ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদী সরকারগী ওইবা খোঙচৎ অমদা নবেম্বর ১৭-নবেম্বর ১৮,২০২৪ দা নাইজেরিয়াদা লৈরি। ঙসি মহাক্না অবুজাদা নাইজেরিয়াগী রাস্ত্রপতি বোলা অহমদ তিনুবুগা ওফিসিএল ওইনা ৱারি শান্নখ্রে। স্তেৎ গেস্ত হাওসতা থুংলবগা, গন সেলুত ২১ পীদুনা প্রধান মন্ত্রী তরাম্না ওকখ্রে।
 

মীহুৎ কাংবুগী থাক্তা ৱারি শান্নরবা মতুংদা লুচিংবা অনিগী অকক্নবা মীফম অমা পাংথোকখি। নিউ দিল্লিদা পাংথোকখিবা জি-২০ মীফমদা মহাক্না রাস্ত্রপতি তিনুবু তরাম্না ওকখিবা অদু প্রধান মন্ত্রীনা নিংশিংখি। মহাক্না হায়খি মদুদি মান্নবা মৈহৌরোলগী শরুক, গনতন্ত্রগী গুনশিং অমসুং মীগা মীগা লৈনবা মরীশিংনা মশক তাক্তুনা লৈবাক অনিগী মরক্তা অখন্নবা মরুপ-মপাং ওইবা মরী অমা লৈনরি। হন্দক নাইজেরিয়াদা ঈশিং ইচাউনা মরম ওইদুনা অমাং-অতা কয়া থোকহনখিবদা প্রধান মন্ত্রীনা রাস্ত্রপতি তিনুবুগী মফমদা মহাক্কী মীনুংশি উৎখ্রে। তেংবাং পোৎলমশিং অমসুং হিদাক লাংথকশিংগা লোয়ননা ভারতনা মতম চানা মতেং পাংলকপগীদমক রাস্ত্রপতি তিনুবুনা প্রধান মন্ত্রী থাগৎপা ফোঙদোকখ্রে।

হৌজিক লৈবাক অনিগী মরক্তা মতেং পাংনরিবা অসি লুচিংবা অনিনা অমুক হন্না য়েংশিনখ্রে অমসুং ইন্দিয়া-নাইজেরিয়া স্ত্রাতেজিক পার্তনরশিপ মখা তানা মপাঙ্গল কনখৎহন্নবা লম্বীশিং খন্নখ্রে। মরীশিং ফগৎলকপদা অপেনবা ফোঙদোক্লদুনা, ললোন-ইতিক, শেন থাদবা, লাইরিক-লাইশু, ইনর্জি, হকশেল, নাত অমসুং মীগা মীগা লৈনবা মরীশিংগী লমদা মতেং পাংনবা য়াবগী খুদোংচাবা কয়া লৈরিবা অসি মখোয়না য়ানরে। লৌউ-শিংউ, ত্রান্সপোর্তেসন, মমল হোংবা হিদাক-লাংথক, রিন্যুএবল ইনর্জি অমসুং দিজিতেলগী থবকশিংদা ভারতকী লৌশিং প্রধান মন্ত্রীনা নাইজেরিয়াদা পীরে। ভারতনা পীরিবা চাউখৎ-থৌরাংগী মতেং অসিগীদমক রাস্ত্রপতি তিনুবুনা থাগৎপা ফোঙদোকখি অমসুং মসিনা লৈবাক অসিগী থবক তৌবা ঙম্বা, স্কিলশিং অমসুং শীনফম কয়াগী মীওইশিং হৈথোই-শিংথোইবা হেনগৎহল্লে। দিফেন্স অমসুং সেকুরিতিগী মতেং পাংনবা হেনগৎহন্নবা লুচিংবা অনিনা ৱা খন্নখ্রে। তেরোরিজম, পাইরেসি অমসুং রেদিকেলাইজেসন পুন্না থেংনমিন্নবা হায়না মখোয়না য়ানরে।

লুচিংবা অনিনা মালেমগী অমসুং লমদম লমদমগী ওইবা থৌদোক-ৱাথোকশিংগী মরমদা খন্নখ্রে। ভোইস ওফ গ্লোবেল সাউথ সম্মিৎকী খুৎথাংদা চাউখৎলক্লিবা লৈবাকশিংগী মতাংদা ভারতনা ৱাফম কয়া পুখৎপদা রাস্ত্রপতি তিনুবুনা থাগৎপা ফোঙদোকখ্রে। নাইজেরিয়ানা ইকোৱাসকী চিয়ার ওইনা অমসুং মসিনা মালেমগী লুপশিং অমসুং লৈবাকশিংদা লৌরিবা থৌদাং প্রধান মন্ত্রীনা থাগৎপা ফোঙদোকখ্রে। ইন্তরনেসনেল সোলার এল্লাইন্স অমসুং ইন্তরনেসনেল বিগ কেত এল্লাইন্সতা নাইজেরিয়া মেম্বর ওইরকপদা থাগৎলদুনা, ভারতনা হৌদোক্লিবা গ্রহ অসি য়াইফনবা থবকশিং শরুক য়ানবা প্রধান মন্ত্রীনা রাস্ত্রপতি তিনুবুদা চেবাউ পীখ্রে।

ৱারি শান্নরবা মতুংদা, কলচরেল একচেঞ্জ প্রোগ্রাম, কস্তমস অমসুং সর্ভেগী মতেং পাংনবগী এম.ও.য়ু অহুম খুৎয়েক পীনখ্রে। মসিগী তুংদা প্রধান মন্ত্রী ইকায়খুম্নবা উৎপা ওইনা রাস্ত্রপতিনা চাক্লেন অমা কৌখি।

***