ভারতকী প্রধানমন্ত্রী

তামিল নাদুগী রাজ্যপাল, শ্রী আর.এন. রভীজী, তামিল নাদুগী মুখ্য মন্ত্রী, শ্রী এম.কে. স্তেলিনজী, চাঞ্চেলর দা. কে.এম. অন্নামলাইজী, ভাইস চাঞ্চেলর প্রোফেসর গুর্মিত সিংহজী, গান্ধীগ্রাম রুরেল ইন্সতিত্যুতকী স্তাফ অমসুং সপ্পোর্ত স্তাফ, আশা লৈবা মহৈরোয়শিং অমসুং মখোয়গী চাউথোকচবনা থল্লবা মমা-মপাশিং,

ৱনক্কম!

ঙসি গ্রেজ্যুএৎ তৌরিবা নহা ওইরিবা মীওই পুম্নমকপু নুংঙাইবা ফোঙদোকচরি। মহৈরোয়শিংগী মমা-মপাশিংবুসু থাগৎচরি। নখোয়না কত্থোকখিবশিং অদুনা ঙসিগী নুমিৎ অসি ওইথোকপা ঙমহনবনি। তীচিং অমসুং নন-তীচিং স্তাফপুসু থাগৎফম থোকই।

মরুপশিং,

কনভোকেসন অসিদা লাকপা ফংজবা অসি ঐহাক্কীদমক য়াম্না ইথিল পোক্নীংঙাই ওইবা এক্সপরিয়েন্স অমনি। গান্ধীগ্রাম অসি মহাত্মা গান্ধী মশামক্না শঙ্গারমখিবনি। মহৌশাগী ফজবা, লেপ্পা লৈতনা চেল্লিবা খুঙ্গংগী পুন্সি, অচম্বা অদুবু লৌশিংনা থনবা অকোইবগী ফীভম অসিদা কনাগুম্বনা মফম অসিদা মহাত্মা গান্ধীগী রুরেল দিবেলপমেন্তগী ৱাখল্লোন অদু উবা ফংগনি। ঐহাক্কী নহা ওইরিবা মরুপশিং, নখোয়না য়াম্না মরু ওইবা তানফম অমদা গ্রেজ্যুএৎ তৌরি। গান্ধীয়নগী ভেল্যুশিং অসি হেন্না মরী লৈনরক্লি। লান লোইশিনবা নত্ত্রগা ক্লাইমেৎ ক্রাইসিস ওইরবসু মহাত্মা গান্ধীগী ৱাখল্লোনশিংদা ঙসিগী ফোং-ফোং শারিবা সমস্যা কয়াগী পাউখুমশিং য়াওরি। গান্ধীয়নগী পুন্সি মহিংগী মহৈরোয়শিং ওইনা নখোয়না অচৌবা শাফু অমা পীনবগী অথোইবা খুদোংচাবা অমা ফংলি।

মরুপশিং,

মহাত্মা গান্ধীদা পীবা খ্বাইদগী অথোইবা ইকাই খুম্নবা অসি মহাক্না চেৎনা থাজজরম্বা ৱাখল্লোনশিং ঙাক্না চৎপনি। মতম শাংনা খাদী অসি মীরাইবীদুনা লাকখি অদুবু ‘খাদী ফোর নেসন, খাদী ফোর ফেশন’গী খোঙথাংগী খুত্থাংদা মসি য়াম্না পাম্নরকখি। হৌখিবা চহি ৮দা খাদী সেক্তরগী সেল অসিদা ২০০% হেন্না হেনগৎলকপা উবা ফংখি। খাদী এন্দ ভিলেজ ইন্দস্ত্রীজ কম্মিসন্না মমাং চহিদা লুপা করোর লাখ ১ হেনবগী তর্নওভর রেকোর্দ তৌখি। অনৌবা গ্লোবেল ফেশন ব্রান্দশিংনা ফাওবা খাদীগী মরমদা শোন্নরি। মসিগী মরমদি ইকো-ফ্রেন্দলী ওইবা ফীদা ওই, গ্রহ অসিগীদমক অফবা ওইরি। মসি মাস প্রদক্সনগী রিভোল্যুসন অমা নত্তে। মসি মীয়াম্না পুরকপা প্রদক্সনগী রিভোল্যুসন অমনি। মহাত্মা গান্ধীনা খাদী অসি খুঙ্গংশিংদা মরোমদোম লেপচনবা খুৎলাই অমা ওইনা উখি। খুঙ্গংশিং মরোমদোম লেপচবা মহাক্না মরোমদোম লেপচবা ঙম্বা ভারতকী মরু হুনবা ওইনা উখি। মহাক্না ইথিল পীদুনা ঐখোয়না আত্মনির্ভর ভারতকী মাইকৈদা চংশিল্লি। স্বাদেসী মুফমেন্তদা তামিল নাদু অসু মরু ওইবা সেন্তর অমা ওইখি। মসিনা আত্মনির্ভর ভারত ওইহনবদসু অমুক হন্না মরু ওইবা থৌদাং লৌখি।

মরুপশিং,

মহাত্মা গান্ধীগী খুঙ্গং চাউখৎহনবগী মঙলান অসি খঙবা মরু ওই। মহাক্না খুঙ্গংশিং চাউখৎহনবা পামখি। মসিগা ইরোইননা মহাক্না খুঙ্গংগী পুন্সিগী মমল য়াম্লবা লনশিং ঙাকশেনবসু পামখি। ঐখোয়গী খুঙ্গং চাউখৎহনবগী মঙলান অসি মঙোন্দগী ইথিল লৌখি। ঐখোয়গী মঙলানদি,

“আত্মা গাও কী, সুভিধা শহর কী”

নত্ত্রগা

“গ্রামত্তিন আনমা, নগরত্তিন বরসি”

সহর অমসুং খুঙ্গং মফমশিংদা খেন্নবা লৈবা অসি করিসু অকাইবা লৈতে। খেন্নবনা অকাইবা পীদে। খল মান্নদবনা অকাইবা থোকহল্লি। মতম শাংনা সহর অমসুং খুঙ্গংগী মফমশিদা খল মান্নদনা লাকখি। অদুবু ঙসি লৈবাক অসিনা মসিবু শেমদোক্লি। রুরেল সেনিতেসনগী কবরেজ মপুং ফাহনবা, য়ুম করোর ৬তা তোতি ঈশিং য়ৌহনবা, ইলেক্ত্রিসিতী কন্নেক্সন করোর ২.৫ পীবা, খুঙ্গংগী লম্বী থোং কয়া শেমগৎপনা মীয়ামগী থোংজিলদা চাউখৎ-থৌরাং য়ৌহনবা ঙম্লি। স্বচ্ছতা হায়বা অসি মহাত্মা গান্ধীনা য়াম্না মরু ওইনা খঞ্জবা ৱাখল্লোন অমনি। মসি স্বচ্ছ ভারতকী খুত্থাংদা মসি রিভোল্যুসনাইজ তৌখি। অদুবু ঐখোয়না তঙাই ফদবশিং অসি থুংহনবা খক্তদা লেপতে। ঙসি খুঙ্গংশিংদা মোদর্ন সাইন্স অমসুং তেক্নোলোজীগী কান্নবশিং ফাওবা য়ৌহল্লি। গ্রাম পঞ্চায়ত লাখ ২গী ময়া কন্নেক্ত তৌনবগীদমক ওপ্তিক ফাইবর কেবল কিলোমিতর লাখ ৬ তিংখি। খুঙ্গংগী মফমশিংনা অহোংবা ইন্তর্নেৎ দেতাগী কান্নবা ফংখি। স্তদীশিংনা হায়রি মদুদি ইন্তর্নেৎ শীজিন্নবগী চাং অসি সহরগী মফমশিংদগী খুঙ্গংগী মফমশিংনা খোঙজেল য়াংনা হেনগৎলক্লি। মসিনা খুদোংচাবশিংগী লম অমা হাংদোকখি। স্বামিত্ব স্কিমগী মখাদা ঐখোয়না লমশিং মেপ্পিং তৌবদা দ্রোনশিং শীজিন্নরি। ঐখোয়না মীয়ামদা প্রোপর্তী কার্দশিংসু পীরি। লৌমীশিংনা এপ কয়াগা লোয়ননা কন্নেক্ত তৌরি। মখোয়না সোইল হেল্থ কার্দশিংগী কান্নবা ফংলি। তৌবা য়াবা কয়া তৌখ্রে অদুবু তৌগদবা কয়া অমা লৈরি। নখোয়দি চহি নৌরি, আশা লৈবা মীরোলনি। য়ুম্ফম অসিদা নখোয়না শেমগৎ-শাগৎপগী থৌনা চাউনা লৈ।

মরুপশিং,

খুঙ্গংগী চাউখৎ-থৌরাংগী মতাংদা লাকপা মতমদা ঐখোয়না সস্তেনেবিলিতীগী মরমদা চেকশিনগদবনি। মসিদা নহারোলশিংনা লুচিংবা মথৌ তাই। খুঙ্গংগী মফমশিংগী তুংলমচৎকীদমক সস্তেনেবল এগ্রিকলচর য়াম্না মরু ওই। মহৌশাগী লৌউ পথাপ, কেমিকেল-ফ্রী ফার্মিংদা চাউনা থৱায় য়াওশিন্নরক্লি। মসিনা হার মপালদগী পুশিল্লকপদা লৈবাক অসিনা মীপাল তাংলম্বা অদু হন্থহল্লি। মসি লৈহাও অমসুং মীওইবগী হকচাংগীদমক য়াম্না ফৈ। মাইকৈ অসিদা ঐখোয়না হান্নদগী থবক পাইখৎপা হৌখ্রে। ঐখোয়গী ওর্গানিক ফার্মিং স্কিমনা মরু ওইনা অৱাং নোংপোক্তা শীংথানীংঙাই ওইনা কান্নবা ফংহল্লি। হৌখিবা চহিগী বজেৎতা ঐখোয়না মহৌশাগী লৌউ পথাপকা মরী লৈনবা পোলিসী পুথোকখি। খুঙ্গংশিংদা মহৌশাগী লৌউ পথাপকী মতাংদা ৱাখল তাহনবদা নখোয়না মরু ওইবা থৌদাং লৌবা য়াগনি।

সস্তেনেবল ফার্মিংগী মতাংদা নহারোলশিংনা মীৎয়েং চংগদবা মরু ওইবা হীরম অমগা লৈ। মোনো-কলচরদগী এগ্রিকলচর কনবগী মতম ওইরে। লমদম অসিগী চেং-হৱায়, মিল্লেৎ অমসুং অতোপ্পা মহৈ-মরোংশিংগী মখলশিং অমুক হন্না হিংগৎহনবগী মথৌ তারে। সঙ্গমগী চহিচাদা মিল্লেৎ মখল কয়া পল্লমখি। য়েলহৌঙৈগী তামিল নাদুগী মীয়াম্না মখোয়বু য়াম্না পাম্নরমখি। মসি মচি ওই অমসুং নোংজু-নুংশা খাংবা ঙম্মি। মসিগী মথক্তা ক্রোপ দাইভর্সিফিকেসন্না লৈহাও অমসুং ঈশিং কনবদা মতেং পাংই। নখোয়গী নশাগী য়ুনিভর্সিতীনা রিন্যুএবল ইনর্জী শীজিন্নরি। হৌখিবা চহি ৮দা সোলর ইনর্জীগী ইনস্তোল তৌখিবা কেপাসিতী অসি শরুক ২০রোম হেনগৎলকখি। করিগুম্বা খুঙ্গংশিংদা পাকশন্না সোলর ইনর্জী শীজিন্নরবদি ভারতনা ইনর্জীদসু মরোমদোম লেপচবা ঙমগনি।

মরুপশিং,

গান্ধীয়নগী ৱাখল্লোন চেনবা বিনোবা ভাবেনা চাংয়েং অমা তৌখি। মহাক্না হায়খি মদুদি খুঙ্গংগী থাক্কী বোদীশিংগী মীখলশিংনা তোখাই তাহনবগী ৱাখল্লোন পোকহল্লি। ফুরুপশিং অমসুং ইমুং মনুংদা ফাওবা মখোয়গীদমক খৎন-চৈনবা থোকই। গুজরাত্তা মসি লাকশিন্নবগীদমক ঐখোয়না সমরাস গ্রাম য়োজনা হৌদোকখি। খুঙ্গংশিংনা অমত্তা ওইনা য়ানদুনা লুচিংবশিং খনবদা ইনসেন্তিব খরা পীখি। মসিনা সোসিএল কনফ্লিক চাউনা হন্থহনখি। নহা ওইরিবা মীওইশিংনা খুঞ্জাশিংগা লোয়ননা থবক তৌমিন্নদুনা মসিগী মান্নবা মেকানিজমশিং অসি ভারত শিনবা থুংবদা চৎনহনবা য়াগনি। করিগুম্বা খুঙ্গংশিং পুনশিনবাতারবদি মখোয়না ক্রাইম, ময়াই কাবা নিশা অমসুং খুন্নাইগী মায়োক্তা লৈবা হীরমশিংগুম্বা সমস্যা অসি লান্থেনবা ঙমগনি।

মরুপশিং,

মহাত্মা গান্ধীনা অপুনবা অমসুং নীংতম্বা ভারতকীদমক লান্থেংনখি। গান্ধীগ্রাম অসিমক ভারতকী অপুনবগী ৱারী অমনি। গান্ধীজীবু উবা ফংজনবা খুঞ্জা লিশিং কয়ানা ত্রেন তৌবা লাকখিবা মফম অদু মসিনি। মহাক অসি কদাইদগী লাকপনো হায়বগী মথৌ তাখিদে। মসিদা মথৌ তারিবা অসি গান্ধীজী অমসুং খুঞ্জাশিং অসি ভারত মচানি হায়বা অসিনি। তামিল নাদুনা নেস্নেল কন্সিয়সনেসকী হৌরকফম মতম চুপ্পদা ওইদুনা লাকখি। মফম অসিদা স্বামী বিবেকানন্দনা নোংচুপতগী হল্লকপদা মহাকপু তরাম্না ওকখি। মমাং চহিমক্তদা ঐখোয়না ‘ভীরা বনক্কম’ শোনবা উবা ফংখি। তামিলগী মীয়াম্না জেনরেল বিপিন রাৱতপু ইকাই খুম্নবা উৎখিবগী মওং অদু তশেংনা পেন্নীংঙাই ওই। অমরোমদা কাশীদা কাশী তামিল সঙ্গামম অথুবদ পাঙথোক্লগনি। মসিনা কাশী অমসুং তামিল নাদুগী মরক্তা লৈরিবা মরী চেৎশিনহনগনি। কাশী মীয়াম্না তামিল নাদুগী লোল, নাৎ অমসুং পুৱারীগীদমক নুংঙাইবা ফোঙদোক্নবা খৌরাংনা ঙাইরি। মসি এক ভারত শ্রেস্থ ভারতকী থৌওংনি। অমনা অমবু নুংশিবা অমদি ইকাই খুম্নবা অসি ঐখোয়গী অপুনবা শক্তমগী য়ুম্ফমনি। ঐহাক্না মফম অসিদগী গ্রেজ্যুএৎ তৌরিবা নহারোলশিংদা মরু ওইনা অপুনবগী ৱাখল্লোন পুক্নিং থৌগৎপদা মীৎয়েং চংনবা হায়জরি।

মরুপশিং,

ঙসি ঐহাক্না নারী শক্তিগী মপাঙ্গল উবা ফংখ্রবা লমদম অসিদা লাক্লি। মসি রানি ভেলু নচিয়রনা ব্রিতিশকা লান শোক্ননবা শেম-শারিঙৈদা লৈরমখিবা মফম অদুনি। মফম অসিদগী গ্রেজ্যুএৎ তৌরিবা নহা ওইরিবা নুপীশিংবু খ্বাইদগী চাউবা চেঞ্জমেকরশিং ওইনা ঐহাক্না উই। নখোয়না খুঙ্গংগী নুপীশিং মাইপাকহনবদা মতেং পাংগনি। মখোয়গী মাইপাকপা অসি জাতিগী মাইপাকপনি।

মরুপশিং,

চহিচা অমদা থেংনবা খ্বাইদগী চাউবা খুদোংথিবা মালেম্না মায়োক্নরিবা তানফম অসিদা ভারতনা অচৌবা মফম অমা কনখি। মালেমগী খ্বাইদগী চাউবা ভেক্সিন দ্রাইব ওইরবসু, লায়রবশিংগী ফুদ সেক্যুরিতী ওইরবসু নত্ত্রগা মালেম গ্রোথ ইঞ্জিন ওইরিবা অসি ওইরবসু ভারতনা মসি পাঙথোক্তুনা উৎপা ঙমখি। মালেমনা ভারত্তা অহেনবা কয়া তৌরক্কনি হায়না থাজবা থমখি। মরম অসিনা ভারতকী তুংলমচৎ অসি নহারোলশিংগী ‘কেন দু’ জেনরেসনগী মখুৎশিংদা লৈ।

শীংনবশিং মায়োক য়াবা খক্তা নত্তনা মখোয়বু থেংনবদা নুংঙাইবা পোকপা নহারোলশিং, ৱাহং হংবা খক্তা নত্তে পাউখুমশিং থীরিবা নহারোলশিং, অকিপা পোক্তবা খক্তা নত্তনা চোকথবা নাইদবা নহারোলশিং, আশা থম্বা খক্তা নত্তনা মাইপাকপা ঙম্লিবা নহারোলশিং। ঙসিগী গ্রেজ্যুএৎ তৌরিবা নহারোলশিংদা পীজনীংবা ঐহাক্কী পাউজেল অসি নখোয়না অনৌবা ভারতকী বিল্দরশিংনি। নখোয়না অমৃত কালগী মথংগী চহি ২৫ অসিদা ভারতপু লমজিংনবগী থৌদাং য়াগদবনি। অমুক্কা হন্না ময়ামদা নুংঙাইবা ফোঙদোকচরি।

অমসুং য়াইফ-মঙ্গোল পীজরি!

***