ভারতকী প্রধানমন্ত্রী

ঐহাক্কী নুংশিজরবা ইরৈবাকচাশিং, খুরুমজরি!

কোরোনাগী মায়োক্তা ঙসি লৈবাক অসিনা অমুক হন্না অচৌবা লান শোক্নরি। চয়োল খরগী মমাংদা ফীভম অসি ফগৎলম্লে মসিগী মতুং কোরোনাগী অনিশুবা ৱেভ অসি খুদোংথিবগী শকলোন লৌদুনা লাকখি। নখোয়না অৱাবগী চৈথেং নংখিবা, নখোয়না অৱাবগী চৈথেং নংলিবা, ঐহাক্না অৱাবা পুম্নমক অদু ফাওই। হৌখিবা নুমিৎ খরা অসিদা মখোয়গী নুংশিজরবা মীওইশিং কাইনখ্রবশিংদা ঐহাক্না ইরৈবাকচা পুম্নমক্কী মহুৎশিন্দুনা অৱাবা ফোঙদোকচরি। ইমুংগী মীওই অমগুম্না নখোয়গী অৱাবদা শরুক য়াজরি। থেংনরিবা শীংনবা অসি চাউই অদুবু ঐখোয়গী অখাং কনবা, ঐখোয়গী থৌনা অমসুং ঐখোয়না শেম-শারিবা অসিগা লোইননা ঐখোয়না মায়োক্নবা তাই।

মরুপশিং,

ঐহাক্কী ৱাফম অসি শন্দোক্না থমদ্রিঙৈ মমাংদা ঐহাক্না ঐখোয়গী দোক্তর, মেদিকেল স্তাফ, পেরামেদিকেল স্তাফ পুম্নমক, ঐখোয়গী লুনান্না থম্নবা কর্মচারী পুম্নমক, ঐখোয়গী এম্ব্যুলেন্সশিংগী দ্রাইভরশিং, ঐখোয়গৌ সেক্যুরিতী-পুলিসমেনশিং পুম্নমক অসিবু ঐহাক্না থাগৎপা ফোঙদোকচরি। নখোয়না কোরোনাগী অহানবা ৱেভতসু অদোমগী পুন্সি খুপাক্তা হাপতুনা মীয়ামগী পুন্সি কনখি। ঙসিসু অমুক হন্না নখোয়গী ইমুং-মনুং, নখোয়গী হরাও-নুংঙাইবা, নখোয়গী অৱা-অনা কয়া তুংঙোইনরম্লগা অতোপ্পগী পুন্সি কন্নবা খুদোংথিবা অসিদা অয়ুক নুংথিল খাক্তনা থবক তৌরি।

মরুপশিং,

ঐখোয়গী শাস্ত্রশিংদা অসুম্না হায়রম্মি – ত্যাজ্যম না ধৈয়র্ম, বিধুরেপি কালে। মসিগী অর্থদি অৱাবা তানফমদসু ঐখোয়না পক্নিং ফাথগদবনি। ফীভম অমা হেক্তা মায়োক্নবা ঙম্নবা ঐখোয়না অচুম্বা ফীরেপ লৌবা তাই, অচুম্বা মাইকৈদা চংশিনবা তাই মদুতদা ঐখোয়না মাইপাকপা ঙমগনি। মন্ত্র অসি মাংদা থমদুনা ঙসি লৈবাক অসিনা অয়ুক নুংথিল খাক্তনা হোৎনরি। হৌখিবা নুমিৎ খরনি অসিদা লৌখিবা ৱারেপশিং, লৌখৎখিবা খোঙথাংশিং অসিনা ফীভম অসি খোঙজেল য়াংনা ফগৎহল্লগনি। কোরোনাগী চৈথেং অসিদা লৈবাক্কী মফম অয়াম্বদা হন্দক্তি ওক্সিজেনগী দিমান্দ য়াম্না হেনগৎলক্লে। হীরম অসিদা খোঙজেল য়াংনা অমসুং চেকশিন্না থবক পাইখৎলি। কেন্দ্র সরকার, রাজ্য সরকারশিং, প্রাইবেৎ সেক্তর, পুম্নমক্না মথৌ তারিবা খুদিংমক্তা ওক্সিজেন ফংহন্নবা হোৎনরি। ওক্সিজেন প্রদক্সন অমসুং সপ্লাই হেনগৎহন্নবসু থাক কয়াদা খোঙথাংশিং লৌখৎলি। রাজ্যশিংদা অনৌবা ওক্সিজেন প্লান্তশিং লৈহনবা ওইরসু, লাখ অমগী অনৌবা সিলিন্দর ফংহনবা ওইরসু, ইন্দস্ত্রিএল য়ুনিৎশিংদা শিজিন্নরিবা ওক্সিজেন মেদিকেলগী ওইনা শিজিন্নবা ওইরসু, ওক্সিজেন রেল ওইরসু হীরম খুদিংমক্তা খোঙথাংশিং লৌখৎলি।

মরুপশিং,

হন্দক কোরোনাগী কেস হেনগৎলকপা অসিদা লৈবাক্কী ফার্মা সেক্তরনা হীদা-লাংথকশিং পুথোকপা হেন্না হেনগৎহনখ্রে। ঙসি লৈবাক অসিদা জনুৱারী-ফেব্রুৱারীদা হীদাক-লাংথকশিং শরুক কা হেন্না পুথোক্লি। মসি হৌজিক হেন্না খোঙজেল য়াংশিলহল্লি। ঙরাংসু ঐখোয়গী লৈবাক্কী ফারগমা ইন্দস্ত্রীগী লুচিংবশিং, লম অসিগী এক্সপর্তশিং ওইরিবশিংগা লোইননা শাংনা ৱারী শাখি। প্রদক্সন হেনগৎহন্নবা লম খুদিংমক্তা ফার্মাকোতিকেল কম্পনীশিংদগী মতেং লৌরি। ঐখোয়গী লৈবাক্তা য়াম্না ফবা অমসুং খোঙজেল য়াংনা হীদাক-লাংথকশিং পুথোক্লিবা অসিগুম্বা মপাঙ্গল লনবা ফার্মা সেক্তর লৈবা অসি ঐখোয়গী লাইবক ফবনি। মসিগা লোইননা হোস্পিতালশিংদা বেদকী মশিংসু হেনগৎনবা থবক খোঙজেল য়াংনা পাইখৎলি। সহর খরদা দিমান্দ হেনগৎলকপা অসি য়েংলগা অখন্নবা অমসুং অচৌবা কোবিদ হোস্পিতালশিং শারি।

মরুপশিং,

হৌখিবা চহিদা লৈবাক অসিদা কোরোনা নাবা মীওইগী মশিং খরা খক্তা লৈবা মতম অদুমক্তদা ভারত্তা কোরোনা ভাইরসকী ঙাকথোকপা ঙমগদবা বেক্সিনশিং পুথোক্নবা থবক পাইখৎপা হৌখি। ঐখোয়গী সাইন্তিস্তশিংনা অয়ুক নুংথিল খাক্তনা হোৎনদুনা য়াম্না তেনবা মতমগী মনুংদা লৈবাক মীয়ামগীদমক্তা বেক্সিনশিং পুথোকখি। ঙসি মালেমগী খ্বাইদগী হোংবা বেক্সিন ভারত্তা ফংলি। ভারতকী কোল্দ চেন সিস্তেমগা চুনবা বেক্সিন ঐখোয়দা ফংলে। হোৎনরিবা অসিদা ঐখোয়গী প্রাইবেৎ সেক্তরনা ইন্নোভেসন অমসুং ইন্তরপ্রাইসকী থৌনা-লিংজেল অদু উৎখি। বেক্সিনগী এপ্রুবেলশিং অমসুং রিগুলেতরী প্রোসেসশিং ফাস্ত ত্রেকতা থমদুনা সাইন্তিফিক অমসুং রিগুলেতরীগী মতেং পুম্নমকসু হেনগৎহনখি। মসিদা  তীম ইফর্ত অমা য়াওরি মসিনা মরম ওইদুনা ঐখোয়গী ভারতনা মেদ ইন ইন্দিয়াগী বেক্সিন অনিগা লোইননা মালেমগী খ্বাইদগী চাউবা তীকা কাপ্পগী থৌরম পাঙথোকপা ঙমখ্রিবনি। তীকা কাপ্পগী অহানবা তাঙ্কক অসিদগী হৌদুনা খোঙজেল য়াংনা য়ারিবা মখৈ মথৌ তারিবা মীওইশিংদা তীকা অসি য়ৌহন্নবা অকনবা মীৎয়েং থমখি। মালেমদা খ্বাইদগী খোঙজেল য়াংনা ভারতনা অহানবদা করোর ১০, মতুংদা করোর ১১ অমসুং হৌজিক করোর ১২গী দোজ কাপখ্রে। ঙসি কোরোনাগী লাঞ্জং অসিদা ঐখোয়গী হেল্থকিয়র ৱার্করশিং, ফ্রন্তলাইন কোরোনা ৱারিয়রশিং অমসুং সিনিয়র সিতিজেনশিংগী অয়াম্বা শরুক বেক্সিনগী কান্নবা ফংখিবা অসিনা ঐখোয়না থৌনা হাপখি।

মরুপশিং,

ঙরাংদা বেক্সিনেসনগী মতাংদা অতোপ্পা মরু ওইবা ৱারেপ অমা লৌখি। মে অমগী মতুংদগী চহি ১৮গী মথক্কী মীওই অমা হেক্তদা বেক্সিন কাপ্পা য়ারগনি। হৌজিক ভারত্তা শাজবা বেক্সিনগী শরুক তঙ্খাই অমদি রাজ্যশিং অমসুং হোস্পিতালশিংদা হকথেংননা ফংহল্লগনি।চৈরক অসিদা লায়রবশিং, অহল ওইরবশিংলোৱর মিদল ক্লাসকী মীওইশিং অমসুং চহি ৪৫গী মথক্কী মীওইশিংগী কেন্দ্র সরকারগী বেক্সিনেসন প্রোগ্রাম চত্থরিবা অসিসু খোঙজেল য়াংনা চত্থহল্লগনি। মমাংদা তৌখিবা অদুগুম্না সরকারগী হোস্পিতালশিংদা বেক্সিন লেম্না কাপকনি মসিগী কান্নবা অসি লায়রবা ইমুংশিং, ঐখোয়গী লো ক্লাস, মিদল ক্লাসকী ইমুংশিংনা লৌহৌবা য়ারগনি।

মরুপশিং,

ঐখোয় পুম্নমক্না হোৎনরিবা অসি পুন্সিশিং কন্নবনি অদুবু পুন্সিশিং কনবতা  নত্তনা শেন্মীৎলোনগী থবক-থৌরমশিং অমসুং হিংনবগী পাম্বৈশিংদা য়ারিবা মখৈ অপনবা থোক্তনবা হোৎনবসু তাই। মসিগী মওং অসিদা হোৎনফম থোকই। চহি ১৮গী মথক্কী মীওইশিংদা বেক্সিনেসন তৌনবা ওপন তৌবা অসিনা সহরশিংদা লৈরিবা ঐখোয়গী ৱার্কফোর্সতা বেক্সিন অসি খোঙজেল য়াংনা ফংহনবা ঙম্লগনি। রাজ্যশিং অমসুং কেন্দ্র সরকারনা হোৎনরিবা অসিগা লোইননা শিন্মীশিংনা হেন্না থুনা বেক্সিনশিং কাপ্পসু ফংলগনি। ঐহাক্কী রাজ্যগী লৈঙাক্লিবশিংদা ঐহাক্না হায়জনীংবদি শিন্মীশিংগী থাজবা মাংহনদনা মখোয়না লৈরিবা মফম অদুদা অদুমক লৈহনবা মখোয়দা খঙহল্লু। রাজ্যশিংনা পীরিবা থাজবনা মখোয়দা য়াম্না মতেং ওইগনি, মসিনা মখোয়না লৈরিবা সহর অদুমক্তদা মথংগী নুমিৎ খরনি অসিদা মখোয়বু বেক্সিন কাপ্লগনি অমসুং মখোয়গী থবক লেপ্লরোই হায়না ফাওহনগদবনি।

মরুপশিং,

মমাংদা লৈরম্বা ফীভম অদুগা হৌজিক লৈরিবা অসিগা য়াম্না খেনরে। মতম অদুদা ঐখোয়দা মালেমগী লাইচৎ অসি থেংননবা কোরোনা স্পেসিফিক মেদিকেল ইনফ্রাস্ত্রকচর লৈরমখিদে। নীংশিংদুনা য়েংবীয়ু লৈবাক অসি করি ফীভমদা লৈরমখি। কোরোনা তেস্ত তৌনবগী লেব মতিক চানা লৈরমখিদে, পি.পি.ই.শিং পুথোকপা অমত্তা লৈরমখিদে। ঐখোয়দা অনাবা অসিগী ত্রীৎমেন্তগী অখন্নবা ই-পাউসু লৈরমখিদে।  অদুবু য়াম্না তেনবা মতমগী মনুংদা হীরমশিং অসিদা অওনবা পুরকখি। ঙসিদি ঐখোয়গী দোক্তরশিংনা কোরোনাগী লায়েং চত্থনবা এক্সপর্তীজ য়াম্না ফংবা ঙম্লে, মখোয়না পুন্সি কয়া কয়া কনবা ঙম্লে। ঙসি ঐখোয়দা পি.পি.ই. কিৎশিং অসি মশিং য়াম্না লৈরে, লেবকী অচৌবা নেৎৱর্ক লৈরে অমসুং ঐখোয়না তেস্তিংগী খুদোংচাবশিং লেপ্তনা হেনগৎহল্লি।

মরুপশিং,

হৌজিক ফাওবদা লৈবাক অসিনা থৌনা য়াম্না লৈনা অমসুং য়াম্না পুক্নিং ফাথবা মওংদা লান্থেংনদুনা লাক্লি। মসিগী মনা অসি ইরৈবাকচা পুম্নমক্তা পীজরি। দিসিপ্লিন লৈনা অমসুং পুক্নিং ফাথবগা লোইননা কোরোনাগা লান্থেংনদুনা ঙসি লৈবাক অসি ফীভম অসি য়ৌহনবা ঙমখিবনি। কোরোনাগী খুদোংথিবা অসি ঐখোয়না জনভাগীদারীগী শক্তিগা লোইননা ঐখোয়না মাইথিবা পীবা ঙমগনি হায়না ঐহাক্না থাজৈ। ঙসি ঐখোয়গী অকোইবদা মীওই কয়ানা, সোসিএল ওর্গনাইজেসন কয়ানা অৱাবা তারবশিংগী মতেং পাংনবা অয়ুক নুংথিক খাক্তনা করম্না হোৎনবগে হায়বা ঐখোয়না উরি।  হীদাক-লাংথকশিং ফংহনবা, চান্নবা নত্ত্রগা লৈনবা শিল-লাংবা, মীয়াম্না থৱায় য়াওনা হোৎনরি। ঐহাক্না অসিগুম্বা শেবা তৌরিবা মীওই পুম্নমক্তা ইকাই খুম্নবা উৎচরি অমসুং ইরৈবাকচাশিংদা অসিগুম্বা মীওই কয়া কয়া থোরক্তুনা অৱাবা তারবা তানফম অসিদা অৱাবা তারিবশিং মতেং পাংনবা অপীল তৌজরি।  খুন্নাইগী হোৎনবা অমসুং শেবা তৌবনা অচেৎপা ফীরেপনা ঐখোয়না অৱাবা অসি মাইথিবা পীবা ঙমগনি। ঐহাক্কী নহা ওইরিবা মরুপশিং হায়জনীংবদি মখোয়না মখোয়গী সোসাইতীদা, লৈকাইদা, অপার্তমেন্তদা অপীক-অপীকপা কম্মিতিসিং শেমদুনা কোবিদকী কাংলোন ঙাক্না চৎহনবদা মতেং পাংবীয়ু। করিগুম্বা ঐখোয়না অসুম্না তৌরবদি সরকারশিংনা কন্তেনমেন্ত জোন থম্বা মথৌ তাররোই, নত্ত্রগা কার্ফিয়ু থম্বগী মথৌ তাররোই, অমসুং লোকদাউন তৌবগী ওইথোকপসু লৈররোই। মসিগী মথৌ তাররোই। স্বচ্ছতা অমিয়ামগী মতমদা লৈবাক অসিদা এৱের্নেস পীনবগীদমক ঐহাক্কী পীক্লিবা মরুপশিংনা মতেং য়াম্না পাংখি। অপীক-অপীকপা ক্লাস ৫, ক্লাস ৭, ক্লাস ১০ তম্লিবা অঙাংশিংনা। মখোয়গী ইমুংগী মীওইশিংদা ভাব তাহনখি, থেমখি। মখোয়না অহলশিংদা লুনানবগী পাউজেল পীখি। ঙসিসু অমুক হন্না ঐখোয়গী পীক্লিবা মরুপশিংদা অখন্নবা ৱাফম অমা ঐহাক্না থমজনীংঙি। ঐহাক্কী পীক্লিবা  মরুপ, থবক লৈতনা, মরম লৈতনা য়ুমগী মীওইনা য়ুমদগী মপান থোক্তনবা অদুগুম্বা য়ুমগী ফীভম অমা শেমগৎলু। নখোয়গী অনম কনবা অদুনা য়াম্না চাউবা কান্নবা পুরকপা ঙমগনি। ই-পাউ শন্দোক্লিবশিংদসু ঐহাক্না হায়জনিংবদি অৱাবা তারবা তানফম অসিদা মখোয়না মীয়ামদা চেকশিন্না লৈনবা হোৎনরিবা অসি হেন্না হেনগৎপীয়ু। মসিগা লোইননা অকীপা ফাওবা হন্থহন্নবা হোৎনবীয়ু, মীয়াম্না তোকঙা অমসুং অরানবা থাজদনবা হোৎনবীয়ু। 

মরুপশিং,

ঙসিগী ফীভম অসিদা ঐখোয়গী লৈবাক অসিবু লোকদাউনদগী কল্লসি। ঐহাক্না রাজ্যশিংদসু হায়জনীংবদি লোকদাউনবু অরোইবা পাম্বৈ ওইনা শিজিন্নবীয়ু হায়না হায়জরি। লোকদাউন তৌদনবা কন্নবা হোৎনবা তাই। অমসুং মাইক্রো কন্তেনমেন্ত জোন খক্তদা মীৎয়েং চংবীয়ু। ঐখোয়না ঐখোয়গী শেন্মীৎলোনগী ফীভম ফগৎহনসি অমসুং ঐখোয়গী ইরৈবাকচাশিংগী হকশেলসু ঙাকশেনসি।

মরুপশিং,

ঙসি নবরাত্রিগী অরোইবা নুমিৎনি। হয়েং রামনৱমীনি অমসুং মর্য়াদা পুরুশোত্তম শ্রী রামগী পাউজেলদি ঐখোয়না কাংলোনশিং ঙাক্না চৎপা অসিনি।  কোরোনাগী খুদোংথিবা অসিদা কোরোনাদগী ঙাকথোক্নবা লৈরিবা পাম্বৈ পুম্নমক থৌজানবীদুনা মখোয় অদু চাদা ১০০ ঙাক্না চৎপীয়ু। হীদাকসু, চেকশিনবসু হায়বা মন্ত্র অসি কৈদৌঙৈদা কাওগনু। মন্ত্র অসি তঙাই ফদে, বেক্সিনগী মতুংদসু তঙাই ফদে। রমজানগী শেংলবা থাগী ঙাই অসি তরেৎনি চনবা নুমিৎনি। রমজান্না ঐখোয়দা পুক্নিং ফাথবা, ইশানা ইশাবু লাকশিনবা অমসুং কাংলোন ঙাক্না চৎপা তাকপীরি। কোরোনাগী মায়োক্তা লান্থেংনবদা কাংলোন ঙাক্না চৎপা অসিসু মথৌ তাই। তঙাই ফদবা মতমদতা মপান থোকপীয়ু, কোবিদকী কাংলোন মপুং ফানা ঙাক্না চৎলু হায়না ঐহাক্না নখোয় পুম্নমক্তা হায়জরি। নখোয়গী থৌনা, পুক্নিং ফাথবা অমসুং কাংলোন ঙাকপা অসিগা পুন্না লৈবাক অসিনা ঙসি ওইরিবা ফীভম অসিদা অহোংবা পুরক্নবা অঙম্বা মখৈ হোৎনগনি হায়না ঐহাক্না নখোয়দা অমুক হন্না থাজবা পীরি। নখোয় পুম্নমক হকচাং ফনা লৈবা ওইয়ু, নখোয়গী ইমুং-মনুং পুম্নমক হকচাং ফনা লৈবা ওইয়ু মসিগী য়াইফ-পাউজেল অসিগা লোইননা ঐহাক্কী ৱারোল অসি মসিদা লোইশিনজরগে। অদোমবু হন্না-হন্না থাগৎচরি!

*****