ভারতকী প্রধানমন্ত্রী

প্রধান মন্ত্রী শ্রী নরেন্দ্র মোদীনা ঙসি ভিদিও কনফরেন্সকী থোংদা বারানসীদা তোঙান তোঙানবা চাউখৎ-থৌরাংগী প্রজেক্তশিং শঙ্গাখ্রে অমসুং উরেপ-উয়ুং তমখ্রে। প্রধান মন্ত্রীনা ঙসি লুপা করোর ২২০গী স্কিম ১৬ হৌদোকখি অমসুং খঙহনখি মদুদি বারানসীদা লুপা করোর ৪০০গী স্কিম ১৪গী থবক হৌরে। 

ঙসি হৌদোকখিবা প্রোজেক্তশিং অদুগী মনুংদা, সারনাথ লাইৎ এন্দ সাউন্দ শো, লাল বহাদুর শাস্ত্রী হোস্পিতাল রামনগর চাউথোকহনবা, সিবরেজগী থবকশিং, শনবী য়োকপা অমসুং ঙাকপী-শেনবীনবগীদমক ইনফ্রাস্ত্রকচরগী খুদোংচাবশিং, মখল মখাগী মরু-মরাং থম্ফমশিং, লৌউ-শিংউগী পোৎথোকশিংগী ১০০ এম.তি.গী ৱেয়রহাউস, আই.পি.দি.এস. ফেজ-২, সম্পুর্নানন্দ স্তেদিয়মদা শান্নরোইশিংগী হাউজিং কম্প্লেক্স, বারানসী সিতী স্মার্ত লাইতিং ৱর্ক, লোইননা আঙ্গনৱারী সেন্তর ১০৫ অমসুং গৌ আশ্রয় কেন্দ্র ১০২ য়াওরি। 

থৌরম অদুদা ৱা ঙাংলদুনা, প্রধান মন্ত্রীনা হায়খি মদুদি তুরিজম অসিসু বারানসী শহর অমসুং রাজ্য অসিগী মফমশিংগী চাউখৎ-থৌরাংগী শরুক অমনি। মহাক্না হায়খি মদুদি গঙ্গা তুরেল শেংদোকপা, হকশেলগী সর্বিসশিং, লম্বী, ইনফ্রাস্ত্রকচর, তুরিজম, ইলেক্ত্রিসিতী, নহারোল, শান্ন-খোৎনবা, লৌমীশিং অসিনচিংবা লমশিংদা পুরক্লিবা চাউখৎ-খৌংথাং অসি অসি বরানসীদা পুরকপা চাউখৎ-থৌরাংশিংগী খুদম ওইরি। মহাক্না লাওথোকখি মদুদি ঙসি গঙ্গা এক্সন প্লানগী মখাদা সিৱেজ ত্রিৎমেন্ত প্লান প্রোজেক্ত অমুক হন্না হৌদোক্তুনা মপুং ফাখ্রে। মহাক্না বারানসীদা পায়খৎলিবা খুদম ওইনা ঘাত্তা লৈতেংলিবশিং, দশাশোমেধ ঘাত্তা লৈবা তুরিস্ত প্লাজাদা, পোলুসন হন্থহন্নবা সি.এন.জি. হৌদোকপা কয়ামরুম অসি পনখি।

প্রধান মন্ত্রীনা হায়খি মদুদি গঙ্গা তুরেলগী মাইকৈদা হোৎনরিবশিং অসিসু কাশীগীদমক ৱাশক অমনি অমসুং কাশীগী অনৌবা খুদোংচাবশিংগী লম্বী অমসুনি। অনম্বনা, মফম অসিগী ঘাতশিংগী ফিভম ফগৎলক্লি। মহাক্না হায়খি মদুদি গঙ্গা ঘাতশিং শেংদোকপা অমসুং লৈতেংবগা লোইননা, সারনাথকী অনৌবা শক্তম অমা চোংথোরক্লি। মহাক্না হায়খি মদুদি ঙসি হৌদোকখিবা মঙাল অমসুং খোঞ্জেলগী থৌরম অসিনা সারনাথকী মতিক-মঙাল অসি অমুক্কা হেনগৎহল্লগনি।

প্রধান মন্ত্রী লাওথোকখি মদুদি ঙসি, কাশীগী চাউরবা শরুক অমবু য়ান্দুনা থম্বা ইলেক্ত্রিক ৱায়রশিংগী অৱাবা কোকহনগদৌরি। ৱায়র লৈনুংদা ফুম্বগী অতোপ্পা ফেজ অমা ঙসি লোইশিনখ্রে। মহাক্না মসিসু হায়খি মদুদি স্মার্ত এল.ই.দি. লাইৎশিং থাল্লগনি অমসুং লৈরকশিং অসি লৈতেংলগনি।

প্রধান মন্ত্রীনা শাফু পীরদুনা হায়খি মদুদি বারানসীগী কনেক্তিবিতী অসি মতম পুম্বদা সরকার অসিগী খ্বাইদগী মরুওইবা ওইদুনা লাক্লি। কাশীগী মীয়াম অমসুং তুরিস্তশিংদা ত্রাফিক চিনবদগী মতম মাংদনবা ইনফ্রাস্ত্রকচরশিং অসি শেমগৎলিবনি। মহাক্না ফোংদোকখি মদুদি চহি তরুক্কী মমাংদগী, বারানসী এয়রপোর্তনা নুংতিগী ফ্লাইৎ ১২ পাইরি মসি হৌজিক নোংমদা ফ্লাইৎ ৪৮ য়ৌখ্রে, বারানসী এয়রপোর্ত্তা মথৌ তাবা মতুং ইন্না পেসেঞ্জর বোর্দিং ব্রিজ অনি হৌদোক্নবা ফোংদোকখি। মহাক্না হায়খি মদুদি মফম অসিদা লৈরিবা মীয়াম অমসুং শহর অসিদা লাকথোক-লাকশিন তৌরিবা মীয়ামগী পুন্সি লাইথোকহন্নবগীদমক বারানসীদা অনৌবা ইনফ্রাস্ত্রকচর শেমগৎলি।

প্রধান মন্ত্রী হায়খি মদুদি হৌখিবা চহি ৬তা, হকশেলগী ইনফ্রাস্ত্রকচরদা অমক্তা ওইখিদ্রিবা মওংদা থবক পায়খৎখ্রে। ঙসি, শুপ্নগী উত্তর প্রদেশ খক্তা নত্তনা অমরোমদা মসি মফম পুম্নমক্কীদমক্তা হকশেলগী খুদোংচাবশিংগী হব অমা ওইরক্লি। মহাক্না পনখি মদুদি বারানসীগী মফম অসিদা রামনগরদা লৈবা লাল বহাদুর শাস্ত্রী হোস্পিতাল নৌথোকহনবা অসিনচিংবা য়াওনা হকশেলগী ইনফ্রাস্ত্রকচর কয়ামরুম পায়খৎলি।

প্রধান মন্ত্রীনা ময়েক শেংনা ফোংদোকখি মদুদি ঙসি বারানসীদা পুম্নমক্কী চাউখৎ-থৌরাং পায়খৎলিবা অমসুং পুর্বাঞ্চল য়াওনা নোংপোক ভারত অপুনবদা কান্নবা ফংহল্লি। মহাক্না হায়খি মদুদি হৌজিক পুর্বাঞ্চলগী মীয়াম্না করিগুম্বা তঙাইফদবা মচা অমগী ফাওবাক দিল্লী অমসুং মুম্বাইদা চৎপগী মথৌ তাদ্রে। 

প্রধান মন্ত্রীনা হায়খি মদুদি খুঙ্গংগী লাইরবা অমসুং লৌমীশিং অসি আত্মনির্ভর ভারতকী খ্বাইদগী চাউবা য়ুম্বীনি অমসুং খ্বাইদগী চাউবা বেনিফিসরীশিংসুনি। মহাক্না হায়খি মদুদি মরম অসিনা লৌউ-শিংউগী শোমদোকপশিং অসিনা লৌমীশিংদা হকথেংননা কান্নবা ফংহল্লগনি। মহাক্না হায়খি মদুদি ঙসি প্রধান মন্ত্রী স্বনিধি য়োজনাগী মখাদা স্ত্রীৎ ভেন্দরশিংনা লাইনা লোন ফংলি, মদুনা মরম ওইদুনা লাইচৎ অসিগী মতমুংদা মখোয়গী বিজিনেস মখা চৎথবা ঙমলগনি।

প্রধান মন্ত্রীনা হায়খি মদুদি খুঙ্গংদা লৈরিবা মীয়ামদা মখোয়গী লম অমসুং য়ুমগী মতাংদা আইনগী ওইবা হক ফংহন্নবা ‘স্বামিত্ব য়োজনা’ হৌদোক্লে। মহাক্না হায়খি মদুদি স্কিম অসিগী মখাদা প্রোপর্তী কার্দ য়েন্থোক্লবা মতুংদা, লন-থুমগী চয়েৎনবশিংগী ৱাফম অদু খুঙ্গংশিংদা লৈররোই। মহাক্না হায়খি মদুদি খুঙ্গংগী য়ুম নত্ত্রগা লমগীদমক্তা বেঙ্কতগী লোন লৌবা লাইরগনি। 

প্রধান মন্ত্রীনা মীয়ামদা দিৱালীগী, গোবর্ধন পুজাগী অমসুং ভায় দুজগী য়াইফ-পাউজেল পীখি অমসুং মীয়ামদা দিৱালীগীদমক লোকেল শৌগৎপীনবা খঙহনখি অমসুং মফম অসিগী পোৎথোকশিংবু মীয়াম্না পাম্নবা ওইহন্নবগীদমক চাউথোক্না থবক তৌনবগীদমক ফোংদোকখি। মহাক্না হায়খি মদুদি মসিনা লমদম অসিগী শক্তাক অদু চেৎশিলহল্লগনি।

***