ভারতকী প্রধানমন্ত্রী

প্রধানমন্ত্রী শ্রী নরেন্দ্র মোদীনা ঙসি নুমিৎ য়ুংবা মতুংদা অফগানিস্তানগী চীফ এগজ্যুকেতিব দা. অবদুল্লাহ অবদুল্লাহগা উনখ্রে।

প্রধানমন্ত্রীনা নুমিৎ নিনিগী খোংচৎতা ভারত্তা লৈরিবা দা. অবদুল্লাহবু তরম্না ওকখি।

লুচীংবা অনিনা ভারত অমসুং অফগানিস্তানগী মরক্তা লৈনরিবা মাইথোং য়াম্বা স্ত্রাতেজিক পার্তনরশিপকী অচেৎপা অমসুং নকশিন্নবা মরি অদুবু অমুক হন্না নীংশিংনখি। মখোয়না নই দিল্লীদা পাংথোকখিবা লৈবাক অনিগী ওইবা স্ত্রাতেজিক পার্তনরশিপ কাউন্সিলগী মীফমদা হন্দক্তা লাওথোকখিবা অনৌবা দিব্লপমেন্ত পার্তনরশিপকী খোংজেল য়াংনা তেংবাং পীনববু তরাম্না ওকখি।

দা. অবদুল্লাহনা অফগানিস্তানগী ইনফ্রাস্ত্রকচর দিব্লপমেন্ত অমসুং কেপাসিতী বিল্দিংগীদমক ভারতনা লেপ্তনা পীরিবা তেংবাংগীদমক অফগানিস্তানগী মাইকৈদগী থাগৎপা ফোংদোকখি।

প্রধানমন্ত্রীনা অফগানিস্তানগী ইং তপ্পা, অপুনবা, ৱাত্ত-পাদবা, মান্নবা অমসুং দেমোক্রেতিক অফগানিস্তান অমা শেমগৎনবগীদমক মপুং ফানা তেংবাং পীবগী ৱাফম অদু অমুক হন্না ফোংদোকখি।

লুচীংবা অনিনা অফগানিস্তান্দা ঙাক-শেলগী ফিভম অমসুং মরি লৈনবা লমশিংদা খন্ন-নৈনখি অমসুং মসিগী মতাংদা মখা তানা তেংবাং পীনবদা অয়াবা পীনখি।

মীফমগী অরোইবদা লুচিংবা অনিগী মাংদা পুলিস ত্রেনীং অমসুং দিব্লপমেন্তকী তেংবাং পীননবা এমওয়ু অমা পীথোক-পীসিন তৌনখি।

প্রধানমন্ত্রীনা অফগান মাস্তর ক্রাফসমেন্না শাবা মোজেক পোর্ত্রেৎ অমবু য়াম্না থাগৎপা ফোংদোকখি মদু দা. অবদুল্লাহনা মঙোন্দা খুদোল তৌখবনি।