ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা মার্চ 7-8দা দাদরা অমসুং নগর হাভেলী অমসুং দমন অমসুং দিয়ুগী য়ু.তি. অমসুং গুজরাত্তা চৎকনি। মহাক্না মার্চ 7তা সিলভাস্সাদা চৎকনি অমসুং নুংথিল পুং 2 রোম তাবদা মহাক্না নমো হোস্পিতাল (ফেস I) শঙ্গাগনি। নুংথিল পুং 2:45 রোম তাবদা, মহাক্না সিলভাস্সাদা লুপা করোর 2580 হেনবগী য়ু.তি. অসিগী চাউখৎ-থৌরাংগী প্রোজেক্ত কয়াগী উরেপ উয়ুং তমগনি অমসুং উরেপ উয়ুংসু তমগনি। মসিগী মতুংদা মহাক্না সুরত চৎকনি অমসুং নুমিদাংৱাইরম পুং 5 রোম তাবদা মহাক্না সুরত ফুদ সেক্যুরিতী সেচুরেশন কেম্পেন হৌদোক্কনি। মার্চ 8দা, প্রধান মন্ত্রীনা নভসারিদা চৎকনি অমসুং অয়ুক্কী পুং 11.30 রোম তাবদা, মহাক্না লাখপতী দিদিগা ৱারী শানগনি। মসিগী মতুংদা তোঙান তোঙানবা স্কিমশিং হৌদোক্নবা মীয়ামগী থৌরম অমা পাংথোক্কনি।

দাদরা অমসুং নগর হাভেলী অমসুং দমন অমসুং দিয়ুগী য়ু.তি.দা পি.এম.

লৈবাক অসিগী মফম খুদিংমক্তা হেল্থকেয়র ফেসিলিতীশিং হেনগৎহনবা অসি প্রধান মন্ত্রীগী মরুওইবা মীৎয়েং অমনি। মসিগী মতুং ইন্না মহাক্না সিলভাস্সাদা নমো হোস্পিতাল (ফেস I) শঙ্গাগনি। বেদ 450 লৈবা হায়রিবা হোস্পিতাল অসি লুপা করোর 460 হেন্না চংদুনা শাখি, মসিনা য়ুনিয়ন তেরিতোরী অসিদা হেল্থকেয়র সর্ভিসশিং মপাঙ্গল কনখৎহল্লগনি। মসিনা লমদম অসিগী মীয়াম, মরু ওইনা ত্রাইবেল কম্ম্যুনিতীশিংদা স্তেৎ-ওফ-দি-আর্ত মেদিকেল কেয়র ফংহল্লগনি।

প্রধান মন্ত্রীনা সিলভাস্সাদা লুপা করোর 2580 হেনবগী য়ু.তি. অসিগী চাউখৎ-থৌরাংগী প্রোজেক্ত কয়া শঙ্গাগনি অমসুং উরেপ উয়ুংসু তমগনি। মসিগী মনুংদা তোঙান তোঙানবা খুঙ্গংগী লম্বীশিং অমসুং অতোপ্পা লম্বীগী ইনফ্রাস্ত্রকচর, স্কুলশিং, হেল্থ অমসুং ৱেলনেস সেন্তরশিং, পঞ্চায়ত অমসুং এদমিনিস্ত্রেতিব বিল্দিংশিং, অঙ্গনৱাদি সেন্তরশিং, ঈশিং সপ্লাই অমসুং সিৱেজ ইনফ্রাস্ত্রকচর য়াওরি। প্রোজেক্তশিং অসিনা কন্নেক্তিবিতী ফগৎহনবা, ইন্দস্ত্রীগী গ্রোথ প্রমোৎ তৌবা, তুরিজম পুক্নিং থৌগৎপা, থবক ফংহন্নবা খুদোংচাবশিং শেমগৎপা অমসুং লমদম অসিদা মীয়ামগী য়াইফনবা থৌরাংশিং হেনগৎহন্নবা পান্দম থম্লি।

প্রধান মন্ত্রীনা রোজগর মেলাগী মখাদা এপোইন্তমেন্ত লেতরশিং য়েন্থোক্কনি। মহাক্না পি.এম. অৱাস য়োজনা-অর্বান, গির আদর্শ আজীবিকা য়োজনা অমসুং সিলভান দিদি স্কিমগী মখাদা বেনিফিসরীশিংদা কান্নবা য়েন্থোক্কনি।

গির আদর্শ অজীবিকা য়োজনাগী পান্দমদি লমদম অসিদা লৈরিবা সেদ্যুল্দ কাস্তশিং (SC), সেদ্যুল্দ ত্রাইবশিং (ST), অদর বেকৱার্দ ক্লাসশিং (OBC), মাইনোরিতী অমসুং দিব্যাঙ্গনগী নুপীশিংদা অপীকপা দাইরী ফার্মশিং লিংখৎতুনা মখোয়গী পুন্সিদা খুন্নাইগী অমসুং শেন্মিৎলোনগী অহোংবশিং পুরকপগা লোয়ননা মখোয়গী শেন্মিৎলোনগী মপাঙ্গল কনখৎহনবনি। সিলভান দিদি স্কিম অসি নুপী স্ত্রীৎ ভেন্দরশিংবু পি.এম. স্বানিধি স্কিমদগী কো-ফন্দিং তৌদুনা মখোয়দা এস্থেতিক ওইবা মওংদা দিজাইন তৌরবা কার্তশিং পীনবা খোংথাং অমনি।

গুজরাত্তা পি.এম.

মার্চ 7তা, প্রধান মন্ত্রীনা সুরতকী লিম্বায়াত্তা সুরত ফুদ সেক্যুরিতী সেচুরেশন কেম্পেন প্রোগ্রাম হৌদোক্কনি অমসুং নেস্নেল ফুদ সেক্যুরিতী এক্তকী মখাদা বেনিফিসরী লাখ 2.3 হেনবদা কান্নবা য়েন্থোক্কনি।

নুপীশিংগী শক্তি হেনগৎহনবা অসি সরকারনা পায়খৎলিবা থবকশিংগী মরুওইবা শরুক অমা ওইরি। প্রধান মন্ত্রীগী লমজিং মখাদা, সরকারনা মখোয়গী চাউখৎ-থৌরাংগী মায়কৈদা খোংথাং লৌখৎনবা অচেৎপা ৱাফম থম্লি। মসিগা মরী লৈননা, মার্চ 8দা, ইন্তর্নেস্নেল ৱুমেন দেনা লাকপদা, প্রধান মন্ত্রীনা নভসারী জিলাগী ভন্সি বোর্সি খুঙ্গংদা লাখপতী দিদি প্রোগ্রামদা শরুক য়াগনি অমসুং লাখপতী দিদিশিংগা ৱারী শানগনি। প্রধান মন্ত্রীনা লাখপতী দিদি 5বু লাখপতী দিদি সর্তিফিকেৎশিংসু পীদুনা ইকায় খুম্নবা উৎকনি।

প্রধান মন্ত্রীনা গুজরাত সরকারগী G-SAFAL (গুজরাত স্কিম ফোর অন্ত্যোদয়া ফেমিলীজ ফোর ওগমেন্তিং লাইবলিহুদ) অমসুং G-MAITRI (গুজরাত মেন্তরশিপ এন্দ এক্সেলেরেসন ওফ ইন্দিভিজুএলস ফোর ত্রান্সফোর্মিং রুরেল ইনকম) প্রোগ্রাম হৌদোক্কনি।

G-MAITRI স্কিম অসিনা খুঙ্গংগী পুন্সি মহিংগীদমক খুদোংচাবা ফংবা অকোয়রোন অমা শেমগৎনবা থবক পায়খৎলিবা স্তার্ত-অপশিংদা শেলগী তেংবাং অমসুং হেন্দহোল্দিং সপ্পোর্ত পীগনি।

G-SAFALনা গুজরাতকী এস্পিরেস্নেল দিস্ত্রিক্ত অনি অমসুং এস্পিরেস্নেল ব্লোক তরাহুমদোইদা লৈবা অন্ত্যোদয়া ইমুংশিংগী SHG নুপীশিংদা শেলগী তেংবাং অমসুং ওন্তপ্রিন্যুওরিএল ত্রেনিং পীগনি।

***