ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি ভিদিও কনফরেন্সিংগী খুত্থাংদা ২০২১গী কনফেদরেসন ওফ ইন্দিয়ন ইন্দস্ত্রী (সি.আই.আই.)গী চহিগী মীফমদা ৱা ঙাংখ্রে। মীফম অদুদা ইন্দস্ত্রীগী লুচিংবশিংনা দোলর ত্রিলিয়ন ৫কী ইকনোমী অমা ফংনবা থম্লিবা পান্দম অসি মাইপাকপা ঙম্নবা তোঙান-তোঙানবা সেক্তরশিংদা রিফোর্মশিং পুরক্নবা লৌখৎলিবা প্রধান মন্ত্রীগী খোঙথাংশিং অসিবু থাগৎপা ফোঙদোকখ্রে। ‘India@75: আত্মনির্ভর ভারতকীদমক্তা সরকার অমসুং বিজিনেস পুন্না থবক তৌবা’ হায়বা মীফম অসিগী হীরম অসিগী মতাংদা ৱা ঙাংলদুনা অতৈ ৱাফম কয়াগী মনুংদা মখোয়না ইনফ্রাস্ত্রকচরগী ওইবা শীংনবশিং কোকহন্নবা, মেন্যুফেকচরিং কেপাসিতী হেনগৎহন্নবা, ফাইনান্সিএল সেক্তর হেন্না চাউথোক্নবা, তেক্নোলোজী সেক্তরদা মকোক থোংবা মফম অমা কনবা ঙম্নবা ভারতকী তেক্নিকেলগী ওইবা মতিক-ময়াই হেনগৎহন্নবা ইনপুৎশিং অমসুং সজেসনশিং পীখি।

মীতিন অদুদা ৱা ঙাংলদুনা প্রধান মন্ত্রীনা হায় সি.আই.আই.গী মীফম অসি হন্দক্তি নীংখা তমখিবগী চহি ৭৫ শুরকপা, আজাদী কা অমৃত মহোৎসবকী চৈরক অসিদা পাঙথোক্লি। মহাক্না হায়খি ভারতকী ইন্দস্ত্রীগী অনৌবা ফিরেপশিংগী, অনৌবা পান্দমশিংগীদমক্তা অচৌবা খুদোংচাবা অমনি। মহাক্না মখা তারদুনা হায়, আত্মনির্ভর ভারত অভিয়ান মাইপাকহনবগী অচৌবা থৌদাং অসি ভারতকী ইন্দস্ত্রীশিংনা য়াগদবনি। লাইচৎ মনুংদা ইন্দস্ত্রীনা উৎখিবা মপাঙ্গল অদুবু প্রধান মন্ত্রীনা থাগৎখি।

শ্রী মোদীনা ইন্দস্ত্রীদা ভারতকী খুমাং চাউশিনবা অমসুং তৌবা ঙম্বশিং অসিদা থাজবা থম্লিবা ফীভম অসিগী খুদোংচাবা মপুং ফানা লৌহৌনবা হায়খি। হৌজিক পাল্লিবা সরকারগী থৌশিলদা অহোংবশিং লৈরিবা অমদি হৌজিক লৈরিবা ফীভম অসিগী থবক তৌবগী মওংশিংদা হোংলক্লিবা অসিগী মতাংদা পল্লদুনা প্রধান মন্ত্রীনা হায় অনৌবা ভারতনা অনৌবা মালেমগী লোইননা খুৎশম্নদুনা চৎমিন্ননবা ঙসি শেম শাদুনা লৈরে। মপাল লৈবাক্কী ইনভেস্তমেন্তদা চীংনবা পোক্লম্বা ভারতনা ঙসিদা মখল পুম্নমক্কী ইনভেস্তমেন্তশিং তরাম্না ওক্লি। মসিগা মান্ননা তেক্স পোলিসীশিংনা ইনভেস্তরশিংগী মরক্তা থৌনা হন্থহল্লমি, চপ মান্নবা আরত অসিনা মালেম খ্বাইদগী কম্পিতিতিব ওইবা কোর্পোরেৎ তেক্স অমসুং ফেসলেস তেক্স সিস্তেম থৌগৎপা ঙম্মি। মমাংঙৈগী রেদ-তেপিজম অসি ইজ ওফ দুইং বিজিনেস ইনদেক্সতা শীংথানীংঙাই ওইনা হেনগৎলকপা অসিনা মহুৎ শিনখ্রে। চনৈনদুনা লৈরম্বা লেবর লোশিং অদু লেবর কোদ ৪দা রেস্নেলাইজ তৌখি; শুপ্নগী হিংনবগী পাম্বৈ অমা ওইনা লৌরম্বা লৌউ-শিংউ অসি রিফোর্মশিংগী খুত্থাংদা কৈথেলশিংগা শম্নহল্লি। মরম অসিনা ভারতনা এফ.দি.আই. অমসুং এফ.পি.আই.দা রেকোর্দ থম্বা ঙম্লিবনি। ফোরেক্স রিজর্বস অসি মমাংদা ওইখিদ্রিবা মওংদা খ্বাইদগী ৱাংবা ওইখি হায়না প্রধান মন্ত্রীনা পাউদমখি।

ঐখোয়না মপানগী ওইরবদি মদুনা হেন্না ফৈ হায়না খল্লম্বা মতম অমা লৈখি। মসিগী সাইকোলোজী অসিগী ফল করি ওইখি হায়বা ইন্দস্ত্রীগী ভেতরিয়নশিংনা য়াম্না মুন্না খংলবনি। লমদম অসিদা চহি কয়া কন্না হোৎনজদুনা পুথোকচবা লমদম অসিগী ব্রান্দশিং ফাওবা মপানগী মমিংশিংগী মখাদা প্রমোৎ তৌদুনা ফীভম অসি অদুক্কী মতিক ফৎলমদে। প্রধান মন্ত্রীনা হায়, ঙসিদি ফীভম অসি চাউনা অহোংবা লাক্লি। ঙসি ইরৈবাকচাশিংগী পুক্নীংদা ভারত্তা শাজবা প্রদক্তশিংবু পাম্লি। মহাক্না হায় কম্পনী অদু ভারতকী ওইদবা য়াদে হায়বা লৈতে অদুবু ঙসি ভারতমচা খুদিংমক্না ভারত্তা শাজবা প্রদক্তশিং শীজিন্নবা পাম্মি।

প্রধান মন্ত্রীনা হায়, ঙসি ভারতকী নহারোলশিংনা ফিল্দদা চংলকপা মতমদা মখোয়দা নীংজিং-মাংজিংনবা পোক্তে। মখোয়না কন্না হোৎনবা পামখি, মখোয়না রিস্ক লৌবা পামখি, মখোয়না মহৈ ফংবা পামখি। মহাক্না হায় ঐখোয়গী নহারোলশিংনা মখোয় মফম অসিদগী হায়না খনবা উবা ফংলি। অসিগুম্বা মখলগী মশানা মশাদা থাজবা পোকপা অসি ঙসিদি ভারতকী স্তার্তঅপশিংদা য়াওরি। প্রধান মন্ত্রীনা হায় ঙসিদি ভারত য়ুনিকোর্ন অসি চহি ৬-৭কী মমাংগী ৩-৪গা চাংদম্নবদা য়ুনিকোর্ন ৬০ লৈরে। য়ুনিকোর্ন ৬০ অসিগী মনুংদা ২১দি হৌখিবা থা খরা অসিদা থোরকপনি। সেক্তরশিংগী মতুংইন্না দাইভর্সিতী লৈবা য়ুনিকোর্নশিং অসিনা থাক খুদিংমক্তা ভারতকী অহোংবা তাক্লি। হায়রিবা স্তার্তঅপশিং অসিগী ইনভেস্তরগী রেস্পোন্স অসি অঙকপা ফংনা ফজৈ অমসুং মসিনা ভারত অসি গ্রোথকী তোপ তোপ্পা খুদোংচাবশিং লৈরে হায়বা তাক্লি।

মহাক্না হায় ঐখোয়গী ইন্দস্ত্রীদা লৈবাক অসিনা থাজবা থম্বনা ঙসি ইজ ওফ দুইং ব্যুজিনেস হেনগৎলক্লি, অমসুং ইজ ওফ লিবিং হেনগৎলক্লি। মহাক্না হায় কম্পনী এক্ততা অহোংবা পুরকখিবশিং অদুনা মসিগী অচৌবা খুদম অমা ওইরি।

প্রধান মন্ত্রী হায় সরকারগী রিফোর্মশিং অসি অচেৎপা থাজবদা য়ুম্ফম ওইবা অদুবু নমদুনা তৌহনবদি নত্তবনা সরকার অসিনা অরুবা রিফোর্মশিং অসি পাইখৎপা ঙম্লিবনি। পার্লিয়ামেন্ত সেসন্দা লৌখিবা অনৌবা থৌরাং হায়বদি ফেক্তরীং রিগুলেসন এমেন্দমেন্ত বিলগুম্বা অসিনা অপীকপা ব্যুজিনেসমেনসিংনা ক্রিদিৎ ফংহনবদা মতেং পাংলগনি। দিপোজিৎ ইন্সুরেন্স অমসুং ক্রেদিৎ গরেন্তী কোর্পোরেসন এমেন্দমেন্ত বিলনা অপীকপা দিপোজিতরশিংগী অপাম্বা ঙাক শেনগনি। অসিগুম্বা খোঙথাংশিং অসিনা সরকারগী থৌশিলশিংদা ইনোৎ হাপ্লগনি হায়না প্রধান মন্ত্রীনা ফোঙদোকখি।

প্রধান মন্ত্রীনা হায় হৌখিবগী অশোইবশিং শেমদোক্নবা সরকার অসিনা রেত্রোস্পেক্তিব তেক্সেসন লৌথোকখ্রে। ইন্দস্ত্রীবু থাগৎলদুনা অনৌবা থৌরাং অসিনা সরকার অমসুং ইন্দস্ত্রিগী মরক্তা থাজবগী মপাঙ্গল কনখৎহল্লগনি হায়না প্রধান মন্ত্রীনা ফোঙদোকখ্রে।

ঙসিদি লৈবাক অসিগী খল্লগা অচৌবা রিস্ক লৌনবা শেম্না শাদুনা লৈরবা সরকার অমা লৈবাক অসিদা লৈরে হায়না প্রধান মন্ত্রীনা ফোঙদোকখ্রে। মহাক্না হায় জি.এস.তি. অসি চহি কয়া পন্দুনা লৈখি মসিগী মরমদি হান্নগী সরকারনা রাজনীতিগী ওইবা রিস্কশিং লৌনবগী থৌনা অদু ফুদোকপা ঙমখিদে। মহাক্না হায় ঐখোয়না জি.এস.তি. চৎনহনখিবতা নত্তনা ঙসি ঐখোয়না রেকোর্দ ওইনা জি.এস.তি. খোমগৎপা উবা ফংলি।

***