ভারতকী প্রধানমন্ত্রী

মহাক্কী লুচিংবা ওইবগী গুন, কোবিদ-১৯ লাইচৎ মনুংদা দোমিনিকাগী মতেং পাংখিবা অমসুং ভারত অমসুং দোমিনিকাগী মরীশিং মপাঙ্গল কনখৎহন্নবা মহাক্না পাংথোকখিবা থবকশিংগীদমক প্রধান মন্ত্রী শ্রী নরেন্দ্র মোদীদা দোমিনিকাগী রাস্ত্রপতি সিলভানি বুরতোন্না খ্বাইদগী চাউবা জাতিগী মনা “দোমিনিকা এৱার্দ ওফ ওনর” পীখ্রে। মনা পীবগী থৌরম অদুদা দোমিনিকাগী প্রধান মন্ত্রী রুজবেল্ত কেরিতশু শরুক য়াখি। থৌরম অদুদা গয়ানাগী রাস্ত্রপতি দোক্তর ইরফান অলি, বারবাদোসকী প্রধান মন্ত্রী মিয়া অমোর মোতলি, গ্রেনেদাগী প্রধান মন্ত্রী দিক্কোন মিতচেল, সেন্ত লুসিয়াগী প্রধান মন্ত্রী ফিল্লিপ জে পিয়র অমসুং এন্তিগুৱা অমসুং বারবুদাগী প্রধান মন্ত্রী গাস্তোন ব্রাউনশু শুরুক য়াখি।

প্রধান মন্ত্রীনা মনা অসি ভারতকী মীয়াম অমসুং ভারত অমসুং দোমিনিকাগী মরক্ত লৈনরিবা পুৱারি অমসুং নাতকী মরীশিংদা কৎথোকখ্রে। লাক্লিবা চহিশিংদা লৈবাক অনিগী মরক্তা লৈনরিবা মরীশিং মখা তানা চাউখৎকনি হায়বগী থাজবা মহাক্না ফোঙদোকখ্রে।

গয়ানাগী জর্জতাউন্দা পাংথোকপা ২শুবা ইন্দিয়া-করিকোম মীফমগী নাকলদা, নবেম্বর ২০,২০২৪ দা মনা য়েন্থোকপগী থৌরম অসি পাংথোকখিবনি।

***