ভারতকী প্রধানমন্ত্রী

খুরুমজরি,

গুলমার্গকী লমদমদা হৌজিক য়াম্না ইঙলবসু, নখোয়গী ফোং-ফোং শারবা ইথিল অমসুং থৱাই য়াওবা অসি ভারত মচা খুদিংনা উবা ফংলি অমসুং ফাওবসু ফাওনরি। ঙসিদগী খেলো ইন্দিয়া ৱিন্তর গেম্সকী অনিশুবা থৌরম হৌগদৌরি। মসি মালেমগী ওইবা ৱিন্তর গেম্সতা ভারতনা শরুক য়াবগা লোয়ননা জম্মু অমসুং কশ্মিরবু অচৌবা হব অমা ওইহন্নবা হোৎনবগী খোঙথাং অমনি। ঐহাক্না জম্মু অমসুং কশ্মির অমসুং লৈবাক্কী মফম খুদিংদগী লাকপা শান্নরোই শিংবু য়াইফ পাউজেল পীজরি।

লৈবাক্কী মফম খুদিংদগী মসিদা শরুক য়াবা লাক্লিবা শান্নরোই নখোয়না ভারত অমা, মপাঙ্গল লৈবা ভারত অমগী ৱাখল্লোন অসিবুসু হেন্না মপাঙ্গল লৈহল্লে। মসিগী ৱিন্তর গেম্স অসিদা শরুক য়ানবা লাক্লিবা রাজ্য অমসুং য়ুনিয়ন তেরিতরীগী মশিং অসি শরুক থোক্না হেনগৎলে হায়না ঐহাক্কী মফমদা পাউদম্বিরে। ৱিন্তর গেম্সকী মাইকৈদা লৈবাক অসিনা থৱাই য়াওবা হেনগৎলক্লিবা অসিগী মতৌসু উবা ফংলে। মমাংগী থৌরমদা জম্মু কশ্মিরগী শান্নরোইশিংনা নীংথিজবা থৌওং উৎখি। হন্দক্কী মতাং অসিদসু অতোপ্পা তীমশিংনা জম্মু কশ্মিরগী হৈ-শিংলবা তীমদা হান্নদগী হেনবা চাংয়েংনবগী শিংনবা উৎকনি অমসুং লৈবাক শিনবা থুংবদগী লাক্লিবা তীমশিংনা জম্মু কশ্মিরগী শান্নরোইশিংগী, মখোয়গী হৈ-শিংবা, মহাক্কী হোৎনবগী ফিভমশিং য়েংবা ফংগনি অমসুং মসিদগী হীরম কয়া অমা তমজবগী খুদোংচাবা ফংগনি হায়বগী ঐহাক্না থাজবা থম্মি। অদুগা মসিগী খেলো ইন্দিয়া ৱিন্তর গেম্স অসিদা থেংনরিবা থৌওংশিং অসিদগী ৱিন্তর ওলীম্পিক্সকী পোদিয়মদা ভারতকী মিংচৎ পুরকপা ঙম্নবদসু য়াম্না তেংবাংগনি ঐহাক্না থাজবা থম্মি।

মরুপশিং,

গুল্মার্গতা পাংথোক্লিবা মসিগী শান্নবগী থৌরম অসিনা জম্মু কশ্মিরনা তংদু-লৈতাবা অমসুং চাউখৎপগী অনৌবা থাক অমদা য়ৌনবা শেম-শাদুনা লৈরে হায়বগী মওং উৎলি। মসিগী ৱিন্তর গেম্স অসিনা জম্মু কশ্মিরনা শান্ন-খোৎনবগী অনৌবা ইকোসীস্তেম অমস শেম-শাবদা তেংবাংগনি। জম্মু কশ্মিরদা খেলো ইন্দিয়া সেন্তর ওফ এক্সসেলেন্স ২ অমসুং জিলা ২০দা খেলো ইন্দিয়া সেন্তর লৈরিবা অসিনা নহা ওইরিবা শান্নরোইশিংগীদমক্তা য়াম্না চাউবা খুদোংচাবা অমা পীরগনি। অসিগুম্বা সেন্তরশিং অসি ভারতকী মফম খুদিংদসু হাংদোক্লি। মসিদা নত্তনা, মসিগী থৌরম হৌদোকপা অসিনা জম্মু কশ্মিরদা অনৌবা ইথিল অমসুং পুক্নিং থৌগৎপগী ফিভম অমসু লৈহল্লগনি। অদুগা কোরোনাগী মরমদগী লাকখিবা খুদোংদবশিং অদুসু তপ্না-তপ্না হন্থরকপগী ফিভমসু ঐখোয়না উবা ফংলে।

মরূপশিং,

শান্ন-খোৎনবা অসি পামজবা থবক অমা নত্ত্রগা মতম লেন্নবা থৌওং অমখক্তং নত্তে। শান্ন-খোৎনবদগী ঐখোয়না কাঙবু অমা ওইবগী কান্নবা ইথিল ফংবগী থৌওং তমজৈ, মাইথীবা পীনবা অনৌবা পাম্বৈ তম্মি অমসুং হন্না-হন্না মাই পাকপা ফংনবা পুক্নিং চেৎপগী থৌওং কয়াসু তমজৈ। শান্ন-খোৎনবা অসিনা মীওইবা অমগী পুন্সি অমসুং পুন্সি মহিংগী মওং শেম্মি। মসিনা মশাদা থাজবগী চাং হেনগৎহল্লি অমসুং মসিনা মরোমদোম লেপচবা ঙম্বগী হীরমদা য়াম্না মরু ওইবা ৱাফম অমসু ওইরিবনি।

মরূপশিং,

মালেম অসিদা লৈবাক অমনা শেন্মিৎলোন অমসুং থৌরাং ফজবখক্তনা চাউখৎপা অমসুং মপাঙ্গল কনবা ওইবা নত্তে। মসিগী তোঙানবা মরম কয়া লৈ। সাইন্তিস্ত অমনা মহাক্না পুথোকপা অনৌবা পোত্থোক অমদগী মহাক্কী লৈবাক্কী মিংচৎ পুরকই। মিংচৎ পুরক্নবা তোঙান-তোঙানবা হীরম লৈ। অদুবু য়াম্না নীংথিনা শিন-লাঙবা অমসুং মওং-মরিল চুম্বা লম্বী কয়াগী মনুং চনবা ওইনা শান-খোৎনবা অসিসু অসিগুম্বা হীরম অমা ওইরক্লে। অমসুং হৌজিক্কী মতম অসিদদি মসিনা লৈবাক্কী মিংচৎ অমসুং মপাঙ্গল পুরকপসু ঙম্লে। মালেমগী অপিকপা লৈবাক কয়া অমদি শান-খোৎনবনা মরম ওইদুনা মালেমদা মিংচৎ পুরক্লি অমসুং শান-খোৎনবদা লাই পাক্তুনা লৈবাক শিনবা থুংনা ইথিল পীদুনা অনৌবা থাক অমদা পুখৎপসু ঙম্লে। মরম অদুনা, শান-খোৎনবা অসি মাই-পাকপা অমসুং মাইথীবগী চাংয়েংনবা খক্তা নত্তে হায়নসু হায়নরিবনি। শান-খোৎনবা অসি মেদল ফংবা অমসুং অহৈবা উত্থোকপা খক্তদা অকক্নবা নত্তে। মসিদি মালেমগী ওইবা মওং-মতৌ অমনি। ভারত্তদি ক্রিকেৎকী মতাংদা ঐখোয়না মসিগী ৱাফম অসি খঙনরে, অদুবু মসিগী ৱাফম অসি মালেমগী অতোপ্পা শান-খোৎনশিংগীসুনি। মসিগী মিৎয়েং অসিদা লোয়ননা লৈবাক অসিদা হৌখিবা চহি কয়াদগী শান-খোৎনবগী ইকোসীস্তেমগা মরী লৈনবা শেমদোকপা কয়া অমা পাংথোক্তুনা লাক্লি।

খেলো ইন্দিয়াগী খোঙথাংদগী হৌদুনা ওলীম্পিক পোদিয়মগী স্কিম ফাবদা, অনৌবা অপুনবা খোঙথাং অমগা লোয়ননা ঐখোয়না তুং লমচৎকীদমক্তা চৎলি। গ্রাউন্দ লেভেলদগী হৌদুনা ঐখোয়না হৈ-শিংবশিংবু মশক খণহদোক্তুনা অৱাংবা ফম্বাক্তা পুখৎনবা শান-খোৎনবগী প্রোফেস্নেলশিংবু মখুৎ পায়দুনা লমজিংবীরি। হৈ-শিংববু মশক খঙদোকপদগী হৌদুনা তীম খনবা ফাওবা মনুং-মপান ফাওনা উনবা পাংথোকপা হায়বসিদা সরকারনা অহেনবা মিৎইয়েং চঙলি। লৈবাক্কী মিংচৎ পুরক্না মপুন্সি চুপ্পা হোৎনরিবা শান্নরোইশিংবুসু ইকায় খুম্নবা উৎনবা, মখোয়না থেংনরকপা কয়াবু অনৌবা শান্ন্রোইশিংদা খঙহন্নবগীদমক্তা ঐখোয়না খোঙথাং কয়া অমসু পায়খৎলি।

মরূপশিং,

অনৌবা নেস্নেল এজুকেসন পোলিসী অসিদসু শান্ন-খোৎনবদা য়াম্না মরু ওইবা মিৎয়েং চঙলি। অহানবদদি, স্পোর্ত অসি এক্সত্রা-করিকলম অমা ওইনা লৌরম্বনি, অদুবু হৌজিক্তি মসিবু করিকলমগী শরুক অমা ওইরগনি। স্পোর্তকী গ্রেদ অসিসু মহৈরোয় অমগী মহৈগী চাং ওনবদা য়াওরগনি। মসি ঐখোয়গী শান-খোৎনবগী, ঐখোয়গী মহৈরোয়শিংগী ওইনা য়াম্না চাউনা শেমদোকপগী থোউওং অমনি। মরূপশিং, ঙসিদি অৱাংবা থাক্কী মহৈ তম্ফমশঙ অমসুং স্পোর্তকী য়ুনিভর্সিতী কয়া হাংদোক্লি। অসিদা নত্তনা, হৌজিক্তি ঐখোয়না স্পোর্ত সাইন্স অমসুং স্পোর্ত মেনেজমেন্তপু স্কুলগী থাক্তা মতৌ করম্না পুরকসিগে হায়না খনবগী মতম লাক্লবনি। মসিনা ঐখোয়গী নহাশিংদা হেন্নবা ফবা কেরিয়র শেম্নবগী খুদোংচাবা পীবতা নত্তনা ভারতনা স্পোর্ত শেন্মিৎলোন্দা শরুক য়াবগী চাংবুসু হেনগৎহনগনি।

ঐহাক্কী নহা ওইরিবা মরূপশিং,

নখোয়না খেলো ইন্দিয়া – ৱিন্তর গেম্স অসিদা নখোয়গী হৈ-শিংবা উৎপা মতমদা, নখোয়না মশানা অমগী শরুক ওইবতা নত্তনা মরোমদোম লেপচবা ঙম্বা ভারতকী ব্রান্দ এম্বেসেদর অমনি হায়বা অসিসু নীংশিংউ। নখোয়না শান্নবুংদা হৈ-শিংবা উৎলিবা অদুনা ভারতকী মগুন হাপ্লিবনি। মরম অদুনা, নখোয়না শান্নবুংদা খোঙদাবা মতমদা, ইমা লৈবাক অসিবু নখোয়গী ৱাখল্লোন অমসুং পুক্নিংদা মতম পুম্বা নীংশিংবীয়ু। মসিনা নখোয়গী মশানবু হেন্না ফগৎহনবতা নত্তনা নশাগী মওং-মতৌবুসু হেন্না ফগৎহনগনি। নখোয়না শান্নবুংদা খোঙদারকপা মৎমদা, নখোয় নাইতোম তাদে, ভারতকী মীওই করোর ১৩০না নখোয়গীদমক্তা ননাক্তা লেপ্লি হায়বা থাজবা থম্বীয়ু। ঐহাক্না মসিগী শান্নবগী থৌরম অসিবু, নুংঙাইরবা পুংফম অসিগীসু নুংঙাইবা লৌবীয়ু অমসুং নীংথিনা শান্নবীয়ু। ঐহাক্না নখোয় খুদিংবু অমুক্কা হন্না য়াইফ পাউজেল পীজরি। ঐহাক্না ইকায় খুম্ননীংঙাই ওইরবা মনোজ সিনহাজী, কিরেন রিজিজুজী, লেংবীরক্লিবা অতোপ্পা মীওইশিং অমসুং জম্মু কশ্মিরগী মীয়াম্বুসু থৌরম অসিগীদমক্তা হন্না-হন্না থাগৎচরি।

থাগৎচরি।

*****