ভারতকী প্রধানমন্ত্রী

প্রধান মন্ত্রী, শ্রী নরেন্দ্র মোদীনা ঙসি গুজরাতকী গান্ধীনগরদা ৱিমেন ইম্পাৱর্মেন্তকী মতাংদা পাংথোকপা G20 মন্ত্রীশিংগী কনফরেন্সতা ভিদিও মেসেজকী খুত্থাংদা ৱা ঙাঙখ্রে।

প্রধান মন্ত্রীনা ঙসি তিনখিবা মীয়ামদা ৱা ঙাঙবদা, মীথুংলেনশিংবু মহাত্মা গান্ধীগী মইং লৌদুনা মিংথোনখিবা শহর, গান্ধীনগরদা তরাম্না ওকখি অমসুং মখোয়না অহমেদবাদকী গান্ধী আশ্রমদা চৎপগী খুদোংচাবা ফংলিবা অসিদা নুংঙাইবা ফোংদোকখি। ক্লাইমেত চেঞ্জ অমসুং গ্লোবেল ৱার্মিংগুম্বা শিংনবশিংগী খুদক্কী ওইবা অমসুং সস্তেনেবল ওইবা ৱারোইশিন পুরকপগী তঙাই ফদবা লৈরিবা অসিদা মিৎয়েং চঙলদুনা, প্রধান মন্ত্রীনা গান্ধী আশ্রমদা গান্ধীজীগী অচুম্বা পুন্সি মহিং অমসুং মহাক্কী সস্তেনেবল ওইবা, মরোমদোম লেপচবা অমসুং মান্নবা মিৎয়েং য়েংবগী লমজিং শানবা ৱাখল্লোনগী অহানবা মমি উবা ফংগনি হায়না ফোংদোকখি। মীথুংলেনশিংনা মসিদগী ইথিল য়াম্না ফংগনি হায়বগী শ্রী মোদীনা থাজবা ফোংদোকখি। দান্দী কুতীর ম্যুজিয়মদসু চৎপা য়াই মহাক্না মখা তারদুনা গান্ধীজীগী মমিং লৈরবা তরেং অদু গঙ্গাবেন কৌবী নুপী অমনা মনাক নকপা খুঙ্গংদগী ফংখিবনি হায়না মহাক্না পাউদমখি। মরোমদোম লেপচবা অমসুং সস্তেনেবল ওইবগী খুদম অমা ওইখিবা খাদীগী ফিজোল অসি গান্ধীজীনা মদুদগী হৌনা শেৎপা হৌখিবনি হায়না প্রধান মন্ত্রীনা হায়খি।

“নুপীশিংনা নুংঙাই য়াইফবা মতমদা মালেমসু নুংঙাই য়াইফবা ওইরকই”, মখোয়গী শেন্মিৎলোন চাউখৎহনবনা শাহৌ লৈহল্লি অমসুং মখোয়গী মফমদা এজুকেসনগী মঙাল ফংহনবনা মালেমগী চাউখৎ থৌরাং পুরকই হায়বা ৱাফম থম্লদুনা প্রধান মন্ত্রীনা হায়খি। মখোয়না লুচিংবা ওইবনা ইনক্লুজিব ওইবগী মতৌবু খুমাং চাউশিনহল্লি অমসুং মখোয়গী খোল্লাওন অফবা অহোংবা পুরকহল্লি হায়না মহাক্না মখা তাখি। নুপীশিংবু মপাঙ্গল হাপ্পগী খ্বাইদগী অফবা পাম্বৈদি নুপীনা লুচিংদুনা চাউখৎপা পুরকপগী থৌওংগী খুত্থাংদগীনি অমসুং ভারতনা মাইকৈ অসিদা খুমাং য়াম্না চাউশিল্লি হায়না প্রধান মন্ত্রীনা হায়খি।

ভারতকী রাস্ত্রপতি শ্রীমতি দ্রৌপদি মুর্মু মশামক্না অফবা খুদম অমা ওইরি হায়না প্রধান মন্ত্রীনা হায়খি। মহাক্না অচম্বা পুন্সি মরোলদগী হৌরক্লবসু, মালেমগী খ্বাইদগী চাউবা গনতন্ত্রা অমবু লুচিংলি অমসুং মালেমগী খ্বাইদগী অনিশুবা চাউবা দিফেন্স ফোর্সকী কম্মান্দর-ইন-চীফ ওইনা থৌ পুরি হায়না মহাক্না মীয়ামগী পুক্নিং চীংশিনখি। মসিগুম্বা গনতন্ত্রগী মমা অসিদা, ভারতকী সংবিধান্না হেক অহৌবদগী হৌনা নুপীশিং য়াওনা লৈবাক মীয়াম খুদিংদা ‘ভোত থাদবগী হক’ অমসুং মীরেপ ওইবগী হক অসিবুসু চপ মান্নবা মিৎয়েং য়েংবগী থৌওংদা য়ুম্ফম ওইদুনা পীদুনা লাক্লি হায়না প্রধান মন্ত্রীনা হায়খি। মীয়াম্না খল্লবা নুপী মীহুৎশিংনা শেন্মিৎলোন, অকোয়বগী ফিভম অমসুং খুন্নাইদা অহোংবা পুরকপগী থৌবুরেল ওইদুনা লাক্লি হায়না প্রধান মন্ত্রীনা পল্লদুনা, মিলিয়ন 1.4 ওইদুনা, ভারতকী রুরেল লোকেল বোদীশিংগী মীয়াম্না খল্লবা মীহুতকী 46%দি নুপী ওইরি হায়না মখা তাখি। নুপীশিংগী সেল্ফ হেল্প গ্রুপশিংবু মপাঙ্গল হাপখিবনা অহোংবা পুরকপগী মতিক লৈরবা শাফু ওইখিবসিদা মিৎয়েং চঙলদুনা, প্রধান মন্ত্রীনা লাইচৎ মনুংদা সেল্ফ হেল্প গ্রুপ অমসুং নুপী মীহুৎশিংনা খুন্নাইদা তেংবাংবগী য়ুম্বী ওইখি হায়না ফোংদোকখি। প্রধান মন্ত্রীনা মখোয়গী মায় পাকপশিংগী খুদম পীখি অমসুং মখোয়না মাস্ক, সেনিতাইজর, লাইনা শন্দোকপগী মরী লৈনবা ৱারোল কয়া মীয়ামদা খঙহনখিবগী থবক থৌরমশিংবু অমুক্কা হন্না নীংশিংখি। “ভারতকী নর্স অমসুং মিদৱাইফকী 80% হেনবদি নুপীশিংনি। মখোয়না লাইচৎ মনুংদা ঐখোয়গী ঙাক-শেলগী খ্বাইদগী মমাংদা লৈখি।  অমসুং, ঐখোয়না মখোয়গী মসিগুম্বা মায় পাকপা অসিগীদমক্তা চাউথোকচরি”, মহাক্না মখা তাখি।

নুপীনা লুচিংদুনা চাউখৎপা পুরকপা অসিনা সরকার অসিগী মরু ওইবা মিৎয়েং অমনি হায়না ফোংদোক্লদুনা, প্রধান মন্ত্রী মুদ্রা য়োজনাগী মখাদা মাইক্রো-লেভেল য়ুনিৎশিংবু তেংবাংনবগীদমক্তা পীথবা লুপা মিলিয়ন অমগী লোনগী চাউরাকপা 70%দি নুপীশিংদা পীখি হায়না প্রধান মন্ত্রীনা হায়খি। মান্নবা মতৌ ওইনা, স্তেন্দ-অপ ইন্দিয়াগী চাউরাকপা বেনিফিশরী 80%দি নুপীশিংনা ওইরি, গ্রীন ফিল্দ প্রোজেক্তকী বেঙ্ক লোন কয়া অমসু মখোয়না ফংলি। ক্লিন কুকিং ফুএলনা অকোয়বগী ফিভমদা হকথেংননা তেংবাংই অমসুং নুপীশিংগী হকশেল ফগৎহল্লি হায়বা ৱাফম পল্লদুনা, প্রধান মন্ত্রীনা প্রধান মন্ত্রী উজ্বালা য়োজনাগী মতাংদা হায়রদুনা খুঙ্গংগী নুপীশিংদা কুকিং গ্যাস কন্নেক্সন চাউরাকপা মিলিয়ন 100 পীখি হায়না পাউদমখি। ইং 2014দগী হৌদুনা, ইন্দস্ত্রীএল ত্রেনিং ইন্সতিত্যুতশিংদা তেক্নিকেল এজুকেসন লৌরিবা নুপী মশিংনা শরুক অমা হেনগৎলে,  ভারতকী STEM (সাইন্স, তেক্নোলোজী, ইঞ্জিনিয়রিং অমসুং মেথমেতিক্স) গ্রেজুএতকী চাউরাকপা চাদা 34দি নুপীশিংনি অমসুং স্পেস সাইন্তিস্তকী শরুক মরি থোকপগী অমদি নুপীশিংনি হায়না মহাক্না পাউদমখি। “চন্দ্রয়ান, গগনয়ান অমসুং মিসন মার্সকুম্বা ফ্লেগশিপ প্রোগ্রামশিংগী মায় পাকপগী মরুমদা হায়রিবা নুপী সাইন্তিস্তশিং অসিগী মহৈ অমসুং শুবা নোম্বা কনবগী থৌওং লৈরি”, মহাক্না হায়খি। ঙসিদি, হাইয়র এজুকেসন্দা মিং চনবা নুপী মশিং হেনগৎলক্লি, অমসুং নুপাশিংগী মশিংদগীসু হেল্লি হায়না প্রধান মন্ত্রীনা হায়খি। সিভিল এভিএসন্দা নুপী পাইলোতকী মশিং চাদা খ্বাইদগী য়াম্বশিংগী মনুংদা ভারতসু অমা ওইরি অমসুং ইন্দিয়ন এয়র ফোর্সকী নুপী পাইলোতশিংনা ফাইতর জেতসু পাইরি হায়না মহাক্না হায়খি। ঐখোয়গী আর্ম্দ ফোর্সশিংদা নুপীশিংবু ওপরেসনগী রোল অমসুং ফাইতিং প্লেতফোর্মশিংদা শিজিন্নরি হায়না শ্রী মোদীনা পনখি।

লৌউ-শিংউগী ইমুংশিংদা নুপীশিংনা অপীকপা ত্রেদর অমসুং দুকান ফমদুনা মরু ওইবা থৌদাং লৌবশিংবু প্রধান মন্ত্রীনা পাউদমখি। মখোয়গা মহৌশা ইমাগা লৈনরিবা নক্নবা মরীদা মিৎয়েং চঙলদুনা, প্রধান মন্ত্রীনা নুপীশিংনা ক্লাইমেত চেঞ্জকী ইন্নোভেতিব ওইবা ৱারোইশিন পুরকপগী চুক্লি পায়রি হায়না ফোংদোকখি। রাজস্থানগী বিশ্নোই খুন্নাইগী অমৃতা দেবীনা লুচিংদুনা 18শুবা চহি-চাদা মওং-মরিল তাদনা ঈশিং তুংশিনবা থিংনবগীদমক্তা ‘চিপকো ইহৌ’ হৌদোক্তুনা ক্লাইমেত এক্সনগী খ্বাইদগী অহানবা থৌওং পাংথোকখিববু প্রধান মন্ত্রীনা নীংশিংখি। মহাক অমসুং খুঙ্গংগী অতোপ্পা মীওইশিংগা লোয়ননা মহৌশা ইমাগী লম্বী য়াৎনবগীদমক্তা মশাগী পুন্সি কত্থোকখি হায়না প্রধান মন্ত্রীনা পাউদমখি। “ভারতকী নুপীশিংনা ‘মিসন LiFE- লাইফস্তাইল ফোর ইনভাইরনমেন্ত’কী ব্রান্দ এম্বেসেদর ওইরি”, প্রধান মন্ত্রীনা নুপীশিংগী হন্থহনবা, হন্না শিজিন্নবা, রিসাইকল অমসুং রি-পর্পজ তৌবগী নাৎকী ওইবা লৌশিংগী মতাংদা তাম্লদুনা হায়খি। তোঙান-তোঙানবা খোঙথাংশিংগী মখাদা, নুপীশিংনা সোলর পেনেল অমসুং লাইত শাবগী ত্রেনিং কয়াসু লৌরি হায়না প্রধান মন্ত্রীনা হায়খি। গ্লোবেল সুয়াথকী পার্ত্নর লৈবাকশিংগা তেংবাংনদুনা মায় পাকপা ফংলিবা ‘সোলর মানস’কী মতাংদসু মহাক্না পনখি।

“নুপী ওন্তোপ্রিনরশিংনা মালেমগী শেন্মিৎলোন্দা মশক থোকপা শরুক তম্লি”, প্রধান মন্ত্রীনা নুপী ওন্তোপ্রিনরশিংগী থৌদাংদা মিৎয়েং চঙলদুনা হায়খি। দিকেদ কয়াগী মমাংদা, ইং 1959দা গুজরাতী নুপী তরেৎনা পুৱারী ওইরবা কোওপরেতিব ইহৌ – শ্রী মহিলা গৃহুদ্যোগ শেম্নবগীদমক্তা মুবাইদা লাকখি, মসিনা নুপী মিলিয়ন কয়া অমসুং মখোয়গী ইমুংশিংগী পুন্সিদা অচৌবা অহোংবা পুরকখিবনি হায়না মহাক্না হায়খি। মখোয়গী খ্বাইদগী মমিং চৎপা পোত্থোক- লিজত পাপরগী মতাংদা তম্লদুনা, গুজরাতকী চাক-এন্সাংগী শরুক অমা ওইখি হায়না শ্রী মোদীনা হায়খি। মহাক্না দাইরী সেক্তরগী খুদম পীরদুনা, গুজরাত খক্তদা নুপী মিলিয়ন 3.6না সেক্তর অসিগী শরুক ওইরি হায়না মহাক্না মখা তাখি। ভারতকী য়ুনিকোর্ন স্তার্তঅপকী 15%দা য়ামদ্রবদা নুপী ফাউন্দর অমা য়াওই অমসুং মসিগুম্বা নুপীশিংনা লুচিংবা য়ুনিকোর্ন অসিগী অপুনবা ভেল্যুনা বিলিয়ন দোল্লর 40 হেল্লি হায়না শ্রী মোদীনা পাউদমখি। নুপীনা মায় পাকপা অসিনা মহৌশাগী মতৌ ওইবা থাক মান্নবা প্লেতফোর্ম অমা শেম্বগী তঙাই ফদবা লৈবসিদা মহাক্না মীয়ামগী পুক্নিং চীংশিনখি। নুপীশিংনা মার্কেত, গ্লোবেল ভেল্যু চেন অমসুং এফোর্দেবল ফাইনান্সকী খুদোংচাবা লৌবদা অথিংবা থম্লিবা অসিবু লৌথোক্নবা অমসুং চপ মান্নবা মতমদা, য়ুম চলায়বগী পোৎলুমদগী মখোয়বু মনিং তমহন্নবা ঐখোয়না হোৎনগদবনি হায়না মহাক্না ফোংদোকখি।

প্রধান মন্ত্রীনা মহাক্কী ৱারোল লোইশিনবা ওইনা, নুপীশিংগী ওন্তোপ্রিনর্শিপ, লীদর্শিপ অমসুং এজুকেসনগী মতাংদা পাংথোকপা মন্ত্রীশিংগী কনফরেন্স অসিনা চঙলিবা মিৎয়েংবু প্রধান মন্ত্রীনা থাগৎলদুনা, নুপীশিংগী দিজিতেল অমসুং ফাইনেন্সিএল লিতরেসী খুমাং চাউশিলহন্নবা ‘তেক ইকুইতী প্লেতফোর্ম’ লোঞ্চ তৌবসিদা নুংঙাইবা ফোংদোকখি। ভারতকী G20 প্রসিদেন্সীগী মখাদা, ‘ৱিমেন ইম্পাৱর্মেন্ত’কী মতাংদা ৱর্কিং গ্রুপ অমা শেম্নবা ৱারেপ লৌখি হায়না মহাক্না পাউদমখি। গান্ধীনগরদা পাংথোক্লিবা অৱাবা নাইদবা থবক-থৌরমশিং অসিনা মালেম পুম্বগী নুপীশিংদা থাজবা অমা পীগনি হায়বগী থাজবা লৈ হায়না মহাক্না ৱারোল লোইশিনখি।

*****