ভারতকী প্রধানমন্ত্রী

ভারত ইমানা য়াইফরে, ভারত ইমানা য়াইফরে,

খুরুমচরি, বোঞ্জুর

বনক্কম, সত স্রি অকাল

কেম ছো!

উরিবা অসি মীৎফম হোংবা ঙমদনা নীংথিজরে‍। মীয়ামগী মথুম মরাং হৌবা অসি হান্না খন্নরুদবা অমনি অমদি মীনুংসিগী পনখৈ নাইদ্রবা ঈচেল অসি পুক্নিং লুম্নিংঙাইগী মশক্নি‍। মীওক মীচান অসিসু য়াম্না পেন্নিংঙাই ওই‍। ঐনা লৈবাকসিদগী লাপ্না লৈবা মতমসিদা, ঐনা ‘ভারত ইমানা য়াইফরে’ হায়বা খোল্লাউ তাবা ফংবা, নৎত্রগা কনাগুম্বনা ‘নমস্কার’ হায়রকপদা ঐ য়ুমদা লৈবগুম ফাওহল্লি‍। অদুগা ঐখোয় ভারত মচাশিংনা চৎলু চৎলুবা মফমদা, ঐখোয়না মতম পুম্বদা মফমদুদা অপীকপা ভারত অমা শেমদুনা লাক্লি‍। ঙসি মফমসিদা য়ৌরক্নবগীদমক পুং তরামাথোই তরানিথোই লাপ্পা মফমদগী লাকপা মীওইশিংসু তিল্লিবা মীয়ামলক্তা য়াওরিআ হায়না ঐঙোন্দা হায়বিরকই‍। মসিদগী হেনবা মীনুংসি কদায়দগী লৌরুগদগে, তশেংবমক্নি!

তেক্নোলোজী চহি অসিদা, মীওই অমনা মখোয়গী য়ুমদা নুংঙাইনা লৈরগা মখোয়গী মোবাইল ফোন্দগী লাইব তেলিকাস্ত অমা তাবা হায়বসি অরুবা থবক অমা নত্তে হায়বা ঐখোয় খঙই‍। অদুম ওইনমক, মসি ওইদুনসু, অরাপ্পা মফম কয়াদগী মখোয়গী মতম কায়থোক্তুনা মফমসিদা মীওই কয়া অমা তিল্লরিবসি, ঐগীদমক্তদি ময়াম পুম্নমকপু উনজনবগী নুংঙাইরবা তাঞ্জা অমদি খুদোংচাবা অমনি‍। মফমসিদা লেঙবিরকপগীদমক ঐনা ময়াম পুম্নমক্কী মফমদা থম্মোয়নুংদগী তৌবিমল খঙবা উৎচরি‍।

মরূপশিং,

ঐ মমাঙদসু ফ্রান্সতা কয়ারক হন্না লাকখ্রে‍। অদুম ওইনমক, হন্দক ঐগী ফ্রান্সকী খোঙচৎ অসি অমুক্কা হেন্না অখন্নবা খোঙচৎ ওইরি‍। হয়েং অসি ফ্রান্সকী নেস্নেল দেনি‍। ঐনা ফ্রান্সকী মীয়ামগী মফমদা থম্মোয়নুংদগী নুংঙাইবা ফোঙদোকচরি‍। অমদি অসিগুম্লপা মরুওইখ্রবা থৌরম অসিদা ঐবু শরুক য়াহনবিবগীদমকসু ঐনা ফ্রান্সকী মীয়ামগী মফমদা থাগৎচবা ফোঙদোকচরি‍।

ঙসি ঙল্লিঙৈদা, প্রাইম মিনিস্তর ইলিজাবেথ বোর্ননা ঐবু এয়রপোর্ত্তা তরাম্না ওকপা লেঙবিরকখি‍। অদুগা হয়েং ঐনা ঐগী মরুপ প্রেসিদেন্ত মেক্রোনগা নেস্নেল দে পেরেদতা শরুক য়াগনি‍। অসিগুম্বা মরী অসি লৈবাক অনিগী লুচিংবশিংগী মরক্তা খক্তা নত্তনা, ভারত অমসুং ফ্রান্সকী মরক্তা লৈনরিবা তৎন-থানবা য়াদ্রবা মরুপ মপাং ওইবগী মরীদুগী মমিনি তারিবসি‍। ফ্রান্সকী নেস্নেল এন্থেম্না হায়রি ‘মার্চওন, মার্চওন…’ হায়বদি ‘ঐখোয় মাঙদা চঙশিনসি, ঐখোয় মাঙদা চঙশিনসি’ হায়বনি‍। মতৌ অসুম্না ঐখোয়গী অরিবা ভেদ পুরানশিংদা, ঐখোয়বু মতম পুম্বদা পুক্নিং থৌগৎলিবা লাইৱাদি ‘চরাইবেতী, চরাইবেতী’ হায়বদি ‘চৎপা লেপকনু, চৎপা লেপকনু; ঐখোয় মাঙদা চঙশিনসি, ঐখোয় মাঙদা চঙশিনসি’ হায়বনি‍। অদুগা হায়রিবা ৱাখল্লোন অসিমক ঐখোয় হয়েং নেস্নেল দে পেরেদতা উবা ফংলগনি‍। ভারতপু কংফাল, সমুদ্র, অমদি নোংথোক্তা ঙাক্লিবা ইন্দিয়ন আর্ম্দ ফোর্সকী মশা অহুম্মক্কী লান্মীশিংনা পেরেদ অসিদা শরুক য়াগদৌরি‍। অমদি হায়রিবা ঐখোয়গী অপুনবগী শক্তম অসি তশেংনা অখন্নবা শক্তম্নি‍। মসিদা অপুনবগী শক্তম উরি; অকোয়বা শিনবা থুংনা মচু কয়া লৈরি অমদি পুক্নিং মথুম মরাং হৌনরি‍। মসি তশেংনা অঙকপগী মশক্নি‍। ভারত অমদি ফ্রান্সকী মরক্তা লৈনরিবা স্ত্রেতেজিক ওইবা চহি ২৫গী খোঙবুসিবু হরাও তয়াম্না পাঙথোকপগী মসিদগী হেন্না ফবা মওং কদাইদা লৈরিবগে?

মরূপশিং,

ঙসি, মালেম অসিনা অনৌবা মালেমগী ওর্দর অমগী মায়কৈদা চঙশিল্লি‍। ভারতকী মপঙ্গল অমদি থৌদাং থুনা হোংলক্লি‍। হৌজিক ভারতনা জি২০গী প্রেসিদেন্ত ওইরি‍। লৈবাক অমগী প্রেসিদেন্সীদা লৈবাক্তুগী কাচিন কোয়া শিনবা থুংনা মীফম ২০০ হেন্না পাঙথোকপা উরিবসি হন্দক্না অহানবনি‍। জি২০ গ্রুপ পুম্বনা ভারতকী মতিংবু য়েংলি অমদি মসিনা শুমহৎহল্লি‍। ক্লাইমেৎ চেঞ্জ, মালেমগী সপ্লাই চেন, তেরোরিজম, নৎত্রগা এক্সত্রিমিজমগী মতাঙদা ওইরবসু শিংনবা খুদিং থেংনবগী ভারতকী এক্সপিরিএন্স অমদি হোৎনরিবশিংনা মালেমদা কান্নবা পীরি‍।

ভারতনা হায়রি, ‘একম সত বিপ্রা বহুধ বদন্তী’, মসিনা হায়রিবদি ‘অচুম্বদি অমখক্তনি, অদুবু মদু ফোঙদোকপগী মওংদি তোঙান তোঙাল্লি’ হায়বসিনি‍। ভারতনা হায়রি, ‘অত্মবত সর্ব ভুতেসু’ মসিনা হায়রিবদি ‘ঐখোয়না মীনুংসি অমদি অমনা অমবু তরাম্না তৌবগী মওং মতৌ উত্তুনা ঐখোয় ইশাবুসু অতোপ্পদা উত্থোকসি’ হায়বনি‍। ভারতনা হায়রি, ‘সমগচ্ছধ্বম সম্বদধ্বম সম বো মানন্সি জনতম’, মসিনা হায়রিবনা ‘ঐখোয় পুন্না চৎমিন্নসি, ঐখোয় পুন্না ঙাঙমিন্নসি, ঐখোয়গী পুক্নিং অমত্তা ওইহনসি’ হায়বনি‍। ভারতনা হায়রি, ‘বসুদৈব কুতুম্বকম’, মসিনা হায়রিবনা ‘মালেম পুম্বসি ইমুং অমনি’ হায়বনি‍। হায়রিবা ইহুল অসিগা লোয়ননা ঐখোয়না হেন্না ফবা খুন্নাই, হেন্না ফবা মালেম অমা শেমগৎপা ঙমগনি‍। হায়রিবা ৱাখল্লোন অসিদনি ভারত অমসুং ফ্রান্সনা ২১শুবা চহিচাগী শিংনবা কয়া থেংনরিবসু‍।

মরম অদুনা, ফ্রান্স অমদি ভারতকী মরক্তা লৈনরিবা স্ত্রেতেজিক পার্ত্নরসিপকী মরুওইবা অসিগুম্লবা লুরবা তানফমসিদা হেনগৎলক্লি‍। অদুগা হায়রিবা ইন্দিয়া-ফ্রান্স পার্ত্নরসিপ অসি লেপ্পা লৈতনা কনানা মপাঙ্গল হাপ্লিবগে… কনানা মসিবু মপাঙ্গল হেন্না কলহনবগে… কনানা মসিবু তৌরিবগে…, কনানা তৌরিবগে হায়বা অদোম্না খঙবরা? লৈবাক অনিগী মরক্তা লৈনরিবা মরীদা অনৌবা মায়ওন অমা কনানা পীরিবগে? অদোমগী পাউখুম অদু চুমদে‍। মসি মোদীনা তৌবা নত্তে, ময়াম পুম্নমক্না তৌবনি‍। ঐখোয়গী মীগা মীগগী মরক্তা লৈনরিবা মরী অসিনা খোঙবু ওইরিবা অসিদা লৈবাক অনিগী মীয়ামগী মরক্তা অনিমক্না থাজনবগী ফীভম অসিগী খ্বায়দগী মপাঙ্গল কনবা য়ুম্ফম থোল্লিবনি‍।

মফমসিদা নমস্তে ফ্রান্স ফেস্তিবেল পাঙথোক্লি, অমদি ভারত্তা মীয়াম্না বোঞ্জুর ইন্দিয়া ফেস্তিবেল পাঙথোক্লি‍। ঐখোয়গী লৈবাক অনিমক্কী পারী পুরীগী লন নৎত্রগা পুৱারী, কলা নৎত্রগা এস্থেতিক্স, ক্রাফ্ত নৎত্রগা ক্রিএতিবিতী, মখেল লুক্কোয় নৎত্রগা নাৎ, ফেসন নৎত্রগা ফিল্মশিংনা ঐখোয়বু অমত্তা ওইনা পুনশিল্লি‍। মখোয়না ঐখোয়বু পুন্সিল্লি‍। অদোম ভারত্তা লাক্তুনা ফ্রেঞ্চ ফুতবোল শান্নরোয়শিং মীয়াম্না কয়া য়াম্না পাম্নবগে হায়বা য়েংবিরুলাউ‍। ফ্রান্সতা কৈলিয়ন এম্বাপ্পেগী লৈরিবা ফেন মশিংনা ভারতকী নহাশিংগী মরক্তা মহাকপু পাম্নরিবসিদগী হেল্লোই‍।

মরূপশিং,

ঐ ইশানা ফ্রান্সকা লৈরিবা অমত্তা ওইবগী ইথিল অসি মতম কুইরবনি, অমদি ঐনা মসিবু কাউবা ঙম্লোই‍। চাউরাক্না চহি ৪০ রোমগী মমাঙদা, এলাইন্স ফ্রেঙ্কেজ কৌবা ফ্রেঞ্চ কল্চরেল সেন্তর অমা গুজরাতকী অহমদবাদতা লিংখৎখি‍। অদুগা ঙসি ময়ামগা ৱারী ৱাতায় শানরিবা ঐ ইশামক হায়রিবা ভারত্তা লৈবা কল্চরেল সেন্তর অদুগী অহানবা মেম্বরনি‍। নুংঙাইবা ৱাফম অমনা, ফ্রেঞ্চ লৈঙাক্না মখোয়গী অরিবা রেকোর্দতগী ঐগী আইদেন্তিফিকেসন কার্দ অমা লৌথোক্লগা, মদুগী জেরোক্স কোপী অমা শেম্লগা, চহি খরগী মমাঙদা ঐঙোন্দা পীরকখি‍। হায়রিবা খুদোল অদু ঐগী ইফমদা ঙসিসু মমল নাইদ্রবা খুদোল অমা ওইরি‍।

মরূপশিং,

ঐগীদমক্তদি ভারত অমসুং ফ্রান্সকী মরক্তা লৈনরিবা পুৱারীগী ওইবা মরী অসি নৈনবদা মতম ফনা য়াম্না চঙগনি… অদোমগীদি কমদৌবা? ঐনা ফ্রান্সতা ২০১৫দা লাকখিবা মতমদা, ঐনা ন্যুবে-চপেলদা চৎখি‍। মফমদুদা ঐনা অহানবা মালেমগী লাঞ্জাওদা থৱায় কৎখ্রবা ভারতকী লান্মী লিশিং কয়াগী মফমদা শ্রদ্ধাঞ্জলি কৎচখি‍। ভারত লান্মীশিংদুনা মখোয়গী থৌদাং মতোল লোমদুনা চহি ১০০গী মমাঙদা ফ্রান্সকী ইকায়খুম্নববু ঙাক্তুনা ফ্রান্সগী লৈমায়দা মপুন্সি কত্থোকখি‍। মদু তশেংনমক পুক্নিং নুংশিনিংঙাইগী মীকুপ অমা ওইখি মরুপশিং‍।

মফমসিদা শোক্নখিবা লান অদুদা শরুক য়াখিবা রেজিমেন্তশিংগী মরক্তা অমা ওইরিবা পঞ্জাব রেজিমেন্ত, হয়েং মফমসিদা পাঙথোক্কদৌরিবা নেস্নেল দে পেরেদতা শরুক য়াগদৌরি‍। মরূপশিং, চহি ১০০ শুরবা পুক্নিংগী ওইবা মরী অমদি অতৈগী য়াইফনবগীদমক মপুন্সি কত্থোকপগী চৎনবী অসি য়াম্না পুক্নিং থৌগৎনিংঙাইগী মশক্নি‍। ভারত্তা লৈবা মীওই কনানা মসিদা চাউথোকচবা পোক্লোইদগে? ভারতকী লান্মীশিংনা তৌখিবা মখোয়গী মথৌদাং অমদি মখোয়না মতমদুদা কত্থোকখিবা হৌজিক চাউথোকচবা অমদি ইকায়খুম্নবগা লোয়ননা লমদম অ্রসিদা নীংশিংনরি‍। থাগৎচরি ফ্রান্স!

ঐনা থাজৈ মদুদি অদোম্না ভারত অমদি ফ্রান্সকী মরক্তা লৈনরিবা মরীবু মপাঙ্গল কলহন্নবা লৌরিবা থৌদাং অসিনা… ঐনা হায়রিবসিনি, ঐনা ময়ামগী মফমদা হায়রি… ঙসি অদোম্না থৌদাং য়াদুনা তৌরিবা পুম্নমক অসি পুৱারীদা সনাগী ময়েক্না হক্তুনা লৈহৌরগনি‍।

মরূপশিং,

ফ্রান্সবু, লিবর্তী, ইক্বেলিতী, অমদি ফ্রেতর্নিতী হায়রিবা মাগী খোল্লাওগা লোয়ননা, মহাত্মা গান্ধীনা হায়রিবা ৱাহৈ অহুম অসিবু থৱায় হাপ্লিবা লৈবাক অমনি হায়না শিংথারম্মি‍। ৱাফমসি মহাত্মা গান্ধীনা হায়বিরম্বনি‍। লৈবাক অয়াম্বনা ভারতপু ইচম চম্না লোইলমগী মীৎয়েঙদগী য়েংনরম্বা মতমদুদা, নোবেল লোরেত রোমেন রোলেন্দনা “ভারত অসি ঐখোয়গী মীহৌরোনগী পোক্নফম্নি” হায়রমখি‍। ভারতকী চহি লিশিং কয়া লিরবা পুৱারী, মাগী এক্সপিরিএন্স, অমদি মালেমগী য়াইফনবগীদমক মহাক্না হোৎনরিবশিংদা পাক চাউরবা মঙম লৈ‍। ভারত অসি দিমোক্রেসীগী মমানি অমদি খেন্নবা কয়াগী খুদম চাংদম্নি‍। মসিনা ঐখোয়গী পাঙ্গলনি, অচৌবা শাফু অমনি‍। ঐ ময়ামদা খুদম অমা পীজগে‍।

মরূপশিং,

ঐখোয়গী লৈবাক্তা হায়নবা অমা লৈ, ঈশিংগী মহাও মাইল খরা খর চৎলগা হোংই, অদুগা লোলনা মাইল মরি খুদিংগী হোংই‍। মসিনা হায়বদি ঈশিংগী মহাও অমদি লোলসু ভারত্তদি মচি মচিদা খেন্নৈ হায়বনি‍। ভারত অসি লোল ১০০ হেনবা অমদি লোলথৈ ১,০০০ হেনবগী তুংনফম্নি‍। নুমিৎ খুদিংগী লোল ১০০ হেনবদা তোঙান তোঙানবা পাউচে ৩২,০০০ ফোঙই‍। হায়রিবা লোল ১০০ হেনবসিদা পাউগী চেনেল অমদি তেলিভিজন পাউ ৯০০ হেন্না শন্দোক্লি‍। মসিগী মথক্তা, চাউরাক্না রেদিও চেনেল ৪০০ রোম্না লোল ১০০ হেনবদা শন্দোক্লি‍।

ঙসিমকসু, ভারত্তা ময়েক অমদি ইবগী মওং মখল মখা কয়া শীজিন্নরি‍। ভারতনা হায়রিবা চৎনবী অসিবু হিংহন্দুনা থম্লিবসি চাউথোকচনিংঙাইগী মশক্নি‍। ভারতকী স্কুলশিংদা অমদি তোঙান তোঙানবা মফমশিংদা, লোল ১০০গী ময়াদা তম্বিরি‍। অদুগা মী কয়া অমদি তামিল অসি মালেমগী খ্বায়দগী লিবা লোলনি হায়বা খঙলমদবসু য়াই‍। মালেমগী খ্বায়দগী লিরবা লোল তামিল অসি ভারতকী লোলনি, ভারত মচাশিংগী লোলনি হায়বসিদগী হেন্না চাউথোকচনিংঙাই করিবু লৈরিবগে?

অদুগা মরূপশিং,

হৌজিক্তি মালেম অসিনসু ভারতকী খেন্নবা লোলশিংবু এঞ্জোয় তৌরি‍। নুমিৎ খরনিগী মমাঙদা, তেন্নিস লিজেন্দ রোজর ফেদররবু ৱিম্বলদন্না “থলাইবা” কৌখিবা অদোম উবিরম্লগনি‍। হায়রিবা খেন্নবা মশক অসি ঐখোয়গী দিমোক্রেসীগী অচৌবা পাঙ্গলনি‍। ঙসি, হায়রিবা পাঙ্গল অসিনা থৌদুনা, ভারত মচা খুদিংমক্না মাগী মাগী মঙলান মঙফাওনহল্লি অমদি লৈবাকসিবু অমদি মালেম অসিবু মাঙদা পুদুনা চৎলি‍। চহি তরাগী মনুংদা ১০শুবা মফমদা লৈরম্বদগী ভারতনা মালেমগী মঙাশুবা খ্বায়দগী চাউবা শেন্মিৎলোন ওইরকপদা চাউথোকচরোইদবা কনাবু লৈরমগদগে? হায়রিবা চাউথোকচবগী ইহুল অসি ভারত মচাখক্তনা ফাওবা নত্তে; ঙসি মালেম পুম্বনা ভারতনা $৫গী শেন্মিৎলোন ওইরকপদা মতম কুইনা চঙলোয় হায়না থাজনবা হৌরক্লি‍।

অদোম্না কুইদ্রিবা য়ু.এন. রিপোর্ত অমা উবিরম্লগনি‍। রিপোর্ত অদুদা, য়ু.এন.না ভারতনা মীওই মিলিয়ন ৪১৫, হায়বদি করোর ৪২ রোম চহি ১০-১৫খক্কী মনুংদা লায়রবগী পনখৈ মখাদগী পুখৎলক্লে হায়রি‍। অদোম খনবিয়ু, মীওই মিলিয়ন ৪১৫ হায়বসি য়ুরোপ অপুনবগী মীশিংদগী হেল্লিবনি‍। মসি য়ুনাইতেদ স্তেতস পুম্বগী মীশিংদগীসু হে্ল্লিবনি‍।

আই.এম.এফ.গী স্তদী অমনসু ভারত্তা পৎ তৎপমখৈ লায়রবগী ফীভম মুত্থৎপগী থাক্তা য়ৌরক্লে হায়রি‍। ভারতন অসিগুম্বা মশক নাইবা পন্দোল লোম্বা ঙম্লকপদা মসিনা ঐখোয়খক্তা নত্তনা মীওইবা খুন্নাই পুম্বদা কান্নবা পীরি‍। ভারতকী খোঙজেলনা মালেমগী চাওখৎপগী পেরামিতরদা অহোংবা পুরক্তুনা, মপুং ওইবা ফীভম ফগৎহল্লি‍। মসিনা অতৈ লায়রবা লৈবাকশিংদসু মখোয়গী ফীভম ফগৎলকখিনি অমদি লায়রবা কোকহনবা ঙম্লকখিগনি হায়বগী থাজবা পীরি‍।

মরূপশিং,

ফ্রান্সকী লমদম অসিনা মীয়ামগী শুবা নোম্বা কনবা অমদি হুমাংমলনা লৈবাক অমা হেক্তদা অওনবা পুরকপা ঙম্মি হায়বা উৎলি‍। ঙসি, ভারতকী লমদমসু মশক থোকপা অওনবগী খুদম ওইরক্লি‍। হায়রিবা অওনবা পুরকপগী চুপ্লি অসি ভারতকী মীয়ামগী খুত্তা লৈ, ভারতকী ইচে ইচলশিং অমদি ইচানুপীশিংদা, ভারতকী নহাশিংগী খুত্তা লৈ‍। ঙসি, মালেম পুম্বনা ভারতকী মায়কৈদা অনৌবা থাজবা অমদি মঙলান কয়াগা লোয়ননা য়েংলি‍। হায়রিবা থাজবা অসি চৎনবা য়ানা মহৈ য়াল্লক্লি অমদি মসিগী মরুমদা লৈরিবা মরুওইবা পাঙ্গল অমদি ভারতকী হ্যুমেন রিসোর্সনি‍। হায়রিবা হ্যুমেন রিসোর্স অসি অচেৎপা খোঙফম, অমদি থৌনাগী ইহুলনা থল্লি‍। মসিনা ভারতকী দিমোক্রেতিক ভেল্যুগা লোয়ননা অমদি মীওইবা খুন্নাইগী য়াইফনবগীদমক মাঙদা খোঙফম চেৎনা লেপ্তুনা চঙশিল্লি‍।

মরূপশিং,

ঙসিগী ভারতনা মাগী হৌজিক থেংনরিবা শিংনবশিং অমদি মতম শাংলবা ইসুশিংগী মতম চুপ্পগী ওইবা পাম্বৈ থিরি‍। খুদোংচাবা অমত্তা মাঙহল্লোই অমদি মীকুপ অমত্তা মাঙহল্লোয় হায়না ভারতনা খোঙফম চেৎনা লেপ্লি‍। ঐখোয়গী লয়বাক্কী তুংলমচৎপু মশেক মঙাল নাইহন্নবা অমদি তুংগী মীরোলগী লম্বী ঙালহন্নবা ঐখোয়না মপুং ফানা কত্থোকপগা লোয়ননা লেপ্লি‍। অদুগা ঐগী মরূপ সিতিজনশিং, ঐগী ফিরেপ ময়ামগী মফমদা থমজগে‍। ঐগী হকচাঙদা য়াওরিবা পোৎশক খুদিংমক, ঐগী মতমগী মীকুপ খুদিংমক, ময়ামগীদমক্তনি, লৈবাকসিগী মীয়ামগীদমক্তনি‍।

মরূপশিং,

ঙসি ঐখোয়গী পুন্সিগী মীকুপ খুদিংদা ঐখোয়না তেক্নোলোজীগী শাহুম ফংলি‍। মালেম অসি তেক্নোলোজীনা থৌদুনা চৎলি‍। ঙসি ভারত্তা স্কুল ২৫,০০০ হেনবদা অঙাং লাখ ৮০ হেনবনা অতল তিঙ্করিং লেবশিংদা ইনোভেসনকী এ.বি.সি.দি. তম্লি‍। ২১শুবা চহিচাগী মথৌ তাবশিং য়েংলগা, ঐখোয়না অনৌবা নেস্নেল এজুকেসন পোলিসী অমা চৎনহল্লে‍। হৌজিক্কী ভারত অসি নুপীশিংনা লমজিংবা চাওখৎপগী য়ুম্ফম অমদা মাঙদা চঙশিল্লি‍। ৱাফম অসি ত্রাইবেল নুপী অমখক্তনা ভারতকী প্রেসিদেন্ত ওইনা লুচিংলি হায়বখক্কী নত্তে, ঐখোয়গী লুচিংবগী মওং অসি মসিদগীসু হেল্লি‍। ঙসি ভারত্তা নুপীমচাশিংনা হীরম খুদিংদা লুচিংবগী থৌদাং য়ারি‍। হাইয়র এজুকেসনগীদমক নুপীমচাশিং মিং চনবগী চাং লেপ্পা লৈতনা হেনগৎলক্লি, অমদি নেস্নেল দে পেরেদ অসিদা শরুক য়াবা লাক্লিবা কন্তিঞ্জেন্ত অসিদা নুপী ওফিসর অমদি নুপী পাইলোৎ কয়া য়াওবা উবদা ঐ অপেনবা পোকই‍।

মরূপশিং,

২১শুবা চহিচাগী মালেম অসিনা তেক্নোলোজী অমদি তেলেন্ততা য়ুম্ফম ওইদুনা মাঙদা চঙশিল্লি‍। ভারত অমসুং ফ্রান্সকী খোঙবু ওইবগী মরীনা মসিগী অকনবা য়ুম্ফম অমা শেম্লি‍। ঐখোয়গী স্পেস প্রোগ্রাম্নি মসিগী খুদম্নি‍। থুম্বা সাউন্দিং রোকেৎ স্পেসন লিংখৎনবগী ৱাফম খন্নরকপা মতমদা, মতেঙ পাংনবগীদমক মাঙদা চোংথোরকখিবসি ফ্রান্সনি‍। মদুদগী হৌনা, ঐখোয়গী লৈবাক অনিমক্না স্পেস সেক্তরদা শাংলবা খোঙচৎ অমদা লাকখ্রে‍। ঙসি, ঐখোয়না অমনা অমগী সেতলাইতশিং থাগৎলি, অমদি ঙসি ঐনা ময়ামগী মফমদা ৱা ঙাঙনা ঙাঙনা চন্দ্রয়ান-৩ থাগৎনবগী হঙ্গৎনা মশিং থিথরকপগী ইৱায় ইনিল ভারত্তা তারি হায়বা খঙবদা অদোম হরাওগনি‍। পুং খরগী মনুংদা, ভারতকী স্রিহরিকোতাদগী পুৱারী ওইবা মওংদা থাগৎলগনি‍।

মরূপশিং,

স্পেস সেক্তরগুম্না, ভারত অমদি ফ্রান্সকী খোঙবু ওইবগী মরীনা মালেমবু অনৌবা মায়কৈ অমদা পুবদা থৌদাং য়াগদবা তোঙান তোঙানবা সেক্তর কয়াসু লৈরি‍। ইন্তরনেস্নেল সোলার এলাইএন্সনা মালেমগী মফমদা পীবা য়াবা কয়া অমা লৈরি‍। হৌজিক ঐখোয়না ক্লীন ইনর্জী, ক্রিতিকেল অমদি স্ত্রেতেজিকেল তেক্নোলোজী, ক্লীন ত্রান্সপোর্তেসন, ইলেক্ত্রোনিক্স অমদি কম্ম্যুনিকেসন্স, সর্কুলর ইকনমী, হেল্থ অমদি ন্যুত্রিসন, অমদি অতৈ হীরম কয়া য়াওনা অসিগুম্বা সেক্তর কয়াদা লৈনরিবা খোঙবু ওইবগী মরীবু হেন্না কনখৎহন্নবা পুন্না থবক পায়খৎমিন্নরি‍। ভারত অমদি ফ্রান্সনা আর্কিওলোজিকেল মিসনশিংদা মতম শাংনা পুন্না থবক তৌমিন্নদুনা লাক্লি, অমদি মসিনা য়ৌশিল্লিবসি চান্দিগরদগী হৌরগা লদাখ ফাওবা য়ৌরে হায়বসি মীওই খরখক্তমক খঙলমগনি‍।

মরূপশিং,

ভারত-ফ্রান্সকী খোঙবু ওইবগী মরীবু মপাঙ্গল কনখৎহল্লিবা অতোপ্পা সেক্তর অমদি দিজিতেল ইনফ্রাস্ত্রকচরনি‍। সেক্তর অসিদা ইন্দস্ত্রী ৪.০গী মশক থোকপা য়ুম্ফমসু ওইরিবনি‍। ঙসি, মালেমগী রিএল-তাইম দিজিতেল ত্রাঞ্জেক্সনগী ৪৬%দি ভারত্তা তৌরি হায়বা খঙবদা অদোম চাউথোকচবা পোক্কনি‍। অদুগা অদোম্না ভারত্তা মথঙ লাকপা মতমদা, অদোমগী ফুরিৎখাউ হাঙনা লাকপিয়ু, খুত্তা শেল হাপ্পিরক্কনু, অমদি ইচম চম্না য়ু.পি.আই. (য়ুনিফাইদ পেমেন্ত ইন্তরফেস) এপ অমা অদোমগী মোবাইল ফোন্দা দাউনলোদ তৌবিয়ু হায়জরি‍। অদোম্না লৈবাক শিনবা থুংনা খুত্তা শেল পায়দনা চৎপা য়াগনি অমদি অদোমগী এক্সপেন্স মেনেজ তৌবা য়াগনি‍। ঙসি, ভারত্তা বেঙ্কিং সর্ভিস পুং ২৪ চুপ্না, মতম অমদি মফম অমা হেক্তদা ফংলি‍। দাইরেক্ত বেনিফিৎ ত্রান্সফর লৈঙাক্লোনগী শরুক অমা ওইরে‍। ভারতকী য়ু.পি.আই. নৎত্রগা অতৈ দিজিতেল প্লেৎফোর্ম অমা হেক্তা ওইরবসু, মখোয়না লৈবাকসিদা মশক থোকপা খুন্নাইগী অওনবা অমা পুরক্লে‍। অমদি ভারত অমসুং ফ্রান্সনা মায়কৈ অসিদসু পুন্না থবক পায়খৎমিন্নরিবসিদা ঐঙোন্দা অপেনবা ফাওই‍। ভারতকী য়ু.পি.আই. ফ্রান্সতা শীজিন্ননবগী মতাঙদা য়ানবা অমা লৈরে‍। হায়রিবা য়ানবা অসি লোইশিল্লম্লগা ঐ ঐগী লৈবাক্তা অমুক হল্লগনি, অমদি হায়রিবা থবক অসিবু মাঙদা পুশিনবদি অদোমগী খুত্তা লৈরে‍।

মরূপশিং,

লাক্কদৌরিবা নুমিশিংদা, হায়রিবা অসি ইফেল তৱারদগী হৌরক্কনি, মসিনা তাক্লিবদি, হৌজিক্তি ভারতকী লম কোয়বশিংনা ইফেল তৱারদা মোবাইল এপ অমগী খুত্থাঙদা ভারতকী শেলদা পেমেন্ত তৌবা য়ারগনি‍। হোয় মোদী লৈরবদি ওইথোকপা লৈ, অদুবু ঐ ময়ামগী খোল্লাউদু শেমদোকপদি ঙম্লরোই‍।

মরূপশিং,

হৌজিক্তগী পুং খরগী মনুংদা, নৎত্রগা চয়োল নৎত্রগা থা খরা চঙবা য়াই, মফমসিগী সের্গী প্রিফেকচরদা ভারতকী অথোইবা সাধু থিরুবল্লুবর জীগী মীতম অমা খিল্লগনি‍। অদুগা সাধু থিরুবল্লুবর জীনা হায়বিরম্মি, “ঈন্দ্র পোঝুধিন পেরিধুবক্কুম অন্মকনাইচ চান্দ্রোন এনাক্কেত্তা থাই”‍।

তামিল লোল ঙাঙবা মরূপশিংদি ৱাহৈশিং অসি খঙলবসু, অতৈগী ওইনা ঐ শন্দোক্না তাকচগে‍। মসিগী ৱাহন্থোক য়াম্না চাউই, অমদি লম্বোইবা থিরুবল্লুবর জীনা হায়রিবা লৌশিং অসি চহিচা কয়াগী মমাঙদা ঐখোয়না তাকপিরম্বনি‍। মসিগী ৱাহন্থোক্তি মমা অমনা মাগী মচাবু লাইরিক লাইশু হৈবা অমা ওইনা শিংথানবা তাবা মতমদা, অঙাং অদু পোকপা নুমিত্তা নুংঙাইখিবদুদগী হেন্না নুংঙাইবা ফাওই হায়বনি‍। হায়বদি, অঙাহ অমা পোক্লকপদা নুংঙাইবা কয়া ফাওখ্রবসু, অঙাং অদুনা মায় পাক্লকপা মতমদা মদুদগী হেন্না নুংঙাইবা ফাওই হায়বনি‍। মসি মমা ওইবীশিংগীদমক হায়বিরম্বনি, অমদি মরম অদুনা, অদোম্না মপান লৈবাক্তা শকখঙবিরকপা মতমদা, মালেম অসিনা অদোমবু থাগৎনরকপা মতমদা, ইমা ভারতনা হায়রিবা নুংঙাইবদুমক ফাওই‍। মপানগী লৈবাক্তসু ইমা ভারতপু থম্মোয়নুংদা থাগোন্নরিবা মীওই অমা ওইনা, ঐনা ইমা ভারতকী মচা খুদিংমকপু ভারতকী ব্রান্দ এম্বেসেদর ওইনা লৌই‍।

অদোম্না ভারতকী ব্রান্দ এম্বেসেদর ওইরিবনি‍। ভারত মচাশিং মফম অমা হেক্তদা থেংনগনি হায়বা ঐ খঙই, অদুবু মখোয়গী থম্মোয়গী মিহুলদি ভারতকীদমক্তসু হুল্লিবনি‍। ঐনা স্পেসকী মরমদা ৱাফম কয়া ফোঙদোকবদা, অদোম্না হরাও মথোয় কানা লাউরি, “চন্দ্রয়ান, চন্দ্রয়ান, চন্দ্রয়ান!” মসিগী ৱাহন্থোক্তি, অদোম্না মফমিদা লৈরবসু, অদোমগী থম্মোয়দি চন্দ্রয়ান্দা (ভারতকী থাগী মিসন্দা) লুপ্তুনা লৈরি‍। মরম অসিননি ফ্রান্স য়াওনা মালেম শিনবা থুংনা শন্দোক্তুনা লৈরিবা ভারতকী দাইস্পোরাশিংনা রিমিত্তেন্সতা অনৌবা রেকোর্দ অমা থম্বা ঙম্লিবা‍। ঐ ময়ামদা হায়য়ুরা? ঐ ময়ামগী মফমদা হায়য়ুরা? অদোম খঙদে, চুম্মি! পাখৎকনু, ঐনা অদোমগী মায় পাকপগী ঈশৈ শক্তুনা শৈথারিবনি‍।

মপান লৈবাকশিংদা লৈরিবা ভারতকী দাইস্পোরাশিংনা চহিগী ওইনা থাজিল্লকপা শেনফম দোলর বিলিয়ন ১০০ লানবা অহানবা লৈবাক ভারতনা ওইরবনি, অমদি হায়রিবা অদোমগী থৌদাং অসি চাং নাইনা হেনগৎলক্লিবসিসু তশেংনমক চাউথোকচনিংঙাইনি‍। অদুবু ঐনা ময়ামদা হায়জনিংবা ৱাফম অমগা লৈরি‍। ঐ ময়ামদা ৱাফম অমা হায়জবা য়াগদ্রা? হোয় হায়বদা করিসু মাঙজবা লৈতে‍। মোদীনা অমুক হন্না হায়ননবা লাক্লোই‍। ঐনা ময়ামদা হায়জনিংবদি অদোম্না ইচঙ থৌনা ভারত্তা শেল থাদনবা মাঙজিল থানা থোরকপা মথৌ তাই‍। ভারতনা লাক্কদৌরিবা চহি ২৫সিদা চাওখৎপা লৈবাক অমা ওইননবা পান্দমদা থবক পায়খৎলি‍। মসিদা অদোমগী থৌদাং য়াম্না মরুওই‍। অদোম্না সেক্তর অমা হেক্তদা থবক তৌরবসু, মদুবু ভারতকী মরী শম্নহন্নবা লম্বী থিগদবনি‍। ঙসি, মালেমগী এজেন্সী খুদিংমক্না ভারতনা মাঙদা চঙশিল্লি, অমদি ভারতনা তরং তরংবা মফমদা লেপ্লি হায়নরিবনি‍।

ভারত্তা হান্না খন্নরুদবা চাংদা ইনভেস্তমেন্তকী খুদোংচাবশিং উবা ফংলি‍। ঐনা ময়ামগী মফমদা ভারত্তা ইনভেস্ত তৌনবা হায়জরি, অমদি ঐনা মসি হায়বা মতমদা, মোদীনা মসিগী মতাঙদা হায়রমদে হায়না তুংদা পাউহোম্মক্কনু‍। খুদোংচাবা অদু মফমসিদা লৈরে, অমদি ঐনা রেদ ফোর্তকী মথক্তগী হায়খিবগুম, হৌজিক মতম চারে, মসি চপ চারবা মতম্নি, অমদি ঙন্না লাকখিবশিংনা কান্নবা হেন্না ফংগনি‍। থেঙনা লাকপশিংগীদি ঙাইবা তাই‍। হৌজিক খুদোংচাবা অসি লৌহৌবা মতম্নি, কয়াম থুনা তাঞ্জা অসি লৌবা হায়বদুদি অদোমগী মফমদা লৈরে‍।

মরূপশিং,

মরম অদুনা, লাউ অমদি ভারত্তা ইনভেস্ত তৌরু লাউ‍। ভারত লৈঙাক্না খুদোংচাবা পীননবা অমদি মপান লৈবাকশিংদা থবক তৌরিবা ভারত মচাশিংদা ঙাকশেল পীননবা মপুং ফানা লেপ্লি‍। লানফম ওইরবসু নৎত্রগা মহৌশাগী অমাঙ অতাগী মফম ওইরবসু, ভারতনা মাগী মীয়াম্না অৱাবা তারক্লবা মতমদা হান্না চঙশিন্দুনা থবক পায়খৎলি‍। য়ূক্রেন নৎত্রগা সুদান, য়েমেন নৎত্রগা অফঘানিস্তান, ইরাক নৎত্রগা নেপালদা ওইরবসু, ঐখোয়না ভারত মচাশিং শাফনবগীদমক তৌবা য়াবা খুদিং তৌদুনা লাক্লি‍। মপান লৈবাকশিংদা লৈরিবা ভারত মচা পুম্নমকপু ভারত্তা লৈরিবা লৈবাক মীয়ামগা চপ মান্নবা প্রাইওরিতীদা ঐখোয়না লৌরি‍। চহি খরগী মমাঙদা নিতি আয়োগ শেমখিবা মতমদা, ঐখোয়না ভারতকী দাইস্পোরাশিংগী মতিং অমদি থৌদাংদা মতিক চানা মরুওইবা মীৎয়েঙ থমখি‍। রিয়ুনিয়ন ঈথত্তা ও.সি.আই. কার্দকী মতাঙদা লৈরম্বা খুদোংচাদবশিং হৌজিক্তি ৱাখৈনখ্রে হায়বসি ময়ামগী মফমদা থমবদা ঐনা অপেনবা ফাওজরি‍। মফমদুদা হৌজিক্তি ও.সি.আই. পীরে‍। ঐখোয়না মার্তিনিক অমদি গ্বাদেলুপতসু পাম্বৈ অমা পুথোক্নবা হোৎনরি‍।

মরূপশিং,

ফ্রান্স য়াওনা একাদমিক অমদি রীছর্চকী লমদা মরী থম্নরিবা খোঙবু কয়া অমা লৈরি‍। মখোয়শিং অসি ওজাশিংনি অমদি প্রোফেসরশিংনি‍। ঐনা মপান লৈবাক্তা অসিগুম্বা একাদমিক্সি্রন অমদি প্রফোস্নেলশিং উনবা মতমদা, মখোয়না মখোয়গী এক্সপিরিএন্স, ৱাখল লৌশিং, অমদি হৈ-শিংববু ভারতকা মরী শম্নহন্নিংবগী অপাম্বা হেক হেক ফোঙদোরকই‍। অদুগা মসিগী মতাঙদা ঐনা ময়ামগী নুংঙাইবা পাউ অমা পুরক্লি‍। ঐখোয়না মখোয়গী অপাম্ববুসু খঙজিল্লে‍। হৌজিক্তি অসিগুম্বা খোঙবুশিংবু ভারতকী ইন্সতিত্যুসনশিংদা তাকপি তম্বিহনবগী থৌওং লায়থোকহল্লে‍। মমাঙদা ঐনা ফ্রান্সতা লাক্লম্বা মতমদা, ফ্রান্সতা মহৈ মশিং তম্লিবা ভারতকী মহৈরোয়শিংদা চহি অনিগী পোস্ত-স্তদী ৱর্ক ভিজা পীননবা ৱারেপ লৌমিন্নখি‍। হৌজিক্তি ফ্রান্সতা মাস্তর তৌরিবা ভারতকী মহৈরোয়শিংদা চহি মঙাগী লোং-তর্ম পোস্ত-স্তদী ভিজা পীনবা ৱারেপ লৌরে‍। ভারত লৈঙাক্না ফ্রেঞ্চ লৈঙাক্কী মতেঙগা লোয়ননা মার্সিলদা অনৌবা কোন্সুলেত অমসু হাংদোক্নবা ফিরেপ লৌরে‍। মসিনা অদোমগী খুদোংচাবা হেনগৎহল্লগনি‍।

মরূপশিং,

ঐনা ফ্রান্সতা লৈরিবা ঐগী মরুপশিং অমদি মফমসিগী মীয়ামদা ৱাফম অমগা থমজনিংই‍। ভারত অসি কয়ামুক য়াম্না পাক চাউবগে অমদি খেন্নবা কয়া য়াম্না লৈবগে হায়ববু, ঐখোয়না ভারত মচা অমা ওইদুনসু, হায়রিবশিং অসিবু থিজিনবদা অমদি খঙজিনবদা পুন্সি চুপ্পা অমা চঙগনি‍। মালেম অসিনা অসিগুম্লবা ভারতকী চীংলেম্লবা মতৌবু য়েংনবগীদমক খৌরাংনা ঙাইনরি‍। অদোম্না পাম্বা করিগুম্বা খরা শোয়দনা ভারত্তা ফংগনি‍। ভারত্তা লৈরিবা তুরিজম অসি লম কোইদুনা ফজবা মফম য়েংবখক্তগী ৱাফম ওইদে‍। অদোম্না ভারতকী খেন্নবা মতৌশিংবু অমুক্তং মহাও ফংখ্রবদি, অদোম শোয়দনা লৈবাকসিবু য়াম্না খোয়দাজবা মীওই অমা ওইরক্কনি‍। হিমালয়াগী ৱাংলবা চীংদোন্দগী হৌরগা অশুকপা উমং ফাওবদা, শারবা লৈকঙলাদগী হৌরগা নীংথিরবা সমুদ্র খোঙবান পরিং ফাওবদা, এদভেঞ্চর স্পোর্তসতগী হৌরগা হিরি কোনবা অমদি য়োগগী মফম ফাওবদা, ভারতনা মীপুম খুদিংদা পীবা য়াবা খরদি অদুমক লৈ‍। ঐখোয়গী ফ্রেঞ্জ মরুপশিংবু ভারত্তা পুরক্তুনা লমদমসিগী খেন্নবশিংবু থেংনহন্দুনা খঙহনবা হায়বসি অদোমগী থৌদাংনি‍। অদোম্না মখোয়দা মতেঙ পাংলিবমখৈ, মখোয়না ভারত্তা লাক্কদৌরিবনি‍। ঐগী ভারতকী দাইস্পোরাশিং, ফ্রান্সতা লৈরিবা ঐগী ইয়াম্বা ইনাউ, অমদি ইচল ইচেশিংনা হায়রিবা অসিদা চাউনা থৌদাং য়াবা ঙমগনি‍। মোবাইল ফোন নৎত্রগা কম্প্যুতর অমদা এক্সেস কোদ নৎত্রগা পাসৱর্দ অমা হাপচিল্লগা অনৌবা তাইবংপান অমা হাংদোকপগুম, ভারতকী দাইস্পোরাশিংনা ভারতকী এক্সেস কোদ, পাসৱর্দ ওইগদৌরিবনি‍। ভারত্তা তুরিজম য়োকখৎপসি অদোমগী মিসন ওইহনবিয়ু‍। ভারত্তা লাকপা হায়বসি চহি লিশিং কয়াগী পারী পুরীগী লন কয়া থেংনগদৌরিবনি অমদি পুৱারীসু হকথেংননা থেংনগদৌরিবনি‍। অদোম্না ভারত্তা লাকপা মতমদা, অদোম্না পারী পুরীগী লন উবা ফংবতা নত্তনা চাওখৎ খোঙজেলসু উবা ফংগদৌরিবনি‍।

মরূপশিং,

ঐখোয়গী মপুং ফাবা মতিং, ঐখোয়গী এক্সপিরিএন্স, ঐখোয়গী কন্তেক্ত অমদি ঐখোয়গী মরীগা লোয়ননা ফ্রান্সকী মীয়ামবু ভারতকা মশক থোকপা মওংনা মরী শম্নহন্নবা ঐখোয় ফিরেপ লৌমিন্নসি‍। অদোম্না লাকপা মতমদা মখোয়বুসু ভারত্তা পুরকপিয়ু‍। মখোয়বু ভারত্তা কোয়বা লাক্নবা পুক্নিং থৌগৎপিয়ু‍। ঐখোয়গী মীগা মীগগী লৈনরিবা মরী হেনগৎলকপা মতমদা, তুরিজম খক্তা নত্তনে চাওখৎলক্কদৌরিবসি, হোয় মদুসু ওইরিবনি‍। অদুদু মদুগী মথক্তা, শকখঙ মায়খঙনবগী মরীসু হেনগৎলক্তুনা তুংগী মীরোল কয়াগী মমল নাইদ্রবা পারী পুরীগী লন ওইগদৌরিবনি‍। হায়রিবা থবক অসিদা অদোম্না কৈদৌঙৈদা তুংদা লৈথহৌরোই হায়বা ঐনা ঐগী মরূপশিংগী মফমদা থাজৈ‍। অদোম্না মশিং য়াম্না মফমসিদা লেঙবিরক্লি, অমদি ময়াম পুম্নমকপু উনজনবগী তাঞ্জা ঐনা ফংলি‍। মসিগীদমক ঐনা ময়ামগী মফমদা থম্মোয়নুংদগী থাগৎচবা ফোঙদোকচরি‍। ময়ামবু হন্না হন্না থাগৎচরি‍।

ঐগা লোয়ননা ময়ামসু লাউবিয়ু ভারত ইমানা য়াইফরে!

ভারত ইমানা য়াইফরে!

ভারত ইমানা য়াইফরে!

থাগৎচরি!