ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি নই দিল্লীদা পাংথোকপা এন.সি.সি. রেল্লীদা ৱা ঙাংখ্রে।

মহাক্না হায়খি মদুদি মহাক্না এন.সি.সি. কেদেৎশিংগী মরক্তা লৈবা মতম খুদিংমক্তা থোদোক্তুনা চৎনিংদবা ফাওই।

মহাক্না নুঙাইবা ফোংদোকখি মদুদি হৌখিবা চহী অমা অসিদা এন.সি.সি. কেদেৎশিংনা স্বচ্ছ ভারত অভিয়ান, দিজিতেল ত্রাঞ্জেক্সন অসিনচিংবা মরুওইবা ইনিসিয়েতিব কয়াদা থৌদাং লৌরি। কেরলাগী ইচাও মতমদা রিলিফ অমসুং রেস্ক্যুদা মখোয়গী থৌদাং অদু থোয়দোক হেন্দোক্না থাগৎনিঙাইনি হায়না মহাক্না ফোংদোকখি।

প্রধান মন্ত্রীনা হায়খি মদুদি ঙসি, মালেম পুম্বনা ভারতপু লংলবা থৱানমিচাক অমগুম উরি। মহাক্না হায়খি মদুদি হৌজিক্তি খংবা অমা লৈরে মদুদি ভারত অসি পোতেন্সিয়েল কয়া অমা লৈবতা নত্তনা পোতেন্সিয়েল অদুবুসু মপুং ফাহল্লি।

মহাক্না হায়খি মদুদি ইকোনোমী ওইগেরা নত্রগা দিফেন্স ওইগেরা, ভারতকী তৌবা ঙম্বশিং অদু হেন্না পাকথোক চাওথোক্লে। ভারতনা শান্তি শৌগৎপা অমা ওইবা মতমদা, ভারতনা নেস্নেল সেক্যুরিতীগীদমক দরকার তাবা খোংথাং অমা হেক্তা লৌখৎপদা নিংজিং মাংজিংনরোয় হায়না মহাক্না মখা তাখি। হৌখিবা চহী মরি মখায় অসিদা দিফেন্স অমসুং সেক্যুরিতীগীদমক মরুওইবা ৱারেপ কয়া লৌখ্রে হায়না মহাক্না ফোংদোকখি। ভারত অসি হৌজিক্তি নইক্লিয়ার ত্রাইএদ দিবেলপ তৌরবা খনগৎলবা লৈবাক খরগী মনুং চল্লে হায়না মহাক্না হায়খি। মহাক্না হায়খি মদুদি লৈবাক অদুনা সেক্যুর ওইরবা মতমদতা নহাশিংনা মখোয়গী মংলানশিং মংফাওনহনবা ঙমগনি।

মহাক্না কেদেৎশিংনা পাংথোক্লিবা অকনবা থবশিং অদু থাগৎপা ফোংদোকখি, মখোয়শিং অদুগী মরক্তা কয়া অমদি খুঙ্গংশিং অমসুং তাউন মচাশিংদগী লাকপশিংনি। এন.সি.সি. কেদেৎ কয়া অমনা লৈবাক অসিবু চাওথোকহন্নবা থবক তৌরি হায়না মহাক্না হায়খি। মসিগা মরী লৈননা মহাক্না মমিং চৎলবা এথেলেৎ হিমা দাসকী ৱাফম ফোংদোকখি। সরকার অসিনা ভি.আই.পি. কলচরবু ই.পি.আই.- “ইভরী পর্সন ইজ ইম্পোর্তেন্ত”না মহুৎ শিন্নবা হোৎনরি হায়না মহাক্না হায়খি। মহাক্না কেদেৎশিংগী মফমদা মখল খুদিংমক্কী নেগতিবিতী ঙাকথোক্নবা অমদি মশাগী অমসুং জাতিগী য়াইফনবগীদমক্তা থবক তৌনবা তকশিনখি। নুপীশিংদা খুদোংচাবা ফংহন্নবা অমদি ৱার্কফোর্সতা মখোয়না শরুক য়াবা হেঙ্গৎনবা খোংথাং কয়া অমা পায়খৎলে হায়না মহাক্না ফোংদোকখি। হৌজিক্তি অহানবা ওইনা ইন্দিয়ান এয়ার ফোর্সতা নুপীনা ফাইতর পাইলোৎশিং ওইরে হায়না মহাক্না হায়খি। শেঞ্জা-থুমজা অসি অনৌবা ভারতকী শরুক অমা ওইহন্দনবা প্রধান মন্ত্রীনা অকনবা ৱাফম থমখি।

প্রধান মন্ত্রীনা নহাশিংবু স্বচ্ছ ভারত অমসুং দিজিতেল ইন্দিয়াগুম্বা মরুওইবা ইনিসিয়েতিবশিংদা ইচং থৌনা শরুক য়াবগীদমক থাগৎপা ফোংদোকখি। সরকারগী য়াইফ থৌরাংশিংগী মতাংদা হেন্না চাওবা এৱারনেস শন্দোক্নবা মহাক্না কেদেৎশিংদা তকশিনখি। লাক্কদৌরিবা মীখলশিংদা মশিং য়াম্না ভোৎ থাদনবা নহাশিংবু মোতিভেৎ তৌনবসু মহাক্না মখোয়দা তকশিনখি।

মহাক্না কেদেৎশিংবু ভারতকী হিরিতেজ অমসুং অথোইবা লুচিংবশিংগা শম্নরিবা হন্দক্তা নই দিল্লী সহরদা হাংদোকখিবা তোঙান তোঙানবা অনৌবা লেন্দমার্কশিংদা চৎপা য়াই হায়না ফোংদোকখি। মসিগী মনুং চন্না মহাক্না লাল কিলাগী ক্রান্তি মন্দির অমসুং অলিপুর রোদতা লৈরিবা দা. ভিমরাও অম্বেদকরগী মহাপরিনিভানা স্থলগী মমিং পনখি। অসিগুম্বা মফমশিং অসিদা অমুক্তং চৎপনা মীওই অমবু মীয়ামগীদমক্তা থবক তৌনবা অনৌবা ইনর্জী ফংহনবা ঙমগনি হায়না মহাক্না ফোংদোকখি।