ভারতকী প্রধানমন্ত্রী

প্রধানমন্ত্রী শ্রী নরেন্দ্র মোদী ঙসি মহাক্কী কর্নাতকা খোংচৎকী অহানবা তাঙ্কক ওইনা মেঙ্গলুরুদা থুংখ্রে। মহাক্না ধর্মাস্থলদা চৎখি, মফম অদুদা মহাক্না শ্রী মঞ্জুনাথ স্বামী মন্দিরদা লাই খুরুমখি।

উজিরেদা পাংথোকপা মীয়ামগী মীফম অমদা প্রধানমন্ত্রীনা প্রধানমন্ত্রী জন ধন য়োজনা একাউন্ত হোল্দরশিংদা রুপে কার্দশিং য়েন্থোকখি। মহাক্না “প্রিজার্ব মাদর আর্থ, অমসুং ত্রান্সফর তু নেক্স জেনেরেসন” প্রোগ্রাম হৌদোক্নবা লোগো অমা মাইখুম হাংদোকখি।

মীফম অদুদা ৱা ঙাংলদুনা মহাক্না ভগবান মঞ্জুনাথ খুরুমজবা ফংজবদা নুংঙাইবা ফোংদোকখি।

মহাক্না হায়খি মদুদি হৌজিক্কী চহি চা অসি স্কিল দিব্লপমেন্তকীনি। মহাক্না হায়খি মদুদি ভারত অসি নহা ওইরিবশিংগী লৈবাক্নি, অমসুং মরম অসিনা ঐখোয়গী মীশিং য়াম্বগী খুদোংচাবা অসি শিজিন্নগবনি।

প্রধানমন্ত্রীনা হায়খি মদুদি ঐখোয়গী মুনী-ঋষিশিংনা চহি চা কয়াদগী খুন্নাই অসিদা মতেং পীরিবা লুপশিং শেমগৎপীবগা লোইননা মদুবু য়োকখৎপীরম্মি।

নুপীশিংগী সেল্ফ হেল্প গ্রুপশিংদা রুপে কার্দ খুৎশিন্নবগী তাঞ্জাগী মরমদা পল্লদুনা প্রধানমন্ত্রীনা হায়খি মদুদি দিজিতেল ত্রান্সেক্সনগী মাইকৈদা থৱাই য়াওবা অসি উবদা মহাক নুংঙাইবা পোকই।

মহাক্না মীয়ামদা ভীম এপ শিজিন্ননবা খঙহনখি অমসুং কেসলেস ত্রান্সেক্সনদা পুক্নীং থৌগৎখি। প্রধানমন্ত্রীনা হায়খি মদুদি মসি পুকচেল শেংবা অমসুং অপুনবগী চহি-চানি, মসিদা সিস্তেম অসিদা মীনম্বা তৌবা অমত্তগী মফম লৈতে।

প্রধানমন্ত্রীনা হায়খি মদুদি ভারত সরকারগী লুপা খুদিংমক অমসুং পাম্বৈ পুম্নমক ভারত মচাশিংগী য়াইফনবগীদমক কৎথোক্লবনি। মহাক্না হায়খি মদুদি ঐখোয়না মসি লেপথোক্লি মদুদি চাওখৎ-থৌরাংগী মহৈ অসি শেঞ্জা-থুমজাগী করিগুম্বা মখল অমত্তা য়াওদনা কান্নবা ফংলবশিংদা য়ৌহনগনি।

শ্রী নরেন্দ্র মোদীনা হায়খি মদুদি হৌজিক্কী মতম অসিদা ঈশিং য়োকশিন্দুনা থম্বা অসি ঐখোয়গী অচৌবা শিংনবা অমা ওইরি। মহাক্না হায়খি মদুদি ঐখোয়না মহৌষাগা নুংশি চান্ননা হিংমিন্ননবগী মাইকৈদসু হেন্না পুক্নীং চংগদবনি অমসুং ঙৈহাক্কী কান্ননবগীদমক খল্লোইদবনি। মহাক্না কর্নাতকাগী লৌমীশিংদা ঈশিং য়োকশিনবদা মতেং ওইগদবা দ্রিপ ইরিগেসনগুম্বা পাম্বৈশিং শিজিন্ননবসু খঙহনখি।