ভারতকী প্রধানমন্ত্রী

প্রধান মন্ত্রী, শ্রী নরেন্দ্র মোদীনা ঙসি দ্রোন অমগী মতেংগা লোয়ননা ভিদিও কন্ফরেন্সিংগী খুত্থাঙদা গুজরাৎকী লোথালদা লৈবা নেস্নেল মেরিতাইম হেরিতেজ কম্প্লেক্সকী পায়খৎলিবা থবক্কী ফীভম য়েংশিনখ্রে‍।

তিল্লিবা মীয়ামগী মফমদা ৱা ঙাঙলদুনা, প্রধান মন্ত্রীনা প্রোজেক্ত অদুনা খোঙজেল য়াঙনা চঙশিল্লিবা অদুদা নুংঙাইবা ফোঙদোকখি‍। রেদ ফোর্ত মথক্তগী মহাক্না ৱা ঙাঙবদা ‘পঞ্চ প্রান’গী মতাঙদা পনখিবা নীংশিংলদুনা, প্রধান মন্ত্রীনা ‘ঐখোয়গী নাৎকী লনগী’ মরমদা পনখি অমদি ঐখোয়গী মেরিতাইম হেরিতেজ অসি ঐখোয়গী ইপা ইপুশিংনা শিন্নবিরম্বা অসিগুম্বা হেরিতেজ মখল অমনি হায়না হায়খি‍। “ঐখোয়না কাউনখ্রবা অমদি মখোয়শিংদুবু তুংগী মীরোলদা শিন্নরম্নবা পাম্বৈ ফংখিদ্রবা ঐখোয়গী পুৱারীগী ৱারী কয়া লৈরি‍। পুৱারীগী থৌদোকশিংদগী ঐখোয়না কয়া য়াম্না তমশিনবা য়াবগে? ভারতকী মেরিতাইম হেরিতেজ অসি মপুং ফানা খন্নবিদ্রবা হীরম অমসিনি”, হায়না মহাক্না ফোঙদোকখি‍। প্রধান মন্ত্রীনা ঙল্লিঙৈ মতমদা ভারতকী লল্লোন ইতিক্না পাক শন্না শন্দোক্লমবা অমদি মালেমগী খুন্থোকলোন পুম্নমক্কা লৈনরম্বা মরীগী মরমদা পনখি‍। অদুম ওইনমক, চহি লিশিং কয়াগী মীনাই নাইথাংনা চৎনবীবু মমু য়ৈথেকখিবতা নত্তনা ঐখোয় ইশাগী নাৎকী লন অমসুং মতিংবু হন্না য়েংশিনবিদবগী ৱাখল্লোন অমা পোকহনখি হায়না প্রধান মন্ত্রীনা পেন্দবা ফোঙদোকখি‍।

চহি লিশিং কয়া লৈরক্লবা ভারতকী ইনাক খুল্লবা অমদি খেন্নবা মেরিতাইম হেরিতাজকী মরমদা পল্লদুনা, প্রধান মন্ত্রীনা সমুদ্রগী মচাক মথুমশিংগী মতিক খঙদুনা মদুবু অৱাংবা থাক্তা পুখৎলম্বা চোলা এম্পাইয়র, চেরা দাইনাস্ত অমসুং খা ভারতকী পান্দ্যা দাইনাস্তীগী মরমদা ৱাফম কয়া থমখি‍। মসিনা লৈবাকসিগী ঈশিং লান্মীগী মপাঙ্গল কনখৎহন্দুনা ভারত্তগী লল্লোন ইতিক মালেমগী মফম পুম্নমক্তা শন্দোকখি হায়না প্রধান মন্ত্রীনা মখা তাখি‍। প্রধান মন্ত্রীনা মপাঙ্গল কল্লবা ঈশিং লান্মী শেমগত্তুনা মীরমগী লম খোপচিনবশিংবু শিংনখিবা ছত্রপতি সিবাজী মহারাজকী মরমদসু ফোঙদোকখি‍। “পুম্নমক অসি মীরোইবিরুরবা ভারতকী পুৱারীগী চাউথোকচনিংঙাই ওইরবা পন্দুপ অমনি”, হায়না শ্রী মোদীনা মখা তাখি‍। কছ্চনা অচৌবা জহাজ শাফম মকোন অমা ওইনা মমিং চৎলম্বা মতমবু নীংশিংলদুনা, প্রধান মন্ত্রীনা পুৱারীগা শাগোন্নবা মফমশিং নৌনা শেমগৎনবা লৈঙাক্কী ফিরেপকী মরমদা ৱাফম কয়া থমখি‍। “ভারত্তা শাবা অচৌবা জহাজ কয়া মালেম পুম্বদা য়োল্লমখি‍। নাৎকী লন হন্না য়েংশিনবিরমদবা অসিনা লৈবাকসিদা অমাং অতা কয়া থোকহল্লম্মী‍। ফীভম অসি হোংদোকপা মথৌ তাই”, হায়না মহাক্না হায়খি‍।

আর্কিওলোজিকেল এক্সকাভেসনশিংনা পুৱারীগা শাগোন্নবা মফম কয়া পুথোরক্লি হায়বা ৱাফম প্রধান মন্ত্রীনা পনখি‍। “ঐখোয়না ভারতকী চাউথোকচনিংঙাই ওইরিবা ধোলাবিরা অমসুং লোথালগী মফমশিং অসিবু মখোয়না মমিং চৎলৈঙা মতমদা লৈরম্বা মওংদা হঞ্জিলহন্নবা ফিরেপ লৌরে‍। ঙসিদি মিসন অসিদা খোঙজেল য়াঙনা থবক পায়খৎপা ঐখোয়না উরি”, হায়না মহাক্না হায়খি‍। লোথাল অসি ভারতকী মেরিতাইম মতিংগী মাঙজিল থারম্বা মফম অমা ওইরম্মী‍। হন্দক্তা, বদনগরগা তৌবদা, সিনকোতর মাতাগী লাইশঙ থেংনখি‍। মফমসিদগী সমুদ্রগী লম্বীদা লল্লোন ইতিক তৌরম্বগী খুদম চাংদম খরসু ফংবা ঙমখি‍। মতৌ অসুম্না সুরেন্দ্রনগরগী ঝিন্ঝুৱালা খুঙ্গঙদা লাইতহাউস অমা লৈরম্বগী খুদম চাংদমসু ফংলে,” হায়না মহাক্না মখা তাখি‍।

লোথালদা তৌবদা থেংনরকখিবা ময়োল্লমশিং, হিথাংফমশিং অমসুং কৈথেলশিংগী লেমহৌরবশিং অসিদগী ঙসিগী অর্বান প্লান্নিংগী মরমদা তমশিনবা য়াবা কয়ামরুম য়াওরি হায়বা ৱাফম প্রধান মন্ত্রীনা থমখি‍। “লোথাল অসি ইন্দস ভেলী সিভিলাইজেসনগী অচৌবা লল্লোন ইতিক্কী মফম অমা ওইরম্বতা নত্তনা, মসি ভারতকী সমুদ্রগী মতিক অমসুং নুংঙাই য়াইফবগী খুদম অমসু ওইরম্মী”, হায়না মহাক্না হায়খি‍। মফমসিদা লাইরেম্বী লক্সমী অমসুং লাইরেম্বী সরস্বতীগী থৌজাল লৈ হায়রদুনা, লোথাল হিথাংফম লৈবাক ৮৪গী ফিরাল য়ুংলম্বা অদুগা ভলভীনা লৈবাক ৮০গী মহৈরোয়শিংগী মফম ওইরম্বা মতম অমা লৈরম্মী হায়না মহাক্না হায়খি‍।

প্রধান মন্ত্রীনা লোথালদা লৈরিবা নেস্নেল মেরিতাইম হেরিতেজ কম্প্লেক্স অসিনা ভারতকী খেন্নবা মেরিতাইমগী পুৱারীগী মরমদা খঙজিন্নবা অমদি তম্নবা মফম অমা ওইগনি হায়না পাউদমখি‍। লোথালদা লৈরিবা হেরিতেজ কম্প্লেক্স অসি ভারতকী মীচম মীয়াম্না মাগী পুৱারীগী মরমদা লায়না খঙবা ঙম্নবা মওংদা শেমগৎপনি হায়না মহাক্না শন্দোক্না তাকখি‍। মসিদা মতমসিগী ওইবা তেক্নোলোজী শীজিন্নদুনা মতমদুগী লৈরম্বা শক্তম অদু অমুক হিংগৎহন্নবা হোৎনরি‍। লোথালগী মতিক অমুক হন্না পুরক্নবা থৌরাং অসি কম্প্লেক্স অসিখক্তদা লোইবা নত্তে, গুজরাতকী সমুদ্র খোঙবাল পরিংদসু মতমগা চুনবা ইনফ্রাস্ত্রকচর প্রোজেক্তশিংসু মথং মথং পায়খৎলক্কদৌরি হায়না প্রধান মন্ত্রীনা হায়খি‍। মহাক্না নৌনা পায়খৎকদৌরিবা সেমিকন্দক্তর প্লান্তকী মরমদসু পনখি‍। “ঐখোয়গী লৈঙাক অসিনা মফম অসিবু চহি লিশিং কয়াগী মমাঙদা চাওখৎনা লৈরম্বা মতৌগুম চাওখৎপা পুরক্নবগীদমক মপুং ফানা হোৎনরি‍। লোথালগী পুৱারীনা তুংদা লাক্কদবা মীরোলগী ফীভম শেম্লগদবা মরম্না লোথালনা ঐখোয়বু চাউথোকচনিংঙাইনা থনহল্লগনি”, হায়না প্রধান মন্ত্রীনা হায়খি‍।

ম্যুজি্রম অমা হায়বসি পোৎলমশিং নৎত্রগা চে-চাংশিং থম্নবা অমদি থেন্নবা মফম অমখক্তা নত্তে হায়বা ৱাফম থম্লদুনা, প্রধান মন্ত্রীনা ঐখোয়গী নাৎকী লন ঐখোয়না লুনা চান্না থম্বা য়াই, মখোয়গা মরী লৈনবা ইহুল ঙাক্তুনা থম্বা য়াই হায়না ফোঙদোকখি‍। ভারতকী ত্রাইবেল হেরিতেজকী মরমদা পল্লদুনা, শ্রী মোদীনা লৈবাক শিনবা থুংনা শেমগৎলিবা ত্রাইবেল ফ্রীদম ফাইতর ম্যুজিয়মশিংগী মরমদা মচা খায়বা ৱাফম থমখি অমদি ভারতকী নীংতম ঈহৌদা ত্রাইবেল নীংতম লান্মীশিংনা লৌরম্বা থৌদাংশিং পনখি‍। প্রধান মন্ত্রীনা লানগী অথৌবশিংনা কত্থোক্লমবশিং পল্লদুনা, লৈবাক ঙাকথোক্নবা হোৎনবদা মথৱায় কৎখ্রবা অথৌবা মপারী মমোমশিংগী নীংশিং খুভম ওইরিবা নেস্নেল ৱার মেমোরিএল অমসুং নেস্নেল পুলিস মেমোরিএলগী মরমদা পনখি‍। ভারতকী দিমোক্রেসীগী মরমদা ৱা ঙাঙলদুনা, প্রধান মন্ত্রীনা লৈবাকসিগী চহি ৭৫গী খোঙচৎকী শক্তম উৎলিবা প্রাইম মিনিস্তর্স ম্যুজিয়মগী মরমদসু পনখি‍। কেবারিয়া, এক্তা নগরদা লৈরিবা স্তেচু ওফ য়ুনিতী অসিনা ভারতকী অপুনবগী শক্তম শাগৎনবগীদমক হোৎনখিবা, ৱাখিবা অমদি থেংনখিবশিংবু ঐখোয়দা নীংশিংহল্লি হায়না প্রধান মন্ত্রীনা মখা তাখি‍। “লৈবাকসিদা হৌখিবা চহি ৮সিদা শেমগৎলক্লিবা নাৎকী লনশিং অসিনা ভারতকী পাক চাউরবা লিগেসীগী শক্তম উৎলি”, হায়বা ৱাফম প্রধান মন্ত্রীনা থমখি‍।

লোথালদা শাগৎলিবা নেস্নেল মেরিতাইম ম্যুজিয়ম অসি লৈবাকসিগী মেরিতাইম হেরিতেজকী মতাঙদা ভারত মচা পুম্নমক্কী চাউথোকচনিংঙাই ওইগনি হায়না প্রধান মন্ত্রীনা থাজবা পীখি‍। “লোথালনা মালেমগী মমাঙদা মাগী অরিবা মতিক ময়ায়গা লোয়ননা থোরকখিগনি হায়না ঐনা চপ চানা থাজৈ”, হায়না প্রধান মন্ত্রীনা লোইশিল্লকপদা ফোঙদোকখি‍।

গুজরাতকী মুখ্য মন্ত্রী, শ্রী ভুপেন্দ্র পতেল থৌরম অদুদা শরুক য়াখি অদুগা কেন্দ্র মন্ত্রী শ্রী মনসুখ মন্দাবিয়া অমসুং শ্রী সর্বনন্দ সোনোৱালনা ভিদিও কনফরেন্সিংগী খুত্থাঙদা শরুক য়াখি‍।

বেকগ্রাউন্দ

লোথাল হরপ্পন সিভিলাইজেসনগী মশক নাইবা ময়োল্লমশিংগী মরক্তা অমা ওইরম্মী অমদি মীওইবনা শেম্বা খ্বাইদগী লিবা দোকয়ার্দ থেংনবগীদমক মীয়াম্না খঙনৈ‍। লোথালদা মেরিতাইম হেরিতেজ কমপ্লেক্স অমা শেমগৎপা হায়বসি ময়োল্লম অসিগী পুৱারীগী লিগেসী অমসুং নাৎকী লনদা চপ চারবা শ্রদ্ধাঞ্জলি অমনি‍।

লোথালগী নেস্নেল মেরিতাইম হেরিতেজ কমপ্লেক্স (এন.এম.ঐচ.সি.) অসি ভারতকী ইনাক খুল্লবা অমদি মখল মথেলগী মেরিতাইম হেরিতেজ উৎনবখক নত্তনা লোথালবু মালেমগী থাক্কী লমকোয় লমথুংফম অমা ওইনা শেমগৎনবগীদমক অসিগুম্বা মখলগী অমত্তা ঙায়রবা প্রোজেক্ত অমা ওইনা শেমগৎপনি‍। প্রোজেক্ত অসিনা তুরিজমগী মতিং হেনগৎহনগদৌরিবা অসিনা লমদম অসিগী শেন্মিৎলোন চাওখৎপদসু মতেং ওইগনি‍।

মার্চ ২০২২দগী হৌখিবা কমপ্লেক্স অসি শেমগৎপগী থবক অসি লুপা করোর ৩৫০০রোম চঙনা পায়খৎপনি‍। মসিদা হরপ্পন আর্কিতেকচর অমসুং পুন্সি মহিং নৌহৌননা শেমগৎনবা লোথাল মিনি রিক্রিএসন, মেমোরিএল থীম পার্ক, মেরিতাইম অমসুং নেভী থীম পার্ক, ক্লাইমেৎ থীম পার্ক, অমদি এদভেঞ্চর অমসুং এম্যুজমেন্ত থীম পার্ক হায়রিবা থীম পার্ক মরি অসিনচিংবা য়াম্লবা ইনোভেতিব ওইবা অমদি তোপ তোপ্পা ফীচরশিং য়াওগনি‍। মসিদা মালেমগী খ্বাইদগী ৱাংবা লাইতহাউস ম্যুজিয়ম, গেল্লরী তরামরিদা হরপ্পন মতমদগী হৌরগা হৌজিক ফাওবগী ভারতকী মেরিতাইম হেরিতেজ, লোয়ননা স্তেত অমসুং য়ু.তি.শিংগী খেন্নবা মেরিতাইম হেরিতেজ উৎপা কোস্তেল স্তেত পেভিলিয়নশিং অমদি অতৈ কয়া লৈগনি‍।

National Maritime Heritage Complex at Lothal is our resolve to celebrate India’s rich maritime history. https://t.co/iIbHS8Z6EB

— Narendra Modi (@narendramodi) October 18, 2022

India’s maritime history… It is our heritage that has been little talked about. pic.twitter.com/c0GXThIPd5

— PMO India (@PMOIndia) October 18, 2022

India has had a rich and diverse maritime heritage since thousands of years. pic.twitter.com/glpVGTX2CO

— PMO India (@PMOIndia) October 18, 2022

Government is committed to revamp sites of historical significance. pic.twitter.com/OUQsLJrz3b

— PMO India (@PMOIndia) October 18, 2022

Archaeological excavations have unearthed several sites of historical relevance. pic.twitter.com/cf4Oc7kCcF

— PMO India (@PMOIndia) October 18, 2022

Lothal was a thriving centre of India’s maritime capability. pic.twitter.com/92J13bVLGT

— PMO India (@PMOIndia) October 18, 2022

National Maritime Heritage Complex at Lothal will act as a centre for learning and understanding of India’s diverse maritime history. pic.twitter.com/PMGHxWI3YJ

— PMO India (@PMOIndia) October 18, 2022

*****