ভারতকী প্রধানমন্ত্রী

প্রধান মন্ত্রী, শ্রী নরেন্দ্র মোদীনা ঙসি নই দিল্লীগী কর্তব্য পথতা পাংথোকপা মেরি মাতী মেরা দেশ কেম্পেনগী অমৃত কলাশ য়াত্রা লোইশিনবগী থৌরমদা শরুক য়াখ্রে। থৌরম অসিনা আজাদী কা অমৃত মহোৎসব অসিসু লোইশিল্লে হায়বা তাকখি। প্রধান মন্ত্রীনা থৌরম মনুংদা অমৃত বাতিকা অমসুং অমৃত মহোৎসব মেমোরিএলগী উরেপ উয়ুং তম্বগা লোয়ননা লৈবাক্কী নহাশিংগী ওইরিবা ‘মেরা য়ুবা ভারত – MY ভারত প্লেতফোর্ম’ অসিসু হৌদোকখি।

শ্রী মোদীনা মথৌ নীংথিনা পাংথোকপা খ্বাইদগী মকোক থোংবা রাজ্য নত্ত্রগা য়ুনিয়ন তেরিতোরীগা লোয়ননা মন্ত্রালয় অমসুং বিভাগকী মফমদসু আজাদী কা অমৃত মহোৎসব এৱার্দ পীখি। মকোক থোংবা রাজ্য/য়ুনিয়ন তেরিতীরী অহুম অদুদি জম্মু অমসুং কশ্মির, গুজরাত অমসুং হরিয়ানানি অমসুং মকোক থোংবা মন্ত্রালয়/বিভাগ অহুম অদুনা এক্সতর্নেল এফিয়র্স মন্ত্রালয়, ঙাক-শেল মন্ত্রালয় অমসুং অহুমশুবা থাক্তা পুন্না লৈমিন্নখিবা রেলৱে মন্ত্রালয় অমদি এজুকেসন মন্ত্রালয়নি।

প্রধান মন্ত্রীনা ঙসিগী মীয়ামদা ৱা ঙাঙবদা, কর্তব্য পথনা সর্দার সাহেবকী মপোক কুমওন অসিদা মহাগায়া উবা ফংলে হায়না ফোংদোকখি। মহাত্মা গান্ধীগী দান্দী খোঙচৎনা ইথিল পীদুনা আজাদী কা অমৃত মহোৎসবকী খোঙথাং হৌদোকখিবা মার্চ 12, 2021বু প্রধান মন্ত্রীনা নীংশিংলদুনা, আজাদী কা অমৃত মহোৎসবনা সর্দার পতেলগী মপোক কুমওন ওইরিবা ওক্তোবর 31, 2023দা লোইশিল্লে হায়না ফোংদোকখি। ভারত মচা খুদিংনা শরুক য়াখিবা দান্দী খোঙচৎকা চাংদম্নরদুনা, প্রধান মন্ত্রীনা আজাদী কা অমৃত মহোৎসবনা মীয়াম্ন শরুক য়াবগী অনৌবা রেকোর্দ অমা থম্লিবা অসিদা মীয়ামগী পুক্নিং চীংশিনখি। “দান্দী খোঙচৎনা নিংতম্বগী মৈরী নৌহৌননা চুখৎখি, অদুগা অমৃত কাল অসিনা ভারতকী চাউখৎ থৌরাংগী চহি 75গী খোঙচৎনা মায় পাকপগী মতম ওইরক্লি”, শ্রী মোদীনা হায়খি। চহি অনি চুপ্না পাংথোক্তুনা লাক্লিবা আজাদী কা অমৃত মহোৎসব অসি ‘মেরি মাতী মেরা দেশ’ খোঙথাংগা লোয়ননা লোইশিল্লে হায়না মহাক্না হায়খি। ঙসিগী মতমগী পুৱারী ওইরবা লুপ কয়াবু তুংগী চারোন শুরোন্দা খঙহনগদবা স্মারক্কী উরেপ উয়ুং তম্লিবা অসিবুসু মহাক্না পনবদা য়াওখি। খ্বাইদগী নীংথিজনা মথৌ পাংথোকপগী মনা ফংলবা রাজ্য/য়ুনিয়ন তেরিতোরী অমসুং মন্ত্রালয়শিংবুসু মহাক্না থাগৎখি।

নুংঙাইবা ফোংদোকপগী চাউরবা থৌরম অসিদা ঐখোয়না কাইন পাউজেল পীবগা লোয়ননা, ঐখোয়না MY ভারতকা লোয়ননা অনৌবা খোঙথাং অমা অমুক হৌদোক্লি হায়না মহাক্না হায়খি। “MY ভারতনা 21শুবা চা অসিদা লৈবাক শেম্বগী থৌওংশিংদা অচৌবা থৌদাং য়াগনি”, মহাক্না মখা তাখি।

প্রধান মন্ত্রীনা ভারতকী নহাশিংগী অপুনবা পাঙ্গলদা মীয়ামগী পুক্নিং চীংশিল্লদুনা, ‘মেরি মাতী মেরা দেশ’ অভিয়ান অসিনা ভারতকী নহাশিংনা মতৌ করম্না চুংশিন্নদুনা পান্দম খুদিংমক ফংবা ঙম্লিবনো হায়বগী অচঙবা খুদম্নি হায়না পাউদমখি। লৈবাক্কী মফম খুদিংগী মশিং থীঙমদ্রবা নহাশিংনা শরুক য়ারিবা অসিদা মিৎয়েং চঙলদুনা, লৈবাক শিনবা থুংবদগী অমৃত কলাশ 8500না মতৌ করম্না কর্তব্য পথতা য়ৌরকখিবনো অমসুং ভারত মচা করোর কয়ানা পাঞ্চ প্রনগী ৱাশক লৌদুনা কেম্পেনগী ৱেবসাইত্তা সেলফী অপলোদ তৌনখ্রে হায়না প্রধান মন্ত্রীনা ফোংদোকখি।

আজাদী কা অমৃত মহোৎসব লোইশিনবদা লৈবাক-লৈহাওবু পোৎলম অমা ওইনা করিগীদমক্তা শিজিন্নরিবনো হায়বা প্রধান মন্ত্রীনা শন্দোক্না তাক্লদুনা কবি অমগী ৱারোল খরা পনখি অমসুং সিভিলাইজেসন কয়ানা চাউখৎখিবা, মীওইবা খুন্নাইনা চাউখৎখিবা অসিদি লৈবাক লৈহাও অসিদনি অমসুং মসিদা ইওন কয়াগী খোঙ্গুল তারিবনি হায়না ফোংদোকখি। “ভারতকী লৈবাক-লৈহাওদা কন্সিয়সনেস লৈজৈ। সিভিলাইজেসনবু মরাই চাইথখিগদবদগী কনবা ঙমখিবা পুন্সিগী মতৌ অমা মসিদা য়াওরি”, শ্রী মোদীনা হায়খি, অমসুং সিভিলাইজেসন কয়ানা মুৎখ্রগা ভারৎনা হৌজিক ফাওবদা মপাঙ্গল লৈনা লেপ্লিবা অসিবুসু পনখি। ভারতকী থৌনাগী য়াম্লবা ৱারি কয়াগী মতাংদা পল্লদুনা অমসুং শহীদ ভগৎ সিংহগী থৌদাংশিংগী মতাংদা পল্লদুনা মহাক্না হায়খি, “ভারতকী লৈবাক লৈহাওনা থৱাইনা স্পিসিচুএলিতীগী মাইকৈদা চৎনবা ফিভম শেম্লি”। লৈবাক মীয়াম খুদিংগা ইমা লৈবাক্কী লৈবাক-লৈহাওগা নক্নবা মরী লৈনরিবা অসিদা মিৎয়েং চঙলদুনা, প্রধান মন্ত্রীনা হায়খি, “ভারতকী লৈবাক-লৈহাওগী লমন শিংবা ঙমদবা পুন্সি অদুদি করম্বা পুন্সিনো?” দিল্লীদা য়ৌরকখ্রবা ‘অমৃত কলাশ’ লিশিং কয়াদা য়াওরিবা লৈবাক-লৈহাওনা মীপুম খুদিংগী মফমদা কর্তব্য নত্ত্রগা ইশাগী থৌদাংগী ৱাখল্লোন নীংশিংহনগনি অমসুং চাউখৎপা ভারতকী মঙলান মঙফাওনহন্নবা মীপুম খুদিংদা মসিনা ইথিল পীগনি হায়না মহাক্না হায়খি। মীয়াম পুম্নমক্না লৈবাক শেম্বগী থৌওংদা ইশাগী থৌদাং য়াবীয়ু হায়বা ৱাফমসু মহাক্না থমখি।

লৈবাক্কী মফম খুদিংদগী পুরক্লিবা উ-চারা অসিনা শেমগদৌরিবা অমৃত বাতিকানা হৌরক্লিবা চারোন শুরোনশিংদা ‘এক ভারত, শ্রেস্থ ভারত’কী মতাংদা তাকপী তম্বীগনি হায়না প্রধান মন্ত্রীনা হায়খি। অনৌবা পার্লিয়ামেন্ত বিলদিংদা লৈরিবা রাজ্য খুদিংদগী খোম্লকপা লৈবাক লৈহাও শিজিন্নদুনা নুপী আর্তিস্ত 75না শাবা আর্তৱর্ক জন, জননী, জনমভুমীগী মতাংদা প্রধান মন্ত্রীনা মীয়ামদা পাউদমখি।

চাউরাক্না নুমিৎ 1000 চুপ্না চত্থখিবা আজাদী কা অমৃত মহোৎসব (AKAM) অসিনা খ্বাইদগী কান্নবা শাফু পীখিবসি ভারতকী নহা ওইরিবা চারোন শুরোনগী মফমদনি হায়না প্রধান মন্ত্রীনা হায়খি। ঙসিগী চারোন শুরোন্না মীখা পোনবা হায়বসি করিনো থেংনদ্রে, অমসুং মহাক্না নিংতম্বা ভারত্তা পোকখিবা অহানবা প্রধান মন্ত্রীসু ওইরি হায়না মহাক্না হায়খি। লৈবাক অসিনা মীরম লৈবাক্কী মখা পোন্দুনা লৈরিঙৈ মতমদা নিংতম্বগীদমক্তা ইহৌ হৌদবা মতম অমত্তা লৈখিদে অমসুং ইহৌশিং অসিনা মফম খুদিংদা য়ৌখি হায়না AKAMনা মীয়ামদা নীংশিংহল্লি হায়না প্রধান মন্ত্রীনা হায়খি।

প্রধান মন্ত্রীনা হায়খি, “অমৃত মহোৎসবনা পুৱারীগী অৱাৎপা লমায় কয়া তুংগী চারোন শুরোনগীদমক্তা মওং অমদা হাপচিনবীরে”। ভারতকী মীয়াম্না অমৃত মহোৎসবপু মীয়ামগী ইহৌ ওইহনখি হায়না মহাক্না হায়খি। মহাক্না হর ঘর তিরঙ্গানা মায় পাকপসি ভারত মচা খুদিংগী মায় পাকপনি হায়খি। মীয়াম্না মখোয়গী ইমুং অমসুং খুঙ্গংনা নিংতম ইহৌদা শরুক তমখিবশিং মসিনা মরম ওইরগা খঙনবা হৌরকখি। নিংতম লান্মীশিংগী ওইবা জিলাশিংগী দেতাবেজ অমসু শেমখ্রে হায়না মহাক্না ফোংদোকখি।

প্রধান মন্ত্রীনা ভারতনা AKAMগী মনুংদা ফংখিবা মায় পাকপশিং তাক্লদুনা ভারতনা মালেমগী মকোক থোংবা শেন্মিৎলোন মঙাগী মনুংদা লৈখিবা, চন্দ্রয়ান 3না মায় পাক্না থা লৈমায়দা খোঙদাবা, G20 সম্মিত মায় পাক্না শিনখিবা, এসিয়ন গেম্স অমসুং পেরা এসিয়ন গেম্সতা মেদল 100 হেন্না লৌখিবা, অনৌবা পার্লিয়ামেন্ত বিলদিং শঙ্গাখিবা, নারী শক্তি বন্দন আধিনিয়মগী খোঙচৎ, এক্সপোর্ত, লৌউ-শিংউগী পোত্থোক পুথোকপদা অনৌবা রেকোর্দ থমখিবা, বন্দে ভারত ত্রেন নেতৱর্ক পাকথোক চাউথোকখিবা, অমৃত ভারত স্তেসন কেম্পেন হৌদোকখিবা, লৈবাক্কী অহানবা রিজনেল রেপিদ ত্রেন- নমো ভারত লম্থাখিবা, অমৃত সরোবর 65,000 হেন্না শেমখিবা, ভারত্তা শাবা 5G হৌদোকখিবা অমসুং পাকথোক চাউথোকখিবা, অমসুং কন্নেক্তিবিতী হেন্না ফগৎহন্নবা পি.এম. গতিশক্তী মাস্তরপ্লান হৌদোকখিবগী মতাংদা পনখি।

প্রধান মন্ত্রীনা হায়খি, “আজাদী কা অমৃত মহোৎসব মনুংদা, লৈবাক অসিনা রাজপাথতগী কর্তব্য পথ ফাওবগী খোঙচৎ লোইশিনখি। ঐখোয়না মীখা পোনবগী থৌওং কয়াবুসু লৌথোকখি”। ইন্দিয়া গেত্তা লৈরিবা সুভাস চন্দ্র বোসকী মীতম, নেভীগী অনৌবা ইনসিগনিয়া, আন্দমান অমসুং নিকোবার ইথৎকী ইথিল পীনিংঙাই ওইরবা মমিং থোলহনখিবা, জঞ্জাতিয় গৌরব দিবস লাউথোকপা, সাহিবজাদেবু নীংশিংবা ওইনা বীর বাল দিবস পাংথোকপা, অমসুং চহি খুদিংগী ওগস্ত 14দা বিভাজন বিভিশিকা দিবস পাংথোক্কনি লাউথোকখিবশিংগী মতাংদসু মহাক্না পাউদমখি।

“করিগুম্বা অমা লোইখিবা মতমদা, করিগুম্বা অনৌবা অমা মতম পুম্বদা হৌবা নাই হায়বা তাক্লি”, প্রধান মন্ত্রীনা সংস্কৃতকী শ্লোক অমা তাক্লদুনা হায়খি। অমৃত মহোৎসব লোইখিবগা MY ভারত হৌদোক্লিবা অসিগী মতাংদা মহাক্না পল্লদুনা হায়খি, “MY ভারত হায়বসিদি ভারতকী নহাশিংগী পাঙ্গলবু লাউথোকপা থৌওংনি”। মসিনা লৈবাক্কী নহাশিংবু অমত্তা ওইবা প্লেতফোর্মদা পুরকপগী অথোইবা পাম্বৈ অমা ওইগনি অমসুং লৈবাক শেম্বগী থৌওংদা নহা মশিং য়াম্ববু শরুক য়াহনগনি হায়না মহাক্না হায়খি। মহাক্না MY ভারত ৱেবসাইত হৌদোক্লে, অমসুং প্লেতফোর্ম অসিদা নহাশিংগীদমক্তা চলায়বা মখল কয়াগী প্রোগ্রাম খুদিংমক য়াওহনগনি হায়না ফোংদোকখি। প্রধান মন্ত্রী মোদীনা লৈবাক্কী নহাশিংনা মখোয় মশেল য়ারিবমখৈ মরী লৈনবীয়ু, ভারতপু অনৌবা ইনর্জীনা থলহনবীয়ু অমসুং লৈবাক অসিবু তুংলমচত্তা পুবীয়ু হায়না নহাশিংদা হায়খি।

প্রধান মন্ত্রীনা মহাক্কী ৱারোল লোইশিনবা ওইনা, মহাক্না ভারতনা নিংতম্বা ফংবা অসিদি লৈবাক মীয়াম খুদিংগী মান্নবা মঙলান মঙফাওনবনি হায়রদুনা লৈবাক অসিবু অমত্তা ওইদুনা ঙাক শেনগদবনি হায়খি। ইং 2047 ফাওবগী মনুংদা ভারতপু চাউখৎপা লৈবাক অমা ওইহনবগী ৱারেপ নীংশিংলদুনা, মহাক্না নুমিৎ অসিদি নিংতম্বগী চহি 100 মপুং ফাবগী অখন্নবা নুমিৎ অমনি হায়না লৈবাক মীয়াম্না নীংশিংনগনি হায়খি। “ঐখোয়না শকখিবা ৱাশক, হৌরক্লিবা চারোন শুরোনশিংদা পীখিবা থাজবা পুম্নমক ঐখোয় পুম্নমক্না ঙাকপা তাবনি”, থৌওংশিং অসি কনশিন্না হোৎনসি হায়দুনা প্রধান মন্ত্রীনা ফোংদোকখি। “চাউখৎপা লৈবাক অমা ওইহনবগী পান্দম অসি ফংনবগীদমক্তা ভারত মচা খুদিংগী থৌদাংগী মথৌ তাই। অমৃত মহোৎসবকী খুত্থাংদা বিকশিত ভারত অমা ওইহনবগী অমৃত কালগী অনৌবা খোঙচৎ অসি চৎমিন্নবা হৌরসি”, হায়রদুনা মহাক্না মশাগী ৱারোল লোইশিনখি।

কেন্দ্রগী গৃহ মন্ত্রী, শ্রী অমিত শাহ; ইনফোর্মেসন অমসুং ব্রোদকাস্তিংগী কেন্দ্র মন্ত্রী, শ্রী অনুরাগ থাকুর অমসুং কলচরগী কেন্দ্র মন্ত্রী, শ্রী জি. কিশন রেদ্দীসু ঙসিগী থৌরমসিদা অতোপ্পা কয়াগা লোয়ননা শরুক য়াখি।

বেকগ্রাউন্দ

মেরী মাতি মেরা দেশ কেম্পেন অসি লৈবাক্কীদমক মথ্বায় কৎখিবা অথৌবা অমদি অথৌবীশিংগী মফমদা কৎপা শ্রদ্ধাঞ্জলি অমনি‍। মীয়াম পুন্না শরুক য়ামিন্নবগী ৱাখল্লোন্দা, কেম্পেন অসিগী মনুং চন্না লৈবাক শিনবা থুংনা পঞ্চায়ত/খুঙ্গং, ব্লোক, অর্বান লোকেল বোদীশিং, স্তেত অমদি লৈবাক্কী থাক্তা থবক অমদি থৌরম কয়া পাঙথোকখি‍। পাঙথোকখিবা থবক থৌরমশিংগী মনুংদা মথ্বায় কৎখ্রবা অথৌবা অথৌবীশিংগী মফমদা তৌবিমল খঙবা উৎপা ওইনা সিলফলকম (নীংশিং খুভম) শেমগৎপা; নীংশিং খুভমশিংদা মীয়াম্না ‘ৱাশক মঙা’ শকমিন্নবা; লম লমগী উ চারা মখলশিং থাবা অমদি ‘অমৃত ভাতিকা’ (বসুধ বন্ধন) শেমগৎপা অমদি নীংতম লান্মীশিং অমসুং লৈখিদ্রবা নীংতম লান্মীশিংগী ইমুং মনুংশিং (বীরোং কা বন্ধন) ইকায়খুম্নবা উৎপগী থৌরম অমদি অতৈ কয়া য়াওরি‍।

কেম্পেন অসি, স্তেত/য়ু.তি. 36তা নীংশিং খুভম লাখ 2.3 হেন্না শেমগত্তুনা; ৱাশক মঙা শকপগী সেল্ফী করোর 4 রোম থাগৎলক্তুনা; লৈবাক শিনবা থুংনা ‘বীরোং কা বন্ধন’ থৌরম লাখ 2 হেন্না পাঙথোক্তুনা; লম লমগী ওইবা উ চারা করোর 2.6 হেন্না থাদুনা; অমদি লৈবাক শিনবা থুংনা বসুধ বন্দন থীমগী মখাদা অমৃত বাতিকা লাখ 2.63 শেমগত্তুনা চাউনা মায় পাকপা ওইখি‍।

‘মেরী মাতি মেরা দেশ’ কেম্পেন্দা, খুঙ্গংগী লমগী খুলশিং অমদি ময়োল্লমগী মফমশিংদগী ৱার্দ লাখ 6 হেনবদগী লৈবাক মচেৎ অমদি চেঙ মরূশিং খোমগত্তুনা, মদুবু ব্লোক্কী থাক্তা থাগৎলগা (ব্লোক্তা খুঙ্গং পুম্নমক্কী লৈবাকশিং তাশিল্লগা) অমদি স্তেতকী থাক্তা অমুক পুনশিল্লগা পুরকপগী থৌরম অমা ওইরিবা অমৃত কলাস য়াত্রাসু য়াওরি‍। স্তেতকী থাক্তা তাশিন্দুনা পুরকপা লৈবাকশিং লৈবাক্কী কোনুংদা অমৃত কলাস য়াত্রী লিশিং কয়ানা পুরকপনি‍।

মরী লৈনবা ব্লোক অমসুং অর্বান লোকেল বোদীনা মহুৎ শিন্দুনা রাজ্য অমসুং য়ু.তি.শিংনা মখোয়গী কলাশ্তা য়াওরিবা লৈবাক-লৈহাও লৌথোক্তুনা ‘এক ভারত, শ্রেস্থ ভারত’কী ইথিলগা লোয়ননা অচৌবা অমৃত কলাশতা হাপ্পগী মতৌ অসি ঙরাং অমৃত কলাশ য়াত্রানা য়েংবা ফংখি। প্রধান মন্ত্রীনা শঙ্গাগদৌরিবা অমৃত বাতিকা অমদি অমৃত মহোৎসব মেমোরিএল অসি লৈবাক্কী মফম খুদিংদগী খোমগৎলকপা লৈবাকশিংনা কর্তব্য পথতা শাবনি‍।

মেরী মাতি মেরা দেশ কেম্পেন ‘অজাদী কা অমৃত মহোৎসব’ লোইশিনবগী থৌরম অমা ওইনা মীৎয়েঙ থমদুনা পায়খৎপনি‍। অচাদী কা অমৃত মহোৎসব মার্চ 12, 2021দগী ভারতকী নীংতম্বগী চহি 75বু হরাও তয়াম্না পাঙথোক্নবা হৌখিবনি‍। মসিগী মনুং চন্না লৈবাক পুম্বদা মীয়াম্না ইচঙ থৌনা শরুক য়াদুনা থৌরম লাখ 2 হেন্না পাঙথোকখ্রে‍।

MY ভারত

মেরা য়ুবা ভারত (MY ভারত) লৈবাকসিগী নহাশিংগী ওইবা ৱন স্তোপ হোল-ওফ-গভর্নমেন্ত ফম্পাক অমা ওইনা থবক তৌননবা মনীং মখা তম্বা বোদী অমা ওইনা লিংখৎপনি‍। লৈবাকসিগী নহা খুদিংদা মান্নবা খুদোংচাবা ফংহনবা হায়বা প্রধান মন্ত্রীগী মঙলান পরিংদা, MY ভারতনা নহাশিংনা মখোয়গী অপাম্বশিং ফংবা ঙমহন্নবা অমদি চাওখৎপা ভারত অমা শেমগৎপদা থৌদাং য়াবা ঙমহন্নবগীদমক লৈঙাক্কী মশা মরেং পুম্বদা ইনেব্লিং মেকানিজম অমা পীননবা তেক্নোলোজী শীজিন্নগনি‍। MY ভারতকী পান্দমদি নহাশিংবু খুন্নাইদা অহোংবা পুরক্নবা এজেন্ত অমদি লৈবাক শেমগৎকদবা মীওইশিং ওইহন্নবা পুক্নিং থৌগৎপা অমদি মখোয়গী লৈঙাক অমদি মীয়ামগী মরক্তা ‘নহাশিংগী থোং’ অমা ওইনা থবক তৌবা ঙমহনবনি‍। ৱাখল্লোন অসিদা, ‘MY ভারত’না লৈবাকসিদা ‘নহাশিংনা লমজিংবা চাওখৎ থৌরাং’দা অচৌবা ইনোৎ অমা হাপকনি‍।

‘Meri Mati Mera Desh’ campaign illustrates the strength of our collective spirit in advancing the nation. https://t.co/2a0L2PZKKi

— Narendra Modi (@narendramodi) October 31, 2023

जैसे दांडी यात्रा शुरू होने के बाद देशवासी उससे जुड़ते गए, वैसे ही आजादी के अमृत महोत्सव ने जनभागीदारी का ऐसा हुजूम देखा कि नया इतिहास बन गया: PM @narendramodi pic.twitter.com/P4roHSTh7Y

— PMO India (@PMOIndia) October 31, 2023

21वीं सदी में राष्ट्रनिर्माण के लिए मेरा युवा भारत संगठन, बहुत बड़ी भूमिका निभाने वाला है: PM @narendramodi pic.twitter.com/WSVjxgaIuO

— PMO India (@PMOIndia) October 31, 2023

भारत के युवा कैसे संगठित होकर हर लक्ष्य प्राप्त कर सकते हैं, इसका प्रत्यक्ष उदाहरण मेरी माटी मेरा देश अभियान है: PM @narendramodi pic.twitter.com/43jMsTdL40

— PMO India (@PMOIndia) October 31, 2023

बड़ी-बड़ी महान सभ्यताएं समाप्त हो गईं लेकिन भारत की मिट्टी में वो चेतना है जिसने इस राष्ट्र को अनादिकाल से आज तक बचा कर रखा है: PM @narendramodi pic.twitter.com/pGJjGhm97j

— PMO India (@PMOIndia) October 31, 2023

The sacred soil will serve as a wellspring of motivation, propelling us to redouble our efforts toward realising our vision of a ‘Viksit Bharat’. pic.twitter.com/wTT9Ihc5XH

— PMO India (@PMOIndia) October 31, 2023

अमृत महोत्सव ने एक प्रकार से इतिहास के छूटे हुए पृष्ठ को भविष्य की पीढ़ियों के लिए जोड़ दिया है। pic.twitter.com/Cb2wGALG0E

— PMO India (@PMOIndia) October 31, 2023

MY भारत संगठन, भारत की युवा शक्ति का उद्घोष है। pic.twitter.com/uUXpgD0fpE

— PMO India (@PMOIndia) October 31, 2023

****