ভারতকী প্রধানমন্ত্রী

গুজরাতকী রাজ্যপাল অচার্য় দেবব্রতজী, লৈবাক্কী ঙাক-শেল মন্ত্রী, শ্রী রাজনাথ সিংহজী, গুজরাতকী মীয়াম্না য়াবা মুখ্য মন্ত্রী, শ্রী ভুপেন্দ্র ভাই পতেল, গুজরাত সরকারগী মন্ত্রী জগদীশ ভাই, মিনিস্তর কাউন্সিলগী সেনিয়র মন্ত্রী, সি.দি.এস., জেনেরেল অনিল চৌহানজী, চীফ ওফ এয়র স্তাফ এয়র চীফ মার্শেল বি.আর. চৌধ্রী, চীফ ওফ নেভেল স্তাফ এদমিরেল আর. হরিকুমার, চীফ ওফ আর্মী স্তাফ, জেনেরেল মনোজ পান্দে, অতোপ্পা মীথুংলেন, মীরমদগী লাক্লিবা মরু ওইবা মীপুম খুদিং, নুপী অমসুং নুপাশিং!

গুজরাত লমদমসিদা মপাঙ্গল লৈবা, মতিক লৈবা অমসুং মরোমদোম লেপচবা ঙম্বা ভারতকী মসিগুম্বা মরু ওইবা থৌরমসিদা পুম্নমকপু ঐহাক্না তরাম্না ওকচরি। লৈবাক্কী প্রধান মন্ত্রী ওইনা অদোম্বু তরাম্না ওকপদা নুংঙাইবা ফাওরিবা অসিগুম্না ঐহাক্না গুজরাতকী মচা অমা ওইনা অদোম্বু তরাম্না ওকপদা নুংঙাইবা ফাওরি। দেফএক্সপো ২০২২গী থৌরমসিনা ঐখোয়না অমৃত কালদা শেমগে খনখিবা অনৌবা ভারতকী শক্তম উৎলি। মসিদি নহাশিংগী মপাঙ্গল অমসুং মঙলান কয়া য়াওরি, অসিদা নহাশিংগী ৱারেপ অমসুং তৌবা ঙম্বগী মতিকশিং য়াওরি। মসিদা মালেমগী থাজবা অমসুং য়ুম্লোন্নবা লৈবাক্কী খুদোংচাবা কয়া য়াওরি।

মরূপশিং,

ঐখোয়গী লৈবাকসিদা মমাংদসু দিফেন্স এক্সপো পাংথোকখ্রে, অদুবু হন্দক্কী দেফএক্সপো অসিগী তোঙানবা মতৌ চেল্লি। মসিগী মরমদি, হন্দক্কী অসিনা ভারতকী কম্পেনীশিংনা শরুক য়াবা অমসুং ভারত্তা শাবা পোৎলমখক্তমক উৎপা খ্বাইদগী অহানবা দিফেন্স এক্সপোনি। ভারতকী এক্সপো অমদা ভারতকী লমদমদগী, ভারতকী মীওইনা মশাগী হুমাং তাদুনা আইরন মেন, সর্দার পতেলগী লমদমদগী ঐখোয়না ভারতকী তৌবা ঙম্বগী মতিক কয়া মালেমগী মাঙদা উৎলি। এক্সপো অসিদা ভারতকী দিফেন্স ইন্দস্ত্রী, মখোয়, এম.এস.এম.ই. অমসুং স্তার্তঅপ ১০০ হেনবগা পুন্না পায়খৎমিন্নবা জোইন্ত ভেঞ্চর খরা য়াওনা একজিবিতর ১৩০০ হেনবনা শরুক য়ারি। মসিনা ভারতকী তৌবা ঙম্বগী চাউরাকপা শক্তম অমা ফ্রেম অমখক্তদা উৎলি। এম.ও.য়ু. ৪০০ হেনববুসু খ্বাইদগী ইহান হানবা ওইনা খুৎয়েক পীনরি।

মরূপশিং,

ঐখোয়না থৌরম অসি মতম কয়াদগী মমাংদগী পান্থোক্নিংবনি। গুজরাতকী মীয়াম্নসু নীংথিনা খঙবনি। শিংনবা খরা লাকপদগী মতম হোংদোকপা তাখিবনি, অদুনা থেংখ্রে। মীরমদগী লাক্কদবা মীথুংলেনশিংনা খুদোংচাদবা খরা থেংনরে, অদুবু লৈবাক্কী হৌজিক ফাওবগী খ্বাইদগী চাউবা দিফেন্স এক্সপোনা অনৌবা মতম অমগী লম্বী য়াৎলে। লৈবাক খরনা খুদোংচাবা থেংনৈ হায়বা ঐহাক খঙই, অদুবু, লৈবাক কয়া অমনা ৱাখল চাউথোক্না মফমসিদা লাক্লি।

মরূপশিং,

ভারতনা তুংগী খুদোংচাবা কয়া শেম্বা অমসুং অফ্রিকাগী অফবা মরী লৈনবা লৈবাক ৫৩না ঐখোয়গা পুন্না চৎমিন্নবসিদা নুংঙাইবা ফাওই। মসিগুম্বা তাঞ্জা অসিদা ২শুবা ভারত-অফ্রিকা দাইলোগসু পাংথোক্কনি। মরুপশিং, অদোম্না ঙসি গুজরাতকী লমদমদা লাকপীরি, মসিদা অফ্রিকা অমসুং গুজরাতকা অরিবা অমসুং অচেৎপা মরী অমা লৈ হায়বা ৱাফম থমজনীংই। অফ্রিকাদা অহানবা ত্রেন চেনখিবা মতমদা, মদুগী থবক শুনবা গুজরাতকী কৎচতগী মীওই কয়া চৎখিবনি। মখোয়না অৱাবা কয়া থেংনদুনা মতমদুদা অফ্রিকাদা ত্রেন চেনলহনবদা মতেং য়াম্না পাংখিবনি। মসিদা নত্তনা, অদোম্না মফমদুদা চৎলুবা মৎদা দুকান হায়বা ৱাহৈ মখোয়সু শিজিন্নবা থেংনগনি, অদুগা ৱাহৈ অসি গুজরাতীনি। রোতী, ভাজী হায়রিবা ৱাহৈশিং অসি অফ্রিকাগী নোংমগী পুন্সিদা চুশিনখ্রবনি। করিগুম্বা, মহাত্মা গান্ধীগুম্বা মালেমগী লুচিংবগী পোক্নফম লমদম্না গুজরাত ওইবা মতমদা, অফ্রিকানা মহাক্কী অহানবা ‘কর্মভুমী’ ওইরিবনি। অফ্রিকাগা মতৌ অসুম্না মরী লৈনরিবসি ঐখোয়গী ভারতকী ফোরেন পোলিসীনা মরু ওইনা লৌরি। কোরোনা মতমদা মালেম্না ভেক্সিনগী মতাংদা ৱানবা মতমদা, ঐখোয়গী অফবা মরী লৈনবা অফ্রিকাগী লৈবাকশিংদা ভারতনা অহেনবা মিৎয়েং চঙদুনা ভেক্সিন পীখিবনি। তঙাই ফদবা মতমদা হিদাক পীবদগী হৌদুনা পীস মিসন ফাওবদা ভারতনা অফ্রিকাগা লেংগোন্নদুনা চৎনবা হোৎনদুনা লাক্লি। হৌজিক, ঐখোয়না দিফেন্স সেক্তরদা তেংবাংনরিবা অসিদগী ঐখোয়গী মরীবু অৱাংবা থাক্তা পুখৎলগনি।

থৌরম অসিগী অতোপ্পা মরু ওইবা থৌওং অমনা ‘ইন্দিয়ন ওসীন রিজন প্লস’কী দিফেন্স মিনিস্তরশিংগী কনক্লেবনসু ওইরি। মসিদা ঐখোয়গী মরুপ লৈবাক ৪৬না শরুক য়ারি। মালেমগী তেক্ত কায়দবদগী হৌরগা মালেমগী কারবার অমসুং মেরিতাইম সেক্যুরিতী ফাওবসি মালেমগী খ্বাইদগী অহেনবা মিৎয়েং চঙফম ওইরি। ঐহাক্না ইং ২০১৫দা মোরিসস্তা সেক্যুরিতী অমসুং গ্রোথ ফোর ওল রিজন (সাগর)গী পান্দম থমখি। ঐহাক্না সিঙ্গাপোরগী সঙ্গ্রীলাদসু ইন্দো-পেসিফিক লমদমদা, অফ্রিকাগী ইথৎশিংদগী হৌদুনা অমেরিকা ফাওবদা ভারতকী ইংগেজমেন্ত লৈরি  হায়খিবদুনি। মর্চেন্ত নেভীগী থৌদাংসু গ্লোবেলাইজেসনগী য়ুগ অসিদা পাকথোক চাউথোরক্লি। মালেম্না ভারত্তা থম্লিবা থাজবা হেনগৎলে অমসুং ঐহাক্না থাজবা পুম্নমক ঙাক্কনি। ঐখোয়না তুং খক হল্লোই। মরম অসিনা, মসিগী দিফেন্স এক্সপো অসিনা মালেম্না ভারত্তা থম্লিবা থাজবগী খুদম অমসু ওইরি। লৈবাক ময়াম্না ঙসি মফমসিদা পুন্দুনা মালেমগী চাউরবা পাঙ্গল অমা ঙসি গুজরাতকী লমদগী থোক্লি। ঐহাক্না থৌরমসিদা ভারতকী মরুপ লৈবাক অমসুং মখোয়গী মীহুৎশিংবু তরাম্না ওক্লি। ঐহাক্না থৌরমসিগীদমক্তা গুজরাতকী মুখ্য মন্ত্রী অমসুং মহাক্কী তীম্বু থাগৎচরি। চাউখৎ-থৌরাং, ইন্দস্ত্রীগী পাঙ্গলগী মতাংদা লৈবাক অমসুং মালেমদা গুজরাতনা মমিং থম্বা ঙম্লিবসিসু দিফেন্স এক্সপো অসিনা হেন্না চেৎহল্লগনি। লাক্কদৌরিবা মতমশিংদা গুজরাতনা দিফেন্স ইন্দস্ত্রীগী চাউরবা মফম অমা ওইরক্কনি অমসুং লৈবাক ঙাক শেনবদা অচৌবা থৌদাং য়াগনি হায়বসি ঐহাক্কী থাজবনি।

মরূপশিং,

দীসাগী মীয়াম্না হরাও নুংঙাইবগী মতৌ ঐহাক্না হৌজিক স্কীন্দা উরে। দীসা এয়রফিল্দ শেমগৎপসিসু লৈবাক্কী চাউখৎ-থৌরাংগী মশক থোকপা খোঙথাং অমনি। দীসা অসি মালেমগী ঙমখৈদগী শুপ্নগী কিলোমীতর ১৩০ লাপ্না লৈ। ঐখোয়গী ফোর্সশিংনা, মরু ওইনা এয়র ফোর্সনা দীসাদা লৈরবদি নোংচুপ ঙমখৈদা থেংনবা শিংনবা খুদিংমক মায় পাক্না থেংনবা ঙম্লগনি। দীসাগী মরুপশিং, অদোম্বু ঐহাক্না গান্ধীনগরদগী য়াইফ পাউজেল কয়া পীজরি। হৌজিক্তি দীসা, বনসকন্থা, পাতন জিলা পুম্লং লংলে। এয়রফিল্দ অসিগীদমক্তা গুজরাতকী মাইকৈদগী ইং ২০০০দা দীসাদগী লম পীখ্রবনি। ঐহাক্না রাজ্যসিগী মুখ্য মন্ত্রী ওইরিঙৈদা মসিগীদমক্তা য়াম্না কন্না হোৎনখিবনি। মসিগুম্বা মরু ওইবা করিনো হায়বা মতমদুগী কেন্দ্র সরকারগী মফমদা ঐহাক্না হন্না হন্না নীংশিংখিবনি। অসুক য়াম্না চাউরবা লম পীরে, অদুবু চহি ১৪ ফাওবা থবক অমত্তা পায়খত্তনা ফাইলদা তাদুনা অদুমক লৈরকখি। ঐহাক্না প্রধান মন্ত্রী ওইরবফাওবা থবক অসি মখা চত্থবদা খুদোংচাদবা থেংনগদবা মওংদা থম্বীরম্মি। ঐহাক্না সরকারদা লাক্লবা তুংদা দীসাদা ওপরেস্নেল বেজ অমা শেমগৎনবা ঐখোয়না ৱারেপ লৌখি অমসুং ঙসিদি, লান্মীশিংগী অপাম্বসিসু মখোয়না ফংলে। চীফ ওফ দিফেন্স স্তাফ ওইখিবা ঐখোয়গী মরুপ খুদিংনা ঐহাক্কী মফমদা ৱাফমসিগী মতাংদা নীংশিংখিবনি, অমসুং চৌধরীজীগী লুচিং মখাদা থবক অসি মায় পাক্লে। ঐহাক্না দীসাগী মীয়ামগা চপ মান্ননা এয়রফোর্সকী মরুপশিংবুসু ইকায় খুম্নজরি। লমদম অসিনা লৈবাক্কী ঙাক-শেলগী মরু ওইবা সেক্তর ওইরগনি। বনসকন্থা অমসুং পাতন্না মশাগী শক্তাক শেম্লে, মদুদি বনসকন্থা পাতন্না গুজরাতকী সোলর ইনর্জীগী মফম ওইনা থোক্লকপা অসিনি।

মরূপশিং,

মপাঙ্গল লৈবা লৈবাক অমগী তুংগী সেক্যুরিতীনা করি ওইগনি হায়বসিদা স্পেস তেক্নোলোজীনা অচৌবা খুদম অমা ওইরি। ফোর্স অমুম্মক পুল্লগা সেক্তর অসিদা থেংনবা শিংনবা করিনো হায়না শকখঙখ্রে হায়না ঐহাক্কী ইফমদা তম্লে। মসিগী ৱারোইশিনসু অথুবা মতমদা পুরক্নবা হোৎনরি। ‘মিসন দিফেন্স স্পেস’না লৈবাক্কী প্রাইভেত সেক্তরদা মখোয়গী মতিক উৎনবা খুদোংচাবা পীগনি। স্পেস্তা লৈরক্কদৌবা তুংগী খুদোংচাবা কয়া খঙলদুনা ভারতনা থৌওংসিদা শেম শাবগী থবক খুমাং চাউশিলহনবা তাই। মসিগী মতাংদা অনৌবা ৱারোইশিন থীদোকপা তাবনি। ভারতকী পাঙ্গলনা স্পেসতা অকক্নদুনা লৈহন্দনবা, মসিগী কান্নবশিংবু ভারত মচাখক্তা ফংহনবা তৌহন্দবা হায়বসিসু ঐখোয়গী পান্দম্নি। স্পেস তেক্নোলোজীনা ভারতকী লিবরেল মাইন্দেদ ওইবা স্পেস দিপ্লোমেসীগী অনৌবা মওং পীরি, অনৌবা খুদোংচাবা কয়া পীরি। অফ্রিকাগী লৈবাক অমসুং অতোপ্পা লৈবাক কয়াসু  মসিগী কান্নবা লৌরি। ভারতনা মশাগী স্পেস সাইন্স লান্নবা লৈবাক ৬০ হেন্না লৈরে। সাউথ ইস্ত সেতিলাতনা মসিগী মরু ওইবা খুদম অমনি। মথংগী চহি ফাওবা এসিয়নগী লৈবাক ১০না ভারতকী সেতিলাইত দেতাশিংগী রীএল তাইম এক্সেস ফংখিগনি। য়ুরোপ অমসুং অমেরিকাগুম্বা চাউখৎলবা লৈবাক ফাওবনা ঐখোয়গী সেতিলাইত দেতা শিজিন্নরি। মসিনা মেরিতাইম ত্রেদতা চাউখৎপগী মতিক লৈবা হীরম অমসু ওইরি। ঐখোয়গী ঙামীশিংনা মসিগী মতেংদগী হেন্না চুম্বা অমসুং থাজবা য়াবা ই-পাউ কয়া রীএল তাইমদা ফংবা ঙম্লি।

মরূপশিং,

দিফেন্স সেক্তরগী ৱারী শাবা মতমদা ফ্যুচর ৱাফেয়রগী ৱারী অদুমক লাকই, অদুনা মসিগী লিরুং চুক্লি অসি ঐখোয়গী নহাশিংনা পায়বগুম্নি। মসিদা ঐখোয়গী ভারতকী নহাশিংগী রিসর্চ অমসুং ইন্নোভেসনগী অচৌবা থৌদাং লৈরি। মরম অদুনা, দিফেন্স এক্সপো অসিনা ভারতকী নহাশিংবু ফ্যুচর রেদী ওইহন্নবা ৱিন্দো অমগুম্বনি।

মরূপশিং,

দিফেন্স সেক্তরদা অনৌবা ভারতনা ইন্তেন্ত, ইনোভেসন অমসুং ইমপ্লিমেন্তেসনগী মন্ত্রফা লোয়ননা মাংদা চংশিল্লি। চহি ৮গী মমাং ফাওবদা ভারত অসি মালেমগী খ্বাইদগী চাউবা দিফেন্স ইম্পোর্তর ওইনা শকখঙখি। অদুবু অনৌবা ভারত অসিনা তৌবা ঙম্বা উৎখি, অখাং কনবা উৎখি অমসুং ‘মেক ইন ইন্দিয়া’না ঙসিগী দিফেন্স সেক্তরদা মাইপাকপগী ৱারী অমা ওইরি। ঐখোয়গী দিফেন্স এক্সপোর্তশিং অসি হৌখিবা চহি ৫দা শরুক ৮ হেনগৎখি। ঐখোয়না মালেমগী লৈবাক ৭৫ হেনবদা দিফেন্সকী মেতরিএল অমসুং ইক্বিপমেন্ত এক্সপোর্ত তৌরি। ২০২১-২২দা ভারতকী দিফেন্স এক্সপোর্তশিং অসি দোলর বিলিয়ন ১.৫৯ য়ৌখি হায়বদি লুপা করোর লিশিং ১৩ য়ৌখি। অমসুং তুংদা লাক্কদবা মতমশিংদা ঐখোয়না দোলর বিলিয়ন ৫ য়ৌনবা পান্দম থমখি হায়বদি লুপা করোর লিশিং ৪০। হায়রিবা এক্সপোর্ত অসিনা খুৎলায় খরা নত্ত্রগা লৈবাক খরদা অখন্নবা থম্লোই। ভারতকী দিফেন্স কম্পেনীশিংনা ঙসিদি মালেমগী সপ্লাই চেনগী মরু ওইবা শরুক ওইবা ঙম্লে। ঐখোয়না মালেমগী থাক্তা লৈবা ‘স্তেত ওফ দি আর্ত’ পোৎলম কয়া সপ্লাই তৌরি। মালেমগী লৈবাক কয়ানা ভারতকী তেজস ফাইতর জেত্তা পুক্নিং চংলি। অদুগা ঐখোয়গী কম্পেনীশিংনা অমেরিকা, ইজ্রেল, অমসুং ইতালীগুম্বা লৈবাকশিংদা দিফেন্সকী খুৎলায় কয়াগী পার্ত পীরি।

মরূপশিং,

ভারতকী ব্রহমোস মিসাইলনা মহাক্কী কাঙলুপ মনুংদা খ্বাইদগী খুদোংথীবা অমসুং মোদর্ন ওইবনি খন্নরিবা অসিদা ভারত মচা খুদিংনা চাউথোকফম থোকই। লৈবাক কয়াগী অপাম্বা মিসাইল মসিনা ওইনরি।

মরূপশিং,

ভারতকী লান্মীশিংনা মরী লৈনবা মতিক কয়া উৎখিবনা মরম ওইরগা মালেম্না ভারতকী তেক্নোলোজীদা থাজবা থম্লি। ভারতকী নেভীনা আই.এন.এস.-বিক্রান্তকুম্বা মোদর্ন ওইবা এয়রক্রাফ কেরিয়র মশাগী ফ্লীত মনুং চলহনখ্রে। মসিদি অফবা ইঞ্জিনিয়রিং অমসুং কোচিন শিপয়ার্দনা লমদমসিদা শেমজবা তেক্নোলোজী শিজিন্নদুনা শাখিবনি। ‘মেক ইন ইন্দিয়া’গী মখাদা শাখিবা প্রচন্দ লাইত কোম্বেত হেলিকোপ্তরবুসু ভারতকী এয়র্ফোর্সনা শিজিন্নরি। মসিগা লোয়ননা ঐখোয়গী আর্মীসু লমদমসিদা শাবা তোপ্তগী হৌরগা লানগী নোংমৈ ফাওবা ভারতকী কম্পেনীশিংদগী লৈরি। গুজরাতকী হজিরাদা শারিবা মোদর্ন আর্তিলরীনা লৈবাক ঙাক শেনবদা অহেনবা পাঙ্গল হাপ্লি।

মরূপশিং,

লৈবাক অসিবু থাক অসিদা য়ৌহল্লকপদা ঐখোয়গী পোলিসী, রিফোর্ম অমসুং ইজ ওফ দুইং বিজনেসনা চাউরবা থৌদাং লৌখি। ভারতনা দিফেন্সকী পোৎ লৈবগী বজেতকী ৬৮% ভারতকী কম্পেনীশিংদগী লৈগনি লাউথোকখ্রে, খাক্তুনা থম্লে। মসি য়াম্না চাউবা ৱারেপ অমনি। মতিক লৈবা আর্মীগী মীওইগী মরমদগী ৱারেপ অসি লৌবা ঙমখ্রিবনি। মসিদি রাজনিতীনা লৌবা ৱারেপ নত্তে। মিলিতরীগী অপাম্বগী মখা পোন্না লৌখিবা ৱারেপনি। মসিগী মথক্তা, ঐখোয়গী দিফেন্স সেক্তরবু রিসর্চ অমসুং ইন্নোভেসনগীদমক্তা স্তার্তঅপ, ইন্দস্ত্রী অমসুং একাদমিয়াদা হাংদোক্লে, অমসুং একাদমিয়াগী মপান্দা লৈবশিংদা ঐখোয়না রিসর্চ বজেৎকী ২৫% পীরে, মসি ঐখোয়না তুংগী চারোন শুরোন্দা থাজবা থম্বগীনি। ভারত সরকারনা মখোয়দা লুপা ১০০ পীবা মতমদা মখোয়না লুপা ১০০০ পীরক্কনি, মসি ঐখোয়গী তুংগী চারোন শুরোনগী পাঙ্গলনি।

সরকারনা হোৎনবগা লোয়ননা ঐখোয়গী লান্মীশিংনসু লৈবাক ঙাক শেনবগী পোৎলম অয়াম্বা লৈবাক মনুংদা শারিবশিংদগী লৈগনি ৱারেপ লৌবসি য়াম্না নুংঙাইবা ৱাফম্নি। লান্মীশিংনা পুন্দুনা পোৎলম কয়াগী লিস্ত শেম্লে। লৈবাক মনুং খক্তদগী লৈগনি হায়বা পোৎল্ম কয়াগী লিস্ত অমা মখোয়না শেম্লিবসিদা তঙাই ফদবা লৈবা মতমদখক্তা মীরমদগী লৈগনি। লিস্ত ঙসি অনৌবা পোৎলম ১০১ হাপচিল্লে হায়না ঐহাক্না তাজরে, মখোয়া ভারত্তা শাবা পোৎলমখক্তমক শিজিন্নগনি। ৱারেপ অসিনা ভারতকী আত্মানির্ভর ওইবগী মপাঙ্গল উৎলি, অমসুং ঐখোয়গী লান্মীশিংনা লৈবাক অসিদা শাজবা খুৎশু খুৎলায়শিংদা থাজবা উৎনরি। লিস্ত অসিগী মথংদা, দিফেন্স সেক্তরনা পোৎলম ৪১১ পুথোক্কনি অমসুং ভারতনা মসিবু মেক ইন ইন্দিয়াগী মখাদা লৈগনি।

মরূপশিং,

ভারতনা দিফেন্স সেক্তর অসি খুদোংচাবশিংগা লোয়ননা পোজিতিব ওইবা ওইথোকপা য়াবশিংগী লোইবা নাইদনা লৈ। দিফেন্স সেক্তরদা লৈরিবা ইনবেস্তমেন্তগী খুদোংচাবশিংগী ওইনদি ভারতনা য়ু.পি. অমসুং তমিল নাদুদা দিফেন্স কোরিদোর অনি শারি অমসুং মালেমগী অচৌবা কম্পনী কয়ামরুম্না ভারত্তা ইনবেস্ত তৌনবা লাক্লি। সেক্তর অসি এম.এস.এম.ই.শিংগী মরাইবক ফগৎহল্লগনি অমসুং মসিগী ইনবেস্তমেন্ত অসিগী মরুমদা সপ্লাই চেনশিংগী অচৌবা নেতৱর্ক অমা শেমদুনা মসিগী অচৌবা কম্পনীশিং অসি ঐখোয়গী এম.এস.এম.ই.শিংনা মতেং পাংগনি। মসিগী সেক্তর অসি য়াম্না চাউনা ইনবেস্তমেন্তশিং তৌবা অসিনা মমাংদা অমুক ফাওবা ৱাখল তৌরুদবা অদুগুম্বা মফমশিংদা নহাশিংগী থবক্কী অচৌবা খুদোংচাবশিং ফংলগনি।

মরূপশিং,

লৈবাক অসিনা য়াম্না থুনা হোংলক্লি, অদোম্নসু মসি থেংনরম্লগনি। মমাংগী মতমদা খুনু থাদোক্লম্বনি, অদুবু ঙসিদি চীতাহ থাদোকপগী মতিক লৈরে। পাঙ্গলশিং অসিনা মরম ওইরগা শিংনবা কয়া হন্থরক্লে। অদুবু সাইন কয়াদি য়াম্না চাউনা লৈরি। ৱাফমদদি য়াম্না চম্বনি, অদুবু পাঙ্গলদি য়াম্না লৈবনি, অমসুং ভারতকী ঙসিগী নহাগী পাঙ্গলনা মালেমগী থাজবা থম্ফম অমা ওইরবনি। ঙসিগী দিফেন্স এক্সপো অসিনা মসিগুম্বা শক্তম তাক্নবা লাক্লি। ঐহাক্না ঙাক-শেল মন্ত্রী, শ্রী রাজনাথ সিংহবু থম্মোই শেংনা থাগৎলি অমসুগ এক্সপো অসিগীদমক্তা মহাক্না হোৎনখিবা কয়াসি হায়রিবমখৈ লোইবা নাইরোই। মহাক ৱা য়াম্না ঙাঙদে, অদুবু থবক্তি মপাঙ্গল লৈনা তৌই। ঐহাক্না মহাক অমসুং মহাক্কী তীম্বুসু ইকায় খুম্নবা উৎচরি। অদোম খুদিংগী মফমদা ঐহাক্না য়াইফ পাউজেল পীজরি অমসুং লাক্লিবা দিৱালীগীদমক্তসু য়াইফ পাউজেল পীজরি। ঐখোয়গী গুজরাতকী মীয়ামদসু অনৌবা চহিগীদমক্তা থাগৎচরি।

থাগৎচরি!

দিস্ক্লেমরঃ ৱারোল অসি প্রধান মন্ত্রীনা গুজরাতীদা থমখিবনি অমসুং মসিনা মদুগী ৱাহন্থোক্নি।

*****