ভারতকী প্রধানমন্ত্রী

প্রধান মন্ত্রী, শ্রী নরেন্দ্র মোদীনা ঙসি  গুজরাতকী ভরুচকী আমোলদা লুপা করোর ৮০০০ হেনবা তোঙান-তোঙানবা প্রোজেক্তশিংগী উরেপ-উয়ুং তমখ্রে অমসুং জাতিদা খুৎশিন্নখ্রে। প্রধান মন্ত্রীনা জম্বুসরদা বল্ক দ্রগ পার্ক, দহেজতা দীপ সী পাইপলাইন প্রোজেক্ত, অঙ্কলেশ্বর এয়রপোর্তকী ফেস ১ অমসুং অঙ্কলেশ্বর অমসুং পনোলীগী মলতিলেবেল ইন্দস্ত্রিএল শেদশিং শেমগৎপগী উরেপ-উয়ুং তমখি। প্রধান মন্ত্রীনা জি.এ.সি.এল. প্লান্ত, ভরুচ অন্দরগ্রাউন্দ দ্রেনেজ অমসুং আই.ও.সি.এল. দহেজ কোয়লী পাইপলাইন য়াওনা গুজরাতকী কেমিকেল সেক্তরবু শাহৌ পীরগনি।

অহৌবদা প্রধান মন্ত্রীনা শ্রী মুলায়ম সিংহ য়াদবতা শ্রদ্ধাঞ্জলী কৎখি, “মুলায়ম সিংহ জীগা ঐহাক্কা লৈনরিবা মরি অসি য়াম্না অখন্নবা অমা ওইখি। মুখ্য মন্ত্রীশিং ওইনা ঐখোয়না তোয়না উন্নখি, ঐখোয়গী মরক্তা ইকাই খুম্নবগী অমসুং নক্নবা মরী অমা লৈনখি”, হায়না মহাক্না ফোঙদোকখি। প্রধান মন্ত্রীগী মিরেপ ওইরবা মতুংদা শ্রী মোদীনা তোঙান-তোঙানবা দলশিংগী লুচিংবশিংগা ৱারী শাখিবা অদু নীংশিংলদুনা প্রধান মন্ত্রীনা হায় মদুদি মুলায়ম সিংহজীগী থৌজাল পীবগী ৱাহৈশিং অমসুং পাউতাক অদু ঙসিসু মহাক্না মরু ওইনা লৌরি। মুলায়ম সিংহজীনা মতমগী অহোংবশিং লাক্লবসু ২০১৩দা পীখিবা থৌজালশিং অদু অদুমক হোংদনা থমখি। শ্রী মোদীনা লৈখিদ্রবা লুচিংবা অসিনা দলগী খেন্নবা থমদনা ২০১৯দা প্রধান মন্ত্রী মোদী অমুক হল্লকখিগনি হায়না অরোইবা লোক সভাগী ইকোন-কোনবা সেন্দা মুলায়ম সিংহজীনা পীখিবা থৌজালশিং অদুবু নীংশিংখি, মহাক্না মুলায়ম সিংহজী অসি মীপুম খুদিংমক য়ানবা চৎপা হৈবা লুচিংবা অমনি হায়খি। প্রধান মন্ত্রীনা মখা তারদুনা হায়খি, “ঙসি গুজরাতকী লমদম অসিদগী অমসুং ইমা নর্মদাগী তোর্বান্দগী ঐহাক্না ইকাই খুম্ননীংঙাই ওইরবা মুলায়ম সিংহজীদা শ্রদ্ধাঞ্জলি কৎচরি। শেম্বীবা মপুদা ঐহাক্না মহাক্কী ইমুং মনুং অমসুং মহাকপু নুংশিজবা মীওইশিংনা অৱাবা অসি মায়োক্নবা ঙম্নবা থৌনা পীবীয়ু হায়না থৌনিজরি”।

আজাদী কা অমৃত মহোৎসবকী মতমদা প্রধান মন্ত্রীনা ভরুচতা লাক্লি হায়না ফোঙদোক্লদুনা মহাক্না হায় মদুদি লমদম অসিনা লৈবাক অসিগী মিংচৎপু অনৌবা পনখৈ তম্না পুখৎখিবা জাতিগী মপারি অমসুং মমোমলোয় কয়া পোকপীরি। মহাক্না কন্সতিত্যুএন্ত এসেম্বলীগী মেম্বর অমসুং সোমনাথ ইহৌদা সরদার পতেলগী মরু ওইবা খোঙলোয় ওইখিবা কনহৈলাল মানিকলাল মুন্সী অমসুং ভারতকী ঈশৈগী লমদা অথোইবা ওইরিবা পান্দিৎ ওমকরনাথ থাকুরবু নীংশিংখি। “ভরুচনা গুজরাত অমসুং ভারতকী চাউখৎ খোঙচৎতা মরু ওইবা থৌদাং লৌখি”, শ্রী মোদিনা মখা তারদুনা হায়, “ভারতকী পুৱারীবু হনগৎনা ঐখোয়না পারুবদা অমসুং তুংলমচৎকী মতাংদা ৱা শাবা মতমদা ভরুচ অসি মতম চুপ্পদা ইকাই খুম্নবগা লোয়ননা পল্লি”। মহাক্না ভরুচ জিলাগী কোস্মোপোলিতনগী ওইরক্লিবা মওং-মতৌ অসিবুসু শীংথাখি।

কেমিকেল সেক্তরগা মরী লৈণবা তোঙান-তোঙানবা প্রোজেক্তশিংগা লোয়ননা ভরুচতা অহানবা বল্ক দ্রগ পার্ক অসি খুৎশিন্নরি হায়না প্রধান মন্ত্রীনা ফোঙদোকখি। মহাক্না মখা তারদুনা হায়, “ঙসি কন্নেক্তিবিতীগা মরী লৈনবা মরু ওইবা প্রোজেক্ত অনিসু হৌদোকখ্রে”। শ্রী মোদীনা ভরুচকী মীয়াম্না বরোদা নত্ত্রগা সুরতকী মপাল তাংদনবা অঙ্কলেশ্বরদা ভরুচ এয়রপোর্ত শানবা উরেপ-উয়ুংসু তমখ্রে হায়না পাউদমখি। প্রধান মন্ত্রীনা ভরুচ অসি লৈবাক অসিগী অতোপ্পা অপীকপা রাজ্যশিংদগী ইন্দস্ত্রী মশিং হেন্না লৈ অমসুং অনৌবা এয়রপোর্ত প্রোজেক্ত অসিগা লোয়ননা লমদম অসিনা চাউখৎ খোঙচৎতা খুমাং চাউশিনবা ঙম্লগনি। “মসি নরেন্দ্র-ভুপেন্দ্রগী দসবল-ইঞ্জিন সরকারনা থবকশিং খোঙজেল য়াংনা লোইশিন্নবা হোৎনখিবা অদুগী মহৈনি”, শ্রী মোদীনা মখা তারদুনা হায়, “মসি গুজরাতকী অনৌবা শক্লোন অদুনি”। হৌখিবা দিকেদ অনি অসিদা গুজরাতনা লম খুদিংমক্তা শোত্থনা লৈরম্বা রাজ্য অমা ওইরম্বদগী ইন্দস্ত্রিএল অমসুং এগ্রিকলচরেল স্তেৎ অমা ওইবা ঙমলকখি। মী চিনবা হীথাংফমশিং অমসুং চাউখৎলক্লিবা সমুদ্র খোঙবানগা লোয়ননা আদিৱাসী অমসুং ঙামী ফুরপকী পুন্সিদা অহোংবা লাকখি। প্রধান মন্ত্রীনা হায়খি মদুদি গুজরাত মীয়ামনা কন্না হোৎনবনা মরম ওইদুনা আজাদী কা অমৃত মহোৎসব অসিদা রাজ্য অসিগী নহারোলশিংগীদমক চনাগী চহিচা অমা হৌখি। অপনবশিং লৈতবা ইনেব্লিং এনভাইরনমেন্ত অমা শেম্নবা ঐখোয়না খুদোংচাবা অসি মাংহল্লোইদবনি হায়না মহাক্না ফোঙদোকখি। মহাক্না হায়, মঙলানশিং মঙফাওনবা ঙম্নবগীদমক থৌশিল অমসুং পান্দম (নিতি অমসুং নিয়ত) অনিমক তঙাই ফদে। মহাক্না ভরুচকী লমদম অসিদা লো এন্দ ওর্দরগী ফীভম ফগৎলক্লিবা অসিগী মতাংদা ফোঙদোকখি। মহাক্না চহি খরা অসিদা লৌউ-শিংউ, হকশেল অমসুং থক্নবা ঈশিং ফীভম করম্না ফগৎলকখিবগে হায়বা অদু নীংশিংখি। মুখ্য মন্ত্রী ওইনা মহাক্না করম্না সমস্যা অমমমবু অমমমতা ওইনা থেংন্দুনা মখোয়বু কোকহনখিবগে নীংশিংখি। মহাক্না হায়, “ঙসি অঙাংশিংনা মমাংদা তোইনা তারমখিবা ৱাহৈ কার্ফিয়ু অসি তাখিদ্রে। ঙসি ঐখোয়গী ইচানুপীশিংনা ইজৎ লৈনা হিংবা অমসুং অথেংবদসু থবক তৌবতা নত্তনা মীয়ামবু লমজিংলি”। মতৌ অসুম্না ভরুচতা এজুকেসনগী খুদোংচাবা য়ৌরক্লে, মসিনা নহারোলশিংদা অনৌবা খুদোংচাবশিং পীরি। লোং-তর্ম প্লানিং অমসুং অন্দর-য়ুতিলাইজ রিসোর্সশিং শীজিন্নবনা মরম ওইদুনা গুজরাত অসি মেন্যুফেকচরিং, ইন্দস্ত্রিএল অমসুং বিজিনেস হব অমা ওইবা ঙমলকখি অমসুং মফম অসিদা মালেমগী থাক্কী ফেসিলিতী কয়া য়ৌরকখি। দবল ইঞ্জিন সরকারনা দবল বেনিফিতকী অচৌবা খুদম অমা ওইখি হায়না প্রধান মন্ত্রীনা ফোঙদোকখি।

প্রধান মন্ত্রীনা ভোকেল-ফোর-লোকেলগীদমক মহাক্কী অপাম্বা অদু নৌহৌনা ফোঙদোকখি। লোকেল প্রদক্তশিং শীজিন্নদুনা অমসুং মপালদগী পুশিল্লকপা প্রদক্তশিং শীজিন্নবা লেপতুনা প্রজা খুদিংমক্না আত্মনির্ভর ভারত্তা শরুক তম্বা য়াগনি হায়না মহাক্না ফোঙদোকখি। মহাক্না দিৱালীগীদমক লমদম অসিদা শাজবা পোৎলমশিং শীজিন্নদুনা লমদম অসিগী বিজিনেসশিং অমসুং আর্তিসনশিংবু মতেং পাংনবা অপীল তৌখি। মহাক্না হায়খি মদুদি ভারতকী শেন্মীৎলোন অসি ২০১৪দা ১০শুবা মফমদা লৈরম্বদগী ঙসিদি ৫শুবা মফমদা কাখৎলকপা ঙমখি। মসিগী মাইপাকপা অসি হেন্না মগুন লৈহল্লিবদি ঐখোয়দা মমাংদা লোইলম লৈঙাক শান্দোক্লমবা মীওইশিংবু ভারতনা মাইথীবা পীরম্বা অসিনি। মসিগীদমক নহারোল, লৌমীশিং, শিন্মীশিং, অপিকপা অমসুং অচৌবা বিনিনেসশিং, অমসুং ইন্দস্ত্রিএলিস্তশিংদা মনা পীফম থোকই। মহাক্না ভরুচকী মীয়ামদা হীদাকশিং শাদুনা মীওইবগী পুন্সি কনবগী অথোইবা থৌদাং পাঙথোকপদা শরুক য়াবগীদমক থাগৎপা ফোঙদোকখি। লাইচৎনা ফার্মা সেক্তরগী মরু ওইবা অদু ময়েক শেংনা খঙহনখি হায়না মহাক্না ফোঙদোকখি। প্রধান মন্ত্রীনা মখা তারদুনা হায়, “গুজরাতনা কোরোনাগী মায়োক্তা লান্থেংনবদা লৈবাক অসিবু চাউনা মতেং পাংখি। গুজরাতনা লৈবাক অসিগী ফার্মা এক্সপোর্তকী শিয়রদা চাদা ২৫ শরুক তম্লি”।

প্রধান মন্ত্রীনা ফত্তবা মীওই খরনা ভরুচকী চাউখৎ খোঙচৎতা অপনবা পীখিবা মতম অদুবুসু নীংশিংখি। মহাক্না হায়, “ঐখোয়না ২০১৪দা শক্তি পাইরকপা মতমদা গুজরাতনা নরেন্দ্র অমসুং ভুপেন্দ্রগী দবল-ইঞ্জিনগী শক্তিনা অপনবা পুম্নমক মরু ফংনা ফুক্তৎখি হায়না ফাওখি”। প্রধান মন্ত্রীনা সরদর সরোভর দাম শাবা মতমদা অর্বন নক্সলনা পীখিবা অপনবশিং অদু পুথোকখি। ঝার্খন্দ, বিহার, ওরিশা, ছত্তিসগর, অমসুং মধ্য প্রদেশ অমসুং মহারাস্ত্রগী শরুকশিংদা লৈরিবা নক্সলাইতশিংগী মতাংদা পল্লদুনা প্রধান মন্ত্রীনা গুজরাতকী রাজ্যদা নক্সল চংবা ঙমহনখিদবা অমসুং রাজ্য অসিদা লৈরিবা মীয়ামগী পুন্সি কনখিবা গুজরাতকী আদিৱাসি ফুরুপশিংবু থাগৎখি। প্রধান মন্ত্রীনা রাজ্য অসিদা অর্বান-নক্সলনা খুদুম চনবা ঙমহন্দনবা চেকশিনবা থমখি। মহাক্না হায় সাইন্স অমসুং মেথমেতিক্সতা নীংথিনা মহৈ তমদ্রবদি সরকারগী খোঙথাংশিংনা মরম ওইরগা পুরকপা পুক্নীং থৌগৎনীংঙাই ওইবা খোঙথাংশিংগী অমসুং অতোপ্পা স্কিমশিংগী কান্নবা মপুং ফানা লৌবা ওইথোক্লোই। ঙসি আজিৱাসীগী নহারোলশিংনা পাইলোৎ ত্রেনিং তৌরি অমসুং দোক্তর, সাইন্তিস্ত অমসুং লোয়রশিং ওইরক্লি। প্রধান মন্ত্রীনা আদিৱাসী ফুরুপনা রাজ্য অসিগী অমদি লৈবাক অসিগী চাউখৎ খোঙচৎতা চাউনা শরুক তমখি হায়না পাউদমখি অমসুং মখোয়না শরুক তমখিবা অসিবু ইকাই খুম্নবা উৎপা ওইনা সরকারনা লৈবাক শিনবা থুংবদা আদিৱাসী ফুরুপশিংনা ইকাই খুম্নরিবা ভগৱান বিরসা মুন্দাগী মপোক কুমওন্দা অথৌবা নীংতম লান্মীশিংবু নীংশিংবা ওইনা জনজাতীয় গৌরব দিৱস হায়না লাউথোকখি।

ৱারোল পীবা লোইশিনবদা প্রধান মন্ত্রীনা হায়খি মদুদি অহমদাবাদ অমসুং গান্ধীনগরগুম্না ভরুচ অমসুং অঙ্কলেশ্বরগী চাউখৎ থৌরাং অসি চাউখৎ-থৌরাংগী ত্বিন সিতী মোদেলগী মওংগা লোয়ননা পাইখৎলি। মহাক্না ৱারোল পীবা লোইশিল্লদুনা হায়, “ন্যু য়োর্ক অমসুং ন্যু জর্সীগী মরমদা মীয়াম্না ঙাংনবগুম্না ভরুচ অমসুং অঙ্কলেশ্বরগী মরমদা ঙাংনরগনি”।

থৌরম অদুদা গুজরাতকী মুখ্য মন্ত্রী, শ্রী ভুপেন্দ্র পতেল, কেমিকেল অমসুং ফর্তিলাইজরগী কেন্দ্র মন্ত্রী, শ্রী মনসুখ মন্দাবিয়া অমসুং মেম্বর ওফ পার্লিয়ামেন্ত শ্রী সি.আর. পাতিল অমসুং শ্রী মনসুখ বসাবানা শরুক য়াখি।

বেকগ্রাউন্দ

ভারতপু ফার্মাসিউতিকেল সেক্তরদা মরোমদোম লেপচবা ঙম্বা লৈবাক অমা ওইহন্নবগী অতোপ্পা খোঙথাং অমদা, প্রধান মন্ত্রীনা জাম্বুসরদা বল্ক দ্রগ পার্ক অমগী উরেপ উয়ুং তমখ্রে‍। ২০২১-২২দা বল্ক দ্রগ পুশিল্লকপনা অপুনবা ফার্মাসিউতিকেল ইম্পোর্তকী ৬০% হেনখি‍। প্রোজেক্ত অসিনা ইম্পোর্তকী মহুৎ শিনবদা অমদি ভারতবু বল্ক দ্রগকী মতাংদা মরোমদোম লেপচবা ঙম্বা লৈবাক অমা ওইহনবদা মরুওইবা শক্লোন লৌগনি‍। প্রধান মন্ত্রীনা ইন্দস্ত্রিএল ইস্তেতশিংদগী শেংদোক্লবা ফত্তবা ঈশিং থাদোকখিনবগী দীপ সী পাইপলাইন প্রোজেক্ত দহেজতা উরেপ উয়ুং তমখ্রে‍। প্রধান মন্ত্রীনা উরেপ উয়ুং তমখিবা অতোপ্পা প্রোজেক্তশিংগী মনুংদা অঙ্কলেশ্বর এয়রপোর্তকী অহানবা তাঙ্কক অমসুং এম.এস.এম.ই. সেক্তরদা ইনোৎ হাপকদবা অঙ্কলেশ্বর অমসুং পনোলীদা শেমগৎকদবা মর্তিলেভেল ইন্দস্ত্রিএল সেদশিং য়াওরি‍।

প্রধান মন্ত্রীনা য়াম্লবা ইন্দস্ত্রিএল পার্কশিং উরেপ-উয়ুং তম্বগী অচৌবা থৌরম অমা পাঙথোকখি‍। মসিদা বালিয়া (ভরুচ), অমীরগর (বনাসকান্থা), চকালিয়া (দাহোদ) অমসুং ৱানর (ছোতা উদয়পুর)দা শেমগৎকদবা ত্রাইবেল ইন্দস্ত্রিএল পার্ক মরি; মুদেথা (বনাসকান্থা)দা শেমগৎকদবা এগ্রো ফুদ পার্ক; কাকৱারী দান্তী (ভলসাদ)তা শেমগৎকদবা সী ফুদ পার্ক; অমসুং খান্দিবাব (মহিসাগর)দা শেমগৎকদবা এম.এস.এম.ই. পার্ক য়াওরি‍।

থৌরম অদুদা, প্রধান মন্ত্রীনা কেমিকেল সেক্তরদা ইনোৎ হাপকদবা প্রোজেক্ত কয়ামরুম মীয়ামদা কত্থোকখি। মহাক্না দহেজতা মেগাৱাৎ ১৩০গী কোজেনেরেসন পৱার প্লান্তগা পুনবা ৮০০ তি.পি.দি. কোস্তিক সোদা প্লান্ত অমা মীয়ামদা কত্থোকখি‍। মসিগা লোয়ননা, মহাক্না দহেজতা লৈবা কেপাসিতী নোংমদা এম.তি. ৭৮৫ ওইরম্বদগী নোংমদা এম.তি. ১৩১০দা হেনগৎহল্লবা হান্নদগী লৈরিবা কোস্তিক সোদা প্লান্তগী চাউথোরকপা শরুকসু মীয়ামদা কত্থোকখি‍। প্রধান মন্ত্রীনা দহেজতা ক্লোরোমিথেন চহিদা এম.তি. লাখ অমা পুথোক্কদবা প্রোজেক্ত অমসু মীয়ামদা কত্থোকখি‍। প্রধান মন্ত্রীনা মীয়ামদা কত্থোখিবা অতোপ্পা প্রোজেক্তশিংদি মপান্দগী পুশিল্লকপা পোৎলমগী মহুৎ শিনগদবা দহেজতা শেমগৎপা হাইদ্রেজাইন হাইদ্রেৎ প্লান্ত, আই.ও.সি.এল. দহেজ-কোয়লী পাইপলাইন প্রোজেক্ত, ভারুচ অন্দরগ্রাউন্দ দ্রেনেজ অমসুং উম্লা অসা পনেথা লম্বীগী এস.তি.পি. ৱর্ক অমসুং লম্বী পাকথোকপা অমদি মপাঙ্গল কনখৎহনবা য়াওরি‍।

Gratitude to the people of Amod for their welcome. Speaking at launch of various development works. https://t.co/TiaNR1x2L7

— Narendra Modi (@narendramodi) October 10, 2022

आज मुलायम सिंह यादव जी का निधन हो गया है।

मुलायम सिंह यादव जी का जाना देश के लिए एक बहुत बड़ी क्षति है: PM @narendramodi

— PMO India (@PMOIndia) October 10, 2022

Bharuch is the land of several greats. pic.twitter.com/wPsVe63IKj

— PMO India (@PMOIndia) October 10, 2022

*****