ভারতকী প্রধানমন্ত্রী

ভারত ইমানা য়াইফরে!

ভারত ইমানা য়াইফরে!

কর্নাতকা তান্দের, মার গোর বঞ্জারা বাই-ভিয়া, নায়ক, দাব, কারবারী, তম্নোন হাথ জোরী রাম-রামী!

জয় সেবালাল মহারাজ! জয় সেবালাল মহারাজ! জয় সেবালাল মহারাজ! কলবুর্গী-য়া, শ্রী শরন বসবেস্বর, মত্তু, গনগাপুরাদা গুরু দত্তোত্রেয়রিঙ্গে, নন্না নমস্কারগদ্দু! প্রখ্যতা, রাস্ত্রকুতা সাম্রাজ্যাদা রাজধানী-গে মত্তু, কন্নদা নাদিনা সমস্ত জন্তে-গে নন্না নমস্কারগদ্দু!

কর্নাতকাগী রাজ্যপাল শ্রী থাৱর্চান্দ গেহলোতজী, মুখ্য মন্ত্রী, শ্রী বাসবরাজ বোম্মাইজী, কেন্দ্র মন্ত্রী মন্দলগী ঐহাক্কী মরুপ, শ্রী ভগ্বন্ত খুবাজী, কর্নাতকা সরকারগী মন্ত্রী অমসুং এম.পি., ঐহাকপু থৌজাল পীবিনবগীদমক্তা লেংবীরক্লিবা মশিং য়াম্লবা ঐহাক্কী নুংশিরবা ইচিল ইনাওশিং!

ইং ২০২৩ হৌজিক হৌরে। হৌজিক জনুৱারী থানি অদুগা জনুৱারী থা অসি অদুম অখন্নবা ওইনবনি। ঐখোয়গী লৈবাক্কী সংবিধান্সু জনুৱারী থাদগী চৎনবা হৌখিবনি, নিংতম্বা ভারত্তা লৈবাক মীয়ামগী হক ফংবা হৌখিবনি। মসিগুম্বা য়াইফরবা জনুৱারী থাসিদা কর্নাতকা সরকারনা সোসিএল জস্তিস্কীদমক্তা অচৌবা খোংথাং অমা থাংজিল্লি। ঙসিদি, কর্নাতকাগী বঞ্জারা মরুপ লাখ কয়াগী নুংঙাইরবা নুমিৎ অমনি। ইমুং লিশিং ৫০ হেনবনা মখোয় মশাগী য়ুম, লৈবগী হক অমসুং হক্কু পাত্রা হৌজিক্তা ফংলে। মসিনা কর্নাতকাগী তান্দা বস্তিদা লৈবা মরুপ লিশিং কয়া, জিপ্সী ইমুং কয়াগী মচা-মশুশিংগী তুংগী অফবা মতম অমা শোইদনা লৈহল্লগনি। কর্নাতকা সরকারনা তান্দা বস্তিগী মীওই লিশিং ৩ হেনবগী মফমদা রেভেন্যুনা শকখঙলবা ভিলেজ অমগী থাক পীনবা মশক থোকপা ৱারেপ লৌখি। মসিগুম্বা মশক থোকপা খোঙথাং অসিগীদমক্তা শ্রী বোম্মাই অমসুং মহাক্কী অপুনবা তীম্বু ঐহাক্না থাগৎচরি।

ঐহাক্কী নুংশিরবা ইচিল ইনাওশিং,

মসিগী লমদম অমসুং বঞ্জারা খুন্নাই অসিদি ঐঙোন্দা অনৌবা ওইদে, মরমদি, রাজস্থান্দগী হৌরগা খা ভারত ফাওবা অমুক্তা চৎপীয়ু। ঐখোয়গী বঞ্জারা খুন্নাইগী ইচিল ইনাওশিংনা চাউখৎ থৌরাংগী মতাংদা মশাগী তোঙানবা থৌদাং য়ারিবনি। ইং ১৯৯৪গী বিধান সভা মীখল মতমগী রেলী অমদা ঐহাকপু কৌরকখিবা ঐ ঙসিসু নিংশিংলি। ঐহাক্না রেলীদুদা বঞ্জারা ইচিল ইনাও লাখ কয়ানা মশাগী চৎনবীগী ফিজোল শেত্তুনা ঐহাক্কী ইফমদা থৌজাল পীবিরকখি। ঐহাক্না মিৎকুপ্তু কৈদৌনুংদা কাওবা ঙম্লোই। অদুগা ঐহাক্না ঙসি কর্নাতকা সরকারগী হোৎনজমন উবদা ঐহাক্না খ্বাইদগী হেন্না নুংঙাইবা ফাওই।

ইচিল ইনাওশিং,

দবল ইঞ্জিন সরকারনা অফবা লৈঙাক অমসুং নুংশি চান্নবগী লম্বীদা চৎলি, মসিমক চহি কয়াগী মমাংদা ভগ্বান বসবন্ননা মালেমদা পীরম্বনি। ভগ্বান বসবেস্বরনা অনুভব মন্দপনগুম্বা প্লেতফোর্ম অমদগী মালেমগী মফমদা গনতন্ত্রা অমসুং সোসিএল জস্তিসকী মওং অমা লান্থোক্লমখি। খুন্নাইগী অচান মীরায়, অনেম-অৱাংদগী হেন্দোক্তুনা মীপুম খুদিংবু মপাঙ্গল হাপ্পগী পাম্বৈ অমা মহাক্না উৎপীরমখি। সবকা সাথ, সবকা বিকাস, সবকা বিশ্বাস অমসুং সবকা প্রয়াস হায়রিবা মন্ত্রা অসিদসু হায়রিবা ৱাখল্লোন অসিগী মমি তাই। অদুগা ঐখোয়না কালবুর্গীদসু মসিমক উবা ফংলি।

মরুপশিং,

ঐখোয়গী বঞ্জারা খুন্নাইনা দিকেদ কয়াদগী অৱাবা মাইয়োক্নদুনা লাক্লি। হৌজিক্তি, অতোপ্পা খুন্নাইগুম্না ইকায় খুম্ননা হিংবগী মতম লাক্লে। ঐহাক্না য়েংলম্লিবনি, ঐহাক্না বঞ্জারা ইমুং অমগা উন্নবদা ইমা অমনা ঐহাকপু থৌজানবীবা, মহাক্কী অপাম্বা পাউদম্বা, খুন্নাইগীদমক্তা হিংবা-শিবা ঙম্বগী থৌনা পীগদবা থৌজাল পীরিবনি। লাক্কদৌরিবা মতমশিংদা মখোয়গী য়াইফ য়ুম্বালগীদমক্তা লুপা করোর কয়াগী থৌওং খরা শিন লাঙখ্রে। বঞ্জারা খুন্নাইগী নহাশিংনা কম্পিতিতিব একজামদা শরুক য়াবা ঙমহন্নবা লেম্না কোচিং পীবগী খুদোংচাবা শীন লাঙলি। খুন্নাইশিং অসিগী অনৌবা পুন্সি মহিং তান্নবা লম্বী কয়াসু শেম্লি। খাংপোকশঙগী মহুত্তা মখোয়গীদমক্তা পক্কা য়ুম শানবা তেংবাংগদৌরি। বঞ্জারাশিংনা মশাগী তঙ তাবা লৈফম লৈতবনা মসিগুম্বা খুদোংচাবা ফংবা ঙমদ্রি অমসুং মসিগীদমক্তা মরী লৈনবা থবক পায়খৎলি। ঙসিগী থৌরম অসিদি মাইকৈ অসিদা পায়খৎপা মশক নাইবা খোংথাং অমনি। ইং ১৯৯৩দা, হায়বদি, দিকেদ অহুমগী মমাংদা মসিগী মতাংদা অহানবা ৱাফম হৌদোকখি। অদুবু মসিগী মতুংদা মফমসিদা খ্বাইদগী শাংনা সরকার পায়খিবা রাজনিতী দল অদুনা ভোত বেঙ্ক পোলিতিক্স শান্নরিঙৈদা মসিগী ৱাফম্বু কাওথোকখ্রে। তান্দাদা লৈবা মীয়াম্না মশাগী হক ফংনবা য়াম্না ৱাবা হোৎনখি, খুদোংচাদবা কয়া মাইয়োক্নখি, মতম শাংনা ঙাইবা তাখি। অদুবু, থৱাই নুংঙাইতবগী ফিভম্বু বি.জে.পি.না মপুং ফানা হোংদোক্লবনি। বঞ্জারা ইমাশিংনা ৱাবীরগনু, অদোমগী ইচানুপা দিল্লীদা ফম্লি হায়না ঐহাক্না ঙসি হায়জরি। হৌজিক, তান্দাগী বস্তিশিংবু খুঙ্গংগী থাক্তা শকখঙলবনিনা, খুঙ্গং অমগী খুদোংচাবা খুদিংমক মখোয়না ফংলগনি। ইশাগী লম, ইশাগী য়ুমগী আইনগী চে-চাং ফংলবা মতুংদা হৌজিক্তি ইমুংশিংনা নুংঙাইনা হিংবা য়ারগনি, বেঙ্কতগী লোন লৌবসু লায়রগনি। কেন্দ্র সরকারনা খুঙ্গংশিংদা স্বমিত্ব য়োজনাগী মখাদা প্রোপর্তী কার্দ য়েন্থোক্লি। কর্নাতকাগী বঞ্জারা খুন্নাইসু মসিগী খুদোংচাবসি ফংলগনি। হৌজিক্তি, ইশাগী অঙাংশিংবু স্কুলদা নিংথিনা থাবা য়ারগনি, দবল ইঞ্জিন সরকারগী য়াইফ য়ুম্বালগী স্কিম খুদিংগী কান্নবা হকথেংননা ফংলগনি। খাঙপোকশঙদা লৈবা হায়বসি হৌখ্রবা মতমগী ৱাফম ওইরবনি। পি.এম. অৱস য়োজনাগী মখাদগী পক্কা য়ুম, য়ুম মনুংদা অমাংশঙ, মৈ, তোতি ঈশিং, গ্যাস, মসিগুম্বা মতেং কয়া ফংলগনি।

ইচিল ইনাওশিং,

কর্নাতকা সরকারগী মসিগুম্বা ৱারেপ অসিনা বঞ্জারা মরুপশিংগী পুন্সি মহিং তানবগী অনৌবা পাম্বৈ কয়া শেম্লগনি। উমংগী পোত্থোক, শিঙ, খোইহী, উহৈনচিংবা পোৎলম কয়া অসিদগী চাগা তানবা য়ারগনি। মমাংগী সরকারনা উমংগী পোত্থোক খরদংগী এম.এস.পি. পীরম্মি। ঐখোয়গী সরকারনা ঙসি পোত্থোক ৯০দগী হেনবদা এম.এস.পি. পীরি। কর্নাতকা সরকারগী ৱারেপ অসিনা তান্দাদা লৈরিবা ঐহাক্কী নুংশিরবা ইমুং খুদিংদা কান্নবা ফংহল্লগনি।

মরুপশিং,

বঞ্জারা খুন্নাইগী চাউখৎ-থৌরাংগীদমক্তা অখন্নবা দিভেলপমেন্ত অমসুং ৱেলফিয়র বোর্দ শেম্বসু ঐখোয়গী সরকারনি। মীখা পোল্লিঙৈ মতম ওইরো, নত্ত্রগা নিংতম্বা ফংলবা মতুংগী শাংলবা মতম ওইরো, লৈবাক শিনবা থুংবদা লৈরিবা বঞ্জারা খুন্নাইবু হীরম খুদিংদা মীরায়দুনা লাকখি। দিকেদ কয়া অসিদগী মখোয়বু য়েংশিনবীদনা লাকখি। মখোয়গী মপাঙ্গল হাপ্নবগীদমক্তা অখন্নবা দিভেলপমেন্ত অমসুং ৱেলফিয়র বোর্দ শেম্বসু ঙসিখক্তনি। ঐখোয়গী সরকারনা মখোয়গী য়াইফ য়ুম্বালগীদমক্তা পাংথোকফম থোকপা থবক খুদিংমক পায়খৎলি।

মরুপশিং,

দবল ইঞ্জিন সরকারনা ভারত্তা লৈবা মীওই খুদিংগী চৎনবী, সংস্কৃতী, চাকচা-য়ুথক, ফিজেত-চাকচাবু ঐখোয়গী পাঙ্গলনি হায়না খল্লি। ঐখোয়না পাঙ্গল অসিবু কন্নবা অমসুং য়োকখৎনবা হোৎনবা পাম্মি। সুহালী, লম্বানী, লম্বাদা, লবানা অমসুং বাজিগর, মমিং অমা হেক্তা পল্লবসু, অদোমদি নাৎ অমসুং চৎনবীদা ইনাক খুনবনি, লৈবাক্কী পাঙ্গলনি, লৈবাক্কী চাউথোকচনিংঙাইনি। চহি লিশিং কয়া শুরবা অদোমগী পুৱারী লৈ। লৈবাক অসিগী চাউখৎ-থৌরাংদা অদোমগী অচৌবা থৌদাং য়াওরি। মসিগুম্বা হেরিতেজ অসিবু ঐখোয়না পুন্না খুমাং চাউশিলহনগদবনি। ঐহাক্কী বঞ্জারা ইমুংশিংদা ঐহাক্না হায়জনিংবদি, ঐহাক গুজরাত লমদমদগীনি, গুজরাত অমসুং রাজস্থান্দা নোং য়াম্না তাদে, অয়াম্বা মতমদা কংই, ঈশিং য়াম্না ৱাই, অদোবু খুঙ্গং কয়া অমনা চহি চা কয়াদগী ঈশিংগী করিগুম্বা পাম্বৈ অমদি য়াৎনরম্মি। অদুগা খুঙ্গংশিংদুগী মীয়াম্না মসিগী লাখা অসি বঞ্জারানা শারম্বনি হায়না ঙসিসু হায়নরি। অদোম্না খুঙ্গং অমদা হেক্তা চৎপীয়ু, ঈশিংগী খুদোংচাবা শীনবগী পাম্বৈ লৈরম্লবদি, গুজরাত অমসুং রাজস্থান্দা লাখা বঞ্জারাগী মমিং খ্বাইদগী হান্না পন্নগনি। চহি কয়াগী মমাংদা খুন্নাইগী মতেং পাংলম্বা লাখা বঞ্জারাগী ইমুংশিংবু মতেং পাংবগী খুদোংচাবা ফংবসিদা ঐহাক্না নুংঙাইবা ফাওই। ঐহাক্না অদোম পুম্নমকপু থাগৎচরি। অদোমগী য়াইফ য়ুম্বালগীদমক্তা ঐহাক্না থৌনিগনি। অদোম্না লাকপীদুনা ঐখোয়দা থৌজাল পীবিবা অসি ঐখোয়গী লাইবক ফবনি। পুক্নিং য়াম্না থৌগৎলে, ইথিল য়াম্না পীবিরে। অদোম্বু কোতি কোতি থাগৎচরি।

নমস্কার!!!

*****