ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ভিদিও কনফরেন্সিংগী খুত্থাংদা এফ.এ.ও.গী ৭৫শুবা কুমওন পাঙথোক্নবা লুপা ৭৫গী নীংশিং শেনয়েক ফোঙখ্রে। হন্দক্তা পুত্থোকখিবা বাইওফোর্তিফাইদ ওইরবা মহৈ-মরোংশিংগী মখল ১৭পু মহাক্না লৈবাক্তা শিন্নখ্রে।

থৌরম অসিদা ৱা ঙাংবদা প্রধান মন্ত্রীনা মচি ওইবা চিঞ্জাক ফংদবগী ফিভম অসিবু লোইশিন্নবা হোৎনদুনা লেপ্তনা থবক তৌরিবা মালেম শিনবা থুংবগী মীওইশিংবু থাগৎখ্রে। মহাক্না হায়খিবদা ঐখোয়গী লৌউবা মরুপশিং – ঐখোয়গী চিঞ্জাক পীরিবশিং, ঐখোয়গী লৌউ-শিংউবগী সাইন্তিস্তশিং, ঐখোয়গী অঙ্গনৱাদি আশাগী থৌমীশিং অসিনা মচি ওইবা চিঞ্জাক ফংদবগী মায়োক্তা চঙশিল্লিবা ইহৌ অসিগী য়ূম্ফম ওইরি। মখোয়গী থবক-কনবগী থৌওংশিং অসিনা ভারতকী চানবা চিঞ্জাক থমফমশিং অসিবু থন্না লৈহনবতা নত্তনা সরকারনা খ্বাইদগী লায়রবা মীওইশিংদা মসিবু য়ৌহনবদসু মখোয়না তেংবাংলি। মহাক্না মখা তানা হায়খিবদা মখোয়না হোৎনরিবশিং অসিগী মরম্না ভারতনা কোরোনাগী ইরাং মনুং অসিদা ফাওবা মচি ওইবা চিঞ্জাক ফংদবগী মায়োক্তা অকনবা মওংদা লান্থেংনবা ঙম্লিবনি হায়খি।

প্রধান মন্ত্রীনা হায়খিবদা এফ.এ.ও.না চহি কয়া অসিগী মনুংদা লৌউ-শিংউবগী পোত্থোক হেনগৎহনবা অমসুং ভারত য়াওনা মালেমগী মফম খুদিংদা চাবা ফংদবগী শিংনবা অসিবু লোইশিনহন্নবা তেংবাংলি অমসুং চিঞ্জাক্তা মচি ওইবগী ফিভম হেনগৎহনবদা অচৌবা থৌদাং পাঙথোক্লি অমসুং মখোয়গী অসিগুম্বা সেবা অসিবু করোর ১৩০ হেনবা ভারতকী মীয়াম্না ইকায় খুম্নরি। হন্দক্কী চহিগী নোবেল পীস প্রাইজ অসি ৱর্ল্দ ফুদ প্রোগ্রামদা পীবা অসি এফ.এ.ও.গী অচৌবা মাই-পাকপা অমনি হায়না মহাক্না হায়খি। মহাক্না মখা তানা হায়খিবদা ভারতনা মখোয়গা খুৎশম্নবা অমসুং থবক পাঙথোকমিন্নবগী পুৱারী ওইরবা থৌওং কয়া লৈরিবা অসিদা য়াম্না হরাওই হায়খি।

প্রধান মন্ত্রীনা হায়খিবদা ৱর্ল্দ ফুদ প্রোগ্রামদা অসি এফ.এ.ও.না দাঃ বিনয় রঞ্জন সেন্না এফ.এ.ও.গী দাইরেক্তর জেনেরেল ওইরিঙৈ মতমদা মহাক্কী লুচিং মখাদা হৌদোকখিবনি হায়খি। মহাক্না চাক-তাঙবা থোকপা অমসুং চাবা ফংদবগী ফিভমশিংগী চৈথেং অসি য়াম্না নক্না থেংনখি অমসুং মহাক্কী থবক্কী পাক-চাউবা অসিনা মালেম খুদিংদা হৌজিক ফাওবা কান্নহল্লি। মহাক্না হায়খিবদা এফ.এ.ও.না হৌখিবা দিকেদশিংদা ভারতনা মচি ওইবা চিঞ্জাক ফংদবগী শিংনবা অসিগা লান্থেংনরিবা অসি য়াম্না কুপ্না য়েংশিল্লি অদুবু মসিগী পাক-চাউবা অসিদা অকক্নবা কয়াদি লৈখি। চহি নৌরিঙৈদা মীরোনবা, মহৈ-মশিং হৈবা ৱাৎপা, ই-পাউ মতিক চানা ফংদবা, থক্নবা ঈশিং মরাং কায়না ফংদবা, লু-নানবগী চাং ৱাৎপগী মরমশিং অসিনা ঐখোয়গী অপাম্বা পান্দম অসি ফংহনবা ঙমদ্রিবনি হায়না মহাক্না হায়খি। 

প্রধান মন্ত্রীনা হায়খিবদা চহি কয়াদগী ফংলকপা লৌশিংগা লোয়ননা ভারত্তা ইং ২০১৪গী মতুংদদি ইনৌ নৌবা থৌওং পাঙথোকপা হৌখি হায়খি। মহাক্না হায়খিবদা পুন্সিনবা থৌওংশিংগা লোয়ননা সরকারনা হীরম খুদিংমক মনুং চনবা থৌওং অমা হৌদোক্তুনা দাইমেন্সন য়াম্বা থৌরাং অমা চত্থনবা মীয়ামদগী তোখায় তানা পাঙথোকপা থৌরম কয়া অমা লোইশিনখি। নেস্নেল ন্যুত্রিসন মিসন (পোশন অভিয়ান), স্বচ্ছ ভারত মিসনগী মখাদা অমাংশঙ শাবা, মিসন রেনবো, জল জীবন মিসন, মমল তাংদবা সেনিতেসন পেদ য়েন্থোকপনচিংবা সরকারনা পাঙথোকখিবা খোঙথাং কয়া অমগী মতাংদা মহাক্না পনখি। মহাক্না নুপীমচাশিংবু মহৈ তমহনবগী রেসিও অসিনা নুপামচাশিংগী রেসিওদগী হেনবগুম্বা মথক্তা পনখ্রিবা খোঙথাংশিং অসিগী মহৈ ফংখিবা অসিগী মতাংদা মিৎয়েং চঙখি। প্রোতিন, আইরন অমসুং জিঙ্কনচিংবা মচি ওইবা পোৎলমশিং মরাং কায়না য়াওবা অপৌবা হৱাই-চেংৱাই অমসুং লৌরোক থানবা পুক্নিং থৌগত্তুনা মচি ওইবা চিঞ্জাক ফংদবগী শিংনবা অসিবু থেংননবা মরু ওইবা থবক কয়া অমসু পাঙথোকখ্রে হায়না মহাক্না হায়খি।

প্রধান মন্ত্রীনা ইং ২০২৩বু ভারতনা মিল্লেৎসকী ওইবা মালেমগী চহি হায়না লাওথোক্নবা হৌদোকপা অসিবু এফ.এ.ও.না মপুং ওইনা শৌগৎপগীদমক্তা এফ.এ.ও.দা থাগৎপসু ফোঙদোকখি। মহাক্না হায়খিবদা মসিনা মচি ওইবা চিঞ্জাক চাবদা পুক্নিং থৌগৎকনি, মসিবু মরাং কায়না ফংহনগনি অমসুং পীক্না লৌ উবা মীওইশিংদা য়াম্না কন্নহনগনি হায়খি। অপীকপা অমসুং ময়ায় ওইরপ্না চাউনা লৌ উবা মীঅইশিংনা মখোয়গী ঈশিং মরাং কায়না ফংদবা অমসুং লৈহাউ য়াম্না চেন্দবা লৌফমশিংদা অপৌবা হৱাই-চেংৱাই থাগল্লি হায়না মহাক্না হায়খি। মসিনা ভারত খক্তদা নত্তনা মালেম পুম্বদসু কান্নবা পীগনি হায়না মহাক্না হায়খি।

প্রধান মন্ত্রীনা মীয়াম্না তোয়না থানবা মহৈ-মরোং খরদি মাইক্রোন্যুত্রিএন্তশিংগী চাং য়াওগন্দে অমসুং মসিগী মওং অসিগী ৱারোইশিন পুরকপা ওইনা বাইও-ফোর্তিফাইদ ওইরবা মখল কয়া অমা পুথোক্লে হায়না হায়খি। মহাক্না মখা তানা হায়খিবদা ন্যুত্রিসন কেম্পেন অসিবু হেন্না মপাঙ্গল হাপ্নবা মরু ওইবা খোঙথাং অমা ওইনা গেহু অমসুং ফৌ য়াওনা মফম মফমগী অমসুং নাৎকী ওইবা বাইও-ফোর্তিফাইদ ওইরবা মরুগী মখল ১৭ অসি লৌউবশিংদা ফংহল্লি হায়না হায়খি।

প্রধান মন্ত্রীনা মন্ত্রীনা হায়খিবদা মালেমগী অখঙ-অহৈ কয়ানা ভারত্তা কোরোনাগী মরমদগী ওইরিবা চাবা ফংদবগী অমসুং মচি ওইবা চিঞ্জাক ফংদবগী ফিভমশিং অসিগী মতাংদা য়াম্না লুম্না লৌরি হায়না হায়খি। মহাক্না হায়খিবদা অসিগুম্বা ফিভমশিং অসিগী মরক্তা শিংনবশিং অসিবু থেংননবা হায়দুনা হৌখিবা থা ৭-৮দা ভারতনা লায়রবা করোর ৮০দা লুপা করোর ১.৫গী শেনফমগী হৱাই-চেংৱাই কয়া লেম্না য়েন্থোকখি হায়খি। ফুদ সেক্যুরিতী হীরমদা ভারতকী খোঙফম চেৎপগী মওং অমা ওইনা রাসন্দা চেং অমসুং গেহুগী মথক্তা লেন্থিলসু য়াওহন্নবা অখন্নবা থবক কয়া অমসু পাঙথোকখ্রে হায়না মহাক্না মখা তানা হায়খি।

প্রধান মন্ত্রীনা হায়খিবদা ইং ২০১৪গী মমাংদদি ফুদ সেক্যুরিতী এক্ত অসি রাজ্য ১১ খক্তদা চৎনরম্মি অমসুং চহিসিগী মতুংদদি মসিবু লৈবাক শিনবা থুংনা চৎনহনখি হায়খি। মালেম অসিনা কোরোনা থোকহনবা ফিভমশিংগা থেংনরিঙৈ মরক্তা ভারতকী লৌউবশিংনা হৱাই-চেংৱাই পুথোকপদা হান্না ফংখিদ্রিবা মাই-পাকপা ফংখি অমসুং সরকারনসু গেহু, ফৌ অমসুং হৱাই লৈবদসু মশক থোকপা অনৌবা মাই-পাকপা কয়া অমসু ফংখ্রে হায়না মহাক্না হায়খি। মহাক্না হায়খিবদা শেমদোকপগী থবক কয়া অমা ভারত্তা চত্থরি অমসুং মসিনা লৈবাক অসিনা মালেমগী ফুদ সেক্যুরিতীগী হীরমদা খোঙফম চেৎপগী মওং উৎলি হায়না হায়খি। লৌউবশিংগী শেন্থোক হেনগৎহন্নবা পাঙথোকপা শেমদোকপগী থৌওং কয়াগী মতাংদসু মহাক্না পনখি। এ.পি.এম.সি. এক্ততা শেমদোকখিবগী পান্দম অসিদি মসিগী চাংয়েংনবগী ফিভম হেনগৎহন্নবনি হায়খি। লৌউবশিংনা পোত্থোক্কী মমল অসি এম.এস.পি.গুম্না শরুক অমগা তঙখায়গী চাংদা ফংহন্নবা তোঙান তোঙানবা খোঙথাং কয়া অমা পায়খৎখ্রে হায়খি। এম.এস.পি. অমসুং সরকারনা পোৎ লৈবগী থৌওং অসি লৈবাক্কী ফুদ সেক্যুরিতী শোইহন্দনবগী মরু ওইবা শরুক অমনি। মরম অদুনা মসিবু মখা তানা চত্থবা অসি মশানা তাবনি।

প্রধান মন্ত্রীনা হায়খিবদা অপীকপা লৌউবশিংদা মপাঙ্গল হাপ্নবা ফার্মর প্রদ্যুসর ওর্গনাইজেসন (এফ.পি.ও.)গী চাউরবা নেৎৱর্ক কয়া লৈবাক অসিদা শেম্লি হায়খি। গ্রেন লেম্না মাঙবা অসি ভারতকী অচৌবা শিংনবা অমা ওইদুনা লাক্লি অমসুং ইসেন্সিএল কম্মোদিতিজ এক্ত অসিনা মসিগী ফিভম অসিদা অহোংবা পুরক্লগনি। হৌজিক্তি সরকার অমসুং লন্নাইগী মীওইশিংনা খুঙ্গংশিংদা অফবা ইনফ্রাস্ত্রকচর শাবগী খুদোংচাবশিংসু হেন্না ফংলগনি।

এ.পি.এম.সি. এক্ততা শেমদোকখিবশিং অসিবু কুপ্না তাক্লদুনা প্রধান মন্ত্রীনা হায়খিবদা লৌউবনা প্রাইবেৎ কম্পেনী নত্ত্রগা ইন্দস্ত্রীগা য়ানবা অমা পুরকপা মতমদা পোত্থোক অমগী মমল অসি পোত্থোক অদু থাদ্রিঙৈগী মমাংদা লেপ্নগনি হায়খি। মসিনা মমলদা অহোংবা লৈবগী ফিভমদগীসু কনলগনি অমসুং লৌউ-শিংউদা অনৌবা তেক্নোলোজী শিজিন্নবদসু পুক্নিং থৌগৎকনি। লৌউবশিংদা অপাম্বা খনবগী অহেনবা খুদোংচাবা কয়া পীবগী মথক্তা লৌউবশিংদা লীগেলগী ওইনা ঙাক-শেনবগী খুদোংচাবসু পীরে হায়না মহাক্না হায়খি। করিগুম্বা লৌউবা অমনা মরম অমদগী য়ানবা অসিদগী তোক্নিংলবদি মহাক্না পেনালতী অমত্তা পীবগী মওং লৈরোই। অদুবু করিগুম্বা ইন্সতিত্যুসন অমনা হায়রিবা য়ানবা অসি ঙাক্ত্রবদি মহাক্নদি ফাইন পীবা তাগনি। য়ানবা অসি লোক্লবা মহৈ-মরোং খক্তগী ওইগনি অমসুং লৌউবগী লমগী মতাংদদি চয়েৎনবা অমত্তা লৈরোই হায়না মহাক্না হায়খি। মসিনা হায়বদি শেমদোকপশিং অসিগী খুত্থাংদা লৌউবশিংদা মখল খুদিংগী মওংদা ঙাক-শেনগনি হায়বনি।

প্রধান মন্ত্রীনা অরোইবা ওইনা হায়খিবদা ভারতকী লৌউবশিংনা মপাঙ্গল লৈবা মতমদা মখোয়গী চাগাসু হেনগৎকনি অমসুং মসিনা মরম ওইদুনা মচি ওইবা চিঞ্জাক ফংদবগী মায়োক্তা পাঙথোক্লিবা কেম্পেন অসিসু চপ মান্নবা পাঙ্গল ফংগনি। মহাক্না ভারত অমসুং এফ.এ.ও.গী মরক্তা খুৎশম্নবা হেনগৎপা অসিনা কেম্পেন অসিবু মখা তানা মাই পাকহনগনি হায়বগী অনীংবা ফোঙদোকখি।

***