ভারতকী প্রধানমন্ত্রী

ঙসি প্রধান মন্ত্রী শ্রী নরেন্দ্র মোদীনা লোক কলয়ান মার্গতা লৈবা মহাক্কী য়ুমদা লাক্লিবা গনতন্ত্র দিবস পেরেদতা শরুক য়াগদৌরিবা এন.সি.সি কেদেতশিং, এন.এস.এস ভোলুন্তিয়ারশিং, ত্রাইবেলশিং অমসুং তেব্লো আর্তিস্তশিংগা উনদুনা ৱারি শানখ্রে। ৱারি শানরবা মতুংদা ভারতকী ইনাকখুল্লবা নাৎ অমসুং খেন্নবশিংগী ফরবা নাৎকী থৌরমশিং উৎখি।

হান্নগী মওংদগী তোখায়না, প্রধান মন্ত্রীনা অনৌবা মওং অমদা  শরুক য়ারিবশিংগা ৱারি শানখি। মহাক্না শরুক য়াখিবা মীওইশিংগা অমমমতা ওইনা নিংতম্না ৱারি শানখি।

প্রধান মন্ত্রীনা হায়খি এক ভারত শ্রেস্থা ভারতকী থৌনা মপাঙ্গল কনখৎহন্নবা শরুক য়ারিবশিংনা তোঙান তোঙানবা রাজ্যশিংগী মীয়ামগা ৱারি শানগদবনি। ৱারি শানবা অসিনা লৈবাক অসি চাউখৎনবা য়াম্না মরুওইরিবা অমনা অমবু শকখঙবা অমসুং অপুনবগী শক্তম ফগৎহনগনি।

প্রধান মন্ত্রীনা হায়খি বিকসিত ভারতকী পান্দম ফংনবা দাইত্ব লৈবা নাগরিক অমা ওইনা থৌদাংশিং পাংথোক্কদবনি। অপুনবগী থবকশিংনা লৈবাক অসি মপাঙ্গল কনখৎহন্নবা মীওই খুদিংমক অমতা ওইগদবনি অমসুং হায়দোকখিবা ৱা ঙাক্না চৎগদবনি। নহারোলশিংনা মাই ভারত পোর্তেলদা মিং চনগদবনি অমসুং লৈবাক শেমগৎপগী থবকশিংদা থৱায় য়াওনা শরুক য়াগদবনি। থকশি-খাশি লৈবা, মতম চানা থবক তৌবা অমসুং য়াহৌ ঙনবা অমসুং দাইরি ইবা য়াওনা অসিগুম্বা অফবা হৈনবীশিং থম্বা য়াম্না মরুওই।

মীয়ামগী পুন্সি হেন্না নুংঙাইনবা সরকারনা পায়খৎলিবা মরুওইবা থবকশিং পল্লদুনা, প্রধান মন্ত্রীনা হায়খি লাখপতি দিদি করোর ৩ শেমগৎতুনা নুপীশিংগী ফিবম ফগৎনবা সরকারনা থবক পায়খৎলে। শরুক য়াখিবা মীওই অমনা মহাক্কী মমানা স্কিম অসিগী কান্নবা ফংখিবগী ৱারি লিখি, মহাক্কী পোৎথোকশিং মপান্দা থাদোকপগী মতাংদা পাউদমখি। কমদৌনা ভারতকী মমল হোংবা দেতাশিংনা অওনবা পুরকপগে হায়বা অমসুং দিজিতেল ইন্দিয়ানা মীয়াম পাউ ফাওনবা অমসুং খুদোংচাবা হেনগৎহনবদা মতেং পাংবগে হায়বগী মতাংদা প্রধান মন্ত্রীনা ফোঙদোকখি।

লু-নানবগী মরুওইবগী মতাংদা, প্রধান মন্ত্রীনা হায়খি করিগুম্বা ভারতমচা করোর ১৪০ না লু-নান্না লৈনবা ৱাশক লৌরবদি, ভারত মতম পুম্নমক্ত লু-নানগনি। মখোয়গী মমাশিংগী মিংদা উ পাম্বীশিং থানবা এক পের মা কে নাম থবক অসি মীয়াম্না শরুক য়াগদবনি। মীয়াম হকচাং ফনা লৈনবা ফিত ইন্দিয়া মুভমেন্ত পায়খৎলি অমসুং মীওই খুদিংমক য়োগ শান্নবা মতম কাইথোক্কদবনি অমসুং মপাঙ্গল কনবা অমসুং মশা ফবা লৈবাক অমা শেমগৎনবা হকচাং ফনা লৈনবা মীৎয়েং চঙগদবনি।

প্রধান মন্ত্রীনা মপান লৈবাকশিংগী মীওইশিংগশু ৱারি শানখি। থৌরম অসিদা শরুক য়াবা, ভারতকী মীয়াম্না লুনা তৌবা অমসুং মখোয়গী খোঙচৎশিংগী নুংঙাইবা থৌদোকশিং মখোয়না থাগৎপা ফোঙদোকখি।

*****