ভারতকী প্রধানমন্ত্রী

অনৌবা তেক্নোলোজিগী যুগ অমদা খোঙ থাংজিল্লদুনা, ঙসি প্রধান মন্ত্রী শ্রী নরেন্দ্র মোদীনা নিউ দিল্লিগী প্রগতি মাইদান্দা ফাইব-জি সর্বিস হৌদোকখ্রে। প্রধান মন্ত্রীনা ৬শুবা ইন্দিয়া মোবাইল কংগ্রেসশু হৌদোকখি অমসুং থৌরম অদুদা পাংথোকখিবা আই.এম.সি একজিবিসনশু য়েংখি।

উদোগকী লুচিংবশিংনা পুৱারি ওইরবা থৌরম অসিগী মতাংদা মখোয়গী ওইবা ৱাখল্লোনশিং ফোঙদোকখি।

২০৪৭দা চাউখৎলবা লৈবাক অমা ওইহন্নবা পান্দম থম্বগীদমক রিলাইন্সকী চিয়ারমেন শ্রী মুকেস অম্বানিনা প্রধান মন্ত্রী থাগৎখি। মহাক্না হায়খি পান্দম অদু ফংনবা ভারতনা চঙশিনবা ঙম্নবা সরকারগী থবক অমসুং থৌশিল খুদিংমক হৈশিংনা শেম্বনি। ভারতনা খোঙজেল য়াংনা ফাইব-জিগী যুগ অমদা চঙশিন্নবা পায়খৎলিবা থবকশিং অসিনা ঐখোয়গী প্রধান মন্ত্রীগী অচেৎপা ফিরেপকী খুদম উৎলে। ফাইব-জিনা লাইরিক তম্বা, হকশেল অমসুং ক্লাইমেতকী মতাংদা খুদোংচাবা কয়া পীগনি। অদোমগী লুচিংবা অসিনা মমাঙদা অমুক্তা ওইখিদ্রিবা মওংদা মালেমদা ভারতকী মিংচৎ, শক্তম অমসুং মালেমগী শক্তি হেনগৎহল্লে। ঙসিগী য়াংনা হোঙলিবা মালেম অসিদা ভারতনা মতোন য়ৌনা কারকপদা অপনবা পীবা ঙম্লোই।

ভারতি ইন্তরপ্রাইজগী চিয়ারমেন শ্রী সুনিল ভারতি মিত্তলনা হায়খি ফাইব-জি হৌদোকপা অসি অনৌবা যুগ অমা হৌরবনি অমসুং মসি অজাদি কা অমৃত মহোৎসব মনুংদা পাংথোকপা অসিনা মসি হেন্না অখন্নবা ওইরে। প্রধান মন্ত্রীনা পায়খৎলিবা থবকশিং অসিগা লোয়ন্না, মসিনা লৈবাক অসিদা অনৌবা থৌনা অমা হাপ্লগনি। তেক্নোলোজিগী মরমদা য়াম্না কুপ্না খঙবা অমসুং মদু লৈবাক্কী চাউখৎনবা শীজিন্নবা প্রধান মন্ত্রী অমা লৈবসি ঐখোয়গী লাইবক ফবনি।  

শ্রী মিত্তলনা মখা তানা হায়খি মসিনা মরুওইনা খুঙ্গংগী শরুকশিংদা অমসুং মীয়ামদা খুদোংচাবা কয়া ফংহল্লগনি। মহাক্না গুজরাতকী চীফ মিনিস্তর ওইরিঙৈদগী হৌনা ইনফ্রাস্ত্রকচর অমসুং তেক্নোলোজিগী লমদা থবক কয়া পায়খৎখি। লাইচৎ মনুংদা খুঙ্গংশিং অমসুং য়ুমশিংদা লম্বী চিলখি অমসুং লৈবাক অসিগী মীহুলদি মিকুপ অমা ফাওবা লেপখিদে। মসিগী মনা দিজিতেল ভিজনদা পীরে। মেক ইন ইন্দিয়াগী মঙলান অসি মাইপাকপা ঙম্লে। দিজিতেল ইন্দিয়াগা লোয়ন্না, প্রধান মন্ত্রীনা স্তার্দ-অপ ইন্দিয়াগী খোঙজং পায়খৎলে অমসুং অথুবা মতমদা ভারতনা য়ুনিকোর্নশিং পুথোকপা হৌরে। ফাইব-জি চৎনবা হৌবদগী লৈবাক অসিনা মালেমদা অহেনবা য়ুনিকোর্নশিং হাপচিল্লগনি।

আদিত্য বিরলা গ্রুপকী চিয়ারমেন, শ্রী কুমার মঙ্গালম বিরলানা হায়খি ফাইব-জি চৎনবা হৌবা অসিনা মালেমদা ভারতকী শক্তি অসি উৎলে অমসুং ভারতকী চাউখৎপদা তেলিকোম তেক্নোলোজিশিংনা মরুওইবা থৌদাংশিং লৌরি। তেক্নোলোজিগী অচৌবা অহোঙবা অমা পুরক্তুনা মালেমগী ওইনা ভারতনা মশক থোকপা অমা পাংথোকপদা মহাক্না লৌখিবা থৌদাং অদুগীদমক মহাক্না প্রধান মন্ত্রী থাগৎখি। লাইচৎ মনুংদা তেলিকোম উদোগতা মতেং পাংখিবা অমসুং উদোগ অসিদা মশক থোকপা তেলিকোমগী অওনবশিং পুরকপদগীদমক মহাক্না প্রধান মন্ত্রী থাগৎখি। শ্রী বিরলানা হায়খি ফাইব-জি হৌদোকপা অসিনা ভারতকী নুংঙাইরবা খোঙচৎ অমা হৌরে। লাক্লিবা চহিশিংদা ঐখোয়গী ফাইব-জিগী মপান নাইদ্রবা খুদোংচাবশিং উরগনি।

ভারত্তা ফাইব-জি তেক্নোলোজিনা পাংথোকপা ঙমগদবা থবকশিং উৎনবা লৈবাক অসিগী অচৌবা তেলিকোম ওপরেতর অহুম্না তেক্নোলোজি অসি শীজিন্নবগী কেস অমমম প্রধান মন্ত্রীগী মমাঙদা উৎখি।

মহারাস্ত্রা, গুজরাত অমসুং ওরিসাগী তোঙান-তোঙানবা মফম অহুমদা লৈবা মহৈরোয়শিংগা মুম্বাইগী স্কুল অমগী ওজা অমগা রিলাইন্স জিওনা শম্নহনখি। মসিনা কমদৌনা ফাইব-জিনা মহৈরোয়শিংগা ওজাশিংগা মখোয়গী মরক্তা লৈনরিবা অরাপ্পা থিদনা নকশিন্নবা ঙমহনবগে হায়বা উৎলে। অগমেন্তেদ  রিএলিতি(এ আর)গী শক্তি স্কৃন্দা উৎখি অমসুং এ.আরগী খুৎলায় য়াওদনা লৈবাক শীনবা থুংনা লৈরিবা অঙাংশিংদা লাইরিক তম্বীবদা কমদৌনা এ.আর শীজিন্নগনি হায়বশু উৎখি।

মহারাস্ত্রাগী চীফ মিনিস্তর শ্রী একনাথ সিন্দে য়াওনা মহারাস্ত্রাগী রাইগাদতা লৈবা দয়ানজয়তি সবিত্রিবাই ফুলে স্কুলগী মহৈরোয়শিংগা প্রধান মন্ত্রীগা ৱারি শানখি। গুজরাতকী চীফ মিনিস্তর শ্রী ভুপেন্দ্র পতেল য়াওনা গুজরাতকী গান্ধীনগরগী রোপদা প্রাইমারি স্কুলগী মহৈরোয়শিংদা ৱারি শানখি। ওরিসাগী চীফ মিনিস্তর শ্রী নবিন পাতনাইক য়াওনা, ওরিসাগী ময়ুরভঞ্জতা লৈবা এস.এল.এস মেমোরিএল স্কুলগী মহৈরোয়শিংগশু প্রধান মন্ত্রীগা ৱারি শানখি। মুম্বাইদা লৈবা ধিরুভাই অম্বানি ইন্তরনেসনেল স্কুলগী শ্রী অভিমনয়ুনা ফাইব-জি তেক্নোলোজি শীজিন্নবগী মতাংদা উৎখি। লাইরিক তম্বদা তেক্নোলোজি শীজিন্নবদা মহৈরোয়শিংনা থৱায় য়াওবা অদু প্রধান মন্ত্রীনা পনখি। অইবা অমিস ত্রিপাথিনা তাঙ্কক অদু শকতাকখি।

তন্নেলগী দিজিতেল ত্বিন অমা শেমদুনা, দিল্লি মেত্রোগী শেমগৎ-শাগৎলিবা তন্নেল অমদা শিন্মীশিং অশোই-অঙাম থোক্তনবা পাংথোকপা থবকশিং ভোদাফোন আইদিয়ানা উৎখি। দিজিতেল ত্বিন্না অরাপ্পা মফম অমদগী শিন্মীশিংদা অশোই-অঙাম থোক্তনবা মিকুপ-নাহুম শিংনা লৈনবা মতেং পাংগনি। প্রধান মন্ত্রীনা দাইজতগী ভি.আর অমসুং আর্তিফিসিএল ইন্তিলিজেন্স শীজিন্নদুনা লাইভ দেমো অমা শরুক য়াখি। দিল্লিগী লেপ্তনেন্ত গভর্নর শ্রী বিনাই সক্সেনা য়াওনা, নিউ দিল্লিগী দিল্লি মেত্রো তন্নেল দ্বারকাদা থবক শুরিবা শিন্মী শ্রী রিনকু কুমারগা প্রধান মন্ত্রীগা ৱারি শানখি। অশোই-অঙাম থোক্তনবা শিন্মীশিংনা থাজবা থম্লিবা অসি অনৌবা তেক্নোলোজি অসিগী খ্বাইদগী চাউবা কান্নবনি। লৈবাক অসিগী চাউখৎপদা মখোয়না পাংলিবা মতেং অদুগীদমক প্রধান মন্ত্রীনা ভারতকী শিন্মীশিং থাগৎখি।

এয়রতেলগী দেমো অমদা, ভি.আর অমসুং এ.আরগী মতেংগা লোয়ন্না, উত্তর প্রদেসকী দানকাউরগী  মহৈরোয়শিংনা কমদৌনা সোলার সিস্তেমগী মরমদা তম্বগে হায়বা উৎখি। দাইজতা হোলোগ্রাম ওইনা থোরক্তুনা, মহৈরোয় খুসিনা মহাক্না লাইরিক তম্বদা থেংনবা অদু প্রধান মন্ত্রীদা পাউদমখি। উত্তর প্রদেসকী চীফ মিনিস্তর শ্রী য়োগি অদিয়ানাথনা বরানসীগী রুদ্রক্ষ কনভেন্সন সেন্তরদগী শম্লকখি। ভি.আরদা লাইরিক তম্বদা মখোয়না য়াম্না লাইনা খঙবা ঙমবরা হায়বা প্রধান মন্ত্রীনা হংখি। মহৈরোয়না হায়খি মসিগী তেক্নোলোজি অসি শীজিন্নরবা মতুংদা মহাক্না অনৌবা পোৎলমশিং হেন্না খঙনিংলে।

তিল্লিবা মীয়ামদা ৱা ঙাংবদা প্রধান মন্ত্রীনা হায়খি ঙসি পাংথোক্লিবা মীফম অসি মালেমগী ওইবা য়াই অদুবু মসিগী মহৈ অমসুং মাইওনদি লমদম অসিগীনি। ২১শুবা চহিচাদা য়াংনা চাউখৎলক্লিবা ভারতকীদমক ঙসিগী নুমিৎ অসি অখন্নবা নুমিৎ অমনি। ঙসিদি ভারতমচা কোতি ১৩০না লৈবাক অসিদগী অমসুং লৈবাক অসিগী তেলিকোম উদোগতগী ফাইব-জিগী মওংদা অঙকপা খুদোলপোৎ অমা ফংলে। লৈবাক অসিদা অনৌবা যুগ অমদা ফাইব-জিনা থোঙজিলদা লেপ্লরে।ফাইব-জি অসি খুদোংচাবশিংগী মপান নাইদ্রবা অতিয়া অমগী অহৌবনি। মসিগীদমক ঐনা ভারতমচা খুদিংমক থাগৎচরি।

প্রধান মন্ত্রীনা হায়খি অনৌবা ভারত শুপ্নগী তেক্নোলোজি শীজিন্নবা কঞ্জুমর অমা ওইনা লৈরোই, অদুবু তেক্নোলোজি অসি চাউখৎহনবা অমসুং চৎনহনবদা ভারতনা মরুওইবা থৌদাং অমা লৌগনি। তুংগী ৱায়ারলেস তেক্নোলোজি দিজাইন তৌবা অমসুং মসিগী পোৎলমশিং শাবদা ভারতনা অচৌবা থৌদাং অমা লৌগনি। তু-জি, থ্রি-জি অমসুং ফোর-জি তেক্নোলোজিশিংগীদমক ভারতনা অতোপ্পা লৈবাকশিংগী মখা পোল্লি। অদুবু ফাইব-জিনা ভারতকী অনৌবা পুৱারি অমা শেম্লে। ফাইব-জি লাকপদগী, অহানবা ওইনা ভারতনা তেলিকোম তেক্নোলোজিগী মালেমগী স্তেন্দার্দ অমা শেম্লে।

দিজিতেল ইন্দিয়াগী মতাংদা প্রধান মন্ত্রীনা হায়খি মীওই খরনা মসি শুপ্নগী সরকারগী স্কিম অমনি হায়না খনখি। অদুবু দিজিতেল ইন্দিয়া অসি মমিং খক্ত নত্তে, মসি লৈবাক অসি চাউখৎনবা অচৌবা মঙলান অমনি। মঙলান অসিগী পান্দমদি মীয়ামগীদমক থবক শুরিবা মীওইশিংগা, থবকশিংগা মীয়ামগা শম্নদুনা তেক্নোলোজি অসি মীয়ামদা ফংহনবনি।

প্রধান মন্ত্রীনা হায়খি মতম অমদা ঐখোয়না মাইকৈ মরিদা, য়ুম্বী মরিদা মীৎয়েং থমখি। অহানবদা, দিভাইসকী মমল, অনিশুবদা দিজিতেল কন্নেক্তিবি, অহুমশুবদা দেতাগী মমল, মরিশুবদা খ্বাইদগী মরুওইবা ওইনা ‘দিজিতেল ফার্স্ত’ অসিনি।

অহানবা য়ুম্বী অসিগী মতাংদা প্রধান মন্ত্রীনা হায়খি অত্মানির্ভর ভারতকী খুৎথাং খক্তদা মমল হোংবা দিভাইসশিং ফংবা ঙমগনি। ভারত্তা চহি ৮গী মমাঙদা শুপ্নগী মোবাইল শাবা য়ুনিত অনি খক লৈরমখি। হায়রিবা য়ুনিতশিং অসি ঙসিদি ২০০ য়ৌরে। ২০১৪দা মোবাইল ফোনশিং অমতা মপান্দা য়োল্লমদবদগী, ঙসি ঐখোয় লুপা কোতি কয়াগী মোবাইল ফোনশিং মপান্দা য়োনবা লৈবাক অমা ওইরে। হায়রিবা থবকশিং অসিনা মহৌশানা দিভাইস পুথোকপদা চঙবা মমল হন্থরক্লে।

দিজিতেল কন্নেক্তিবিতিগী মতাংদা প্রধান মন্ত্রীনা হায়খি ২০১৪দা ইন্তরনেৎ শীজিন্নবা মীওই কোতি ৬ লৈরম্বদগী হৌজিক কোতি ৮দা হেনগৎলে। ২০১৪দা পঞ্চায়ত ১০০গী মখা ওপ্তিকেল ফাইবরনা শম্নরমবদগী হৌজিক পঞ্চায়ত লাখ ১.৭ ওপ্তিকেল ফাইবরনা শম্নরে। মৈ ফংহন্নবা সরকারনা য়ুমথোং খুদিং খোঙজং চঙশিল্লে, হর ঘর জাল অভিয়ানগী মখাদা মীওই খুদিং অফবা থক্নবা ঈশিং ফংহন্নবা মিসনগী থবক পায়খৎলি অমসুং উজৱালা স্কিমগী মখাদা লায়রবশিংগী মনুংদা খ্বাইদগী লায়রবশিংদা গ্যাস সিলিন্দরশিং পীরে, মসিগা মান্নবা মওংদা মীওই খুদিংমক ইন্তরনেৎ ফংহন্নবা ঐখোয়গী সরকারনা থবক পায়খৎলি।

অহুমশুবা য়ুম্বীগী মতাংদা প্রধান মন্ত্রীনা হায়খি তেলিকোম ইন্দস্ত্রিদা সরকারনা মতেং কয়া পাংলি অমসুং ফোর-জি তেক্নোলোজিগী ফংনবা থৌশিলশিংদা মতেং পাংলি। মসিনা মরম ওইদুনা দেতাগী মমল হন্থরে অমসুং লৈবাক অসিগী দেতাগী অওনবা অমা পুরক্লে। হায়রিবা য়ুম্বী অহুম অসিনা মফম খুদিংমক্তা মখোয়না কান্নবা ফংহল্লে।

মরিশুবা য়ুম্বী ‘দিজিতেল ফার্স্ত’কী মতাংদা প্রধান মন্ত্রীনা হায়খি লায়রবশিংনা দিজিতেলগী ৱাহন্থোক খঙদরা হায়না অৱাংবা থাক্কী মীওই কাংলুপ খরনা ৱাহং হংবা মতম অমা লৈরমখি। মহাক্না মতম চুপ্পদা লৈবাক অসিগী মীচম মীয়ামগী ভাব তাবা, লৌশিং অমসুং থিজিন্নিংবগী ৱাখল্লোন অসিদা মপুংফানা থাজবা থম্লি। মতম অয়াম্বদা লৈবাক অসিগী লায়রবশিংনা অনৌবা তেক্নোলোজিশিং শীজিন্নবা মহাক্না থেংনৈ।

দিজিতেল ওইনা শেন পীথোক-পীশিন তৌবা লাইহন্নবা সরকারনা লম্বী শেম্লে। এপ্পকী খুৎথাংদা মীয়ামগী থবকশিং পাংথোক্নবা সরকারনা থবক পায়খৎলে। লৌমীশিং ওইগেরা নত্ত্রগা অপীকপা দুকান ফম্বা মীওইশিং ওইগেরা এপ্পকী খুৎথাংদা মখোয়গী নোংমগী দরকার ওইবশিং ফংহন্নবা ঐখোয়না মখোয়দা লম্বী অমা পীরে। লৈবাক কয়ানা হায়রিবা থবকশিং পাংথোকপা ঙমদ্রিঙৈদা লাইচৎ মনুংদা ঐখোয়না য়ুমদগী থবক শুরে অমসুং দি.বি.তি, লাইরিক তম্বা, তিকা থাবা অমসুং হকশেলগী থবকশিংদা দিজিতেল শীজিন্নরে।

প্রধান মন্ত্রীনা হায়খি অপীকপা ললোনবশিং, অপীকপা ওন্ত্রেপ্রেনিউয়রশিং, লমদম অসিগী কলাকারশিং অমসুং খুৎহৈবশিং হৌজিক মফম খুদিংদা য়োনফম লৈরে। ঙসি অদোম্না লৈকাইগী কৈথেল অমা নত্ত্রগা মনা-মশিংগী কৈথেল অমদা চৎপা মতমদা, পোৎয়োনবী অমনা কেস ওইনা পীরক্কনু, য়ু.পি.আইগী খুৎথাংদা শেন পীরকউ হায়রক্কনি। খুদোংচাবা অমা ফংবা মতমদা, ৱাখল্লোনশু থাজবা হেনগৎলকই। সরকারনা পুকচেল শেংনা থবক তৌরকপা মতমদা, মীয়ামগী ৱাখল্লোনশু অহোঙবা লাকই। মসি তু-জি অমসুং ফাইব-জিগী মরক্তা লৈরিবা ৱাখল্লোন অদুনি।

প্রধান মন্ত্রীনা হায়খি দেতাগী মমল অসি মালেমদা খ্বাইদগী তাবশিংগী মনুংদা য়াওরে। দেতাগী মমল জি.বি অমদা লুপা ৩০০ পীরম্বদগী জি.বি অমদা লুপা ১০দা হন্থরে। ভারত্তা দেতাগী মমল অসি য়াম্না হোঙলে। মসিগী মতাংদা ঐখোয়না লাউ-খোঙবা তৌদে, অমসুং অচৌবা এদভরতাইজমেন্তশিং ফোঙদে। কমদৌনা লৈবাক অসিগী মীয়াম হিংবদা লাইবা হেনগৎহন্নবা ঐখোয়না মীৎয়েং চঙলে। অহানবা ইন্দস্ত্রিএল রিভোলুসন অহুমদা ভারতনা কান্নবশিং ফংখিদে, অদুবু ভারতনা ৪শুবা ইন্দস্ত্রিএল রিভোলুসনগী কান্নবা ভারতনা লৌগনি।

প্রধান মন্ত্রীনা হায়খি ফাইব-জি তেক্নোলোজিনা ইন্তরনেৎ য়াংহনবা খক নত্তনা, মসিনা পুন্সি কয়াদা অহোঙবশিং পুরক্কনি। তেক্নোলোজিনা পীরিবা থাজবশিং থবক ওইনা পাংথোকপা ঐখোয়না উগনি। তেলিকোম ইন্দস্ত্রি এসোসিএসনগী লুচিংবশিংনা লৈবাক অসিগী স্কুলশিং অমসুং কোলেজশিংদা চৎতুনা মসিগী অনৌবা তেক্নোলোজি অসিগী মরমদা খঙহনগদবনি। ইলেকত্রোনিক মেনুফেকচরিংগী পার্তশিং শানবা এম.এস.এম.ইশিংগী ফিবম অমা শেমগৎনবা পায়খৎকদবনি। নৌনা দ্রোন পোলিসি হৌদোক্লবা মতুংদা দ্রোন তেক্নোলোজি শীজিন্নবা ঙমহল্লে। লৌমী কয়া মতৌ করম্না দ্রোনশিং পাইগনি হায়বা তম্লে অমসুং লৌবুকশিংদা তিলহাৎ হিদাকশিং চাইবদা দ্রোনশিং শীজিন্নবা হৌরে। নৌনা লাকপা তেক্নোলোজিগী লমদা তুংদা লাক্কদৌরিবা ভারতনা মালেম লমজিংগনি অমসুং মসিনা ভারত মালেমগী লুচিংবা অমা ওইবা ঙমগনি।

থৌরম অদুদা কম্মুনিকেসনগী য়ুনিয়ন মিনিস্তর শ্রী অসবিনি বাইসনব, কম্মুনিকেসনগী রাজ্য মন্ত্রী শ্রী দেভুসিন চৌহান, রিলাইন্স ইন্দস্ত্রিগী চিয়ারমেন শ্রী মুকেস অম্বানি, ভারতি ইন্তরপ্রাইজেসকী চিয়ারমেন শ্রী সুনিল মিত্তল, আদিত্য বিরলা গ্রুপকী চিয়ারমেন শ্রী কুমার মঙ্গালম অমসুং তেলিকম্মুনিকেসন দিপার্তমেন্তগী সেক্রেতরি শ্রী কে রাজারমন শরুক য়াখি।

নুঙগীৱারোল

ফাইব-জি তেক্নোলোজিনা মীচম মীয়ামদা কান্নবা কয়া ফংহনগনি। মসিনা নেতৱার্ক নুংঙাইগনি, দেতা রেত ৱাংগনি, লো লেতেন্সি লৈগনি অমসুং ই-পাউ ফাওনবা নুংঙাইগনি। মসিনা মৈ চাদবা হেনগৎহনগনি, স্পেকত্রম ফগৎকনি অমসুং নেতৱার্ক নুংঙাইগনি। ইন্তরনেৎ ওফ থিংস দিভাইস বিল্লিয়ন কয়া শম্নবা, অৱাংবা থাক্কী ভিদিও, তেলিসর্জরি অমসুং ওতোনোমস কার থৌবদা ফাইব-জি তেক্নোলোজিনা মতেং পাংগনি। মহৌশাগী ওইবা অমাং-অতাশিং, লৌউ-শিংউ, খুদোংথিনিঙাই ওইবা খনি তানবগী থবকশিং, সমুদ্রগী থবকশিং অশোই-অঙাম থোক্তনবা য়েংশিনবদা ফাইব-জিনা মতেং পাংগনি। হৌজিক শীজিন্নরিবা মোবাইল কম্মুনিকেসন নেতৱার্কশিংগা মান্নদবা অমদা, ফাইব-জি নেতৱার্কশিংনা হায়রিবা খুদোংচাবশিং অসি নেতৱার্ক অমদা ফংহনবা ঙমগনি।

আই.এম.সি-২০২২ অসি “নিউ দিজিতেল য়ুনিভর্স” হায়বা পান্দমদা ওক্তোবর ১-৪, ২০২২ ফাওবা পাংথোক্কদবনি। মসিদা শক্নাইরবা থিঙ্করশিং, ওন্ত্রেপ্রেনিউয়রশিং, ইন্নোবেতরশিং অমসুং সরকারগী ওফিসিএলশিং পুনশিন্দুনা অনৌবা দিজিতেল তেক্নোলোজিগী অঙকপা খুদোংচাবশিং লৌনবা অমসুং দিজিতেল তেক্নোলোজি শন্দোক্নবগী মতাংদা ৱা খন্নগনি।

*****