ভারতকী প্রধানমন্ত্রী

প্রধান মন্ত্রী নরেন্দ্র মোদীনা ঙসি ইন্দিয়ন ইন্সতিত্যুৎ ওফ তেক্নোলোজী, মদ্রাসগী ৫৬শুবা কনভোকেসন্দা শরুক য়াখ্রে।

থৌরম অদুদা ৱা ঙাংলদুনা প্রধান মন্ত্রীনা হায়, “ঐগী মাংদা মিনী–ইন্দিয়া অমসুং ন্যু ইন্দিয়াগী ইহুল অনিমক লৈরি। ইনর্জী অসি, অহিংবা অমসুং অচুম্বা অদুনি। ঐনা অদোমগী মিৎতা তুংলমচৎকী মঙলান উবা ফংলি। ঐনা অদোমগী মিৎতা ভারতকী পন্থুং অদু উবা ফংলি।” গ্রেজুএৎ ফংলবা মহৈরোইশিংগী মমা–মপা অমদি ওজাশিংবু থাগৎপা ফোংদোক্লদুনা প্রধান মন্ত্রীনা মতেং পাংলিবা স্তাফশিং (সপোর্ত স্তাফ)শিংবুসু থাগৎপা ফোংদোকখি। প্রধান মন্ত্রীনা হায়খি, “ঐনা মতেং পাংবা স্তাফশিংগী থৌদাংশিং অদুগী মতাংদসু ফোংদোকপা পাম্মি। মখোয় তুমিন্না লৈবগা লোইননা ফিজংগী মরুমদা লৈদুনা, অদোমগী চাননবা থৌরাং তৌই, কাশিংবু তরু তনান্না থম্মি অমসুং হোস্তেলশিংবুসু লুবা নানবা ওইহল্লি।”

প্রধান মন্ত্রীনা হায়খ্রে মদুদি ভারতকী নহারোলশিংগী তৌবা ঙম্বা অদুদা থাজবা থম্লি। প্রধান মন্ত্রীনা হায়, “ঐগী অমেরিকাগী খোংচৎ মনুংদা ঐখোয়না শানখিবা ৱারী–ৱাতাই অদুদা মান্নবা অমা য়াওখি। মদু অনৌবা ভারতকী মফমদা থম্বা ৱাখল্লোন অদুনি। ভারতকী কাংলুপনা মালেম পুম্বা অসিদা মরু ওইনা সাইন্স, তেক্নোলোজী অমসুং ইনোভেসনগী লমদা মখোয়গী তোপ তোপ্পা মশক অমা শেমলে। মসিদা কনানা থৌনা হাপ্পগে? মখোয়শিংদুগী মনুংদা অনম্বনা আই.আই.তি.দা নখোয়গী সেনিয়র ওইখ্রবশিংদুনি। অদোম্না মালেম পুম্বা অসিদা ব্রান্দ ইন্দিয়াবু হেন্না মপাঙ্গল কলহল্লি।”

প্রধান মন্ত্রীনা হায়খ্রে, “ঙসি ভারত অসি বিলিয়ন দোল্লর ৫গী ইকোনোমী ওইনবগী আশা তৌরি, মসিদা অদোমগী ইনোবেসন অমসুং তেক্নোলোজীগী আশা অদুনা মঙলান অসি মপুং ফাহনগদৌরিবনি। মসি হেন্না অথোই অহেন তান্নবা ইকোনোমী অমা ওইহন্নবগীদমক ভারতকী য়ুম্ফম ওইগদৌরিবনি। ভারত্তা ইনোবেসন অসি তশেংনা ইকোনোমিক্স অমসুং য়ুতিলিতীগী অচৌবা অপুনবা অমনি।”

প্রধান মন্ত্রীনা হায়, “ঐখোয়না লৈবাক অসিদা রিসর্স অমসুং ইনোবেসনগীদমক অফবা ইকোসিস্তেম অমা শেম্নবা চোকথবা লৈতনা হোৎনরি। ইন্সতিত্যুৎ কয়ামরুমদা অতল ইনক্যুবেশন সেন্তর শেমলি। মথংগী খোংথাং অসিদি স্তার্তঅপকীদমক কৈথেল থিবনি।”

প্রধান মন্ত্রীনা থাগৎপা ফোংদোক্লদুনা হায়খি, “অদোম্না কন্না হোৎনবা অদুনা ওইথোক্লরোইদবা অদুবু ওইথোকহল্লে। তাঞ্জা কয়ানা অদোম্বু ঙাইদুনা লৈরি মদুগী মনুংদা পুম্নমক অদু তশেংনা অরাইবদি ওইদে। মঙলান মঙবা কৈদৌঙৈদসু তোক্লোইদবনি, নশামক্কা শিংনদুনতা লৈগদবনি। মতৌ অসুম্না অদোম নশানা নশাবু হেন্না ফগৎহনবা ঙমগনি।”

প্রধান মন্ত্রীনা হায়খি, “অদোম কদাইদা থবক তৌবগে অমদি অদোম কদাইদা লৈবগে হায়বসি করিসু মথৌ তাদে, অদোমগী নমা লৈবাক্কী তঙাই ফদবশিং অদুসু শোইদনা নীংশিংগদবনি। মসিগী মতাংদা নৈনগদবনি মদুদি অদোমগী থবক, রিসর্স অমদি ইনোবেসন অদুনা অদোমগী নমা লৈবাক্কী মতেং করম্না পাংগনি। মসি অদোমগী খুন্নাইগী ওইবা নথৌদাং অদুনি।”

প্রধান মন্ত্রীনা হায়, “ঙসি, খুন্নাইগী ওইনা, ঐখোয়না অমুক্তং শিজিন্নবা প্লাস্তিক শিজিন্নবা তোকপা অসি মখা তানা চৎথগদবনি। মসিগী কান্নবা লৌবা অমদি কান্নদবা অদু মাংহনখিনবা থবক পাইখৎকদবনি। ঐখোয়না অদোমগুম্বা নহা ওইরিবা ইনোবেতরশিংগী মফমদা মিৎয়েং থম্লকপা মতমদা থাজবা পোক্লকই। তেক্নোলোজী অসিনা দেতা সাইন্স, দাইগ্নোস্তিক, বেহেবিয়র সাইন্স অমসুং মেদিসিনগা পুল্লকপা মতমদা নুংঙাইনীংঙাই ওইরবা ই–পাউশিং মাংদা থোরকপা য়াই।”

প্রধান মন্ত্রীনা স্বামী বিবেকানন্দগী ৱাফম পল্লদুনা হায়, “মী মখল অনি শুই – অতোপ্পগীদমক হিংবা মখল অমা অমসুং মশাগীতা হিংবা মখল অমা।” প্রধান মন্ত্রীনা হায়খি মদুদি অতোপ্পগীদমক হিংবা মীওই অদু নুংঙাইনা অমদি মপুং ফানা হিংলবনি।

প্রধান মন্ত্রী শ্রী নরেন্দ্র মোদীনা মসি হায়রদুনা মহাক্কী ৱাফম লোইশিনখি মদুদি মহৈ–মশিং অমসুং তম্বা অসি লেপ্তবা থৌওং অমনি। মহাক্না মহৈরোইশিংদা ইন্সতিত্যুত থাদোকলবসু তম্বা অমদি রিসর্স তৌবদি মখা তাখিনবা ফোংদোকখি।

PM @narendramodi addressing at @iitmadras convocation. pic.twitter.com/RVjGUisuOc

— PIB India (@PIB_India) September 30, 2019