Search

ভারতকী প্রধানমন্ত্রীভারতকী প্রধানমন্ত্রী

অনৌবা পাউশিং

মচাকশিং অসি পি আই বিদগী মশা মথন্তা লৌথোকচবনি

প্রধান মন্ত্রীনা অরুনাচল প্রদেশকী গোলদন জুবিলী অমসুং ৩৬শুবা স্তেতহুদ ফংবা নুমিৎকী হরাওবা ফোংদোকপগী থৌরম পাংথোকপদা ৱা ঙাংখ্রে

প্রধান মন্ত্রীনা অরুনাচল প্রদেশকী গোলদন জুবিলী অমসুং ৩৬শুবা স্তেতহুদ ফংবা নুমিৎকী হরাওবা ফোংদোকপগী থৌরম পাংথোকপদা ৱা ঙাংখ্রে


প্রধান মন্ত্রী, শ্রী নরেন্দ্র মোদীনা অরুনাচল প্রদেশকী মীয়াম্বু রাজ্যসিগী গোলদন জুবিলী অমসুং ৩৬শুবা স্তেতহুদ ফংবা নুমিৎকীদমক্তা থাগৎপা ফোংদোকখ্রে। রাজ্যসিনা হৌখিবা চহি ৫০ অসিদা নুমিৎনা থোক্লকপা মফমগী শক্তাকপু মপাঙ্গল হেন্না কনখৎহনবগীদমক্তা প্রজা মীয়াম্বুসু থাগৎপা ফোংদোকখি। ভারত রত্না ফংখিবা শক্নাইরবা দাঃ ভুপেন হজারিকাগী মমিং চৎলবা ঈশৈ “অরুনাচল হমারা”গী ঈশৈ ময়েক খরসু মহাক্না পনখি। মহাক্না ঙসি অরুনাচল প্রদেশকী গোলদন জুবিলী অমসুং ৩৬শুবা স্তেতহুদ ফংবা নুমিৎকী হরাওবা ফোংদোকপগী থৌরম পাংথোকপদা ৱা ঙাংখিবনি।

PM India

প্রধান মন্ত্রীনা অরুনাচল প্রদেশকী মীয়াম্বু লৈবাক নীংবগী ইথিল অমসুং খুন্নাইনা নুংশি চান্ননা লৈমিন্নবগী থৌওংবু খুমাং চাউশিলহনবা অমসুং লৈবাক্কী নাৎকী লিগেসীবুসু ঙাক শেন্দুনা থম্বগীদমক্তা থাগৎপা ফোংদোকখি। লৈবাক্কীদমক্তা থৱাই থাখিবা অরুনাচল প্রদেশকী অথৌবশিংগী মফমদসু মহাক্না ইকায় খুম্নবা উৎখি। “এঙ্গলো-এবোর লান নত্ত্রগা নীংতম্বা ফংলবা মতুংদা ঙমখৈগী ঙাক শেনবা ওইরো, অরুনাচলগী মীয়ামগী মথৌনা ফবগী ৱারীশিং অসি ভারত মচা খুদিংগী মমল নাইদ্রবা হেরিতেজ অমনি”, হায়না প্রধান মন্ত্রীনা ফোংদোকখি।

প্রধান মন্ত্রীনা রাজ্যসিদা চৎখিবা খোঙচৎ কয়া নীংশিংখি অমসুং মুখ্য মন্ত্রী, শ্রী পেমা খন্দুগী মখাদা দবল ইঞ্জিন সরকার অসিনা পায়খৎলিবা চাউখৎ-থৌরাংগী খোঙজেল অসিদা অপেনবা ফোংদোকখি। “সবকা সাথ, সবকা বিকাস, সবকা বিশ্বাস অমসুং সবকা প্রয়াসকী লম্বীনা অরুনাচল প্রদেশকী হেন্না ফরবা তুংগী মতম অমা শোইদনা লৈহনগনি”, হায়না মহাক্না মখা তাখি।

প্রধান মন্ত্রীনা নোংপোকথংবা ভারত, মরু ওইনা অৱাং নোংপোক ভারতনা ২১শুবা চহি-চাদা ভারতকী চাউখৎপগী ইঞ্জিন অমা ওইগনি হায়বসিদা থাজবা থম্লিবা অসিবু মহাক্না অমুক হন্না মীয়ামদা নীংশিংহনখি। মহাক্না মমাংগী চহি ৭কী মনুংদা পাংথোকখিবা খোঙথাং কয়া পনখি। কন্নেক্তিবিতী অমসুং ইনফ্রাস্ত্রকচরগী মতাংদা পাক শনবা থবক কয়া হৌজিক পায়খৎলি অমসুং থবকশিং অসিনা অরুনাচল প্রদেশকী পুন্সি মহিং অমসুং কারবারদা হেন্না লায়থোকহল্লি। লমদম অসিগী কোনুং খুদিংমকপু খ্বাইদগী অহেনবা মিৎয়েঙ চঙদুনা রেলনা শম্ননবা হোৎনরি। “ঐখোয়না লৈজবী পাঙ্গল শিজিন্নদুনা অরুনাচল প্রদেশপু নোংপোক এসিয়াগী মরু ওইবা গেৎৱে  অমা ওইহন্নবা হোৎনরি। অরুনাচলগী স্ত্রেতজিক ওইবা থৌদাংবু য়েংলদুনা, রাজ্যসিদা মতমগা চুনবা ইনফ্রাস্ত্রকচর শেমগৎ-শাগৎলি”, হায়না প্রধান মন্ত্রীনা ফোংদোকখি।

PM India

প্রধান মন্ত্রীনা অরুনাচলনা মহৌশা অমসুং নাৎকা খুৎশম্ননা চৎলিবা অসিবু পনখি। “অদোমগী হোৎনজমন্দগী, অরুনাচল অসি বাইও দাইবর্সিতীগী খ্বাইদগী মরু ওইবা মফমশিংগী মনুং চল্লে”, হায়না প্রধান মন্ত্রীনা অরুনাচলগী মীয়াম্বু থাগৎপা ফোংদোকখি।

মুখ্য মন্ত্রীনা হকশেল, এজুকেসন, স্কিল দিভেলপমেন্ত, নুপীগী মপাঙ্গল হাপ্পা অমসুং সেল্ফ হেল্প গ্রুপশিংগী হীরমদা চাউখৎপা পুরক্নবা হোৎনরিবা অসিদা শ্রী মোদীনা হরাওবা ফোংদোকখি। রাজ্য অসিগী চাউখৎ-থৌরাংগীদমক্তা কেন্দ্রগী লো মন্ত্রী, শ্রী কিরেন রিজিজুনা লেপ্তনা হোৎনরিবা অসিগীদমক্তসু প্রধান মন্ত্রীনা মহাকপু থাগৎখি।

অরুনাচলগী তুরিজমগী মতিকপু মালেমগী থাক্তা পুখৎনবগীদমক্তা প্রধান মন্ত্রীনা খোঙফম চেৎলিবা অসিবুসু মহাক্না অমুক হন্না পাউদমখি।

*****