ভারতকী প্রধানমন্ত্রী

ইকায় খুম্ননীংঙাই ওইরবা তমিল নাদুগী রাজ্যপাল, শ্রী আর.এন. রবিজী, মুখ্য মন্ত্রী, শ্রী এম.কে. স্তেলিনজী, কেন্দ্র মন্ত্রী, শ্রী এল. মুরুগনজী, অতোপ্পা মন্ত্রী অমসুং মীথুংলেনশিং, অন্না য়ুনিভর্সিতীগী ভাইস চান্সেল্লর, দাঃ আর. ভেলরাজজী, ঐহাক্কী নহা ওইরিবা মরুপ, মখোয়গী মমা মপা অমসুং ওজাশিং…অনেবরুক্কুম বনক্কম!

খ্বাইদগী অহানবমক্তদা, ঙসি, অন্না য়ুনিভর্সিতীগী ৪২শুবা কনভোকেসন্দা গ্রেজুএত লোইরিবা অদোম খুদিংবু থাগৎচরি। অদোম্না ইশাগী তুংগী পুন্সি অমদি ৱাখল্লোন্দা শোইদনমক্কী শেমগৎলম্লগনি। মরম অদুনা, ঙসি অসদি মায় পাকপগী নুমিৎ ওইবতা নত্তনা, অনীঙবা-অপাম্বা ফংবগী নুমিৎ অমসু ওইরি। ঐখোয়গী নহা খুদিংবু মঙলান্না মঙফাওনবা হায়বসি ঐহাক্কী অপাম্বনি। ঙসি অসিদি অন্না য়ুনিভর্সিতীগী তিচিং অমসুং নন-তিচিং স্তাফকী অখন্নবা পুংফম অমসু ওইরিবনি। অদোমদি হয়েংগী লুচিংবা শেম-শারিবা লৈবাক শেম্বা মীওইশিংনি। অদোম্না বেৎচ কয়া অমা লাকপা অমসুং চৎখিবা উদুনা লাকখি, অদুবু বেৎচ খুদিংমক তোপ-তোপ্পা ঙাক্তনি। মখোয়না মশাগী তোঙানবা নীংশিংনীংঙাই ওইবা থৌদোক কয়া থম্লম্মি। ঙসি গ্রেজুএত লোইশিল্লিবশিংগী মমা-মপাশিংবু ঐহাক্না অখন্ননা থাগৎচরি অমসুং য়াইফ পাউজেল পীজরি। অদোমগী অঙাংশিংগী মায় পাকপদা অদোমগী কত্থোকপশিংগী থৌদাং য়াম্না চাউই।

ঐখোয়গী নহাশিংগী মায় পাকপগী নুংঙাইবা ফোংদোক্নবা ঐখোয়না ঙসিদি চেন্নৈগুম্বা মতিক লৈরবা শহরদা লৈরি। ঙসিদগী চহি ১২৫গী মমাংদা, স্বামী বিবেকানন্দনা ফেব্রুৱারী ১৮৯৭তা মদ্রাজ তাইমসতা ৱাফম খরা থমখি। ভারতকী তুংগী মতমগীদমক্তা মহাক্কী করি থৌরাং লৈবগে হায়না মহাক্কী মফমদা হংখি। মহাক্না অসুম্না হায়খি, “ঐহাক্কী থাজবদি নহা ওইরিবা অমসুং হৌজিক্কী মতমগী চারোন শুরোন্দা লৈ, মখোয়গী মরক্তগী ঐহাক্কী থৌমীশিং থোক্লক্কনি। মখোয়না নোংশাগুম্বা শিংনবা খুদিংগী ৱারোইশিন পুরক্কনি”। ৱাফমশিং অসি হৌজিক্কা মতমগসু য়াম্না চুনরি। অদুবু, হন্দক্কী মতাং অসিদদি, ঐখোয়গী নহারোলশিংদা মিৎয়েং থম্লিবসি ভারত খক্তা নত্ত্রে। মালেম পুম্বনা ভারতকী নহাশিংদা থাজবগী মিৎয়েং য়েংলি। অদোম্না লৈবাক্কী গ্রোথ ইঞ্জিন ওইরি, মরম অদুনা ভারতনা মালেমগী গ্রোথ ইঞ্জিন ওইরিবনি। মসিদি য়াম্না চাউথোকচনীংঙাইনি। অদুগা মসিদি অচৌবা থৌদাং অমসু ওইরিবনি, অদোম্না মসিদসু মায় পাক্কনি হায়বসি ঐহাক্কী থাজবনি।

মরুপশিং,

ঐখোয়গী নহাশিংদা থাজবা থম্বগী মতাং লাকপদা, ঐখোয়না ভারত রত্না, হান্নগী রাস্ত্রপতি, দাঃ এ.পি.জে. অবদুল কলাম্বু করম্না কাওথোকপা ঙমগনি। দাঃ কলামগা অন্না য়ুনিভর্সিতীগা অচেৎপা মরী লৈনরম্মি হায়বা ৱাফম অসিদা য়ুনিভর্সিতী অসিদা লৈরিবা মীপুম খুদিংনা চাউথোকফম থোকই। মহাক্না লৈরম্বা কাবু মহাক্কী নীংশিং খুভম ওইনা ওন্থোক্লে হায়না ঐহাক্না তাজৈ। মহাক্কী ৱাখল্লোন অমসুং ভেল্যুনা অদোমদা মতম পুম্বদা ইথিল পীবা ওইসনু।

মরুপশিং,

অদোম্না য়াম্না অখন্নবা মতমদা গ্রেজুএত লোইশিল্লে। মীওই খরনদি মালেমগী তংদু লৈতাদবা মতম হায়না কৌনরি। অদুবু, ঐহাক্তি মসিবু খুদোংচাবা লৌনবা খ্বাইদগী ফবা মতম্নি হায়গনি। কোবিদ-১৯ লাইচৎ অসিদি মমাংদা অমুক্তা থোকখিদ্রিবা থৌওং অমনি। মসিদি, করম্না মাইয়োক্নগদগে হায়বগী কনা অমত্তদা পাউতাক লৈতবা চহি-চা অমদা অমুকখক থোকপা থৌদোক অমনি। মসিনা লৈবাক খুদিংবু চাংয়েং তৌখি। শিংনবা কয়ানা ঐখোয় অসি করিনা শাবনো তাকই হায়বসি অদোমসু খঙই। ভারতনা মশাদা থাজবগা লোয়ননা খঙদবা কয়াগা মাইয়োক্নখি, অমসুং মসি ঙমখ্রিবা অসিদি ঐখোয়গী সাইন্তিস্ত, হেল্থকেয়র প্রোফেস্নেল অমসুং মীচম মীয়ামগী হোৎনজমন্ননি। পুম্নমক অসিগী মহৈ ওইনা, ভারতকী সেক্তর খুদিংনা অনৌবা পাঙ্গলগা লোয়ননা মায় পাক্লিবনি। ইন্দস্ত্রী, ইনভেস্তমেন্ত, ইন্নোভেসন নত্ত্রগা মালেমগী ত্রেদ ওইরো, হীরম কয়া অসিদা ভারতনা হৌজিক মাং থারি। ভারতনা মতম অসিগী মখা পোন্না থবক তৌখি। খুদম ওইনা হায়রবদা, ইলেক্ত্রোনিক্স মেন্যুফেকচরিং। মমাংগী চহিদা, ভারতনা মালেমগী খ্বাইদগী অনিশুবা চাউবা মোবাইল শাবা লৈবাক ওইখি। ইন্নোভেসন হায়বসিনা অনৌবা পুন্সি মহিং অমা ওইরক্লি। হৌখিবা চহি ৬ অসিমক্তদা, শকখঙলবা স্তার্ত-অপশিংগী মশিংনা চাদা ১৫,০০০গী চাংদা হেনগৎখি। চুম্মে, অদোম্না তারিবদো চুম্মে, ১৫,০০০%। ইং ২০১৬তা শুপ্নগী ৪৭০ লৈরম্বদগী, হৌজিক্তি চাউরাক্না ৭৩,০০০ লৈরে। ইন্দস্ত্রীনা ইন্নোভেসন তৌরকপা মতমদা, ইনভেস্তমেন্তনা তুং অদুমক ইল্লক্কনি। ভারতনা মমাংগী চহিদা বিলিয়ন দোল্লর ৮৩ হেনবগী এফ.দি.আই. লাকখি। ঐখোয়গী স্তার্ত-অপশিংনা লাইচৎ মতুংদা রেকোর্দ ওইরবা ফন্দিং ফংখি। পুম্নমক অসিগী মথক্তা, ইন্তর্নেস্নেল ত্রেদ দাইনামিক্সতা ভারতনা কল্লিবা থাক অসিনা হৌজিক ফাওবগী খ্বাইদগী হেন্না ফবা ওইরি। ঐখোয়গী লৈবাক্কী গুদ অমসুং সর্ভিসকী খ্বাইদগী চাউবা এক্সপোর্তকী চাং য়ৌবা ঙমখি। ঐখোয়না লুরবা তাঞ্জা অসিদা মালেমগী হৱাই-চেংৱাই পীখি। ঐখোয়গী নোংচুপ্তা য়ু.এ.ই. অমসুং ঐখোয়গী নোংপোক্তা ওস্ত্রেলিয়াগা ঐখোয়না হন্দক্তা ত্রেদ দীলগী খুৎয়েক পীনখি। ভারতনা গ্লোবেল সপ্লাই চেনগী মরু ওইবা লিঙ্ক অমা ওইরক্লি। ভারতনা শিংনবশিংবু খুদোংচাবদা ওন্থোক্লিবা মতমসিদা, ঐখোয়গী খ্বাইদগী চাউবা শাফু পীবগী তাঞ্জা অমা ঐখোয়দা লৈরবনি।

মরুপশিং,

অদোমগী মরক্তগী অয়াম্বা শরুক্না ইঞ্জিনিয়রিং নত্ত্রগা তেক্নোলোজীগা মরী লৈনবা স্ত্রীমদা মহৈ তম্লকপনি। তেক্না লুচিংদুনা অহোংবা পুরকপা হৌজিক্কী য়ুগ অসিদা, অদোমগী মাইকৈদা তেংবাংবা মরু ওইবা হীরম অহুম লৈ। অহানবনা, ঐখোয়না তেক্নোলোজী শিজিন্নবগী কান্নবা করিনো খঙলে। তেক্নোলোজী শিজিন্নবদা ঐখোয়দা নুংঙাইবা ফাওবগী মতৌ হেনগৎলক্লি। খ্বাইদগী লাইরবা মীওই ফাওবনা হৌজিক্তি তেক্নোলোজী শিজিন্নবা হৌনরে। লৌমীশিংনা কৈথেলগী ই-পাউ, অইং-অশা অমসুং পোৎলমগী মমল খঙনবা এপ শিজিন্নরি। য়ুম শেন্নবশিংনা মশাগী পুন্সি হেন্না নুংঙাইহন্নবা তেক্নোলোজী শিজিন্নরি। অঙাংশিংসু তেক্নোলোজী শিজিন্নবা তম্লি। অপীকপা ভেন্দরশিংনা দিজিতেল পেমেন্ত পাংথোক্নরি। অদোম্না শেল পীবা মতমদা, মখোয়গী মরক্তগী খরদি, দিজিতেল ওইনা পাম্বসু য়াওরমগনি। ভারতনা দিজিতেল পেমেন্ত অমসুং ফিন্তেক্তা মালেমগী লুচিংবা ওইরি। তেক্নোলোজিকেল ইন্নোভেসনগী চাউরবা মার্কেত অমনা অদোম্না ইশাগী হৈ-শিংবা উৎনবা ঙাইদুনা লৈরবনি।

অনিশুবা, রিস্ক-লৌবশিংদা ঐখোয়না থাজবা হেনগৎলে। হান্নগী মতমদা, সোসিএল ওইবা থৌরমশিংদা নহাশিংনা মশাবু ওন্তোপ্রিনরনি হায়বজবসি খরা লুনা থোক্লম্মি। মীয়াম্না মশাবু ‘সেত্তল ওইরে’, হায়বদি, তোলোব চাবা থবক অমা তৌজরে হায়নবা মসিগুম্বা ৱাফম শিজিন্নরম্মি। অদুবু, হৌজিক্তি ফিভম অসি তাইয়োন্নরে। অহুমশুবা, রিফোর্ম পাংথোক্নিংবগী মতৌ হৌজিক লৈরে। ইশাগী ওইবা করিগুম্বা অমা হৌদোক্কে হোৎনবীরবরা হায়না হৌজিক হংনরে। মীওই অমনা থবক অমা তৌবা ওইরবসু, স্তার্ত-অপ্তা থবক তৌই হায়বনা হেন্না পাম্নরে। রিস্ক লৌবশিংগী মশিং হেনগৎলকপনা অদোমগী মফমদা ৱাফম অনি তাক্লি। অদোম ইশানা রিস্ক লৌবা য়ারে। নত্ত্রগা, অতোপ্পনা শেম্লম্বা খুদোংচাবশিংগী কান্নবা অদোম্না লৌবা য়ারে।

অহুমশুবা অসিনা, রিফোর্ম পাংথোক্নিংবগী মতৌ হৌজিক লৈরে। মপাঙ্গল লৈবা সরকার হায়রগদি, মখোয়না হীরম অমসুং মীওই খুদিংবু লাকশিনবা ঙমগদবনি হায়না লৌনরম্মি। অদুবু, ঐখোয়না মসি হোংদোক্লে। মপাঙ্গল লৈবা সরকার অমনা পুম্নমক লাকশিন্দুনা থমদে। মসিনা সীস্তেমগী য়েৎনীংবগী মতৌবু লাকশিল্লি। মপাঙ্গল লৈবা সরকারনা অকক্নবা থমদে, মখোয়না মীয়ামগী তায়। মপাঙ্গল লৈবা সরকার অমনা দোমেন খুদিংদা চঙশিন্দে। মখোয়দি মশাবু অকক্নবা থমদুনা, মীয়ামগী তেলেন্ত শিজিন্ননবা মফম শেম্মি। মপাঙ্গল লৈবা সরকারগী তসেংবা মপাঙ্গলদি, মখোয়না হীরম খুদিং খঙবা ঙম্বা অমসুং পাংথোকপা ঙম্বা নত্তে হায়না য়াজবা ঙম্বসিনি। মসিনা মরম ওইরগা, মীয়াম অমসুং মখোয়গী মনীং তম্বগী মফম হেন্না চাউনা পীদুনা হীরম খুদিংদা রিফোর্ম পাংথোকপগী মতৌ অদোম্না উবা ফংলিবনি।

অনৌবা নেস্নেল এজুকেসন পোলিসীনা নহাশিংদা হোংলক্লিবা ফিভমগী মতুং ইন্না ৱারেপ লৌবা ঙমহল্লে। চাউরাকপা কমপ্লাইএন্স ২৫,০০০ লৌথোকখিবনা পুন্সি মহিং হেন্না নুংঙাইহল্লে। এঞ্জেল তেক্স মুত্থৎপা, রেস্ত্রোস্পেক্তিব তেক্স মুত্থৎপা, অমসুং কোর্পোরেত তেক্স হন্থহনবগী থৌওংনা ইনভেস্তমেন্ত অমসুং ইন্দস্ত্রীবু পুক্নিং থৌগৎলি। দ্রোন, স্পেস অমসুং জিও-স্পেসিএল সেক্তরদা রিফোর্ম পাংথোকপনা অনৌবা খুদোংবশিংগী থোঙ হাংলি। পি.এম. গতি শক্তি মাস্তর প্লানগী খুত্থাংদা ইনফ্রাস্ত্রকচর সেক্তরদা রিফোর্ম পাংথোকপনা মালেমগী থাক্তা লৈবা ইনফ্রাস্ত্রকচর কয়া খোঙজেল য়াঙনা অমসুং চাউনা শেম্লি। তেক্নোলোজীবু পাম্বা, রিস্ক-লৌবশিংদা থাজবা অমসুং রিফোর্ম পাংথোক্নিংবগী মতৌ হৌজিক লৈরে। হীরমশিং অসিনা খুদোংচাবশিং শেমদুনা, মতম কুইনা লৈহনবগা লোয়ননা হেন্না চাউখৎহনবা ঙম্বা প্লেতফোর্ম কয়া অদোমগীদমক্তা শেম্লে।

মরুপশিং,

মথংগী চহি ২৫ অসিদি ভারত অমসুং অদোমগী য়াম্না মরু ওইরি। মসিদি নীংতম্বগী চহি ১০০ মপুং ফাবগী মতমদা পুগদৌরিবা অমৃত কালনি। অদোমগুম্বা নহা কয়ানা ইশাগীতা নত্তনা ভারতকী তুংগী মতম শেমগদৌরিবসি ঐখোয়গী লাইবক ফবনি। মরম অদুনা, অদোমগী চাউখৎপসি ভারতকী চাউখৎপনি। অদোমগী লৌশিং অসি ভারতকী লৌশিংনি। অদোমগী মায় পাকপসি ভারতকী মায় পাকপনি। অদোম্না ইশাগী অমসুং ইমুং মনুংগী থৌরাং য়াৎপা খুদিংদা, অদোম্না মশা-মথন্নতা ভারতকী থৌরাংসু য়াৎলি হায়বা কাওগনু। মসিদি অদোমখক্কী চারোন্না ফংবা পুৱারী ওইরবা খুদোংচাবা অমনি। মসিবু লৌসি অমসুং মসিগী খ্বাইদগী কান্নবা লৌসি! ঐহাক্না পুম্নমকপু অমুক হন্না থাগৎচরি অমসুং পুম্নমক্না মায় পাকপা ওইরসনু!

***