ভারতকী প্রধানমন্ত্রী

প্রধান মন্ত্রী, শ্রী নরেন্দ্র মোদীনা ঙসি দোক্তরগী নুমিৎতা দোক্তর কম্যুনিতীদা হরাওবা ফোংদোকখ্রে। মহাক্না হায় নুমিৎ অসি, ঐখোয়গী মেদিকেল ফ্রাতর্নিতীগী খ্বায়দগী তমজনিঙাই ওইরিবা দোক্তর বি.সি.রোয়বু নিংশিংবা ওইনা পাংথোকপনি। লায়চৎ অসিনা মরম ওইদুনা হৌখিবা চহি অমা মখায় অসিগী লুরবা মতমদা মখোয়না তৌখিবা থবকশিংদা মহাক্না ইন্দিয়ন কোতি ১৩০গী মহুৎ শিন্দুনা থাগৎপা ফোংদোকখি। মহাক্না ঙসি ইন্দিয়ন মেদিকেল এসোসিএসন্না শিনবা থৌরম অমদা ভিদিও কনফরেন্সকী খুত্থাংদা ৱা ঙাংখি।

দোক্তরশিংগী থৌদাং অসি শিংথারদুনা, প্রধান মন্ত্রীনা লায়চৎ অসিদা মখোয়না থৌনা ফনা হোৎনখিবা অদুবু নিংশিংলি অমসুং মীওইবা জাতিগীদমক সেবা তৌবদা মপুন্সি কৎখ্রবশিংগীদমক ইকাই খুম্নবা উৎখ্রে। প্রধান মন্ত্রীনা হায় মদুদি ঐখোয়গী সাইন্তিস্ত অমসুং দোক্তরশিংনা কোরোনানা পীরকপা শিংনবা কয়া থেংননবগী পাম্বৈ লৈরে। ঐখোয়গী দোক্তরশিংনা মসিগী অনৌবা অমসুং য়াম্না থুনা শন্দোক্লবা ভাইরস অসি মখোয়না থেংনরকপশিংগা লোয়ননা অমসুং হৈ-শিংনা মায়োক্নরি। মতম শাংনা মীরাইবিরবা মেদিকেলগী ইনফ্রাস্ত্রকচরগী অকক্নবা অমসুং মীশিংগী পোৎলুম লৈজরবসু ভারতকী মীশিং লাখকী চাংদা নাবা অমসুং শিবগী চাং অসি অতৈ চাওখৎলবা লৈবকশিংগা য়েংনবদা অদুম য়ারি। পুন্সি কয়া অমা মাংখিবা অসি থম্মোয় শোক্নিংঙাইনি অদুবু পুন্সি কয়া অমসু কল্লি। মনা অসি কন্না হোৎনদুনা মীওই কয়া অমগী পুন্সি কল্লিবা দোক্তরশিং, হেলথকেয়র ৱার্করশিং অমসুং ফ্রন্তলাইন ৱার্করশিংদা পীরি।

সরকারনা হেলথকেয়রদা মপাঙ্গল কন্নবা মিয়েং থম্লিবা অসি প্রধান মন্ত্রীনা পনখি। ‘অহানবা ৱেব’কী মনুংদা কোতি লিশিং ১৫ হেলথকেয়রগীদমক পীখি অমসুং হন্দক্কী চহি অসিদা, হেলথ সেক্তরগী বজেৎ অসি শরুক অনি থোক্না লুপা কোতি লাখ ২দা হেনগৎখি। লুপা কোতি লিশিং ৫০ অমা কান্নবা ফংদ্রবা মফমশিংগী চাওখৎ থৌরাংগীদমক ক্রেদিৎ গুরান্তী স্কীমদা পীরি।  অনৌবা এ.আই.আই.এম.এস., মেদিকেল কোলেজশিং লিংখৎলি। ২০১৪দগী হান্না লৈরবা এ.আই.আই.এম.এস. অপুনবা মশীং তরুক অসিগী মথক্তা এ.আই.আই.এম.এস. ১৫ অমগী খোঙথাং লৌখৎলি। মেদিকেল কোলেজগী মশীং অমা তঙ্খায় হেনগৎলি। গ্রেজুএত মখাদা লৈবা মেদিকেল সীত অমা তঙ্খায় হেনগৎলি অমসুং পি.জি. সীতনা চাদা ৮০ হেনগৎলক্লি হায়না প্রধান মন্ত্রীনা পাউদমখি। 

দোক্তরশিংগী তেক্ত কায়দনবা সরকারনা ঙাক্লি হায়না শ্রী মোদীনা হন্না হায়খি। দোক্তরশিংদা হিংশা তৌবা ঙাকথোক্নবা অহকপা লো শেম্লে হায়না মহাক্না পনখি। মসিগা লোয়ননা কোবিদ লান্থেংনরিবশিংগী লেম্না ইন্সুরেন্স স্কীম পীরি।  

দোক্তরশিংনা মীয়াম্বু ভেক্সিন কাপ্নবগী পুক্নিং থৌগৎনবা অমসুং কোবিদকীদমক চৎনগদবশিং চৎহনবা প্রধান মন্ত্রীনা হায়খ্রে। মহাক্না য়োগগী কান্নবশিং শন্দোক্নবা মেদিকেলগী ফ্রাত্রনিতীদা পুক্নিং থৌগৎলি। য়োগ শন্দোক্নবগী থবকশিং অসি নিং-তম্বা মতুং অরোইবা চহিচাদা পাকথোক্লমগদবা অদু হৌজিক্তা তৌরি হায়না প্রধান মন্ত্রীনা হায়খি। মহাক্না দোক্তরশিংবু  মখোয়গী মতমশিং অসি য়োগগী কান্নবশিংগী ইবিদেন্সতা য়ুম্ফম ওইবা স্তদীশিং পাংথোক্তুনা কোবিদ মতুংদা কান্নগদবা অসিগীদমক থাগৎপা ফোংদোকখি। আই.এম.এ.না য়োগগী কান্নবশিংগী ইবিদেন্সতা য়ুম্ফম ওইবা স্তদীশিং অসি মিসন অমদা তৌবা ঙমগদ্রা হায়না হংখি। য়োগগী স্তদীশিং অসি অন্তরজাতিগী ওইবা জর্নেলশিংদা ফোংবা য়াই হায়না অপাম্বা ফোংদোকখি। 

    প্রধান মন্ত্রীনা খুৎলোয়রবা দোক্তরশিংগী দোক্যুমেন্তেসন থম্নবগী তঙাইফদবশিংগী মরুওইবা পীখি। থেংনরকখিবশিং অসিগা লোয়ননা, অনাবশিং অসিগী লায়ওংশিং অমসুং লায়েংবগী থৌরাংশিং মরীক চুম্না দোক্যুমেন্তেসন তৌবা মথৌ তাই। হায়রিবা অসি রিসর্স স্তদী ওইনা লৌবা য়াই। শ্রী মোদীনা হায় মদুদি ঐখোয়গী দোক্তরশিংনা লায়েংখিবা অনাবশিং অসি মালেমগী মমাংদা থম্বা য়াই। হৌজিক মালেম অসিনা সাইন্তিফিক স্তদীজতগী খঙবা অমসুং কান্নবা লৌবা মতমনি। কোবিদকী লায়চৎ্ অসিনা মসি হৌনবগী চপ চাবা মতম ওইরবনি। ভেক্সিন অসিনা ঐখোয়না কয়া য়াম্না কান্নবগে হায়বা স্তদী তৌরবদি, ঐখোয়না য়াম্না ঙন্না লায়েংবদা মতেং তৌবা ঙমগনি হায়না প্রধান মন্ত্রীনা অঙকপা ফাওনা হায়খি। হৌখিবা চহিচাদা থোকখিবা লায়চৎকী দোক্যুমেন্তেসন অমত্তা লৈতে অদুবু হৌজিক্তি কোবিদ থেংনবগী  দোক্যুমেন্তেসন অসিনা মীওইবা খুনাইদা কান্নবা অমা পীরগনি হায়না প্রধান মন্ত্রীনা লোইশিনখি।    

****