনবা থুংবগী মতম খোৎনবগী মফম অমা ওইরমখি অদুবু মসিগী মরুওইবা কাউথোক্নরে। মসি কোকহন্নবগীদমক, সরকারনা উজয়েন্দা মালেমদা অহানবা বিক্রমদিত্যা বেদিক ঘরি অমুক হন্না থম্লে অমসুং ভারত চাউখৎলবা লৈবাক অমা ওইনবা লম্বীদা লাকপা মতমদা উজয়েন্দা লৈরিবা বিক্রমদিত্যা বেদিক ঘরিনা ‘কাল চক্র’ দা শাখি ওইরগনি।

প্রধান মন্ত্রীনা হায়খি ঙসিগী থৌরম অসিগা মরী লৈনবা লুপা করোর ১৭,০০ রোমগী চাউখৎ-থৌরাংগী প্রোজেকশিং অসিদা থক্নবা ঈশিং, ইথৈ, মৈ, লম্বীশিং, স্পোর্তস কমপ্লেক্সশিং অমসুং কম্মুনিতি হোলশিং য়াওরি। মধ্য প্রদেসতা স্তেসন ৩০ অমুক হন্না মতমগা চুনবা মওংদা শেমগৎনবা থবক হৌরে। খোঙজেল শরুক অনিগা লোয়ননা দবল ইঞ্জিন সরকারনা চাউখৎ-থৌরাংগী থবক পায়খৎলি।

মোদীগী গরেন্তিদা লৈবাক অসিনা থাজবা থম্বগীদমক প্রধান মন্ত্রীনা তৌবীমল খঙবা উৎখি। লৈবাক অসি চাউখৎনবা সরকারনা পায়খৎলিবা থবকশিং অমুক হন্না পল্লদুনা প্রধান মন্ত্রীনা হায়খি সরকারগী অহুমশুবা তার্মদা ভারত মালেমদা খ্বাইদগী চাউবা ৩শুবা ইকোনোমি ওইহনগনি।

মহাক্না হায়খি দবল ইঞ্জিন সরকারনা লৌউ-শিংউ, উদোগ অমসুং তুরিজমদা অকনবা মীৎয়েং চঙলি অমসুং মা নর্মাদা তুরেলদা অচৌবা ঈশিংগী প্রোজেক অহুম পায়খৎনবা উরেপ-উয়ুং তম্লে। ঐখোয়না ত্রাইবেলশিংগী লমদমশিংগী ইথৈগী অৱাবশিং কোকহনবা খক নত্তনা থক্নবা ঈশিং ফংবদগী অৱাবশু কোকহনগনি। ঐখোয়না মধ্য প্রদেসকী ইরিগেসন সেক্তরদা অওনবা অমা উরে। কেন-বেতৱা রিভর লিঙ্কিং প্রোজেক্না বুন্দেলখান্দ লমদমদা ইমুং লাখ কয়াগী পুন্সিদা অওনবা লাক্লগনি।

মহাক্না হায়খি লৌমীশিংগীদমক পায়খৎপা খ্বাইদগী চাউবা থবক্তি মখোয়গী লৌফমশিংদা ঈশিং ফংহনবনি। ২০১৪গী মমাঙদা লৈরম্বা ফিবমগা চাংদম্নবদা হৌজিক লৈরিবা ইথৈগী ফিবম অসি য়াম্না ফরে। মমাঙদা সেক্তর লাখ ৪০দা মাইক্রো-ইরিগেসন লৈরম্বা অদু হৌজিক হেক্তর লাখ ৯০দা ইথৈ ফংলে। মসিনা হৌজিক পাল্লিবা সরকার অসিনা মরুওইনা লৌরিবশিং অমসুং মসিগী চাউখৎপগী পাক-চাউবা উবা ফংলে।

প্রধান মন্ত্রীনা হায়খি অপীকপা লৌমীশিংনা মখোয়গী পোৎথোকশিং থমফম লৈতবগী অতোপ্পা অৱাবা অমা মায়োক্নরি। হন্দক মালেমদা খ্বাইদগী চাউবা পোৎথোকশিং থমফম শানবা প্রোজেক অমা হৌদোক্লে। নুমিৎ খরগী মতুংদগী, অচৌবা কৈ লিশিং কয়া শারগনি অমসুং লৈবাক অসিদা মেত্রিক তন লাখ ৭০০গী অনৌবা থমফম অমা লৈরগনি। মসিগীদমক সরকারনা লুপা করোর লাখ ১.২৫ থাদগনি।

প্রধান মন্ত্রীনা হায়খি কোওপরেতিপশিংগী খুৎথাংদা খুঙ্গংশিং অত্মানির্ভর ওইহন্নবা সরকারনা অকনবা মীৎয়েং চঙলে। কোওপরেতিপকী কান্নবশিং শঙ্গোম, চিনি, মহৈ-মরোং, উহৈ-ৱাহৈ, মনা-মশিং অমসুং ঙা য়োকপগী হিরম ফাওবা  ফংলে। খুঙ্গংগী শেন্মিৎলোন ফগৎহন্নবা পান্দম অমগা লোয়ননা খুঙ্গংশিংদা কোওপরেতিপ বোদি লাখ কয়া লিংখৎলে।

প্রধান মন্ত্রীনা হায়খি পি.এম শ্বামিতভা য়োজনাগী খুৎথাংদা খুঙ্গংদা লন-থুমগী য়েৎনবশিং তুংকোইবা য়ানবা অমা পুরক্নবা পাম্বৈ অমা ফংলে। খুঙ্গংগী চাদা ১০০ দ্রোন সর্ভে পাংথোক্তুনা স্কিম অসি পায়খৎপগীদমক মধ্য প্রদেস থাগৎপা ফোঙদোকচরি অমসুং হৌজিক ফাওবদা শ্বামিতভা কার্দ লাখ ২০ হেন্না পীখ্রে।

প্রধান মন্ত্রীনা হায়খি মধ্য প্রদেসকী জিলা ৫৫দা সাইবর তেহসিল প্রোজেক পায়খৎলে। মসিনা লমগী মিং ওনবা অমসুং রেজিস্তার তৌবদা থেংনরিবা খুদোংচাদবশিং কোকহনগনি অমসুং মীয়ামগী মতম অমসুং শেন চঙবা হন্থহগনি।

প্রধান মন্ত্রীনা হায়খি নহারোলশিংনা মধ্য প্রদেস অসি উদোগশিংদা মাঙজিল থাবা রাজ্যশিংগী মনুংদা অমা ওইহন্নিংলি। হৌজিক পাল্লিবা সরকার অসিনা অনৌবা খুদোংচাবশিং পীনবা থবক অমতা পায়খৎতনা তোক্লোই হায়না রাজ্য অসিগী অহানবা ভোত্তরশিংদা থাজবা পীরি। নহারোলশিংগী মঙলানশিং মোদীগী ৱারেপ্নি। অত্মানির্ভর ভারত অমসুং মেক ইন ইন্দিয়াদা মধ্য প্রদেস মরুওইবা য়ুম্বী অমা ওইগনি। মসিগী মঙলান অসি থবক ওইনা পাংথোক্নবা সিতাপুর,মোরেনাদা মেগা লেদর অমসুং ফুদৱায়ার ক্লস্তর, ইন্দোরদা রেদিমেদ গার্মেন্তগী তেক্সতাইল পার্ক, মন্দসুরদা ইন্দস্ত্রিএল পার্ক পাকথোক-চাউথোকহনবা অমসুং ধার ইন্দস্ত্রিএল পার্ক শেমগৎপা য়াওরি।

ভারত্তা শান্নপোৎ শাবগী থবক হেন্না চাউখৎহন্নবা সরকারনা হোৎনবদগী মপান লৈবাকশিংদা শান্নপোৎশিং থাদোকপা হেনগৎলে। ঙসি লমদম অসিদা হৌদোক্লিবা চাউখৎ-থৌরাংগী প্রোজেকশিং অসিনা মরম ওইদুনা বুধনিদা শান্নপোৎ শাবগী কাংলুপ খুদোংচাবা কয়া পীরগনি।

প্রধান মন্ত্রীনা হায়খি খুন্নাইগী মীরাইবীরবা কাংলুপশিং য়েংশিন্নবা থাজবা পীবগা লোয়ননা মমাঙঙৈদগী লৈরক্লবা খুৎহৈবশিং মশক তাকপা ঙমগনি। অফংবা মফম খুদিংমক্তা হায়রিবা খুৎহৈবশিং অসি মহাক্না চাংনাইনা য়োকখৎলি অমসুং মহাক্না মপান লৈবাকশিংগী শক্নাইরবশিংদা মতম অয়াম্বদা কোত্তেচ ইন্দস্ত্রিগী পোৎথোকশিং পীনবা তকশিল্লি। ‘ভোকেল ফোর লোকেল’ য়োকখৎপনা লমদম অমগী খুৎহৈবশিংগী পোৎথোকশিংশু য়োকখৎকনি।

প্রধান মন্ত্রীনা হায়খি হৌখিবা চহি ১০দা, মালেম শীনবা থুংনা ভারতকী মিংচৎ য়াম্না হেনগৎলে। লৈবাক অসিনা ইনভেস্তেমন্ত অমসুং তুরিজমগী কান্নবশিং হকথেংননা ফংলে। মধ্য প্রদেসতা তুরিজম ফজনা চাউখৎলে অমসুং ওমকারেশ্বর অমসুং মমালেশ্বরদা ভক্তশিং লাকপা মশিং হেনগৎলে। আদি গুরু সঙ্করচার্য়া অমসুং উজয়েন সিমহাস্থা নিংশিংনবা ২০২৮ তা ওমকারেশ্বরদা একতম ধাম শেমগৎলগনি। মসিনা তুরিজম চাউখৎপা হেনগৎহল্লগনি।

ইন্দোরদা ওমকারেশ্বরদগী ইছাপুর ফাওবা ৪-লেন লম্বী অমা শেমগৎপা অসিনা ভক্তশিংদা খুদোংচাবা পীরগনি। ঙসি হৌদোক্লিবা রেলৱে প্রোজেকশিং অসিনা মধ্য প্রদেসতা মখা তানা চৎথোক-চৎশিন ফগৎহল্লগনি। চৎথোক-চৎশিন ফগৎলকপদগী, মসিনা লৌউ-শিংউ, তুরিজম নত্ত্রগা উদোগ, অহুমমক কান্নবা পীগনি।

প্রধান মন্ত্রীনা হায়খি হৌখিবা চহি ১০ দা নুপীশিং চাউখৎপদা অপনবা পীরিবা খুদোংচাদবা খুদিংমক লোইশিন্নবা সরকারনা থবক পায়খৎলে অমসুং মথং চহি ৫দা ঐখোয়গী ইচলশিং অমসুং ইচানুপীশিংদা মমাঙদা অমুক্তা ওইখিদ্রিবা মওংদা শক্তি পীবা উবা ফংলগনি। খুঙ্গং খুদিংমক্তা লাখপতি দিদিশিং শেমগৎলে অমসুং দ্রোন দিদিশিংনা লৌউ-শিংউদা অওনবা অমা পুরক্লগনি।

মথং চহি ৫দা নুপীশিংগী শেন-থুমগী ফিবম ফগৎলক্লগনি। সরকারনা পায়খৎলিবা থবকশিংনা মরম ওইদুনা হৌখিবা চহি ১০দা খুঙ্গংশিংদা ইমুংশিংগী শেন্থোক হেনগৎলে। রিপোর্ত অমগী মতুংইন্না, খুঙ্গংগী শেন্থোক সহরশিংদগী হেন্না য়াংনা হেনগৎলে। হৌখিবা চহি ১০দা মীওই করোর ২৫ লায়রবা কোক্লে। মধ্য প্রদেস মখা তানা চাউখৎপগী অনৌবা থাকশিং য়ৌরগনি।

নুঙগীৱারোল

প্রধান মন্ত্রীনা মধ্য প্রদেসতা লুপা করোর ৫৫০০ হেনবগী ইথৈ-লৌখোং পীনবা প্রোজেকশিং উরেপ-উয়ুং তমখ্রে। হায়রিবা প্রোজেকশিংগী মনুংদা অপ্পর নর্মাদা প্রোজেক,  রাঘাবপুর মল্তিপর্পজ প্রোজেক, বসানিয়া মল্তিপর্পজ প্রোজেকনি। হায়রিবা প্রোজেকশিং অসিনা দিন্দোরি, অনুপ্পুর অমসুং মন্দলা জিলাশিংদা লৌবুক হেক্তর ৭৫০০ হেনবদা ঈশিং ফংহনগনি অমসুং লমদম অসিদা মৈ অমসুং থক্নবা ঈশিং ফংবা হেনগৎহনগনি। প্রধান মন্ত্রীনা রাজ্য অসিদা লুপা করোর ৮০০ হেনবগী মাইক্রো ইরিগেসন প্রোজেক অনি লৈবাক মীয়ামদা কৎথোকখ্রে। হায়রিবা প্রোজেকশিংগী মনুংদা পারাদোস মাইক্রো ইরিগেসন প্রোজেক অমসুং আউল্লিয়া মাইক্রো ইরিগেসন প্রোজেক য়াওরি। হায়রিবা মাইক্রো ইরিগেসন প্রোজেকশিং অসিনা বেতুল অমসুং খন্দৱা জিলাশিংদা লম হেক্তর ২৬,০০০ হেনবগী দরকার ওইবশিং ফংহনগনি।

প্রধান মন্ত্রীনা মধ্য প্রদেসতা লুপা করোর ২২০০ হেন্না চঙনা শেমগৎপা রেলৱে প্রোজেক অহুম লৈবাক মীয়ামদা কৎথোকখ্রে। প্রোজেকশিংগী মনুংদা বিরঙ্গানা লক্সমীবাই ঝান্সি-জাখলাউন অমসুং ধাউরা-অগাসোদ রুত্তা অহুমশুবা লাইন; নিউ সুমাউলি-জোরা অলাপুর রেলৱা লাই গেজ ওনখৎপা; অমসুং পোৱারখেরা-জুঝারপুর রেল লাইন ফ্লাইওর প্রোজেক য়াওরি। হায়রিবা প্রোজেকশিং অসিনা লমদম অসিদা রেলগী চৎথোক-চৎশিন অমসুং খুন্নাইগী শেন-থুমগী ফিবম ফগৎহনগনি।

রাজ্য অসিদা উদোগ চাউখৎপা হেনগৎহন্নবা, প্রধান মন্ত্রীনা মধ্য প্রদেস শীনবা থুংনা লুপা করোর ১০০০ রোমগী তোঙান-তোঙানবা উদোগশিংগী প্রোজেকশিং উরেপ-উয়ুং তমখ্রে। হায়রিবা প্রোজেকশিংগী মনুংদা মোরেনা জিলাগী সিতাপুরদা মেগা লেদর, ফুদৱিয়ার অমসুং এসেসোরি ক্লস্তর; ইন্দোরদা গার্মেন্ত ইন্দস্ত্রিগী প্লগ এন্দ প্লে পার্ক; ধার জিলাদা ইন্দস্ত্রিএল পার্ক মান্দসৌর(জাগ্গাখেরি ফেজ-২); অমসুং ইন্দস্ত্রিএল পার্ক পীথমপুরা ফগৎহনবা য়াওরি।

প্রধান মন্ত্রীনা লুপা করোর ১০০০ হেনবগী কোয়লা প্রোজেকশিং লৈবাক মীয়ামদা কৎথোকখ্রে। হায়রিবা প্রোজেকশিংগী মনুংদা জয়ান্ত ও.সি.পি সি.ঐচ.পি সিলো, এন.সি.এল সিঙ্গ্রাউলি অমসুং দুধিচুয়া ও.সি.পি সি.ঐচ.পি সিলোনি।

মধ্য প্রদেসতা পৱার সেক্তর মপাঙ্গল কনখৎহন্নবা, প্রধান মন্ত্রীনা পান্না, রাইসেন, ছিন্দৱারা অমসুং নর্মাদাপুরম জিলাশিংদা সব-স্তেসন তরুক্কী উরেপ-উয়ুং তমখ্রে। হায়রিবা সব-স্তেসনশিং অসিনা রাজ্য অসিগী জিলা ১১ হায়বদি ভোপাল, পান্না, রাইসেন, ছিন্দৱারা, নর্মাদাপুরম, বিদিসা, সাগার, দামোস, ছাতারপুর, হারদা অমসুং সোহোরগী মীয়ামদা কান্নবশিং পীরগনি। মান্দিপ ইন্দস্ত্রিএল এরিয়াগী উদোগশিংদা সব-স্তেসনশিং অসিনা কান্নবা পীগনি।

প্রধান মন্ত্রীনা অমরুত ২.০গী মখাদা  লুপা করোর ৮৮০ হেনবগী তোঙান-তোঙানবা প্রোজেকশিং অমসুং রাজ্য অসিগী জিলা কয়াদা থক্নবা ঈশিং ফংহন্নবা অতোপ্পা স্কিমশিং ফগৎহন্নবা প্রোজেকশিংগী উরেপ-উয়ুং তমখ্রে। প্রধান মন্ত্রীনা খারগোনেদা থক্নবা ঈশিং ফংহন্নবা স্কিম ফগৎহনবগী প্রোজেক লৈবাক মীয়ামদা কৎথোকখ্রে।

মীয়ামদা সরকারগী থবক-থৌরমশিং ফংহনবা ফগৎহন্নবা মাইকৈদা থাংজিনবা খোঙথাং অমদা, মধ্য প্রদেসতা সাইবর তেহসিল প্রোজেক্না মপুংফাবা খাসরাগী লৈবা-য়োনবগী থবক্তা চে য়াওদবা, মীওইশিং হকথেংননা শরুক য়াদনা অমসুং ওনলাইন্দা মিউতেসন পাংথোকপা অমসুং রেভিনিয়ু রেকোর্দশিং চুমথোকপা য়াহল্লগনি। রাজ্য অসিগী জিলা ৫৫দা প্রোজেক অসি পায়খৎকনি অমসুং মধ্য প্রদেস শীনবা থুংবগী রেভিনিয়ু কোর্ত অমা খক লৈহল্লগনি। এপ্লিকান্তদা ফাইনেল ওর্দরগী সর্তিফাইদ কোপি পীনবা মসিদা ই-মেল/ৱাতসএপ্প শীজিন্নরে।

প্রধান মন্ত্রীনা মধ্য প্রদেসতা তোঙান-তোঙানবা মরুওইবা লম্বীগী প্রোজেকশিংশু উরেপ-উয়ুং তমখ্রে। প্রোজেকশিং অসি হৌদোকপনা মধ্য প্রদেসতা ইনফ্রাস্ত্রকচর, খুন্নাইগী শেন-থুম চাউখৎপা অমসুং হিংবদা লাইবা হেনগৎহন্নবা প্রধান মন্ত্রীগী পান্দমগী মরুওইবা থম্লি।

***