ভারতকী প্রধানমন্ত্রী

প্রধানমন্ত্রী শ্রী নরেন্দ্র মোদীনা ঙসি অচেৎপা লৈঙাক অমসুং মতম চানা থবক পাংথোক্নবগীদমক্তা আইসিতিদা য়ুম্ফম ওইবা মল্তি-মোদেল প্লেৎফোর্ম-প্রগতিগী থোংদা মহাক্কী ২২শুবা মীফম পাংথোকখ্রে।

প্রগতিগী হৌখিবা ২১শুবা মীফমদা পুন্না লুপা কোতি লাখ ৮.৯৪গী ওইবা প্রোজেক্ত ১৯০গী মতাংদা য়েংশিনখি। মফম ১৭তা মীচম-মীয়ামগী ৱাকৎশিং লোইশিন্নবগী মতাংদসু য়েংশিনখি।

ঙসি, ২২সুবা মীফমদা প্রধানমন্ত্রীনা বেঙ্কিংগী লমগা মরি লৈনবা ৱাকৎশিংগী ৱারোইশিন পুরকপা অমসুং লোইশিন্নবা থৌওংশিংগী খোংজেল য়েংশিনখি। প্রধানমন্ত্রীনা ফাইনান্সিয়েল সর্বিসশিংগী সেক্রেতরীদা হায়খি মদুদি মখোয়না জন ধন একাউন্ত হোল্দরশিংদা পীখিবা রু পে দেবিৎ কার্দ শিজিন্নবা হেনগৎহন্নবা থৌওংশিংদা পুক্নীং চংগদবনি। প্রধানমন্ত্রীদা একাউন্তশিং অদুগা মরি লৈনবা ইন্সুরেন্সকী ৱাফমশিং অদুগী মখাদা জন ধন একাউন্ত হোল্দরশিংনা ফংলিবা মতেংগী মতাংদা খঙহনখি।

প্রধানমন্ত্রীনা তেলঙ্গনা, কর্নাতক, নোংচুপ বঙ্গাল, মণিপুর, মিজোরম, কেরল, তমিলনাদু, ছত্তিসগর, ঝারখন্দ অমসুং দিল্লী য়াওনা অতৈ রাজ্যশিংদা পাইখৎলিবা রেলৱে, লম্বী, মৈ, কোয়লা অমসুং গ্যাস পাইপ্লাইনগী লমদা ইনফ্রাস্ত্রকচর মাপনগী খোংজেলগী মতাংদা য়েংশিনখি। ভারত ম্যানমার ফ্রেন্দসিপ ব্রিজগী মতাংদসু য়েংশিনখি। প্রোজেক্তশিং অসিগী অচংবা শেনফম অসি লুপা কোতি ৩৭,০০০দগী হেল্লি।

প্রধানমন্ত্রীনা দিব্যাঙ্গশিংগীদমক্তা নেস্নেল হেরিতেজ সিতী দিব্লপমেন্ত এন্দ ওগমেন্তেসন য়োজনা (ঐচআরআইদিএৱাই) অমসুং সুগম্যা ভারত অভিয়ানগী খোংজেল য়েংশিনখি।

জিএসতিগী মতাংদা প্রধানমন্ত্রীনা হায়খি মদুদি লৈবাক অপুম্বদা ললোনবশিংনা মসিগী মতাংদা কান্নবা ফংলি অমসুং মখোয়না অনৌবা তোক্সকী থৌরাং অসিবু লৌরি, অদুবু মখোয়গী অৱাবশিং লোইশিনবা ঙম্নবা মখোয়বু ঙাক্লৌ পীবগী মতৌ তাই। মহাক্না মসিগা মরি লৈননা চীফ সেক্রেতরীশিংদা হায়খি মদুদি অনৌবা থৌরাং অসিবু লৌশিনবদা অমসুং মসিবু শিজিন্নবদা অপীকপা ললোন ইতিক তৌবশিংনা মতেং ফংবা ঙম্ননবা দিস্ত্রিক্ত এদমিনিস্ত্রেসন শিজিন্নগদবনি। মহাক্না অমুক হন্না পনখি মদুদি ললোন-ইতিক তৌবগী খুদোংচাবা লৌননবা অপীকপা ললোন-ইতিক তৌবশিংনা জিএসতি নেৎৱর্কতা শোইদনা রেজিস্তার তৌগদবনি। মহাক্না হায়খি মদুদি মীচম-মীয়াম অমসুং ললোন-ইতিক তৌবশিংনা অসিগুম্বা অনৌবা ৱারেপ অসিদগী শোইদনা কান্নবা ফংগনি।

প্রধানমন্ত্রীনা হায়খি মদুদি দিজিতেল ত্রান্সেক্সনপু য়োকখৎনবা অমসুং শেল-য়েক শিজিন্নদবা খুন্নাই অমা শেমগৎনবগীদমক লেপ্তনা হোৎনগদবনি।