ভারতকী প্রধানমন্ত্রী

ইরৈবাকচা পুম্নমক্তা ঐহাক্না খুরুমজরি!

নুমিৎ 2-3গী মমাংদা হৌদোকখিবা ভিকসিৎ ভারত সঙ্কল্প য়াত্রা অসি নুমিৎ 50নি মপুং ফাখ্রে। অমুক্তা ওইখিদ্রিবা মওংদা অতেনবা মতমগী মনুংদা খোঙচৎ অসিদা মীওই করোর 11না য়াওশিনখ্রে। সরকারনা খুন্নাই অসিদা লৈরিবা অরোইবা মীওই য়ৌশিন্নবা হোৎনরি অমসুং মহাকপু স্কিমশিংগা লোয়ননা কন্নেক্ত তৌরি। ভিকসিৎ ভারত সঙ্কল্প য়াত্রানা সরকারগী য়াত্রা খক্তা ওইবতা নত্তনা লৈবাক্কী য়াত্রাসু ওইরি, মসিনা মঙলানশিংগী য়াত্রা অমা ওইরকখি, মসিনা ৱারেপশিংগী য়াত্রা অমা ওইরক্লি, থাজবগী য়াত্রা অমা ওইরি অমসুং মসিনা মরম ওইরগা মোদীগী গরেন্তীগী গারী অসি ঙসি য়াম্না হরাও তয়াম্না ওক্লি। লৈবাক্কী রিজন খুদিংমক, ইমুং খুদিংমক্না গরেন্তীগী গারী অসিবু মখোয়গী অফবা তুংলমচৎকী আশা ওইনা উরি। খুঙ্গং নত্ত্রগা সহর ওইরবসু মফম খুদিংমক্তা য়াত্রা অসি হরাও তয়াম্বা অমসুং থাজবনা থনখি। মুম্বাইগুম্বা মেত্রোপোলিস নত্ত্রগা মিজোরামগুম্বা মনুং হঞ্জিনবা খুঙ্গংশিং ওইরবসু, কার্গিলগী চীংশিং নত্ত্রগা কন্যাকুমারিগী সমুদ্র তোর্বান ওইরবসু মোদীগী গরেন্তীগী গারীনা লৈবাক্কী কাচিন কোয়া খুদিংমক্তা য়ৌশিল্লি। সরকারগী স্কিমশিংগী কান্নবশিং ফংনবা ঙাইরক্লিবা লায়রবা ইমুংশিংনা ঙসি অচৌবা অহোংবা অমা উরি। নোংমদি সরকার কর্মচারীশিং, সরকারগী ওফিসরশিং, বাবুশিং অমসুং লুচিংবশিংনা মশানা লায়রবগী য়ুমথোংদা লাক্তুনা মখোয়না সরকারগী স্কিমশিংগী কান্নবা ফংলব্রা নত্ত্রগা ফংদ্রিবা হংগনি খল্লুব্রা? অদুবু মসি ওইথোক্লি অমসুং থমোয় শেংনা মসি ওইথোকপা ঙম্লি। মোদীগী গরেন্তীগী গারীশিং, সরকারগী ওফিসশিং, মীয়ামগী মীহুৎশিংনা ইরৈবাকচাশিং অমসুং মখোয়গী খুঙ্গংশিং অমসুং লৈকাইশিংদা য়ৌশিল্লি। ঐহাক্না হৌজিক ৱারী শাখিবা মীওইশিংগী মাইথোংশিংদা অপেনবা পোকপা ময়েক শেংনা উবা ফংলি।

ঐগী ইমুং মনুংশিং,

ঙসি লৈবাকসিদা খক্তা নত্তনা মালেমদা মোদীগী গরেন্তীগী মরমদা কয়া অমা ঙাংনরি। অদুবু মোদীগী গরেন্তীগী ৱাহন্থোক অসি করিনো? করিগীদমক লৈবাক্কী বেনিফিসরী খুদিংমক্তা য়ৌহন্নবা সরকারনা মিসন মোদতা হোৎনরি? সরকার পুম্বনা করিগীদমক অয়ুক নুমিদাং নখোয়বু শেবা তৌরি? সরকারগী স্কিমশিংগী সেচুরেসন অমসুং চাউখৎপা ভারতকী ফিরেপকী মরক্তা করি মরী লৈনৈ। ঐখোয়গী লৈবাক অসিদা মীরোল কয়া লায়রবগী চৈথেং নংদুনা লাকখি, মখোয়গী পুন্সি অসি নীংবা থুংদবা মঙলানশিংগা লোয়ননা হিংলমখি। মহাক্না ফংদবা অসি মাগী মরাইবক্নি হায়না খন্দুনা লায়রদুনা অদুমক হিংলমখি। অপীকপা মথৌ তাবশিংগী চৈথেং অসি লায়রবা, লৌমীশিং, নুপীশিং অমসুং নহারোলনা ফংদুনা লাকখি। ঐখোয়গী সরকারনা হৌজিক অমসুং তুংগী মীরোলশিংনা অসুম্না হিংহনবা পামদে, নখোয়গী ইপা-ইপুশিং থেংনখিবা অৱাবা অদু নখোয়দা থেংনহল্লোই, নখোয়গী অহল-লমনশিংনা থেংনখিবা অৱাবশিং অদু থেংনহল্লোই, মসিগী থবক ঐখোয়না কন্না হোৎনরি। ঐখোয়গী লৈবাক্কী য়াম্লবা মীয়ামবু অপীকপা নুংতিগী থেংনবা অৱাবশিংদগী কোকহন্নবা ঐখোয়না পাম্মি। মরম অসিনা ঐখোয়না লায়রবা, লৌমী, নুপী অমসুং নহারোলগী তুংলমচৎতা মীৎয়েং থম্মি। অমসুং ঐখোয়গীদমক লৈবাক্কী মসিনা খ্বাইদগী চাউবা কাস্তশিং ওইরি। লায়রবা, লৌমী, নুপী অমসুং নহারোলনা, ঐগী কাস্ত মরি অসিনা, ঐগী পামজবা কাস্ত মরি  অসিনা শক্তি লৈরবা মতমদা লৈবাক অসি শক্তি লৈগনি। মরম অসিনা মসিগী ভিকসিৎ ভারত সঙ্কল্প য়াত্রা অসি হৌদোকখিবন অমসুং মসিনা লৈবাক্কী কাচিন কোয়া খুদিংমক্তা য়ৌশিল্লি।

মরুপশিং,

ভিকসিৎ ভারত সঙ্কল্প য়াত্রাগী মপুং ওইবা পান্দম অসি মতিক চাবা মীওই অমত্তা সরকারগী স্কিমশিংগী কান্নবা ফংদবা তৌহল্লোইদবনি হায়বা অসিনি। কয়ারক হন্না মীওই খরনা এৱের্নেস ৱাৎপদগী নত্ত্রগা অতোপ্পা মরমশিংদগী স্কিমশিংগী কান্নবা ফংদনা লৈরকখি। সরকারনা অসিগুম্বা মীওইশিংদা য়ৌশিনবা অসি মখোয়গী থৌদাং ওইনা উরি। মরম অসিনা মোদীগী গরেন্তীগী গারীনা খুঙ্গং অমদগী খুঙ্গং অমদা চৎলি। য়াত্রা অসি হেক হৌখিবদগী উজ্জ্বলা স্কিমগী মখাদা লেম্না LPG কন্নেক্সনগীদম   ক অনৌবা বেনিফিসরী লাখ 12রোমনা এপ্লাই তৌরকখি। নুমিৎ খরনিগী মমাংদা ঐহাক্না অয়োধ্যাদা লৈরিঙৈদা উজ্জ্বলাগী করোর 10শুবা বিনিফিসরীগী য়ুমদা চৎখি। মসিগী মথক্তা সুরক্ষা বিমা য়োজনা, জীবন জ্যোতি বিমা য়োজনা অমসুং পি.এম. স্বনিধিগুম্বা স্কিমশিংগীদমক য়াত্রা মনুংদা এপ্লিকেসনশিং মশিং য়াম্না লাকখি।

মরুপশিং,

লায়রবা মীওই করোর অনি হেনবগী হেল্থ চেকঅপশিংসু ভিকসিৎ ভারত সঙ্কল্প য়াত্রা মনুংদা পাঙথোকখি। চপ মান্ননা মীওই করোর অমগীদমক তিবিগী স্ক্রীনিং তৌখি, মীওই লাখ 22বু সিকল সেল এনেমিয়াগী স্ক্রীনিং তৌখি। বেনিফিসরীশিং, ইচিল-ইনাওশিং অনি কনানো? মখোয় অসি খুঙ্গংশিং, লায়রবা, দলিতশিং, শোত্থরা কাংলুপ অমসুং ত্রাইবেল ফুরুপশিংগী মীওই ঙাক্তনি, মমাংগী সরকারশিংদা দোক্তরশিং তন্নবা অসি মখোয়গী ওইনা অচৌবা শীংনবা অমা ওইরমখি। ঙসি দোক্তরশিংনা ওন দি স্পোৎ মখোয়গী চেক-অপশিং তৌবীরি। ইনিসিএল স্ক্রীনিং অসি লোইবগা মখোয়না আয়ুশ্মান য়োজনাগী মখাদা লুপা লাখ 5 ফাওবগী লেম্না লায়েং ফংনবগী ইলিজিবল ওইগনি। কীদনী নাবা মীওইশিংগীদমক লেম্না দাইলাইসিসকী খুদোংচাবশিং ফংহল্লি অমসুং মখোয়গীদমক জন ঔশাধি কেন্দ্রশিংদা হোংনা হীদাক ফংহল্লি। আয়ুশআন অরোগ্যা মন্দিরশিং লৈবাক শিনবা থুংবদা হাংদোকপা অসিনা খুঙ্গংশিং অমসুং লায়রবগীদমক মরু ওইবা হেল্থ সেন্তরশিং ওইরক্লি। অতোপ্পা ৱাহৈদনা ভিকসিৎ ভারত সঙ্কল্প য়াত্রানা লায়রগী হকশেলগীদমক থৌজাল  অমা ওইরি।

ঐগী ইমুংগী মীওইশিং,

ঐখোয়গী ইমা অমসুং ইচে-ইচল করোর কয়াবু সরকারগী অচৌবা খোঙথাংশিংনা কান্নবা ফংহনবদা ঐহাক্না নুংঙাইবা পোকই। ঙসি নুপীশিংনা মাংদা থোরক্লি অমসুং অনৌব মাইলস্তনশিং ফংবা ঙম্লি। মমাংদা ইচে-ইচল কয়া ফী তুবা, লোনবনচিংবা স্কিল লৈবা কয়া লৈরমখি অদুবু মখোয়গী মশাগী ওইবা বিজিনেস হৌদোক্নবা পাম্বৈ লৈরমখি। মুদ্রা য়োজনানা মখোয়গী মঙলানশিং থুংহন্নবা মখোয়দা কনফিদেন্স পীখি; মসি মোদীগী গরেন্তীনি। ঙসি খুঙ্গং খুদিংমক্তা থবক পীনবা অমসুং মশানা থবক পীজনবা অনৌবা খুদোংচাবা কয়া থোরক্লি। ঙসি মখোয় খরদি বেঙ্ক মিত্রা নত্ত্রগা পশু সখি ওইরি খরনা আশা- ANM- অঙ্গনৱাদিদা য়াওরি। হৌখিবা চহি 10 অসিদা ইচে-ইচল করোর 10না সেল্ফ-হেল্প গ্রুপশিংদা য়াওশিনখি। ইচে-ইচলশিং অসিদা লুপা করোর লাখ 7.5 হেনবগী তেংবাং ফংহনখি। মখোয় কয়ানা চহি খরা অসিদা ‘লাখপতি দিদি’ ওইবা ঙমখি। মাইপাকপা অসি য়েংলগা ঐখোয়না ‘লাখপতি দিদি’ করোর অনি শেম্নবা মঙলান মঙখি অমসুং ফিরেপ লৌখি। করোর অনি অসি য়াম্না চাউবা মশিংনি। ‘লাখপতি দিদি’গী মশিংনা করোর অনি য়ৌরকপদা করি শাফু পীরক্কনি খন্থদুনা য়েংবীয়ু; মসি অচৌবা অওনবা অমা ওইরক্কনি। সরকারনা নমো দ্রোন দিদি য়োজনাসু হৌদোকখি। ভিকসিৎ ভারত সঙ্কল্প য়াত্রা মনুংদা দ্রোন লাখ অমগী ময়ানা দেমোনস্ত্রেসন তৌখি হায়না ঐঙোন্দা তাকপীরকখি। অহানবা ওইনা লৈবাক্কী পুৱারীদা মীওইশিং অসি মিসন মোদতা তেক্নোলোজীগী খুত্থাংদা কন্নেক্ত তৌরি। হৌজিক্কী ওইনা এগ্রিকলচর সেক্তরদা দ্রোনশিং শীজিন্নবগী ত্রেনিং পীরি। অদুবু মসিগী স্কোপ অসি তুংলমচৎতা অতোপ্পা সেক্তরশিংদসু পাকথোক চাউথোরক্কনি পানরি।

ঐগী ইমুংগী মীওইশিং,

লৌমীশিং অমসুং লৌউ-শিংউগী পোলিতীশিংগা মরী লৈনবা খন্ন-নৈনবশিং অসি মমাংগী সরকারশিংগী মতমদা কয়া তৌরমখিদে। লৌমীশিং শক্তি পীবগী হীরম অসি পোত্থোক হেনগৎহনবা, মহৈ-মরোং য়োনবা হেনগৎহনবা অসিদা খক্তা ওইরমখি অরোমদা লৌমীশিংনা মখোয়গী নুংতিগী পুন্সিদা শীংনবা কয়ামরুম মায়োক্নবা তারমখি। মরম অসিনা এখোয়গী সরকারনা লৌমীশিংনা মায়োক্নরিব খুদোংচাদবা খুদিংমক কোকহন্নবা পুম্না শুনা য়াওবা খোঙথাংশিং পাইখৎপা হৌখি। লৌমী খুদিংমক্না পি.এম. কিসান সম্মান নিধিগী মখঅদা য়ামদ্রবদা লুপা 30,000 ফংলি। ঐখোয়না অপীকপা লৌমীশিংগী অৱানবা কোকহন্নবা লেপ্পা লৈতনা থবক তৌরি। এগ্রিকলচরদা কোওপরেতিবশিং প্রমোৎ তৌবা অসি এপ্রোচ অসিগী ফল অমনি। PACS, FPOs, নত্ত্রগা অতোপ্পা ওর্গনাইজেসনশিং ওইরবসু মখোয়না ঙসি ইকনোমিগী অচৌবা শক্তিশিং ওইরি। ঐখোয়না স্তোরেজ ফেসিলিতীশিংদগী হৌরগা ফুদ প্রোসেসিং ইন্দস্ত্রী ফাওবদা লৌমীশিংগী মশিং য়াম্লবা কোওপরেতিব ওর্গনাইজেসনশিং শেম্বা ঙমহনখি। নুমিৎ খরনিগী মমাংদা হৱাই থাবা লৌমীশিংগীদমক মরু ওইবা ৱারেপ অমা লৌখি। হৌজিক লৌমীশিংনা মখোয়গী পোত্থোক অদু সরকারদা ওনলাইন্দা হকথেংননা য়োনবসু ঙম্লগনি। মসিনা হৱাই থাবা লৌমীশিংদা গরেন্তী MSP ফংহনবা খক্তা নত্তনা মার্কেৎতা মমলশিং হোংনসু ফংহনবা ঙমগনি। হৌজিক খুদোংচাব অসি তুর অমুং আরহর দাল খক্তদা ফংহল্লি অদু মসি তুংলমচৎতা অতোপ্পা হৱাইশিংসু কোনশিগনি। ঐখোয়না মীরৈবাক্তগী হৱাই লৈবদা তৌরিবা শেলগী চাদিং অসিনা লৈবাক্কী লৌমীশিংদা ওইনা কান্নবা পীনবা পান্দম থম্মি।

মরুপশিং,

ঐহাক্না ভিকসিৎ ভারত সঙ্কল্প য়াত্রা মনুংদা থবক অসি শেন্নখিবা কর্মচারীশিংবু থাগৎচনীংই। মফম কয়াদা অইংবা অমসুং নোংগী অৱাবা অমসুং অতৈ অৱাবশিং মায়োক্নরবসু লোকেল এদমিনিস্ত্রেসন ওফিসিএলশিং অমসুং মকোক থোংবা ওফিসরশিংনা সঙ্কল্প য়াত্রা অসিগী মীওই কয়ানা কান্নবা লৌহৌনবা মপুং ফানা কত্থোকপগা লোয়ননা হোৎনরি। ঐখোয়না লৈবাক অসি চাউখৎহন্নবা ঐখোয়গী থৌদাংশিং পাঙথোকপগা লোয়ননা মাংদা চংশিনগদবনি। অমুক হন্না ঐহাক্না পুম্নমক্তা য়াইফ মঙ্গোল পীজরি! ঐহাক্না তোঙান-তোঙানবা হীরমশিংগী মরমদা খঙবা ঙমখি অমসুং মখোয় খরগা ৱারী শাবগী খুদোংচাবা ফংবা মতমদা ঐহাক্না মখোয়দা লৈরিবা থাজবা অদু উবা ফংখি। প্রজা খুদিংমক্তা 2047 ফাওবদা চাউখৎপা লৈবাক অমা ওইহন্নবা হোৎনরিবা অসি ঐখোয়গী লাইবক ফবনি। নখোয়গা উনবা ফংবা অসি নুংঙাইবা পোকই অমসুং অমুক হন্না ভিকসিৎ য়াত্রাদা য়াওনবা খৌরাংনা ঙাইজরি। হন্না-হন্না থাগৎচরি!

***