ভারতকী প্রধানমন্ত্রী

গুজরাতকী রাজ্যপাল, অচার্য় দেবব্রতজী, মীয়াম্না য়াবা মুখ্য মন্ত্রী, ভুপেন্দ্র ভাই পতেল, কেন্দ্রগী মন্ত্রী মন্দলগী ঐহাক্কী মরুপ অমসুং লৈবাক্কী ঙাক-শেল মন্ত্রী, শ্রী রাজনাথ সিংহজী, শ্রীমান্য জ্যোতিরাদিত্য সিন্ধিয়াগী, তাতা সন্সকী চেয়রমেন, এয়রবস ইন্তর্নেস্নেলগী চীগ কম্মর্সিএল ওফিসর, দিফেন্স অমসুং এভিএসন সেক্তরগী ইন্দস্ত্রীগা মরী লৈনবা মরুপ্লোই খুদিং, ইবেম্মা অমসুং ইবুংঙোশিং! নমস্কার!

ঐখোয়গী গুজরাতসিদা দিৱালী অসিদি দেব দিৱালী ফাওবা মখা চত্থনা পাংথোকই, অদুগা দিৱালীগী মসিগুম্বা মতমসিদা বদোদরা, গুজরাত অমসুং লৈবাক্না মমল নাইদ্রবা খুদোল অমা ফংলে। গুজরাতকী ওইনদি অনৌবা চহি হৌবনি, ঐহাকসু অনৌবা চহিসিদা গুজরাত্তা অহানবা ওইনা ঙসি লাক্লি। অদোম পুম্নমকপু অনৌবা চহিগীদমক্তা য়াইফ পাউজেল পীজরি।

ঙসিদি, ভারতপু মালেমগী অচৌবা মেন্যুফেকচরিং ফহব অমা ওইহনবগী মাইকৈদা ঐখোয়না চাউরবা খোঙথাং অমা থাংজিল্লি। ভারতনা ঙসিদি মশাগী ফাইতর প্লেন শারে। ভারতনা মশাগী তেঙ্ক শাজরে, মশাগী সবমেরিন শাজরে। মসিদা নত্তনা, ভারত্তা শাবা হিদাক লাংথক অমসুং ভেক্সিনশিংনা মালেমগী পুন্সি লাখ কয়া অমা কল্লি। ভারত্তা শাবা ইলেক্ত্রোনিক্স গেজেত, মোবাইল ফোন, কারশিংনা ঙসিদি মালেমগী লৈবাক কয়াদা মমিং লৈরে। মেক ইন ইন্দিয়া, মেক ফোর দি গ্লোবেলগী মন্ত্রগা লোয়ননা তুংলমচত্তা চঙশিল্লিবা ভারতনা মশাগী তৌবা ঙম্বগী মতিক হেন্না পাকথোক চাউথোকহল্লি। ভারতনা হৌজিক্তি ত্রান্সপোর্ত প্লেন শাবা অচৌবা মেন্যুফেকচরর অমা ওইরগনি। থৌওংসিগী অহৌবা খোঙথাং ঙসি ভারতনা থাংজিল্লে। মালেমগী চাউর-চাউরবা পেসেঞ্জর প্লেন ভারত্তা শাবগী মতমদু ঐহাক্না ঙসি উবা ফংলে, প্লেন্সিং অদুদা মেক ইন ইন্দিয়া হায়না থাবসু ঐহাক্না উরে।

মরূপশিং,

ঙসি উরেপ-উয়ুং তম্লিবা ফেসিলিতী অসিনা লৈবাক অসিগী দিফেসন্স অমসুং ত্রান্সপোর্ত সেক্তরদা অওনবা পুরকপগী শক্তি লৈ। মসি অহানবা ওইনা ভারতকী দিফেন্স সেক্তরদা অচৌবা ইনভেস্তমেন্ত তৌবনি। মফম অসিদা শাজবা ত্রান্সপোর্ত এয়রক্রাফশিংনা আর্মদ ফোর্সশিংগী মপাঙ্গল হাপ্পা খক্তা নত্তনা মসিনা এয়রক্রাফ মেন্যুফেকচরিংগী অনৌবা ইকোসিস্তেম অমা শেমগৎপদা মতেং পাংলগনি। কলচরেল অমসুং এজুকেসন সেন্তরগীদমক খঙনরম্বা বদোদরা অসি এভিএসন সেক্তর হব হায়না নৌনা শক খঙনরগনি। এয়রপ্লেনগী অপীকপা পার্ত কয়া ভারতনা মালেমগী লৈবাক কয়াদা হান্নদগী হৌনা এক্সপোর্ত তৌদুনা লাক্লবসু, লৈবাক অসিদা মিলিতরী ত্রান্সপোর্ত এয়রক্রাফ অহানবা ওইনা শাবা হৌরগনি। তাতা গ্রুপ অমসুং এয়রবস দিফেন্স কম্পেনীবু ঐহাক্না মসিগীদমক্তা য়াইফ পাউজেল পীজরি। প্রোজেক্ত অসিদা লৈবাক্কী এম.এস.এম.ই. ১০০ হেনবগা মরী লৈনগনি হায়না ঐহাক্কী ইফমদা পাউদম্লে। লাক্কদৌরিবা তুংগী মতমদা, মালেমগী অতোপ্পা লৈবাকশিংদা এক্সপোর্ত তৌনবা ওর্দর ফংলকপগী ওইথোকপসু লৈরে। মসিনা হায়বদি, মেক ইন ইন্দিয়া, মেক ফোর দি গ্লোবেলগী ৱারেপ অসিসু লমদমসিদা হেন্না মপাঙ্গল লৈরগনি হায়বনি।

মরূপশিং,

মালেমগী খোঙজেল য়াঙনা চাউখৎলক্লিবা এভিএসন সেক্তর ঙসিদি ভারত্তা লৈরে। এয়র ত্রাফিক্কী মতাংদা মালেমগী মকোক থোংবা লৈবাক অহুমগী মনুং চনগদৌরে। মথংগী চহি ৪-৫দা নোংথক্তা পাইদুনা চৎপা পেসেঞ্জর করোর কয়া হেনগৎলগনি। মসিনা উরান য়োজনাদগী মতেং কয়াসু ফংলি। ভারতনা মথংগী চহি ১০-১৫দা পেসেঞ্জর অমসুং কার্গো এয়রক্রাফ চাউরাক্না ২০০০ হেনবগী তঙাই ফদবা লৈরক্কনি হায়না পানরি। ভারত মথন্তনা এয়রক্রাফ ২০০০ হেন্না তঙাই ফদবা লৈরক্কনি হায়বদি চাউখৎ-থৌরাংনা খোঙজেল কয়া য়াম্না য়াঙগনি হায়বা তাকপনি। মসিগুম্বা অচৌবা দিমান্দ থেংনবা ঙম্নবগীদমক্তা ভারতনা হৌজিক্তগী হৌনা শেম শাবা তাবনি। ঙসিগী থৌরম অসিদি মাইকৈ অসি থাংজিনবা মশক থোকপা খোঙথাং অমনি।

মরূপশিং,

ঙসিগী থৌরমসিদি, মালেমগী মফমদা ৱাফম অমসু থম্লি। ঙসিদি, ভারতনা মালেমগী মফমদা চাউরবা খুদোংচাবা অমা পুদুনা লাক্লি। কোরোনা অমসুং লান্না ওইহনবা পামদবা ফিভম কয়া লৈরবসু, সপ্লাই চেন্দা চৈথেং ফংলবসু, ভারতকী মেন্যুফেকচরিং সেক্তরগী শাহৌ লৈবদি লেপ্পা লৈতে। মসি মথন্নতা ওইজরকপদি নত্তে। ভারতকী থবক তৌবগী অকোয়বগী ফিভমদা লেপ্তনা শেমদোরক্লি। ভারত্তা ঙসিদি অপীবা মমলগী মতাংদা চাংয়েংনবগী মতৌ লৈরে, ক্বালিতীদসু মিৎয়েং চঙলে। ঙসিদি, ভারতনা লো কোস্ত মেন্যুফেকচরিং অমসুং হাই আউতপুতকী খুদোংচাবা ফংহল্লি। ঙসিদি, ভারতকী মফমদা স্কিল লৈরবা মেনপাৱরগী চাউরবা তেলেন্ত পুল অমা লৈরে। মমাংগী চহি ৮দা সরকারনা পাংথোকখিবা রিফোর্ম কয়ানা মেন্যুফেকচরিংগী হীরমদা মমাংদা হান্না লৈরমদবা ইনভাইরনমেন্ত অমা ভারতকীদমক্তা শেম শাবীরে। ভারতনা কারবার তৌবদা হেন্না লাইহন্নবা মিৎয়েং চঙলিবসি মমাংদা অমুক্তা পাংথোকখিদ্রি। কোর্পোরেত তেক্স স্ত্রকচর লাইথোকহনবা ওইরো, মসিবু মালেমগী থাক্তা চাংদম্নবা ঙম্নবা শীনবা ওইরো, সেক্তর কয়াগী ওতোমেতিক রুত্তা এফ.দি.আই.গী ১০০%গী চাংদা লম্বী হাংদোকপা ওইরো, দিফেন্স, মাইনিং, স্পেসকুম্বা সেকতরশিংবু প্রাইভেত কম্পেনীশিংদা হাংদোকপা ওইরো, লেবর রিফোর্ম পাংথোকপা ওইরো, সেন্ত্রেল লেবর লো ২৯বু শুপ্নগী কোদ ৪দা ওন্থোকপা ওইরো, কমপ্লিএন্স লিশিং ৩৩দগী হেনববু লোইশিনবা ওইরো, তেক্স মখল কয়াগী লাংবু মুত্থত্তুনা গুদ এন্দ সর্ভিস তেক্স অমখক লৈহনবা ওইরো, ভারতনা ঙসিদি ইকোনোমিক রিফোর্মগী অনৌবা তাঙ্কক অমা ইরি। হায়রিবা রিফোর্মশিং অসিনা ঐখোয়গী মেন্যুফেকচরিং সেক্তরদা অচৌবা কান্নবা পীরি অমসুং মখোয়না মসিগী য়াম্লবা খুদোংচাবা লৌনরি।

অদুগা মরূপশিং,

মায় পাকপা অসিগী মরুমদা য়াম্না চাউরবা মরম অমা লৈ। ৱাখল্লোন্দা অহোংবা লাকপা হায়বসিনা খ্বাইদগী চাউরবা মরম্নি হায়না ঐহাক্না হায়জনীংই। সরকারনা পুম্নমক খঙবনি, থবক খুদিং সরকারনা পাংথোক্কদবনি হায়বগী ৱাখল্লোন অমা লৈবাকসিদা শাংলবা মতমদগী চৎনদুনা লাকই। মসিগুম্বা ৱাখল্লোন অসিনা লৈবাক্কী তেলেন্তশিংবু নমথদুনা থম্লম্মি, ভারতকী প্রাইভেত সেক্তরশিংগী চাউখৎপা থীন্থদুনা লাকই। পুম্নমক পুন্না হোৎনমিন্নবা হায়বা ৱাখল্লোনগা লোয়ননা তুংলমচত্তা চঙশিল্লিবা লৈবাক অসিনা হৌজিক্তি পব্লিক অমসুং প্রাইভেত সেক্তর অনিমকপু মান্নবা মিৎয়েংদা য়েংলে।

মরূপশিং,

মমাংগী সরকারগী ৱাখল্লোন্সু মসিমক ওইরম্মি। শিংনবা কয়াবু য়ৈথোক্তুনা থম্লগা, অমসুং মেন্যুফেকচরিং সেক্তরশিংবু সবসিদী খরা পীরগা হিংদুনা থম্লম্মি। ৱাখল্লোন অসিনা লৈবাক্কী মেন্যুফেকচরিং সেক্তরশিংদা অৱাবা কয়া পীখ্রে। মসিনা মরম ওইরগা মপুং ওইবা পোলিসী অমত্তা শেম্লমদে, লোজিস্তিক্স, ইলেক্ত্রিসিতী সপ্লাই- ৱাতর সপ্লাইগুম্বা তঙাই ফদবা হীরমশিংবু উশিন্নদনা অদুমক লৈথোক্লম্মি। মসিনা করি ওইহল্লে হায়বা ঐহাক্কী লৈবাক্কী নহারোলশিংনা মমুৎ তানা খঙলবনি। অদুবু, ঙসিগী ভারত্তি অনৌবা ৱাখল্লোন, থবক তৌবগী অনৌবা চৎনবীগা লোয়ননা মথৌ পাংথোক্লি। নশানা অপাম্বা ৱারেপ লৌজরগা থবক তৌজরো হায়বগী থৌওং ঐখোয়না মুত্থত্তুনা চাউখৎপা পুরক্নবা অমসুং শাহৌ লৌনবগীদমক্তা ইন্সেন্তিব মখল কয়া পুথোকখি। ঐখোয়না প্রদক্সন লিঙ্ক ইন্সেন্তিব স্কিম হৌদোকখি অমসুং মসিনা পুরকপা অহোংবা কয়া লৈবাক্না উরে। ঐখোয়গী পোলিসী ঙসিদি তংদু লৈতারে, করি তৌবা ঙমগনি হায়বা ঙম্লে অমসুং তুংগী মতমগা চুনবসু ওইরে। পি.এম. গতি শক্তি নেস্নেল মাস্তর প্লান অমসুং নেস্নেল লোজিস্তিক্স পোলিসীগী খুত্থাংদা ঐখোয়না লোজিস্তিক্সকা মরী লৈনবা খুদোংচাবা খুদিংমক মশক থোক্না ফগৎহল্লে।

মরূপশিং,

ভারতনা মেন্যুফেকচরিং সেক্তরদা কা হেন্না ফগৎপা থবক পাংথোকপা ঙম্লোই, অদুনা সর্ভিস সেক্তরখক্তদা অহেনবা মিৎয়েং চঙবগী অতোপ্পা ৱাখল্লোন অমসু হান্না লৈরম্মি। ঙসি ঐখোয়না সর্ভিসেস অমসুং মেন্যুফেকচরিং সেক্তর অনিমক ফগৎহল্লি। মালেম অসিগী লৈবাক অমত্তনা শুপ্নগী সর্ভিসেস নত্ত্রগা মেন্যুফেকচরিং সেক্তরখকতমক চাউখৎলগা মখা তানা চৎপা য়ারোই হায়বা ঐখোয়না খঙই। চাউখৎ থৌরাংগীদমক্তা হোলিস্তিক এপ্রোচ অমগা লোয়ননা ঐখোয়না চৎফম থোকই। মসিগুম্বা ৱাখল্লোন অসিগা লোয়ননা ঙসিগী ভারতনা মশাদা থাজবগা লোয়ননা তুংলমচত্তা খোঙদারি। মমাংগী ৱাখল্লোন্দা অশোইবা অমগা লৈরম্মি। মদুদি – ঐখোয়গী লৈবাক্তা স্কিল লৈবা মেনপাৱর মশিং ৱাৎলি, লৈবাক্কী স্কিলদা থাজবা লৈরমদে, লৈবাক্কী তেলেন্ততসু থাজরমদে, মসিনা মরম ওইরগা, মেন্যুফেকচরিং সেক্তরনা চাউখৎপা ঙমদনা হান্নগী মতৌগুম্না অদুমক লৈরম্লিবনি, অহেনবা মিৎয়েং চঙলমদ্রিবনি। ঙসিদি, ভারতনা মেন্যুফেকচরিংদা খ্বাইদগী মকোক্তা লৈবা পাম্বগা লোয়ননা মসিগীদমক্তা শেম শাবা হৌরে। সেমিকন্দক্তরদগী হৌরগা এয়রক্রাফ ফাওবদা, ঐখোয়না সেক্তর খুদিংদা মকোক থোংবা পাম্বগা লোয়ননা তুংলমচত্তা চঙশিল্লি। ঐখোয়না মমাংগী চহি ৮দা স্কিল দিভেলপমেন্ততা মিৎয়েং চঙদুনা মরী লৈনবা ইকোসীস্তেম শেম্বদগী ঙসিগী ফিভমসিদা য়ৌরকপা ঙম্লিবনি। অহোংবা কয়াসিবু পুন্সিল্লবা মতুংদা, ভারতকী চাউখৎপগী খোঙচৎনা ঙসিদি ফিভম অসিদা য়ৌরক্লিবনি।

মরূপশিং,

ঐখোয়গী সরকারগী ইনভেস্তমেন্ত পুক্নিং থৌগৎপা কাঙলোন কয়াগী মহৈ অসি ঐখোয়না এফ.দি.আই.দা উবা ফংলে। হৌখিবা চহি নিপান অসিদা লৈবাক ১৬০ হেনবদগী কম্পনীশিংনা ভারত্তা ইনভেস্ত তৌরকখি। অসিগুম্বা ফোরেন ইনভেস্তমেন্তশিং অসি ইন্দস্ত্রী খরখক্তা ইনভেস্ত তৌবা নত্তে অদুবু ইকনোমীগী সেক্তর ৬১দা শন্দোক্লি অমসুং ভারতকী রাজ্য ৩১ কোনশিল্লি। এরোস্পেস সেক্তর খক্তদা বিলিয়ন দোলর ৩দগী হেন্না ইনভেস্ত তৌখ্রে। সেক্তর অসিদা ২০১৪গী মতুংদা ইনভেস্ত তৌখিবা অসি ২০০০ দগী ২০১৪ ফাওবগী মনুংদা তৌখিবা অদুগী শরুক মঙা ওই। লাক্কদৌরিবা চহিশিং অসিদা দিফেন্স অমসুং এরোস্পেস সেক্তরশিংনা আত্মনিভর ভারত কেম্পেনগী মরুওইবা য়ুম্বীশিং ওইরগনি। ২০২৫ ফাওবদা ঐখোয়গী দিফেন্স মেন্যুফেকচরিং অসি দোলর ২৫ হেন্নবা পান্দম থম্লি। ঐখোয়গী দিফেন্স এক্সপোর্তশিং অসি বিলিয়ন দোলর ৫ হেল্লগনি। উত্তর প্রদেশ অমসুং তমিল নাদুদা শেমগৎলিবা দিফেন্স কোরিদোরশিং অসিনা সেক্তর অসি পাকথোক চাউথোকহনবদা চাউনা মতেং পাংলগনি। লৈবাক্কী ঙাক-শেল মন্ত্রালয় অমসুং গুজরাত সরকারবু ঙসি ঐহাক্না থম্মোই শেংনা থাগৎচরি। নুমিৎ খরনিগী মমাংদা, অচৌবা দেফএক্সপো অমা মখোয়না গান্ধীনগরদা শীন-লাঙদুনা পাংথোকখিবা অদোম্না উখ্রে। দিফেন্সকা মরী লৈনবা খুৎশু খুৎলায় পুম্নমক্কী অচৌবা থৌরম অমা মফমদুদা পাংথোকখি। মসিনা হৌজিক ফাওবগী ওইনা খ্বাইদগী চাউবা দেফ-এক্সপো ওইখিবগীদমক্তা ঐহাক্না রাজনাথজীবু থাগৎচরি। দেফ-এক্সপো অসিদা উৎখিবা খুৎশু খুৎলাই অমসুং তেক্নোলোজী খুদিংমক ভারত্তা শাজবা ঙাক্তনি। প্রোজেক্ত সি-২৯৫কী মমিশিং অদুসু লাক্কদৌরিবা চহিশিংদা পাংথোক্কদবা দেফ-এক্সপোদা উবা ফংলগনি। ঐহাক্না তাতা গ্রুপ অমসুং এয়রবসপু মসিগীদমক্তা থাগৎচরি।

মরূপশিং,

ঙসিগী পুৱারী ওইরবা থৌরমসিদা, ঐহাক্না ইন্দস্ত্রীগা মরী লৈনবা মরুপশিংদা ৱাফম অমা থম্বা পাম্মি। ঙসিগী য়াইফরবা থৌরমসিগী শরুক ওইনবগীদমক্তা তোঙানবা সেক্তর কয়াগী সেনিয়র ওইরবা ইন্দস্ত্রী লিদরশিংনা ঙসি লেংবিরকপসি ঐহাক্না য়াম্না নুংঙাইজৈ। লৈবাক অসিদা লৈরিবা ইনভেস্তমেন্তকী থাজবা অসিগী কান্নবা অদোম্না লৌবীয়ু, অনম্বা কনবগা লোয়ননা মাং থানা চঙশিন্দুনা খুদোংচাবা অসিবু মাংহনবীগনু। লৈবাক্কী স্তার্তঅপ, ইন্দস্ত্রীগী মালেমদা মরা চেৎলবা মীওইশিংদা ঐহাক্না হায়নীংবদি লৈবাক্কী স্তার্তঅপশিংবু হেন্না চাউখৎহনবদা করম্না তেংবাংবা য়াবগে খনবীয়ু, অচৌবা ইন্দস্ত্রীশিংনা অদোম ইশাগী মফমদা স্তার্তঅপ সেল অমা শাবীয়ু, লৈবাক্কী নহারোল কয়ানা করি স্তার্তঅপ্তা থবক তৌরিবগে খঙদোকপীয়ু, মখোয়গী থবকশিংদা করম্বা রিসর্চকা চান্নগনি থীদোকপীয়ু, অদুগা মখোয়গী মখুৎ শমদুনা তেংবাংবীয়ু। মসিদা অদোমসু চাউখৎকনি, অদুগা স্তার্তঅপশিংসু চাউখৎকনি। অদুগা, স্তার্তঅপ মালেমদা হিন্দুস্তানগী মমিং পুরক্লিবশিংগী মপাঙ্গলসু শরুক য়াম্না হেনগৎকনি। রিসর্সকী লমদা লনাই সেক্তর খক্তনা হৌজিক শরুক য়ারি। মসিবু ঐখোয় পুন্না পাকথোক চাউথোকহল্লবদি ইন্নোভেসন অমসুং মেন্যুফেকচরিংগী মপাঙ্গল লৈবা ইকোসীস্তেম অমা ঐখোয়না শেমগৎপা ঙমগনি। সবকা প্রয়াসকী মন্ত্রসি ঐখোয় খুদিংগী কান্নবা ওইরক্কনি, মীপুম খুদিংগী তমজনীংঙাই অমসুং খুদমসু ওইরক্কনি। ঐখোয় পুন্না পান্দম অসিগী মাইকৈদা চঙশিল্লসি। মোদর্ন ওইরনবা এয়রক্রাফ মেন্যুফেকচরিং ফেসিলিতী অসিগীদমক্তা ঐহাক্না লৈবাক মীয়াম্বু অমুক্কা হন্না থাগৎচরি। খুদোংচাবা কয়া অমনা লৈবাক্কী নহারোলশিংবু ঙাইদুনা লৈরবনি। ঐহাক্না লৈবাক্কী হৌরক্লিবা চারোন শুরোনশিংবু মরু ওইনা য়াইফ পাউজেল পীজরি।

হন্না হন্না থাগৎচরি!

দিসক্লেমর: প্রধান মন্ত্রীগী ৱারোল অসি গুজরাতী লোলদা থমখিবনি, মসিনা মদুগী চাউরাকপা ৱাহন্থোক্নি।

*****