ভারতকী প্রধানমন্ত্রী

নীংতম্বগী চহি ৭৫ মপুং ফারকপদা লৈবাক মীয়াম্বু থাগৎচরি। হন্না-হন্না থাগৎচরি। হিন্দুস্তানগী কাচিন কোয়া খক নত্তনা মালেমগী মফম খুদিংদসু, ভারতপু নুংশিজবা উৎপা ওইনা মীপুম খুদিংনা তোঙান-তোঙানবা থৌরম পাংথোক্তুনা থৱাই য়াওনা মচু অহুমগী ফিরাল পাইহল্লি। মালেম পুম্বদা লৈরিবা ভারতপু নুংশিবীবশিংবু ভারতকী নীংতম্বগী অমৃত মহোৎসব অসিদা ঐহাক্না হন্না-হন্না থাগৎচরি।

ঙসিগী থৌরম অসিদি পুৱারী ওইরগদবা থৌরম্নি। মসিদি অনৌবা অহৌবা, অনৌবা মিৎয়েং, অনৌবা ৱারেপ অমসুং অনৌবা ৱাশক অমগা লোয়ননা ঐখোয় পুন্না চঙশিনমিন্নবগী য়াইফরবা পুংফম অমনি। নীংতম্বগে ইহৌ অপুনবসি মীখা পোল্লগনি হৌখিবনি। লৈবাক মীয়াম কয়ানা চহি কয়া মীখা পোনবগী মাইয়োক্তা লান্থেংনখিদবা হিন্দুস্তানগী মফম অমসুং মতম অমত্তা লৈখিদে। পুন্সি মাঙখিদবা, মীওৎ-মীনৈ নংখিদবা, কত্থোকখিদবা অমত্তা লৈতে। ঙসিদি, লৈবাক মীয়াম্না মখোয়গুম্বা অথোইবা মীওই, কত্থোকখিবা মীওই খুদিংবু ইকায় খুম্নবগী নুমিৎনি। মখোয়গী ৱাখল্লোনবু য়াজবগী অমসুং মখোয়বু ইকায় খুম্নদুনা মখোয়গী মঙলানশিংবু মঙলানশিংবু অথুবা মতমদা মঙফাওনহনবগী পুংফম্নি।  ঐখোয় লৈবাক মীয়াম খুদিংনা মশাগী তৌফম থোকপা ওইনা মথৱাই থাখ্রবা নুংশিরবা বাপু, নেতাজী সুভাস চন্দ্র বোস, বাবাসাহেব অম্বেদকর, বীর সাবর্করগী মফমদা তৌবীমল খঙলি। মখোয়গী মশাগী থৌদাংনা মশাগী পুন্সিগী লম্বী ওইখিবনি। লৈবাক অসিনা ব্রিতিশ লৈঙাকপু নিকহনখিবা মঙ্গল পান্দে, তাত্যা তোপে, ভগৎ সিংহ, সুখদেব, রাজগুরু, চন্দ্রসেখর আজাদ, অশফাক উল্লা খান, রাম প্রসাদ বিসমিলকুম্বা মশিং থীঙমদ্রবা ঐখোয়গী য়াওল্লোইশিংগী মফমদা তৌবীমল খঙবা উৎলি। লৈবাক অসিনা রানী লক্ষ্মীবাই, ঝলকারী বাই, দুর্গা ভাবী, রানী গাইদিনল্যু, রানী চেনম্মা, বেগম হজরত মহল, বেলু নচিয়ার ওইরো, মখোয়গুম্বী থৌনা ফবী কয়াগী মফমদসু তৌবীমল খঙবা উৎলি।

ভারতকী নুপীগী পাঙ্গলগী ৱারেপ করিনো। ভারতকী নুপীশিংনা করি পাংথোকপা ঙম্মি, মখোয়না করি পুরকপা ঙম্মি, মখোয়গুম্বী থৌনা ফবী কয়াবু শিংথাবদা লৈবাক পুম্বনা চাউথোকচরি। ঙসি অসিদি নীংতম্বগী লান্দসু শরুক য়াখিবা অমসুং নীংতম্বগী মতুংদসু লৈবাক শেমগৎপদা থৌদাং লৌখিবা দাঃ রাজেন্দ্র প্রসাদজী,  নেহরুজী, সর্দার বল্লবভাই পতেল, শ্যামা প্রসাদ মুখর্জী, লাল বহাদুর সাস্ত্রী, দীন্দয়াল উপাধ্যায়, জয় প্রকাশ নরায়ন, রাম মনোহর লোহিয়া, আচার্য় বিনোবাভাবে, নানাজী দেশমুখ, সুব্রমনিয়ম ভারতীগুম্বা মশিং থীঙমদ্রবা শক্নাইরবা মীওইশিংগী মফমদা ইকায় খুম্নবগী নুমিৎ অমনি।

ঐখোয়না নীংতম ইহৌগী ৱারী শাবা মতমদা ঐখয়গী জংগলশিংদা লৈরিবা ত্রাইবেল খুন্নাইশিংগী মীওইশিংগীদমক্তা চাউথোকচবসু কাওরোইদবনি। ভগবান বির্সা মুন্দা, সিধ কানহু, অল্লুরী সিতারাম রাজু, গোবিন্দ গুরু, নীংতম ইহৌগী খোঞ্জেল ওইনা অশুকপা জংগলশিংদা নিলখিবা মশিং থীঙমদ্রবা নীংতম লান্মীশিংনা ঐহাক্কী ত্রাইবেল ইচিল ইনাওশিং, ঐহাক্কী ইমা, ইচে-ইচলশিং, ঐহাক্কী নহারোলশিংগী মফমদা লৈবাক্কীদমক্তা হিংবা অমসুং শিবগীদমক্তা ইথিল পীখিবনি। নীংতম ইহৌগী মওং-মতৌ অমসুং শক্তম কয়া লৈজবা হায়বসি ঐখোয়গী লৈবাক্কী লাইবক ফবনি, অমসুং নরায়ন গুরু, স্বামী বিবেকানন্দ, মহারিশি ঔরোবিন্দো, গুরুদেব রবিন্দ্রনাথ তেগোর ওইরো, মখোয়গুম্বা মশক নাইবা মীওই কয়ানা হিন্দুস্তানগী কাচিন কোয়া খুদিংদা, ভারতকী খুঙ্গং খুদিংদা ভারতকী ৱাখল্লোনবু হিংগৎহনখি। মখোয়না ভারতপু ভাব তাহনখিবনি।

ঐখোয় চহি অমা চুপ্না পাংথোক্তুনা লাক্লিবা অমৃত মহোৎসব মনুংদা লৈবাক অসিনা থৌরম কয়া উখি। মসিনা ইং ২০২১দা দান্দী য়াত্রাদগী হৌখিবনি। নীংতম্বগী অমৃত কুহ্মৈগী পান্দমশিং ফংবদা হেন্না লাইহন্নবগীদমক্তা লৈবাক মীয়াম্না জিলা, খুঙ্গং অমসুং মফম খুদিংদা তোঙান-তোঙানবা থৌরম পাংথোকখি। অশুক য়াম্না শাংবা, চাউবা, মপুং ফাবা থৌদোক পাংথোকখিবা অসি পুৱারীদা মসিনা অহানবা ওইরমগনি অমসুং হিন্দুস্তানগী কাচিন কোয়া খুদিংদা করিগুম্বা মরম খরদগী কাওথোকখ্রবা শক্নাইরবা মীওইশিংবু নৌহৌননা অমুক্কা হন্না নিংশিংখি। ঙসিদি, লৈবাক অসিনা মখোয়গুম্বা অথৌবা কয়াবু থীদোক্তুনা নীংশিংলি অমসুং ইকায় খুম্নরি। অমৃত মহোৎসবকী মনুংদা ঐখোয়না মখোয় পুম্নমকপু নীংশিংবগী মতম ওইখি। ঙরাং ওগস্ত ১৪দা পাংথোকখিবা পার্তিসনবু নীংশিংবগী থৌরমদা লৈবাক্না মতমদুদা নংখিবা অৱাবা কয়া নীংশিংখি। লৈবাক নুংশিবগীদমক্তা মতমদুগী অৱাবশিংদু নংখিবনি। ভারতপু নুংশিবনা মরম ওইরগা অনৌবা পুন্সি অমা হৌদোক্নবা মখোয়না লেপখিবা ৱারেপশিংবু ঐখোয়না ইকায় খুম্নফম থোকই, থৌদোক অসিদগী ইথিল লৌফম থোকই।

ঐখোয়না ঙসি লৈবাক্কী নীংতম্বগী চহি ৭৫ মপুং ফারকপগী নুংঙাইবা ফোংদোক্লিবসিদা লৈবাক্কীদমক্তা থৱাই থাগে হায়না হিংলিবা, লৈবাক্কী ঙাক-শেল্লিবা, লৈবাক্কী ৱারেপ মঙফাওনহল্লিবাঃ সেনাগী লান্মী ওইরো, পুলিস ওইরো, লৈঙাক্তা লৈরিবা ব্যুরোক্রেত ওইরো, মীয়ামগী মীহুৎ ওইরো, কেন্দ্রগী লৈঙাক্লোই ওইখিবশিং ওইরো; ঙসি অসিদি চহি ৭৫ অসিদা মখোয়না লৌখিবা থৌদাংশিংবু নীংশিংবগী নুমিৎনি অমসুং চহি ৭৫ অসিদা লৈবাকপু মাংজিল থাহন্নবা মশাগী ওইবা মওংদা হোৎনখিবা লৈবাক মীয়াম করোর কয়াবুসু ইকায় খুম্নবগী নুমিৎনি।

ঐহাক্কী নুংশিরবা লৈবাক মীয়াম,

ঐখোয়গী চহি ৭৫গী খোঙচত্তা অকা-অকুম কয়া ঐখোয়না থেংনখি। অৱাবা নুংঙাইবা কয়াসু লৈখি অমসুং পুম্নমক অসিগী মরক্তা ঐখোয়গী ত্রাইবেল মীয়াম্না য়াম্না চাউখৎখি, নীংহন্নবা লৈখিদে। ৱারেপশিংবু লেম্না খক মাঙহনখিদে। চহি কয়া মীখা পোন্দুনা লৈখিবনা ভারতকী পুক্নিংদা, ৱাখলদা থম্মোই শেংনা নুংঙাইতবা থৌদোক কয়া থেংনখি হায়বসি অচুম্বনি, অদুবু মখোয়না খাঙবা কনখি, নীংহন্নবা লৈখিদে হায়বসু অচুম্বনি, করিগুম্বা অমা পাংথোক্কে হায়বগী ৱাখল্লোন্সু লৈখিদবা নত্তে। মসিনা মরম ওইরগা, নীংতম ইহৌনা অরোইবা থাক্তা য়ৌশিল্লকপদা, লৈবাকপু হেন্না কিহনবগী, পুক্নিং শোন্থহন্নবা থবক-থৌরম কয়া ঐখোয়গী মাইয়োক্তা পাংথোকখি। নীংতম্বা ফংদুনা ব্রিতিশশিং চৎখ্রবদি, লৈবাক কায়রগনি, মচেৎ-মচেৎ তারগনি, মীয়াম্না লৈবাক মনুংদতা মখোয় মশেল খৎন-চৈনবদগী শিনরগনি, করিমত্তা লেমহৌররোই, ভারতনা নোরোক্তা তারগনি, হায়বনচিংবা কিনীংঙাই ওইরবা ৱাফম কয়া শন্দোকখি। অদুবু মখোয়না লমদম অসি হিন্দুস্তানগী লমদম্নি হায়বা কাওরে, লৈঙাকপশিংগী পাঙ্গলগী ৱাংমদগী হেনবা মপাঙ্গল কয়া লমদম অসিদা লৈরিবনি, চহি কয়াদগী মসিদগী হিংদুনা লাক্লিবনি, মসিনা মরম ওইদুনা ঐখোয়না চাবা তাঙবা, লান্দা মায়থীবা নংদনা লাক্লিবনি।

লালহৌবগী ইরাংনা মফম খুদিংদা শিংনহনখি, অচম্বা মীওইশিংবু হাত্তোকপীখি। প্রোক্সী ৱার মখা চত্থখি, মহৌশাগী ওইবা অৱা-অনা কয়া লাকখি, মায় পাকপা, মায়থীবা, নিংবা কায়বা, অপাম্বা ফংবা, অসিগুম্বা থৌওং কয়া মশিং খঙদনা থোকখি। অদুবু শিংনবা কয়াসিবু মাইয়োক্নদুনা ভারতনা তুংলমচত্তা চঙশিনখি। ভারতকী তোঙান-তোঙানবা মতৌ চেনবগী থৌওংনা অতোপ্পদা পোৎলুম ওইখিবনি। মখোয়না মসিবু ভারতকী পাঙ্গল ওইনা হৌজিক লৌনরে। পাঙ্গলগী মশক থোকপা খুদম অমা ওইরে। ভারতকী ওইবা নুংগী পাঙ্গল, সংসকারগী চৎনবী, পুম্নমকপু অমত্তা ওইহনবা ৱাখল্লোন অমা লৈ হায়বসি অতোপ্পনা খঙদে। পাঙ্গল অদুদি লোকতন্ত্রনা খ্বাইদগী হেল্লি, গনতন্ত্রগী মমানি হায়বসিনি, অমসুং পাঙ্গল অসিনা মালেমগী শক্তি কয়াদা অৱাবা পীবা ঙম্বনি। হায়রিবা অসি ভারতনা হৌজিক ফংলে, অমসুং ঐখোয়গী পাঙ্গল অসি তসেংনা লৈ হায়বসু খুদম ওইনা তাক্লবনি।

ঐহাক্কী নুংশিরবা লৈবাক মীয়াম,

হিমালয়গী শুরুংশিং ওইরো, মীপুম খুদিংগীদমক্তা ৱাবীবগী মহাত্মা গান্ধীগী মঙলান, খ্বাইদগী অরোইবদা লৈবা মীওইবুসু মপাঙ্গল লৈহনবগী মহাক্কী অপাম্বা, ঐহাক্না মসিগীদমক্তা ইশাবু কত্থোকচরি, অমসুং মমাংগী চহি ৮গী মহৈ অমসুং নীংতম্লবা মতুংগী অশুক য়াম্লবা একপেরিএন্সশিংনা মরম ওইরগা ঙসি ঐখোয়না চহি ৭৫গী মতুংদা অমৃত কালগী মাইকৈদা খোঙদারিবনি। ঙসিদি অমৃত কালগী অহানবা অয়ুক্নি, অমসুং মসিদা ঐহাক্না তোঙানবা পাঙ্গল অমা উবা ফংলি। মসিনা ঐহাকপু তসেংনা চাউথোকহল্লি।

লৈবাক মীয়ামশিং,

ঐহাক্না ঙসি লৈবাক্কী খ্বাইদগী লাইবক ফবা থৌওং অমা উবা ফংলি। মদুদি, ভারতকী মীয়াম অসি অনীংবা অপাম্বা য়াম্না থম্বা মীওইনি। এস্পিরেস্নেল সোসাইতী হায়বসি লৈবাক খুদিংগী য়াম্না চাউবা লন অমা ওই। হিন্দুস্তানগী কাচিন কোয়া খুদিংদা, খুন্নাইগী মফম খুদিংদা, লৈকাই খুদিংদা, অনীংবা অপাম্বনা খম থেংনা ৱাংনা লৈবসিদা ঐখোয় খুদিংনা চাউথোকচরি। লৈবাক্কী মীওই খুদিংনা অহোংবা পুরকপা পাম্মি, অওনবা লাকপা পাম্মি, অদুবু ঙাইবদি ঙমদে। মখোয়না পুম্নমক অসি মিৎমাঙদা উবা পাম্মি, থৌদাংগা মরী লৈনহন্দুনা পাংথোকপা পাম্মি। মখোয়না খোঙজেল পাম্মি, চাউখৎপা পাম্মি। চহি ৭৫দা মঙখিবা মঙলানশিংবু মখোয়গী মমিৎ মাঙদা মঙফাওনদুনা উবা মখোয়না পাম্মি।

মীওই খরনা মসিনা মরম ওইরগা নুংঙাইতবা পোকপা য়াই। এস্পিরেস্নেল সোসাইতী ওইবনা মরম ওইরগা সরকারসু মৈরক্তা চৎপগী তঙাই ফদবা লৈ। সরকারসু মতমগা চুননা চত্তবা য়াদে, অদুগা কেন্দ্র সরকার ওইরো, নত্ত্রগা রাজ্য সরকার ওইরো, লোকেলগী লৈঙাক্লোইশিংসু ওইরো, লৈঙাকপগী পথাপ অমবু ওইরবদি, এস্পিরেস্নেল সোসাইতীদা মীপুম খুদিংনা মিৎয়েং চঙবা তাই, মখোয়গী অপাম্বশিংবু ঐখোয়না ঙাইদুনা লৈগদবা নত্তে। ঐখোয়গী অসিগুম্বা এস্পিরেস্নেল সোসাইতীনা মতম কয়াদগী ঙাইদুনা লাক্লবনি। অদুবু, লাক্কদৌরিবা চারোন শুরোনশিংদা ঙাইহন্দুনা অমুক থম্বা মখোয়না পামদ্রে, মরম অদুনা অমৃত কালগী অহানবা অয়ুক অসিদা ঐখোয়না মসিগুম্বা এস্পিরেস্নেল সোসাইতীগী অপাম্বশিংবু মঙফাওনহন্নবা য়াম্না ফরবা খুদোংচাবা অমা পুদুনা লাক্লে।

ঐহাক্কী নুংশিরবা লৈবাক মীয়াম,

ঐখোয়না হৌখিবা নুমিৎ খরনিদা পাঙ্গল অমা উবা ফংখ্রে, এক্সপেরিএন্সসু তৌখ্রে। মদুদি, ভারত্তা পুন্না ৱাখল তামিন্নবগী চৎনবী অমা লাকপনি। ঐখোয়গী নীংতম লানহৌ মনুংদা লৈরম্বা অপাম্বা অমসুং ৱাখল তামিন্নবগী মতৌ খুদিংমক হৌজিক্তি ওইথোক্লে। পুক্নিংগী ৱাখলশিংবু ৱারেপ্তা ওন্থোক্লে, হোৎনমিন্নবগী থৌওং লৈরে অমসুং পান্দম ফংবগী লম্বীসু উবা ফংলে। মসিগুম্বা ৱাখল্লোন অসিনা ঐখোয়গী খ্বাইদগী চাউবা লন্নি হায়না ঐহাক্না থাজৈ। লৈবাক্কী মসিগুম্বা মপাঙ্গল লৈ হায়বসি ওগস্ত ১০ ফাওবা কনা অমত্তনা খঙলমদবা য়াই। অদুবু, মমাংগী নুমিৎ হুম্নিদগী হৌনা মচু অহুমগী ফিরাল পাইদুনা লৈবাক অসিনা খোঙচৎ কয়া চৎনরি। ঐহাক্কী নুংদা অমসুং লৈবাক্কী নুংদা অশুক য়াম্না চাউবা পাঙ্গল অমা লৈ হায়বসি সোসিএল সাইন্সকী অখঙ-অহৈ কয়াশিংনফাওবা খঙলম্লোই, খল্লম্লোই। মসিবু মচু অহুমগী ফিরাল অমনা মীয়ামদা তাক্লে। মসিদি নৌহৌননা ৱাখল অমুক তামিন্নবগী পুংফম্নি। মসি মীয়াম্না খঙদ্রে।

লৈবাক অসিনা জনতা কর্ফ্যুগীদমক্তা হিন্দুস্তানগী কাচিন কোয়াদগী থোক্লকখিবা মতমদা মসিগুম্বা অপুনবা ৱাখল্লোনগী শক্তম উবা ফংখ্রবনি। লৈবাক্না খুবাক, পুখম থীন্দুনা কোরোনা লান্মীশিংগীদমক্তা শাগোন্ননা লেপমিন্নখিবা মতমদা, ঐখোয়না অপুনবা ৱাখল্লোনগী শক্তম উবা ফংখ্রবনি। থাউমৈ থান্দুনা কোরোনা লান্মীশিংগী য়াইফ মঙ্গোলগীদমক্তা লৈবাক্না থোকখিবা মতমদা অপুনবা ৱাখল্লোনগী শক্তম উবা ফংখ্রবনি। মালেম অসিনা কোরোনা মনুংদা ভেক্সিন কাপসিরা কাপ্পোইসিরা, মসিনা মথৌ তৌগদরা তৌরোইদরা হায়বগী মতাংদা খঞ্জান্নদুনা হিংলম্মি। মতমদুদা, ঐহাক্কী লৈবাক্কী খুঙ্গংগী লাইরবশিংনা ভেক্সিন দোজ করোর চহি হেন্না কাপ্তুনা মালেম্না ঙক্কদবা থবক পাংথোকখি। মসিসু অপুনবা ৱাখল্লোন্নি, মসিগী পাঙ্গল অসিনা ঙসিদি লৈবাক অসিদা অনৌবা পাঙ্গল অমা হাপ্লবনি।

ঐহাক্কী নুংশিরবা ইচিল ইনাওশিং,

এস্পিরেস্নেল সোসাইতী অমসুং পুন্না ৱাখল তামিন্নবগুম্বা অতোপ্পা পাঙ্গল অমনা মালেমগী লৈবাকশিংগী মিৎয়েংবু ভারত্তা চিংশিনবগী অতোপ্পা মশক থোকপা পাঙ্গল অমসু ঐহাক্না উবা ফংলি। মালেম্না ভারত্তা চাউথোকচবগা লোয়ননা য়েংলি, থাজবগা লোয়ননা য়েংলি। শিংনবা কয়াগী ৱারোইশিনবু মালেম্না ভারতকী লমদমদগী থিনরিবনি, মরুপশিং। মালেমদা অসিগুম্বা অহোংবা লাকপা অসি ঐখোয়গী মশক থোক্লবা চহি ৭৫গী খোঙচৎকী খুদম অমনি, মহৈ অমনি।

ৱারেপ কয়াগা লোয়ননা ঐখোয়না তুংলমচত্তা চঙশিল্লিবা অসিবু মালেম্না য়েংনরি, অদুগা, মমৈথংদা, মালেম্না থাজবগা লোয়ননা হিংনরি। অপাম্বশিংবু ফংহনবা ঙম্বা পাঙ্গল কদাইদা লৈ হায়বা মখোয়না উরে। মসিবু ঐহাক্না নুপীশিংগী পাঙ্গল ওইনা উই। পাঙ্গল অহুমগী মওংদা উই, অদুগা মসিগুম্বা পাঙ্গল অহুমসিদি এস্পিরেসন, পুন্না ৱাখল তামিন্নবা অমসুং মালেমগী অপাম্বা ফংহনবা ঙম্বসিনি। অদুগা মালেম্না ঙসি ঐখোয়দা থাজবা অমুক হন্না লৈরক্লিবা অসিদা ঐহাক্কী লৈবাক মীয়ামগী অচৌবা থৌদাং য়াই হায়বা ঐহাক্না খঙই, মরুপশিং। লৈবাক মীয়াম করোর ১৩০না দিকেদ কয়াদা থেংনখিবা এক্সপেরিএন্স কয়াগী মতুংদা তংদু লৈতাবা সরকারগী মরু ওইবা করিনো, তংদু লৈতাবা রাজনিতীগী মরু ওইবা করিনো হায়বা খঙলে, অদুগা পোলিতিকেল স্তেবিলিতী লৈবনা মালেমদা করি পাঙ্গল লৈ হায়বা তাকপা ঙমবগে হায়বসু মখোয়না হৌজিক খঙলে।

পোলিসীদা করম্বা পাঙ্গল লৈবগে, অমসুং মালেম্না পোলিসীশিং অসিদা করম্না থাজবগে হায়বসি ভারতনা থবক্না উৎলবনি, অমসুং মালেম্নসু মসিবু নীংথিনা খঙলবনি। অদুনা, হৌজিক্তি তংদু লৈতাবা রাজনিতী লৈরবনিনা, পোলিসী খোঙজেল য়াঙলবনিনা, ৱারেপ থুনা লৌরবনিনা, মীপুম খুদিংনা চাউখৎ-থৌরাংগী লমজেলগী শরুক ওইরে। ঐখোয়না সবকা সাথ, সবকা বিকাসকী মন্ত্রগা লোয়ননা চৎখি, অদুগা লৈবাক মীয়াম্না মসিদা সবকা বিশ্বাস অমসুং সবকা প্রয়াসকী মতৌসু মিৎনা উনা উনা হাপ্পীখি। মরম অদুনা, ঐখোয়না ইশাগী নুংগী পাঙ্গলবু উবা ঙমখি। নীংতম্বগী অমৃত মহোৎসব পাংথোকখিবা মওং, লৈবাক্কী জিলা খুদিংদা অমৃত সরোবর ৭৫ ঙসি ঐখোয়না শেম্লিবা, খুঙ্গং খুদিংনা শরুক য়ারিবা অমসুং মশাগী ওইবা থৌদাং পাংথোক্নরিবা পুম্নমক ঐখোয়না উরে। অদুনা মরুপশিং, লু-নানবগী খোঙজং ওইরো, লাইরবশিংবু নুংঙাই-য়াইফহনবগী থবক ওইরো, লৈবাক্না ঙসিদি মশাগী অপুনবা পাঙ্গলগা লোয়ননা তুংলমচৎকীদমক্তা খোঙশাল্লি।

অদুবু মরুপ অমসুং ইচিল ইনাওশিং, নীংতম্বগী অমৃত কাল অসিদা ঐখোয়না চহি ৭৫গী খোঙচৎকী মতাংদা ৱা ঙাংদুনা অসুং চাউথোকচদুনা অদুমক লৈরবদি ঐখোয়গী মঙলান্দা চাউখৎপা লাক্লোই। অদুনা, মসিগী চহি ৭৫গী মতম্না কয়া য়াম্না অফবা ওইখ্রবসু, খুদোংচাদবা কয়া থেংখিবা ওইরবসু, মঙফাওনদবা মঙলান কয়া উরবসু, ঐখোয়না হৌজিক অমৃত কালগী মাইকৈদা চঙশিল্লি অমসুং লাক্কদৌরিবা চহি ২৫ অসিদি লৈবাক্কী য়াম্না মরু ওই। মরম অদুনা, ঐহাক্না ঙসি লাল কিলাদগী লৈবাক মীয়াম করোর ১৩০গী পাঙ্গলগী মতাংদা শন্দোক্না ফোংদোক্লিবা, মখোয়গী মঙলানবু উরিবা, মখোয়গী ৱারেপশিং শকখঙলিবা অসিদা লাক্কদৌরিবা চহি ২৫ অসিগীদমক্তা ঐখোয়না মসিগুম্বা পাঞ্চপরনগী পাঙ্গল অসিদা মিৎয়েং চঙফম থোকই হায়না খল্লি। অদুগা ঐখোয়না পাঞ্চপরনশিং অসিগা লোয়ননা, লৈবাক্না ইং ২০৪৭তা নীংতম্বগী চহি ১০০ মপুং ফাবা মতমদা, নীংতম্বা পামজবা মীওই খুদিংগী মঙলান খুদিং মঙফাওনহনগনি হায়বগী থৌদাং লৌদুনা চৎকদবনি।

ঐহাক্না পাঞ্চকরনগী ৱারী শাবা মতমদা, লৈবাক্না অচৌবা ৱারেপ অমগা লোয়ননা চৎকদবনি হায়বসিনা ঐহাক্কী অহানবা ৱাশক ওইগনি। অচৌবা ৱারেপ অমা লৌগদবনি। অদুগা মদুগী ৱাশক অদুদি, চাউখৎপা ভারত ওইগদবনি, মসিদগী করিমত্তা তাথবা য়াদে। অচৌবা ৱাশক, অদুগা অনিশুবা ৱাশক অসিনা, ঐখোয়গী নুংদা মীখা পোনবগী পিক্লবা ৱাখল্লোন অমা লৈরবসু, মদু লৈহন্দবা তাবনি হায়বসিনি। মসি কৈদৌনুংদা লৈহনবা য়াদে। চহি চা কয়া মীখা পোন্দুনা লৈরক্লবনি, ঐখোয়গী অনীংবা অপাম্বা খুদিংবু ফাজিন-পুন্সিন্দুনা লৈরক্লবনি, ঐখোয়গী ৱাখল্লোন্দা চমম্নবা পোকহন্দুনা ঐখোয়বু নমথদুনা থম্লক্লবনি। করিগুম্বা মসিগুম্বা মতৌ মচা অমা ওইরবসু, ঐখোয়না উবা ফংলবদি, মসিদগী মপুং ফানা নীংতম্বা ফংগদবনি। মসি ঐখোয়গী অনিশুবা ৱাশক ওইগদবনি। অহুমশুবা ৱাশক, ঐখোয়গী চৎনবীদা চাউথোকচগদবনি, মরমদি, মসিগী চৎনবী অসিনা ভারতপু সনাগী মতম ফংহনখিবনি। মসিগী চৎনবী অসিনা ঐখোয়দা মতমগা লোয়ননা চৎপগী হৈনবী লৈহল্লিবনি। মসিগুম্বা চৎনবী অসিবুনি ঐখোয়না মীয়ামগীদমক্তা খঙনবা থম্লিবনি। অনৌববু মতম পুম্বদা লৌশিন্দুনা লাক্লিবনি। মরম অদুনা, ঐখোয়না মসিগুম্বা চৎনবী অসিগীদমক্তা চাউথোকচফম থোকই। মরিশুবা ৱাশকসু য়াম্না মরু ওই, মদুদি, অমত্তা ওইবা হায়বসিনি। মীওই করোর ১৩০না অমত্তা ওইনা লৈবা, ঐগী মাগী খায়দবা, অমসুং ‘এক ভারত স্রেস্থ ভারত’কী মঙালনগীদমক্তনি ঐখোয়গী মরিশুবা ৱাশক অসি। অদুগা মঙাশুবা ৱাশক, মীয়াম্না মশাগী থৌদাং খঙবা হায়বসিনি। মসিদা প্রধান মন্ত্রীসু য়াওদবা নত্তে, মুখ্য মন্ত্রীসু য়াওদবা নত্তে, মখোয়সু মীয়াম্নি কৈনো। লৈবাক্কী মীওই অমা ওইবগী মথৌদাং পাংথোকপা। হায়রিবশিং অসিনা ঐখোয়গী লাক্কদৌরিবা চহি ২৫গী মঙলানশিংবু মঙফাওনহনবগী য়াম্না চাউরবা পাঙ্গল ওইগদৌরিবনি।

ঐহাক্কী নুংশিরবা ইরৈবাকচাশিং

মংলানশিং অদু চাউরবদি, ৱাখল্লোন অদু চাউরবদি, খোঙথাং অদুসু য়াম্না চাউই। শক্তিসু চাউনা হাপচিল্লি। লৈবাক অসিনা চহি ৪০-৪২গী মতম অদুদা লেপখিবা অদু হৌজিক কনাগুম্বা অমনা নীংশিল্লুবা য়াই। কনাগুম্বা অমনা খুত্তা শুমচিৎ পাইখি, কনাগুম্বা অমনা লংচাক পাইখি, কনাগুম্বা অমনা সত্যগ্রহাগী লম্বী খনখি, কনাগুম্বা অমনা লান্থেংনবগী লম্বী খনখি, কনাগুম্বা অমনা কাল ক্রান্তিগী থৌনা ফবগী লম্বী খনখি। অদুবু ফিরেপ অদুদি অচৌবা ‘নীংতম্বা’ ওইখি অমসুং শক্তি অদু য়েংবীয়ু, করিগুম্বা অচৌবা ফিরেপ অমা লৌরবদি, নীংতম্বসু ফংখি। ঐখোয়না নীংতম্বা ফংখি। করিগুম্বা ফিরেপ অদু অপিকপা ওইরম্লবদি, অকক্নবা ওইরম্লবদি, ঙসি ফাওবা নীংতম্নবগীদমক লান্থেংনরমখিগনি, অদুবু ফিরেপ অদু অচৌবা ওইরম্বনা ঐখোয়না মদু মাইপাকপা ঙমখি।

ঐহাক্কী নুংশিরবা ইরৈবাকচাশিং

ঙসি অমৃত কালগী অহানবা অয়ুক ওইরকপা মতম অসিদা ঐখোয়না চাউখৎলবা ভারত অমা ওইনা চহি কুন মঙা অসিদা হিংগদবনি। ঐহাক্কী মীৎ মাংদা লৈরিবা অমসুং ঐহাক্কী চহি ২০-২২-২৫গী নহারোলশিং, ঐহাক্কী লৈবাক অসি ঐগি মাংদা লৈরি, লৈবাক অসিনা নীংতম্বগী চহি ১০০ শুরকপা মতমদা ঐহাক্কী লৈবাক্কী নহারোলশিংনা চহি ৫০-৫৫ শুরগনি, মসিগী অর্থদি অদোমগী পুন্সিগী মরু ওইবা মরম অসি অদোমগী চহি ২৫-৩০ অসি ভারতকী মংলানশিং অদু মংফাওনহনবগী মতমনি। ফিরেপ অমা লৌবিয়ু অমসুং ঐগা লোয়ননা চৎলসি মরুপশিং, মচু অহুমগী ফিরালগী ৱাশক লৌবিয়ু, ঐখোয় পুম্নমক মপুং ফানা শরুক য়ারসি। মহাসঙ্কলপ অসিদা ঐহাক্কী লৈবাক অসি চাউখৎলবা লৈবাক অমা ওইগনি, চাউখত্পগী পেরামিতর খুদিংমক্তা ঐখোয়না মীওইবদা য়ুম্ফম ওইবা সিস্তেম অমা শেমগত্কনি, ঐখোয়গী সেন্তরদা মীওইবা লৈগনি, ঐখোয়গী সেন্তরদা মীওইবগী আশা অমসুং মঙলান য়াওগনি। ঐখোয়না খঙই মদুদি ভারতনা অচৌবা ফিরেপ লৌবা মতমদা মদুসু থবক ওইনা উৎলি।

ঐহাক্না মফম অসিদা ঐহাক্কী অহানবা ৱারোল পীবদা লুনানবগী মতাংদা ঙাংখিবা অদু লৈবাক অসিনা থবক ওইনা পাইখৎপা হৌদোকখি, মরম অদুনা য়ারিবমখৈ লুনানবগী মায়কৈদা চংশিল্লি অমসুং অমোৎ-অকাই হায়বা অসি মহৌশানা হৈনদবা পোক্লে। মসি পাঙথোকখিবা লৈবাক অদু মসিনি, মসি পাঙথোক্লি অমসুং তুংদসু পাঙথোকখিগনি। লৈবাক অসি মালেমনা ৱানরবা মতমদা ভেক্সিন পুথোকখি, করোর ২০০গী পান্দম অদু লান্থোকখি, মসি অকক্নবা মতমগী মনুংদা পাঙথোক্তুনা অরিবা রেকোরদ পুম্নমক থুগাইখি। ঐখোয়না লৈবাক অসি গল্ফ ওইলদা হিংলি, মতৌ করম্না বুস ওইলদা চংশিনগনি হায়না ঐখোয়না ৱারেপ লৌখি, চাদা ১০ ইথানোল ব্লেদিং তৌবগী মংলান অসি অচৌবা অমা ওইনা উখি। অরিবা পুৱারিনা মসি ওইথোক্লোই হায়রম্মি, অদুবু থাখিবা মতমদগী মাংজৌননা চাদা ১০ ইথানোল ব্লেদ তৌদুনা লৈবাক অসিনা মংলান অসি মংফাওনহনখি।

ইচিল-ইনাওশিং,

অসিগুম্বা অতেনবা মতম অসিদা মীওই করোর ২.৫দা ইলেক্ত্রিসিতী কনেক্সন ফংহনবা অসি অরাইবা থবক অমা ওইখিদে, লৈবাক অসিনা মসি পাঙথোকপা ঙমখি। ঙসি লৈবাক অসিনা ইমুং লাখ কয়াগী য়ুমথোংদা ‘তোতি ঈশিং’ ফংহন্নবগী থবক পাইখৎলি। ভারতপু ওপন দেফিকেসনদগী কোকহনবা অসি ঙসিদি ওইথোকপা ঙম্লে।

ঐহাক্কী নুংশিরবা ইরৈবাকচাশিং,

এক্সপরিয়েন্সনা ঐখোয়দা হায়রি মদুদি ঐখোয় পুম্নমক অখাং কনবগা লোয়ননা চংশিল্লবি ঐখোয়গী পান্দমশিং অদু ফংবা ঙমগনি। রিন্যুএবল ইনর্জিগী পান্দম ওইরো, লৈবাক অসিদা অনৌবা মেদিকেল কোলেজশিং লিংখত্পগী ৱাখল্লোন ওইরো, দোক্তরশিং শেম-শাবা ওইরো, লম খুদিংমক্তা খোঙজেল হান্নদগী য়াম্না য়াংখৎলকখি। মরম অসিনা ঐহাক্না হায়রি মদুদি লাক্কদৌরিবা চহি ২৫ অসি অচৌবা ফিরেপ লৌগদবনি, মসি ঐখোয়গী ৱাশক ওইগদবনি, মসিসু ঐখোয়গী ৱাশক ওইগদবনি।

ঐহাক্না হায়খিবা অনিশুবা ৱাফমদি, মীখা পোনবগী ৱাখল্লোনা, লৈবাক অসিনা খল্লিবা ৱাখল্লোন, কয়াম কুইনা ঐখোয়দা মালেমদা সর্তিফিকেৎ পীখিগনি? ঐহাক্না প্রন শক্তি অদুগী মরমদা খন্নখ্রে। মালেমগী সর্তিফিকেৎ অদুদা ঐখোয়না মতম কয়া হিংখিগনি? ঐখোয়না ঐখোয়গী ইশাগী স্তেন্দর্দশিং থমলোইদ্রা? করোর ১৩০ লৈবা লৈবাক অমনা মাগী স্তেন্দর্দ অসিদগী হেনগৎনবা হোৎনবা ঙমলোইদ্রা? ফীভম অমত্তদা ঐখোয়না অতোপ্পশিংগা মান্ননবা হোৎনরোইদবনি। ঐখোয়না লৈরিবা অসিগুম্না অদুমক লেপকনি, অদুবু পাঙ্গলগা লোয়ননা লেপকদবনি, মসি ঐখোয়গী ৱাখল্লোন ওইগদবনি। ঐখোয়না মীখা পোল্লম্বদগী নীংতম্বা পাম্মি। লাপ্না লৈবা সমুদ্র ৭কী মখাদা ফাওবা ঐখোয়গী ৱাখলদা মীখা পোনবগী ৱাখল্লোন অসি চেল্লোইদবনি মরুপশিং। অমসুং তোঙান তোঙানবা মীওইশিংদগী ৱাখল্লোনশিং লৌবগা লোয়ননা য়েংলি ব্রেনস্তোর্মিং কয়া তৌদুনা অনৌবা নেস্নেল এজুকেসন পোলিসি শেম্বগী মওং অসিদা ঐহাক্না আশাগা লোয়ননা য়েংলি অমসুং মসি লৈবাক্কী এজুকেসন পোলিসিদা মরা তাখি।

ঐখোয়না উবা ফংই মদুদি করিগুম্বা মতমদা ঐখোয়গী তেলেন্ত অসি লোলগী পলনা খাজিন্দুনা থম্বা উবা ফংখি, মসি মীখা পোনবগী ৱাখল্লোনগী মহৈনি। ঐখোয়গী লৈবাক্কী লোল খুদিংমক ঐখোয়না চাউথোকচবা পোকপা তাই। লোল অসি ঐখোয়না খঙলম্বা নত্ত্রগা খঙলমদবসু য়াই, অদুবু মসি ঐখোয়গী লৈবাক্কী লোননি, মসি ঐহাক্কী ইপা-ইপুশিংনা মালেমদা পীবিরম্বা লোলনি, ঐখোয়না চাউথোকচগদবনি।

ঐহাক্কী মরুপশিং,

ঙসি ঐখোয়না দিজিতেল ইন্দিয়াগী মওং মতৌ অদু উবা ফংলি। স্তার্তঅপ উবা ফংলি। মখোয় কনানো? মসি তিয়র-২, তিয়র-৩ সহরদা লৈবা লায়রবা খুঙ্গং অমগী ইমুংদা লৈরিবা মীওইশিংগী তেলেন্ত অদুনি। হায়রিবা অসি ঙসি অনৌবা দিস্কোবরিশিংগা লোয়ননা মালেমগী মমাংদা লেপ্লিবা ঐখোয়গী নহারোলশিংনি। ঐখোয়না মীখা পোনবগী ৱাখল্লোন অদু থাদোক্কদবনি। অদোমগী তৌবা ঙম্বশিংদা থাজবা থমগদবনি।

ঐহাক্না অনিশুবা ৱাফম থমখ্রে, ঐহাক্কি অহুমশুবা প্রনশক্তি অদুদি হেরিতেজকী মতাংদা ওইরি। ঐখোয়না চাউথোকচবা পোকফম থোই। ঐখোয়না ঐখোয়গী হৌরকফমগা শম্নরবা মতমদা, ঐখোয়গী হৌরকফমগা শম্নরবা মতমদা খক্তদা ঐখোয়না ৱাংনা পাইবা ফংগনি, অমসুং ঐখোয়না ৱাংনা পাইরবা মতমদা ঐখোয়না মালেমদসু সোলুসন পীবা ঙমগনি। ঐখোয়না ঐখোয়গী পোৎশিংগীদমক চাউথোকচবা পোক্লবা মতমদা মসি উবা ফংই। ঙসি মালেমনা হোলিস্তিক হেল্থ কেয়রগী মতাংদা খন্নরি, অদুবু হোলিস্তিক হেল্থ কেয়রগী মতাংদা ৱারী শাবা মতমদা মসিনা ভারতকী য়োগ, ভারতকী আয়ুর্বেদ, ভারতকী হোলিস্তিক লাইফস্তাইলদা মীৎয়েং থম্লি। মসি ঐখোয়না মালেমদা পীরিবা ঐখোয়গী লিগেসিনি। ঙসিদি মালেম অসি মসিনা ইথিল পীরি। হৌজিক ঐখোয়গী পাঙ্গল অসি য়েংউ। ঐখোয় অসি মহৌশাগা লোয়ননা হিংমিন্নবা হৈবা মীওইবশিংনি। মহৌশাবু মতৌ করম্না নুংশিগদগে হায়বা খঙবিয়ু। ঙসি মালেম অসিনা অকোয়বগী ফীভমগী সমস্যা মায়োক্নরি। ঐখোয়দা অদুগুম্বা লিগেসি অদু লৈরি, ঐখোয়দা গ্লোবেল ৱারমিংগী সমস্যাশিং কোকহন্নবা পাম্বৈ লৈরি। ঐখোয়গী ইপা-ইপুশিংনা পীবিরমখি।

ঐখোয়না লাইফস্তাইলগী মতাংদা ৱারি শাবা মতমদা, এনভাইর্নমেন্ত ফ্রেন্দলি লাইফস্তাইলগী মতাংদা ৱারি শাবা মতমদা, লাইফ মিসনগী মতাংদা ৱারি শাবা মতমদা ঐখোয়না মালেমগী পুক্নিং চিংশিল্লি। মসিগী শক্তি অসি ঐখোয়দা লৈরি। ঐখোয়গী অপৌবা ফৌ অমসুং মিলেৎ অসি ঐখোয়গী য়ুমথোং খুদিংমক্কী পোৎলম অমা ওইদুনা লাক্লি। মসি ঐখোয়গী হেরিতেজনি, ঐখোয়গী অপিকপা লৌমিশিংনা কন্না হোৎনবনা মরম ওইদুনা অপিকপা লমশিংদা ঐখোয়গী চেং-হৱাই থারি। ঙসি মালেম অসিনা মালেমগী মিলেৎকী নুমিৎ অসি ইন্তর্নেস্নেল লেবেলদা পাঙথোক্নবা মাংলোমদা চংশিল্লি। ঐখোয়না মসিগীদমক চাউথোকচবা তমসি। ঐখোয়না মালেমদা পীগদবা কয়া অমা লৈরি। ঐখোয়গী ফেমিলী ভেল্যুশিংগী মতাংদা, মালেমগী সোসিএল তেন্সনগী মতাংদা খন্নরকপা মতমদা। পর্সনেল তেন্সনগী মতাংদা খন্নরকপা মতমদা মীয়াম্না য়োগ উবা ফংই। কলেক্তিব তেন্সনগি মতাঙ্দা ৱারি সাবা মতমদা, মদুগি মতুঙ্দা ভারতকি ফেমিলি সিস্তেম অসি উবা ফংই । জোইন্ত ফেমিলিগী মকোক অমা, চহি লিশিং কয়াদগী ঐখোয়গী ইমা-ইপাশিংনা কত্থোকখিবশিং অদুনা মরম ওইদুনা ইমুং হায়না মমিং থোনবা সিস্তেম অসি শেমগৎখি, মসি ঐখোয়গী লিগেসিনি। ঐখোয়না মতৌ করম্না হেরিতেজ অসিগিদমক চাউথোকচবা পোক্কনি? ঐখোয় অসি থৱায়দা শিববু উবা ফংলিবা মীওইশিং অদুনি। ঐখোয়দি মীওইবদা নারায়নবু উবা ফংলিবা মীওইনি। ঐখোয়দি নুপীশিংবু নারায়নী হায়না কৌরিবা মীওইশনি। ঐখোয় অসি পাম্বিদা ঈশ্বর ওইনা খনবা মীওইনি। ঐখোয় অসি তুরেলবু ইমা ওইনা লৌরিবা মীওইনি। ঐখোয় অসি কংকর খুদিংমক্তা সঙ্কর ওইনা উবা মীওইনি। মসি ঐখোয়গী শক্তিনি, তুরেল খুদিংমক্তা ইমাগী মওং মতৌ অদু ঐখোয়না উবা ফংলি। অসিগুম্বা অকোয়বগী ফীভম অসি পাকথোক-চাউথোকহনবা হায়বা অসি ঐখোয়গী চাউথোকচবনি, অসিগুম্বা হেরিতেজ অসিগীদমক মালেমগী মমাংদা ঐখোয়না চাউথোকচবা মতমদা, মালেমনসু মসিগীদমক চাউথোকচবা পোক্কনি।

ইচিল-ইনাওশিং,

ঐখোয় অসি মালেমদা বসুধৈব কুতুম্বকমগি মন্ত্র পীরিবা মীওইশিংনি। ঐখোয়দি মালেমদা ‘এক সদ্বিপ্রা বহুধা বদন্তি’ হায়না ফোঙদোকখিবা মীওইশিংনি।

‘হোলিয়র দেন দো’ হায়বগী ৱাখল্লোন চেনবা মতম অসিদা ঙসিগী মালেমনা, ঐহাক্না অদোমদগী হেন্না চাউই হায়বা ৱাখল্লোন অসিনা মরম ওইরগা কনফ্লিক্কী অচৌবা ক্রাইসিস অমা মায়োক্নরি। ঐখোয়দা মসিগী ৱারোইশিন পুরক্নবা লৌশিং লৈ। ঐখোয়গী স্কোলরশিংনা হায়বীরম্মি ‘ইকম সত বিপ্রা বহুধা বদান্তি’ হায়বদি এবসলুৎ ত্রুথ অসি অমখক্তনি অদুবু মসিগী তোঙান তোঙানবা শক্লোনশিং লৈ।  মসি ঐখোয়গী মতিক-ময়াইনি। ঐখোয়না ‘য়াত পিন্দে তত ব্রহ্মন্দে’ হায়না হায়খি, তাইবংপালদা লৈবা খুদিংমক থৱায় পানবা খুদিংমক্তা য়াওই। অসিগুম্বা হ্যুমেন ভেল্যুশিং ঐখোয়না পুথোকখি। লৌসিঙ্ লৈবা ৱাখল্লোন্ অসিদি য়ুনিভরস অসিদা লৈরিবা পোত্ খুদিঙ্মক্ হিঙ্লিবা মিওই খুদিঙ্মক্তা লৈরি, ঐখোয়না অসিগুম্বা মিওইবগি ভেল্য়ুসিঙ্গি পরোপোজেল্ ওইরম্মি।

ঐখোয় মালেমগী য়াইফবা উবা ফংখ্রবা মীওইশিংনি; ঐখোয়না “সরবে ভবন্তু সুকিনাহ, সরবে সান্তু নিরামায়” হায়বা অসিদা থাজদুনা ঐখোয়গী মীয়াম খক্তা নত্তনা মালেম পুম্বগীদমক অপুনবা অফবা অমসুং মীওইবগী অফবা হায়বা লম্বিদা চৎখি। পুম্নমক য়াইফবা অমসুং নুংঙাইবা ওইরসনু, পুম্নমক অনা-অয়েক য়াওদবা ওইরসনু, পুম্নমক্না মঙ্গোল ওইবা ওইরসনু, অমসুং কনাগুম্বা অমত্তনা অৱাবা নংদবা ওইরসনু হায়না ঐখোয়না থৌনিজরিবা অসি ঐখোয়গী ভেল্যুশিংদা শাগোন্নরক্লবনি। পুম্নমক্কি নুংঙাইবা অমসুং অফবা হকশেলগীদমক খনবা হায়বা অসি ঐখোয়গী হেরিতেজনি। মরম অসিনা ঐখোয়না ঐখোয়গী হেরিতেজ অমসুং ভেল্যু সিস্তেমবু ইকায় খুম্নবা অমসুং চাউথোকচবা পোকহনবা তমগদবনি। মথংঈ চহি ২৫দা মংলানশিং অদু মংফাওনহনবদা মরু ওইবা ওইগদৌরিবা অসি ঐখোয়গি ৱারেপকি পাঙ্গলনি।

মসিগা চপ মান্নবা মওংদা ঐহাক্কী নুংশিরবা ইরৈবাকচাশিং,

অতোপ্পা য়াম্না মরুওইবা ৱাফম অমনা অপুনবা অমসুং সোলিদরিতিনি। ঐখোয়গী অচৌবা লৈবাক অসিগী দাইভর্সিতি অসি ঐখোয়না পালন তৌবা মথৌ তাই। মশিং থিঙমদ্রবা চৎনবীশিং অমসুং থাজবশিংগা লোয়ননা শান্তি ওইনা পুন্না লৈমিন্নবসি ঐখোয়গী চাউথোকচনীংঙাইনি। ঐখোয়গী ওইনদি ঐখোয় পুম্নমক্না চপ মান্নৈ। কনাগুম্বা অমত্তনা হেন্না হন্থবা নত্রগা হেন্না ৱাংবা ওইদে; পুম্নমক অসি ঐখোয়গী ইশাগীনি। মসিগী অমত্তা ওইবা ৱাখল্লোন অসি অপুনবা শক্তমগীদমক মরুওই। মচানুপা অমসুং মচানুপীনা থাক মান্নবা লৈরবখক্তদা য়ুম খুদিংমক্তা অমত্তা ওইবগী য়ুম্ফম থোনবা ঙমগনি। করিগুম্বা ইমুং অদুনা মখোয়গী মীরোলশিং অদুগী মরক্তা জেন্দরগী খেৎনবা থম্লবদি অপুনবগী ৱাখল্লোন অসি খুন্নাইদা কৈদৌনুংদা শেমগত্পা ঙম্লোই। জেন্দর ইক্বেলিতি অসি ঐখোয়গি অহানবা স্তিপ্যুলেসন্নি। ঐখোয়না অপুনবগী ৱারী শাবা মতমদা করিগীদমক পেরামিতর অমখক্তমক নত্রগা স্তেন্দর্দ অমখক্তমক – ইন্দিয়া ফার্স্ত হায়বা অসি লৈরিবনো। ঐহাক্না হোৎনরিবা পুম্নমক, ঐহাক্না খঞ্জরিবা, হায়রিবা, মীৎয়েং থমলিবা নত্রগা ভিজুএলাইজ তৌরিবা পুম্নমক অসি ইন্দিয়া ফার্স্তকী মতুং ইন্না চৎলি। মসিগী মওং অসিনা ঐখোয় পুম্নমক্কীদমক অপুনবগী লম্বি হাঙদোকপা ঙমগনি। মসি ঐখোয় পুম্নমকপু অমত্তা ওইনা থম্নবা ঐখোয়না ইন্দুনা চৎকদবা মন্ত্র অদুনি। ঐহাক্না মপুং ফানা থাজবা থম্লি মদুদি ঐখোয়না অসুম্না ঐখোয়গী খুন্নাইদা লৈরিবা খেন্নবা অসি হন্থহনবা ঙমগনি। ঐখোয়না শ্রমেব জয়তেগী মগুন অদু ঙাক্না চৎলি মসিনা তাকপদি শিন্মীশিংবু ইকাই খুম্নবা অসি ঐখোয়গী গুন ওইহনগদবনি।

অদুবু ঐহাক্কী নুংশিরবা ইচিল-ইনাওশিং,

লাল কিলাগী লানবনদগী ঐহাক্না খাংদুনা লাকপা অৱাবশিংগী মনুংদা অমা ঐহাক্না শিয়র তৌজগে। ঐহাক্না ঐহাক্কী অৱাবা অসি লোৎতুনা থম্বা ঙমদ্রে। ঐহাক্না মসি লাল কিলাদা ফোঙদোকচবা মতিক চাদে হায়বদি খঙই। অদুবু ঐহাক্কী অৱাবা অসি ঐগী ইরৈবাকচাশিংদা ফোঙদোকচনীংই। করিগুম্বা ঐহাক্না ইরৈবাকচাশিংদা ফোঙদোক্তবা তারবদি ঐহাক্না কনাদা হায়রুগনি? ঐহাক্না হায়জনীংবদি ঐখোয়গী ঙসি ঙসি ঙাংনরিবা ৱাঙাং শঙাং, মওং-মতৌ অসিদা মাংথরকপা উবা ফংই। নুপীবু ইকাই খুম্নদবা ৱাহৈ-ৱাতা ঐখোয়না শীজিন্নরি। নুপীবু ইকাই খুম্নদবা অমসুং হন্থনা য়েংলিবা ঐখোয়গী মওং-মতৌ, নাৎ অমসুং নুমিৎ খুদিংগী চৎনরিবা মওং মতৌ অসি থাদোক্নবা ৱাশকপা য়াদব্রা? জাতিগী মঙলানশিং থুংহন্নবা হোৎনদা নুপীবু ইকাই খুম্নবা অসিনা অচৌবা লন ওইগদৌরিবনি। ঐহাক্না শক্তি অসি উবা ফংই অমসুং মরম অসিনা মসি ঙাকপা ঐহাক্না পাম্মি।

নুংশিরবা ইরৈবাকচাশিং,

ঐহাক্না মঙাশুবা প্রনগী মতাংদা হৌজিক ঙাংজরগনি – প্রজাশিংনা মথৌ মশক খঙবগী প্রন। মাকেমদা লৈরিবা খুমাং চাউশিল্লিবা লৈবাক পুম্নমক খঙনবা হোৎনবদা; করিগুম্বা খরা মাইপাকপা ঙমখ্রবা লৈবাক খুদিংমক্না মখোয়গী পর্সনেল লাইফতা করিগুম্বা খরা অদুমক থোরকই। অমনা দিস্সিপ্লিন লৈবা পুন্সি অমসুং অমনা মথৌদা কত্থোকপা। মীওই অমগী, খুন্নাইগী, ইমুং-মনুংগী, জাতিগী পুন্সিদা মাইপাক্কদবনি। মসি মরু ওইবা লম্বীনি অমসুং মরু ওইবা ভাইতেল ফোর্সনি।

পুং ২৪ মৈ পীবা হায়বা অসি সরকারগী থৌদাংনি অদুবু য়ুনিৎ কয়া য়াম্না চৎহনদবা ঙম্বগে হায়বা অসি প্রজাগী থৌদাংনি। লৌবুক্তা ঈশিং থাবা হায়বা অসি সরকারগী থৌদাংনি অমসুং খোঙথাংনি অদুবু ‘পর দ্রোপ মোর ক্রোপ’ হায়বা অসিদা মীৎয়েং থমদুনা ঈশিং মাংহনদনবা মাংদা চংশিনগনি হায়বা খোঞ্জেল অসি লৌবুক খুদিংমক্তা থোরক্কদবনি। ঐখোয়না কেমিকেল ফ্রী ফার্মিং, ওর্গানিক ফার্মিং অমসুং নেচরেল ফার্মিং হায়বা অসি ঐখোয়গী থৌদাংনি। মরুপশিং, পুলিস নত্ত্রগা মীচম ওইগেরা, নীংথৌ নত্ত্রগা লৈঙাকপা ওইগেরা, মসিগী সিভিক দ্যুতী অসি কনাগুম্বা অমত্তনা ঙাক্তবা য়ারোই। করিগুম্বা প্রজা অমগী থৌদাংশিং মীপুম খুদিংমক্না পাঙথোকপা তারবদি ঐখোয়না থাখিবা মতমদগী মাংজৌননা পাম্লিবা পান্দমশিং অদু শোইদনা ফংগনি হায়না ঐহাক্না থাজৈ।

ঐহাক্কী নুংশিরবা ইরৈবাকচাশিং,

ঙসি অসি মহাঋসি ওরোবিন্দোগী মপোক নুমিৎসু তারি। ঐহাক্না অথোইবা মীশক অসিবু ইকোক নোন্না খুরুমজরি। অদুবু ঐখোয়না ‘স্বদেশিদগী স্বারাজ’ অমসুং ‘স্বারাজতগী সুরত’ তাকপীরম্বা অথোইবা মীশক অদুবু নীংশিংবা মথৌ তাই। মসি মহাক্কী মন্ত্রনি। ঐখোয় পুম্নমক্না মালেমগী অতোপ্পা মীওইশিংদা ঐখোয়না কয়াম কুইংনা মীপাল তাংদুনা লৈখিগদগে হায়বা খন্থবা মতম ওইরে। ঐখোয়গী লৈবাক্না চেং-হৱায় মথৌ তারকপা মতমদা ঐখোয়ন আউতসোর্স তৌবা য়াগদ্রা? লৈবাক অসিনা ঐখোয়গী চিঞ্জাক্কী মথৌ তাবশিং থুংহন্নবা ৱারেপ লৌবা মতমদা লৈবাক অসিনা মদু থবক ওইনা ওন্থোকখিব্রা নত্ত্রগা ওন্থোকখিদব্রা? ঐখোয়না ফিরেপ অমা লৌরবদি মদু ওইথোক্কনি। মরম অসিনা ‘আত্মনির্ভর ভারত’ ওইহনবা হায়বা অসি প্রজা খুদিংমক্কী, সরকার খুদিংমক্কী অমসুং খুন্নাইগী শরুক খুদিংমক্কী থৌদাংনি। ‘আত্মনির্ভর ভারত’ অসি সরকারগী এজেন্স নত্ত্রগা সরকারগী প্রোগ্রাম অমা নত্তে। মসি খুন্নাইগী মীয়ামগী খোঙজংনি, মসি ঐখোয়না মাংদা পুখৎপা তাই।

ঐহাক্কী মরুপশিং, ঐখোয়না তানবা খৌরাংনা ঙাইরকখিবা অসি নীংতম্বগী চহি ৭৫গী মতুংদা মখোল অসি তাবা ফংলে। অহানবা ওইনা চহি ৭৫গী মতুংদা মেদ ইন ইন্দিয়া কেনন্না লাল কিলাদগী মচু অহুমগী ফিরালবু ইকাই খুম্নবা উৎলি। মসিগী মখোল অসিনা ইথিল পীরোইদবা ভারত মচা লৈবরা? ঐহাক্কী নুংশিরবা ইচিল-ইনাওশিং ঙসি ঐহাক্কী থমোয়দগী ঐহাক্কী লৈবাক্কী আর্মীগী লান্মীশিংবু থাগৎপা ফোঙদোচনীংই। আর্মী জৱানশিংনা নীংথিনা শিন্থোক্লবা মওং অমদা থৌনাগা লোয়ননা আত্মনির্ভর ওইবগী থৌদাং অসিবু মখোয়গী লেংজুমদা পুরিবা মওং অসিবু সেল্যুত তৌজরি। আর্মীগী লান্মীশিংনা মহাক্কী মখুত্তা অশিববু পুদুনা চৎলি। মহাক্না শীবা অমদি হিংবা অনিগী লংদাইদা খোঙফম চেৎনা লেপ্পি। আর্মদ ফোর্সশিংনা লিস্ত অমা শেমদুনা দিফেন্স প্রদক্ত ৩০০ ইমপোর্ত তৌদনবা ৱারেপ লৌখিবা তানফম অসিদা ঐখোয়গী লৈবাক্কী ফিরেপ অসি অপিকপা ওইদে।

ফিরেপ অসিদা ঐহাক্না ‘আত্মনির্ভর ভারত’কী অচৌবা তুংলমচৎ অমগী মরু হুনবা উবা ফংলি মসিগী মঙলান অসিনা অচৌবা উচাও অমা ওইরক্কনি। সেল্যুত! সেল্যুত! সেল্যুৎ তৌজরি ঐহাক্কী আর্মী ওফিসরশিংদা!

চহি ৫ অমসুং ৭কী মরক্তা লৈরিবা অপিকপা অঙাংশিংবু ঐহাক্না ইকাই খুম্নবা উৎপসু পাম্মি। লৈবাক্কী ৱাখল খন্থবা ঙম্বগী মপাঙ্গল অদু য়াকাইহনখি। মশিং লাকঙমদ্রবা ইমুংশিংগী চহি ৫-৭ শুরবা অঙাংশিংনা মখোয়গী মমা-মপাশিংদা মপাল লৈবাক্কী শান্নপোৎশিংগা শান্নবা পামদে হায়না ফোঙদোকখি। চহি ৫গী অঙাং অমনি অসিগুম্বা ফিরেপ অমা লৌবা হায়বা অসি মঙোন্দা আত্মনির্ভর ভারতকী ৱাখল্লোন পোক্লবনি।

পি.এল.আই. স্কিমগী মতাংগী ওইনা, লুপা করোর লাখ  অমা, মালেম শিনবা থুংবদগী মীওইশিংনা মখোয়গী লাইবক চাংয়েং তৌনবা ভারত্তা লাকই। মখোয়গা লোয়ননা অনৌবা তেক্নোলোজী পুরক্লি। মখোয়না অনৌবা থবক্কী খুদোংচাবশিং পীরি। ভারতনা মেন্যুফেকচরিং হব ওইরক্লি। মসিনা মীপাল তাংদবা ভারত অমগী য়ুম্ফম থোল্লি। ইলেক্ত্রোনিক্স গুদস নত্ত্রগা মোবাইল ফোনশিং মেন্যুফেকচর তৌবা ওইরবসু ঙসি লৈবাক অসি য়াম্না খোঙজেল য়াংনা খুমাং চাউশিল্লি। ঐখোয়গী ব্রহ্মোস মপালদা এক্সপোর্ত তৌবদা চাউথোকচবা পোক্তবা ভারত মচা লৈরমগদ্রা? ঙসি ভন্দে ভারত ত্রেন অমসুং ঐখোয়গী মেত্রো কোচশিংনা মালেমগী পুক্নিং চীংশিন্নবা হীরমশিং ওইরক্লি।

ঐহাক্কী নুংশিজরবা ইরৈবাকচাশিং,

ঐখোয়না ইনর্জী সেক্তরদা মীপাল তাংদবা ওইনবা হোৎনবা তাই। ইনর্জীগী লমদা ঐখোয়না অতোপ্পদা কয়াম কুইনা মীপাল তাংদুনা লৈখিগনি? মিসন হাইদ্রোজেন, বাইও ফ্যুল অমসুং ইলেক্ত্রিক ভেহিকল অসিগুম্বা সোলর ইনর্জী, ৱিন্দ ইনর্জী অমসুং তোঙান-তোঙানবা অতোপ্পা রিন্যুএবল ইনর্জীগী লমশিংদা মীপাল তাংদনবা হোৎনগদবনি।

ঐহাক্কী নুংশিজরবা ইরৈবাকচাশিং,

ঙসিদি নেচরেল ফার্মিং অসি ইরোমদোম লেপচনবগী লম্বী অমসু ওইরে। হারশিংদগী অহেনবা নীংতম্বা ফংবদগী, লৈবাক অসিদা লৈরিবা নেনো ফর্তিলাইজর ফেক্তরশিং অসিনা অনৌবা আসা অমা পুরক্লে। অদুবু নেচরেল ফার্মিং, কেমিকেল য়াওদবা ফার্মিংনদি ইরোমদোম লেপচবগী পাঙ্গল পীগনি। ঙসিদি, অশং-অমানগী ওইবা থবক কয়া অমা লৈবাক অসিদা থবক্কী খুদোংচাবা ওইনা খোঙলৈ থুনা হাংদোক্নরক্লি। ভারতনা ‘স্পেস’পু থৌশিল কয়াগী খুত্থাংদা হাংদোক্লক্লি। মালেমদা দ্রোনশিং অসিনা চাউখৎপা য়াবা থৌশিল কয়া অমা পুরক্লি।

লৈবাক অসিগী নহাশিংগী ওইবা অনৌবা থোঙ কয়া ঐখোয়না হাংখ্রে।

নুংশিজরবা ইচিল ইনাওশিং,

ঐহাক্না প্রাইবেৎ সেক্তরশিংবু পুক্নিং চিংশিনজরি… থোকপীরক্লো, ঐখোয়না মালেম্বু খুদুম চল্লবনি। মসিমক্নি ইরোমদোম লেপচবা ভারত অমগী মঙলান হায়বদো, মালেমগী তঙাইফদবশিং পীনবা হোৎনবদা ভারতনা কৈদৌনুংদা মনীং হন্দুনা লৈরোই। অচৌবা ইন্দস্ত্রী ওইগেরা, অপীকপা ইন্দস্ত্রী, কোতেজ ইন্দস্ত্রী ওইগেরা, ঐখোয়না মালেমদা ‘জিরো দিফেক্ত, জিও ইফেক্ত’ পীদুনা হোৎনগদবনি। ঐখোয়না স্বাদেশিগীদমক চাউথোকচগদবনি।

ঐহাক্কী নুংশিজরবা ইরৈবাকচাশিং,

ঐখোয়না লাল বহাদুর শাস্ত্রিজিগী মতম্বু অমুক হন্না নীংশিংশি, মহাক্কী লাইৱা, জয় জৱান-জয় কিশান অসি হৌজিকসু লৈবাক অসিগী ইথিল ওইদুনা লৈরি। তুংদা অতল বিহারি ভাজপায়ীজিনা মসিদা ‘জয় বিগ্যান’ হায়রদুনা মরী অমসু অমুক হাপচিনবীরম্মি, অমসুং লৈবাক অসিনা মসিদা হেন্না মরুওইবা থম্লি। অদুবু হৌজিক্তি অমৃতকালগী থবক অমগা লৈরে, মদুদি জয় অনুশন্ধন্নি। জয় জৱান-জয় কিশান –জয় বিগ্যান – জয় অনুশন্ধন-ইন্নোবেসন। অমসুং ঐহাক্না লৈবাক অসিগী হৌগৎলক্লিবা নহাশিংদা থাজৈ। ইন্নোবেসনগী শক্তিদা অমুক্তা য়েংশি, ঙসিদি ঐখোয়গী য়ু.পি.আই.-ভিম, ঐখোয়গী দিজিতেল পেমেন্ত, মালেমগী ফিন্তেকতা ঐখোয়গী মফম, ঙসিদি মালেমগী রিএল তাইম ওইবা শেলথুমগী ত্রাঞ্জেক্সনশিংগী ৪০%দি ঐহাক্কী লৈবাক অসিদা থোক্লি, মসি ভারতনা উৎখ্রবনি।

ঐহাক্কী নুংশিজরবা ইরৈবাকচাশিং,

হৌজিক্তি ঐখোয়না ৫জিগী য়ুগতা চঙশিল্লি। য়াম্না কুইনা ঙাইরুবগী তঙাইফদবা লৈতে। ঐখোয়না চঙশিনগদৌরবনি। খুঙ্গং অমদগী খুঙ্গং অমদা ঐখোয়না ওপ্তিকেল ফাইবরশিং পীরি। ঐহাক্না খঙলে মদুদি দিজিতেল ইন্দিয়াগী মঙলান অসি খুঙ্গংশিং ফাওদুনা চৎকনি। ঙসিদি ভারতকী কম্মন সর্ভিস সেন্তর লাখ মরিরোম্না খুঙ্গংশিংদা চলাইরি। খুঙ্গংগী নহাশিংনা কম্মন সর্ভিস সেন্তরশিং চলাইরি। লৈবাক অসিনা চাউথোকচবা য়াই মদুদি খুঙ্গংদা দিজিতেল ওন্ত্রপ্রিন্যুর লাখ মরি শেম্বা অমসুং খুঙ্গংগী মীয়াম্না সর্ভিসশিং অসি লৌবা হৈনরে, মসিনি ভারতনা মশামকপু তেক্নোলোজীগী হব অমা ওইহন্নবগী শক্তি হায়বদু।

ঐহাক্কী নুংশিজরবা ইরৈবাকচাশিং,

মসিনি দিজিতেল ইন্দিয়াগী ঈহৌ হায়বদু, ঐখোয়না সেমিকন্দক্তরগী মায়কৈদা চঙশিল্লি, ঐখোয়না ৫জিগী মায়কৈদা মাংজিল থানা চঙশিল্লি, ঐখোয়না ওপ্তিকেল ফাইবর নেৎৱার্ক ফুম্লি, মসি অনৌবা মায়কৈদা চঙশিনবগী খুদম অমনি। মসিদা অচৌবা শাফু অহুম চঙলি। এজুকেসন্দা রেদিকেল ওইবা ঈহৌ – মসি দিজিতেল মীদিয়মদা লাক্কনি। হকশেলগী সর্ভিসতা রেদিকেল ওইবা ঈহৌ অমা দিজিতেলদগী লাক্কনি। লৌউশিংগী পুন্সিদসু অচৌবা অহোংবা অমা দিজিতেলদগী লাক্কদৌরি। অনৌবা মালেম অমা শেম্লি। ভারতনা মসিবু হেনগৎহনগনি অমসুং ঐহাক্না ময়েক শেংনা উরে মদুদি মসিগী দিকেত অসি তেক্নোলোজীগী দিকেতনি। ভারতকী ওইনদি মসি তেকাহেদকী মতম্নি, ৱাখল খুদিংমক তেক্নোলোজীগা শম্ননা লৈগনি। ভারতনা মালেমগী আই.তীগী লমদা মশাগী পাঙ্গল লৈজরে অমসুং ভারত্তা মসিগী তেক্নোলোজী অসিগী শক্তি লৈ।

ঐখোয়গী অতল ইন্নোবেসন মিসন, ঐখোয়গী ইঙ্ক্যুবেসন সেন্তর, ঐখোয়গী স্তার্তঅপশিং অনৌবা সেক্তরদা শেমগৎলি, মসিনা হৌরক্লিবা নহাশিংগীদমক অনৌবা খুদোংচাবশিং পুবীরক্লে। স্পেস মিসনগী মতাংবু ওইরো, দীপ ওসিন মিসনগী মতাংবু ওইরো, ঐখোয়না শমুদ্র ইরোন্নুংদা লুনা চঙগদবনি অমসুং ঐখোয়না অতিয়া পক্না শোক্কদবনি, হায়রিবশিং অসি অনৌবা হীরমশিংনি, মসিদনি ঐখোয়না মাংজিল থানা চঙশিল্লিবসিসু।

ঐহাক্কী নুংশিজরবা ইরৈবাকচাশিং,

মসিমসু ঐখোয়না কাউগুমসি অমসুং ভারতনসু চহি চাম্মা হেন্না উরক্লে, লৈবাক অসিদা মোদেল ৱার্ক খরগী তঙাইফদবা লৈবগুম্না অৱাংবা হীরম খরসু তঙাইফদে, অদুবু মতাং অসিদা লৈমাইগী ওইবা মপাঙ্গলসু য়াম্না চঙই। ভারতকী শেন্মিৎলোন চাউখৎপগী হীরমশিং অসিসু লৈমাইদা লৈবা মপাঙ্গলগা মরী লৈনৈ। অমসুং মসিনা ঐখোয়গী লৌমীশিংনা মখোয়গী শক্তিনি, ঐখোয়গী অপীকপা ওন্ত্রপ্রিন্যুরশিংনা মখোয়গী মপাঙ্গলনি, ঐখোয়গী অপীকপা ইন্দস্ত্রীশিং, কোতেজ ইন্দস্ত্রীশিং, মাইক্রো ইন্দস্ত্রীশিং, স্ত্রীৎ ভেন্দরশিং, য়ুমগী থবক শুবশিং, ওতো রিকশো থৌরিবশিং, বস সর্ভিস পীরিবা ইচিল ইনাওশিং অসিনা খুন্নাই অসিগী খ্বাইদগী মশীং য়াম্বা কাংবুনি, মখোয়বু শক্তি পীবনা ভারতকী তৌবা ঙম্বগী শক্তি শোইদনা পীগনি অমসুং মসিনা মরম ওইদুনা ঐখোয়না হোৎনজরিবশিং অসি শেন্মিৎলোন চাউখৎনবগী লৈমাইদা লৈরিবা শক্তি অদুদা অহেনবা মীৎয়েং চঙবনি।

ঐহাক্কী নুংশিজরবা ইরৈবাকচাশিং,

ঐখোয়দা চহি ৭৫ চুপ্না থেংনরক্লে, ঐখোয়না চহি ৭৫ অসিদা থবক কয়া মায় পাকখ্রে। চহি ৭৫ অসিদা, অনৌবা মঙলান কয়া অমা মঙফাওনখ্রে অমসুং অনৌবা ৱারেপ কয়া অমা লৌখ্রে। অদুবু মতম চুপ্পগী ওইনা ঐখোয়না মতৌ করম্না খ্বাইদগী ফবা ফলশিং ঐখোয়গী হ্যুমেন রিসোর্সতগী ফংবা ঙমগদগে? ঐখোয়গী মহৌশাগী লৈজরিবা লনশিং অসিদগী খ্বাইদগী ফবা ফল ফংবা ঙমগদগে? মসিগী পান্দম অসিগা লোইননা ঐখোয়না খোঙ কান্থোকপা তাই। হৌখিবা চহি খরসিদা থেংনরকপদগী ঐহাক্না মসি হায়বা পাম্মি।  অদোমসু কোর্তকী মনুংদা ঙসিদি ঐখোয়গী নুপী খুন্নাইনা মতৌ করম্না আইনগী মায়কৈদা শক্তি লৈনা চঙশিল্লিবগে হায়বসিসু উবা ফংলম্লগনি। ইশাবু খুঙ্গংগী লমশিংদা মীয়ামগী মীহুৎ অমনি হায়না য়েংশি। নারিশক্তিনা ঐখোয়গী খুঙ্গংশিংদা সমশ্যা কয়া লোইশিন্নবা হোৎনবদা মতৌ করম্না হোৎনবগে? ঙসিদি ৱাখল লৌশিংগী হীরমদবু ওইরো, সাইন্সকী হীরমদবু ওইরো, লৈবাক অসিগী নুপীশিংগী শক্তি অসি ঐখোয়না উরে। ঙসিদি পুলিসতসু ঐখোয়গী লৈবাক অসিগী নুপীশিংনা মীয়াম্বু ঙাক শেনবদা অচৌবা থৌদাং লৌরি। পুন্সিগী শিনফম খুদিংদা, শান্নবুং নৎত্রগা লানবুংবু ওইগেরা, ভারতকী নুপীশিংগী শক্তি অসি মপাঙ্গল লৈনা মাংজিল থারক্লি, মসি অনৌবা থাজবা অমনি। মসিগী শক্তি অসি ঐহাক্না ভারতকী চহি ৭৫গী খোঙচৎ অসিদা উরে অমসুং লাক্কদবা চহি ২৫ অসিদা, ঐহাক্না নুপীশিং, ইমা অমসুং ইচল-ইচেশিং, ইচানুপীশিং, অমসুং পুম্নমক্কী শক্তি উগনি। পুম্নমকসি ঐখোয়না খঙবা ঙম্বগী ৱাংমদনি। মসিদা ঐখোয়না মীৎয়েং চঙলিবা মখৈ, ঐখোয়না ইচানুপীশিংদা খুদোংচাবা কয়া পীবা ঙমগনি, মসিবু হল্লকপা ওইনা মখোয়না ঐখোয়দা অদুক্কী মতীক পীবীরক্কনি। মখোয়না লৈবাক অসিবু হেন্না ৱাংনা থাংগৎকনি। মসিবু ঐখোয়না পাকশন্না শন্দোকপা মতমদা, মঙলান অসিবু মঙফাওননবা হোৎনরকপা মতমদা ঐখোয়না কন্না হোৎনরুদ্রসু য়ারগনি অমসুং ঐখোয়দা লৈরিবা অরোইবা মতমসু হন্থরক্কনি, ঐখোয়গী মঙলানশিংসু হেন্না মঙাল লৈরক্কনি অমসুং অনৌবা কয়ানা য়োমদুনা লাক্কনি।

অসুম্না মরুপশিং,

ঐখোয়গী ইশাগী ইথৌদাংগা লোইননা মাংজিল থানা চঙশিনশি। ঙসিদি ঐহাক্না ভারত সংবিধানবু শেম্বীরম্বশিংগী মফমদা থাগৎপা ফোংদোকচনিংই, ঐখোয়দা পীবীরম্বা ফেদরেল স্ত্রকচরগী ইনোৎপু ঙাক্তুনা, ইকাইখুম্নদুনা, করিগুম্বা ঐখোয়না লেঙ্গোন্নদুনা চৎপা তারবদি ঐখোয়গী মঙলানশিং অসি হেন্না মায় পাকপা ঙমগনি। থবকী থৌশিল থৌরাং অমসুং পাঙথোকপগী মওংদি খেন্নবা য়াই অদুবু ৱারেপতি অমত্তনি, লৈবাক অমগী মঙলান্দি খেন্ননিংঙাই লৈতে।

অসিগুম্বা য়ুগ অমদা ঐখোয়না চঙশিনশি। ঐহাক্না গুজরাতকী মুখ্য মন্ত্রী ওইরিঙৈ মনুংদনি ঐহাক হৌজিকসু নীংশিংলি। কেন্দ্র লৈঙাক্তা, ঐখোয়গী ৱাখলদা লৈবা লৈঙাক অমা লৈরমদে, অদুবু ঐহাক্কী গুজরাতকী মফম খুদিংদা, গুজরাতকী চাউখৎপা হায়বসি ভারতকী চাউখৎপনি হায়বা লাইৱা অসি ঐহাক্না তুংইন্দুনা চৎখি। ঐখোয়না মফম অমেহক্তদা লৈজসনু, ঐখোয় পুম্নমক্কী ৱাখলদদি ভারতকী চাউখৎলোন অদুমক থমগদবনি। লৈবাক অসিবু মাংজিল থানা পুখৎলিবা, লুচিংখিবা, হীরম কয়াদা খুদম ওইনিংঙাই ওইরবা থবকশিং পায়খৎখিবা ঐখোয়গী লৈবাক অসিগী রাজ্য কয়া অমা লৈ।  মখোয়না ঐখোয়গী ফেদরেলিজমদা পাঙ্গল পীরি। অদুবু ঙসিদি, ঐখোয়না কোওপরেতিব ফেদরেলিজম অমা অমসুং অথোই অহেন তাননিংঙাই ওইবা মশক অমগী তঙাইফদবা লৈরে।

ঐহাক্কী নুংশিজরবা ইরৈবাকচাশিং,

ঐখোয়না অমৃতকালগী চহি ২৫গী মতাংদা খন্নবা মতমদা, ঐখোয়গী মাংদা থেংনগদবা শিংনবা কয়া অমা উরে, য়ারোইদবা মফম অদুক্কী মতীক লৈ, অরুবা তাংকক কয়াসু লৈরি, মদুশিংদুবু ঐখোয়না কৈদৌনুংদা হন্থনা য়েংদে। লম্বী থিরদুনা লেপ্পা লৈতনা হোৎনরি, অদুগা ঐহাক্না মফম অসিদা হীরম অনিগী মতাংদা খন্নবা পাম্মি। খন্ন-নৈনবদি হীরম কয়া অমদা পাঙথোকপা য়াই। অদুবু অকক্নবা মতমগী মনুংসিদদি হীরম অনিখক্তমক নৈননিংই। অমসুং হায়রিবা শিংনবা কয়া অসিনা মরম ওইদুনা, অশোইবা, লাইনা কয়ানা মরম ওইদুনা, চহি ২৫গী ময়োল চোংবা মতম অসি ঐখোয়না মতম চানা য়েংশিলহৌদ্রবদি অমসুং মতম চানা ঙাকহৌদ্রবদি শোইনা চৎখিবা য়াই। অহাবদনা শেঞ্জা থুমজানি অমসুং অতোপ্পা অমনা নেপোতিজম, ফেমিলিজম্নি। ভারতকুম্বা মীওই কয়া লাইরনা হিংনরিবা গনতন্ত্র চৎপা লৈবাক অসিদা লৈফম লৈতনা হিংবা কয়া অমসু লৈরি। মসি অফবা ফিভম অমদি নত্তে মরুপশিং। মরম অসিনা ঐখোয়না হেক ঙম্লিবা মখৈ শেঞ্জা থুমজা হায়বসি মুত্থৎনবা হোৎনগদবনি। হৌখিবা চহি নিপানলোম অসিদা, আধার, মোবাইলগুম্বা অনৌবা সিস্তেমশিং শীজিন্নদুনা দাইরেক্ত বেনিফিৎ ত্রান্সফরনা হুরানবশিংগী খুত্তা তারগদবা লুপা করোর লাখ অনি হেন্না কনবদা মায় পাকপা ঙমখ্রে অমসুং মদু লৈবাক অসিবু শেমগৎপদা শীজিন্নরে। মমাংগী লৈঙাক্কী মতমদা বেঙ্ক লুৎ তৌদুনা চৎখ্রবশিংবু মখোয়গী বেঙ্ক একাউন্তশিং থিংজিন্দুনা মখোয়বু হন্না পুরক্নবা হোৎনরি। মীওই কয়া অমা জেলদা লৈহনখ্রে। লৈবাক অসিবু লুত তৌদুনা চৎখ্রিবশিং হল্লকহনগনি অমসুং মসি তানবা ঐখোয়না হোৎনগনি।

ইচিল ইনাওশিং, শেঞ্জা থুমজাগী মায়োক্তা ঐখোয় হৌজিক য়াম্না লুবা তাংকক অমদা চংশিল্লি হায়বসি ঐহাক্না ময়েক শেংনা উবা ফংলি। মথক থোংবা অহলশিং ফাওবনা নান্থোকপা ঙম্লরোই। ৱাখল্লোন অসিগা লোয়ননা, ভারতনা হৌজিক শেঞ্জা থুমজাগী মায়োক্তা খোংফম চেৎনা লেপলি। অমসুং ঐহাক্না ৱাহৈশিং অসি রেদ ফোর্তকী রেমপার্ত্তগী অচৌবা থৌদাংগা লোয়ননা হায়রিবনি। অদুগা, ইচিল ইনাওশিং, শেঞ্জা থুমজানা লৈবাক অসিদা মহিক্কুম্না মরাই চাইথহল্লক্লি। ঐহাক্না মসিগী মায়োক্তা লান্থেংনগনি, হেন্না কন্না থেংনগনি, মসিবু অহোংবা অমদা পুরক্কনি। অদুগা ঐহাক্কী ইরৈচা করোর ১৩০, নখোয়না ঐহাকপু থৌজালবীয়ু, ঐহাকপু শৌগৎপীয়ু, লানফম অসিবু লান্থেংনবা ঙম্ননবা ঙসি ঐহাক্না অদোম্না শৌগৎপীনবগীদমক হায়জরি, অদোমগী মতেংগীদমক হায়জরি। লান অসিবু লৈবাক অসিনা ঙমগদবনি অমসুং মীচম প্রজা অমগী পুন্সিবু শেঞ্জা থুমজানা মাংহনখ্রে। ঐহাক্কী মীচম প্রজা অসিনা অমুক হন্না আন, বান, শান ওইনা হিংনবগীদমক লম্বী য়াৎনিংই। মরম অসিনা, ঐহাক্কী নুংশিরবা ইরৈবাকচাশিং, লৈবাক অসিদা শেঞ্জা থুমজাগী মায়োক্তা য়ানিংদবা উৎলক্লিবা, ফোংদোক্লক্লিবা অসি খন্থনিঙাইনি, শেঞ্জা থুমজাদা কোমথোকপা হায়বসি লৈবাক অমত্তদা চান্নরোই।

অমসুং কোর্ত্তা মরাল লৈরে হায়রবা, শেঞ্জা থুমজা তৌবগীদমক মরাল লৈরবা, জেলদা চঙনবা লেপলবা, জেলদা লৈরিবা মীওই কয়াদি হৌজিক ফাওবা থৌশাদনা মখোয়গী অপাম্বা তৌদুনা মখোয়গী মিংচৎ শেমগৎলি। খুনাই অসিদা থোক্লিবা অমোৎপা অসিদা পামদবা পোক্ত্রবদি, অশেংবা হায়বা ৱাখল্লোন অদু পোক্ত্রি। শেঞ্জা থুমজা অমসুং শেঞ্জা থুমজা তৌরিবা মীগী মায়োক্তা য়ানিংদবগী  ৱাখল্লোন পোক্ত্রিবমখৈ, মখোয়বু খুনাই অসিনা হন্থনা য়েংলোই, অমসুং মসি লেপ্পা লৈতনা চৎখিগনি। মরম অসিনা শেঞ্জা থুমজা অমসুং শেঞ্জা থুমজা তৌরিবা মীওইশিংবু মশক মুন্না খঙগদবনি।  

অনিশুবদা ঐহাক্না খন্ননিংলিবা ৱাফমদি নেপোতিজমনি, অদুগা ঐহাক্না নেপোতিজম, ফেমিলিজমগী মতাংদা হায়রকপা মতমদা, মীয়াম্না ঐহাকপু রাজনিতিগী মতাংদা ঙাংলিবনি হায়না খল্লি। নত্তে, লাইবক থিবনা রাজনিতিগী লমদা লৈরিবা ফত্তবা অদুনা ভারতকী ইন্সতিত্যুসন খুদিংদা ফেমিলিজম য়োকখৎলি। ঐখোয়গী ইন্সতিত্যুসন কয়াবু ফেমিলিজম্না য়োমশিল্লক্লি। মসিনা মরম ওইদুনা লৈবাক অসিগী হৈথোই শিংথোইবগী মগুন  লৈরবা কয়ানা অৱা মায়োক্নরি। ঐহাক্কী লৈবাক্কী মপাঙ্গল শোন্থহল্লি। খুদোংচাবা ফংবা য়াবা মীওইশিং অদুগী ইমুংদি নেপোতিজম্না মরম ওইদুনা ইন্থোকপীরম্মি। মহাক্কীদি ইমুং মনুংগী খংন চান্নবা লৈতবনিনা শেলনা লৈদুনা মফম অমা কলহৌরসি হায়না খলহল্লি, মসিনা শেঞ্জা থুমজা তৌনবগী মরমশিংগী মনুংদা অমা ওইরি। ঐখোয়না ইন্সতিত্যুসন খুদিংদা নেপোতিজম অমসুং ফেমিলিজম অসিবু হৈনহন্দবা তাই, এৱের্নেসশিং পাংথোক্কদবনি, অসুম্না তৌদুনা ঐখোয়না ঐখোয়গী ইন্সতিত্যুসনশিংবু কনবা ঙমগনি। ইন্সতিত্যুসনশিংগী তুংগী য়াইফনবগীদমক্তা মসি য়াম্না তঙাই ফদে। চপ মান্ননা, রাজনিতিদসু, লৈবাক অসিগী তৌবা ঙম্বগী মপাঙ্গলদা ফেমিলিজম্না অরানবা কয়া অমা তৌখ্রে। ইমুং মনুংগী রাজনিতি অসি ইমুং অদুগী য়াইফনবা খক্তনি, মসিনা লৈবাক অসিগী য়াইফনবগীদমক করিসু তৌদ্রি , মরম অসিনা ভারতকী সংবিধানবু রেদ ফোর্তকী রেমপার্ত্তগী নিংশিংবা মতমদা ঐহাক্কী থম্মোয়বু মীয়ামদা কৎথোকচরি। ভারতকী রাজনিতিবু শেংদোক্নবা, ভারতকী ইন্সতিত্যুসন খুদিংমকপু শেংদোক্নবগীদমক ঐখোয়না লৈবাক অসিবু ইমুং মনুংগী হান্না হায়বা ৱাখল্লোন অসিদগী মনিং তমহন্দুনা হৈজ শিংজবদা য়ুম্ফম ওইদুনা লৈবাক অসিবু মাংলোমদা চঙশিনহনবা তাই হায়বসি ঐহাক্না ময়ামগী মফমদা থমজনিংই। মসি থবক্তা ওন্থোকপা তাই। নত্ত্রবদি ঐহাকসু ফংলম্বা য়াবনি, অদুবু ইখুরা, মাম্মা, ইপা, ইপু লৈতবনা ফংদবনি খন্দুনা পুম্নমক্কী ৱাখল খোইশাওদুনা লৈরগনি। অসিগুম্বা ৱাখলগী ফিভমসিদি লৈবাক অমহেক্তদা অফবা পুরক্লোই।

ঐহাক্কী লৈবাক অসিগী নহাশিং, নখোয়গী তুংগী লম্বীগীদমক, নখোয়গী মঙলানশিংগীদমক, ঐহাক্না নেপোতিজমগী মাইয়োক্তা লান্থেংননবা নখোয়গী মতেং নিরি। ইমুং মনুংগী রাজনিতীগী মাইয়োক্তা লান থেংননবা ঐহাক্না নখোয়গী মতেং নিরি। অসিগুম্বা সংবিধানগী ওইবা ইথৌদাং অসি ঐহাক্না য়ানা লৌজরি। মসিবু ঐহাক্না গনতন্ত্রগী থৌদাংনি হায়না লৌজৈ। মসিনি ঐহাক্না রেদ ফোর্তকী রেম্পার্ততগী হায়খিবা কয়াগী থৌনা। মরম অসিননি ঙসি নখোয়গী মফমদগী ঐহাক্না নখোয়গী মফমদগী অসিগুম্বা খুদোংচাবা অমা পাম্বগী মরমসু। হৌখিবা নুমিৎ খরনিসিদা ঐখোয়না শান্ন-খোৎনবদা উখ্রে, মমাংদা লৈবাক অসিগী তেলেন্ত লৈরম্লোই হায়বদি নত্তে, ঐখোয়গী ইচা অমসুং ইনাওশিংনা মমাংদা শান্ন-খোৎনবগী লমদা চঙশিন্দে হায়বদি নত্তে। অদুবু, খনবদি নেপোতিজমগী থোংদগী খন্দুনা চৎনরম্মি। অমসুং মহাক্না লৈবাক অদুগী শান্নবুংদুবুদি য়ৌজবা তারবসু মহাক্কী মফমদা মায় পাকপা পাক্তবা হায়বদুদি থওইনা লৌদ্রে। অদুবু মনুং মপান ফাওনা উরকপা মতমদদি, শান্নরোইশিং অসি হৈজবগী থাক্তা খল্লে, অমসুং মপুং ফানা মনুং মপান ফাওনা উবদগী শান্না খোৎনবদসু হৈথোই শিংথোইবশিংবু ইকাইখুম্নবা হৌরক্লে। ঙসিদি, মালেমগী শান্নবুং কয়াদা মচু অহুমগী ফিরালনা মনিং তম্না পাইরে। ভারতকী জাতিগী ঈশৈনা মনীং তম্না শক্লরে।

করিগুম্বা নেপোতিজমদগী মনীং তম্লকপা তারবদি অমসুং নীংতম্বা ফংলবদি চাউথোকচনিংঙাই ওইগনি। ফরে, ঐগী নুংশিজরবা ইরৈবাকচাশিং, শিংনবা কয়া অমসু লৈরি, করিগুম্বা লৈবাক অসিগী মমাংদা খুদোংচাদবা করোর অমা লৈবা তারবসু মদুগী পাম্বৈ করোর অমা লৈগনি অমসুং ঐহাক্না ইরৈচা করোর ১৩০দা থাজবা থম্লি। ঐখোয়না মসিগী শক্তি অসিগা লোইননা মাংজিল থানা চঙশিনবা তাই। হৌজিক হায়বসিনা ময়োল চোংবা মতম্নি অমসুং ঙল্লিঙৈ মতম অসিগী মনুংদগী ঐখোয়না কৈদৌনুংদা লাক্কবা চহি ২৫গী ৱাখল কাউরোইদবনি। নুমিৎ খুদিং, মীকুপ খুদিং, পুন্সিগী তাংকক খুদিংদা ইমা লৈবাক্কীদমক হিংগদবনি অমসুং মসিখক্তদা ঐখোয়না নীংতম লান্মীশিংগী মফমদা অশেংবা ইকাইখুম্নবা হায়বদু পীবা ঙমগনি। মসিখক্তদা ঐখোয়না লৈবাক অসিবু চহি ৭৫ চঙনা অসিগুম্বা ফিভম অসিদা থম্বীরম্বা খুদিংবু ইকাইখুম্নবগা লোইননা নীংশিংজবা ঙমগনি।

ঐহাক্না ঙসি অমৃত কাল হৌদোকচবা মতমদা ইরৈবাকচাশিংদা অনৌবা ওইথোকপা কয়া অমা শেমগৎপগা লোইননা অনৌবা ৱারেপ কয়াসু লৌমিন্ননবা পুক্নিং চিংশিনজরি। অনৌবা ময়োল চোংবগী নীংতম্বগী থৌরম অসি অনৌবা ময়োল চোংহন্নবগী মাইয়োন্দা চঙশিল্লক্লি, অমসুং মীপুম খুদিংগী থৌনা চঙলি। মীপুম খুদিংনা হোৎনরবা মতমদতা মসিগী মহৈ অসি পুরকপা ঙমগনি। তীম ইন্দিয়াগী থৌনানা লৈবাক অসিবু মাংজিল থানা পুদুনা চৎলি। ইরৈচা করোর ১৩০না শাবা তীম ইন্দিয়ানা খুৎপু অমা ওইনা চৎমিন্নরবা মতমদা মঙলান খুদিংমক মঙফাওনহনবা ঙমগনি। হায়রিবা থাজবা অসিবু ৱাখলদা থমদুনা ঐহাক্কা লোইননা লাউমিন্নসি,

জয় হিন্দ।

জয় হিন্দ।

জয় হিন্দ।

ভারত ইমানা য়াইফরে,

ভারত ইমানা য়াইফরে,

ভারত ইমানা য়াইফরে

ভন্দে মাতরম, ভন্দে মাতরম, ভন্দে মাতরম,

পুম্নমকপু থাগৎচরি!

***