ভারতকী প্রধানমন্ত্রী

খুরুমজরি!

থৌরম অসিদা ঐহাক্কা লোইননা ভারত সরকারগী ঐখোয়গী স্পোর্তস মন্ত্রী, শ্রী অনুরাগ থাকুর, শান্নরোই, কোচ পুম্নমক অমসুং মরু ওইনা মমা-মপাশিং য়াওরি। নখোয় পুম্নমক্কা ৱারী শাবা অসিনা ঐঙোন্দা ভারতনা পেরালিম্পিক্স গেম্সতসু অনৌবা পুৱারী অমা শেমগনি হায়না থাজৈ। ঐহাক্না শান্নরোই অমসুং কোচ পুম্নমক্তা মখোয়না মাইপাক্নবা, লৈবাক অসিগী মীংচৎ পুরক্নবা য়াইফ-মঙ্গোল পীজরি।

মরূপশিং,

নখোয়দা ঐহাক্না চাউনা নশাদা-নশাবু থাজবা অমসুং করিগুম্বা অমা ফংনবা অখাং কনবা অদু উবা ফংই। নখোয়না হোৎনবা কনবনা ঙসি ভারতকী মশিং য়াম্লবা শান্নরোইশিংনা পেরালিম্পিক্সকীদমক চৎকদৌরি। নখোয়না কোরোনানা নখোয়দা অৱাবা হাপচিনখি, অদুবু নখোয়গী শেম-শাবদা মসিনা অকাইবা থোকহনখিদে অমসুং নখোয়না মসি থেংনবা ঙম্নবা হোৎনখি হায়না হায়খি। মসিনা নখোয়দা থৌনা হলহনখিদে অমসুং নখোয়গী প্রক্তিস্তা অপনবা ওইহনখিদে। অমসুং ফিভম খুদিংমক্তা অশেংবা “শান্নরোইগী থৌনা চেনবা”না ঐখোয়দা অসুম্না তাকপীখি – ‘হোয়, ঐখোয়না শোইদনা ঙমগনি! ঐখোয়না ঙমগনি’ অমসুং নখোয় পুম্নমক্না মসি ঙমখি।

মরূপশিং,

নখোয়না অশেংবা মকোক থোংবা ওইবনা মরম ওইরগা তানফম অসি য়্রবা ঙমখিবনি। নখোয়গী পুন্সিগী শান্নবুংদা অৱাবশিং মায়োক্নখি। নখোয়না পুন্সিগী শান্নবুদা মাই পাকখি, নখোয়না চেম্পিয়ন ওইখি। নখোয়দা শান্নরোই অমা ওইনা থোইবা, মেদল অসি য়াম্না মরু ওই, অদুবু ঐহাক্না হন্না হন্না হায়রি মদুদি ঙসিগী অনৌবা ভারতনা ঐখোয়গী শান্নরোইশিংদা মেদল লৌনবা প্রেসর পীখিদে। নখোয়না মপুং ফানা কত্থোকপগা লোইননা, ৱাখলদা অৱাবা পোৎলুম য়াওদনা অমসুং নখোয়দা লম্বা তৌনরিবা শান্নরোই অদু কয়াম কনবগে হায়না ৱাখল ৱাবা তৌদনবা চাদা ১০০ শরুক তম্বা ঙম্নবা হোৎনৌ। মসিগী থাজবা অসিগা লোইননা স্পোর্তসকী এরেনাদা পর্ফোরম তৌগদবনি হায়বা অসি মতম চুপ্পদা নীংশিংউ। ঐহাক্না প্রধান মন্ত্রী ওইরকপা মতমদা ঐহাক্না মালেমগী লুচিংবশিংগা উন্নৈ। মখোয়না ঐখোয়দগী হেন্না ৱাংবা হেল্লি। মখোয়গী লৈবাকশিংনা লৈরিবা থাক অদুসু ৱাংই। নখোয়গুম্না ঐহাকসু চপ মান্নবা বেকগ্রাউন্দগী হৌরকই অমসুং লৈবাক অসিগী মীয়াম্না মোদীজী অসি মালেম অসি করিনো হায়বা খঙবা নত্তে, মহাক্না প্রধান মন্ত্রী ওইরগা করি তৌগদোইনো? হায়না হায়নখি। অদুবু ঐহাক্না মালেমগী লুচিংবশিংগা খুৎ শোক্নবা মতমদা ঐহাক্না নরেন্দ্র মোদীনা খুৎ শোক্নবনি হায়না খনখিদে।  মীওই করোর ১০০ হেন্না লৈবা লৈবাক অমনা মখোয়গা খুৎ শোক্নবনি হায়না মতম চুপ্পদা খনখি। ঐহাক্কী তুংদা ইরৈবাকচা করোর ১০০ হেন্না লেপ্পি হায়না খনখি মরম অসিনা ঐহাক্না থাজবা মাংবা তৌখিদে। নখোয়গী পুন্সিদা মাই পাকপা ঙম্বগী থাজবা লৈবা অদু ঐহাক্না উবা ফংই অমসুং গেম অসি মাই পাকপদি নখোয়গী ওইনা অপীকপা ৱাফম অমনি। নখোয়না হোৎনবা কনবনা মেদলশিং শোইদনা ফংগনি। নখোয়না ঐখোয়গী শান্নরোই কয়ানা ওলিম্পিক্সতা মেদল কয়া লৌরকখি খরনা লৌরকপা ঙমখিদে। অদুবু লৈবাক অসিনা মীপুম খুদিংমক্কীদমক লেপখি অমসুং মীপুম খুদিংমক্কীদমক হরাওবা ফোঙদোকখি।

মরূপশিং,

শান্নরোই অমা ওইনা নখোয়না ফিল্দদা পাঙ্গল কনবগা লোইননা মেন্তল স্ত্রেংথসু মথৌ তাই হায়বা ফজনা খংলম্লগনি। খুদোংথীবা ফীভমশিং লাক্লবসু নখোয়বু মাংলোমদা চংশিনবদা মতেং পাংগদবা অসি নখোয়গী মেন্তল স্ত্রেংথনি। মরম অদুনা লৈবাক অসিনা শান্নরোই খুদিংমক্কী মশিংগী ইসুশিং অসি য়েংশিল্লিবনি। শান্নরোইশিংগীদক ‘স্পোর্ত সাইকোলোজী”দা ৱার্কশোপশিং অমসুং সেমিনারশিং লেপ্পা লৈতনা পাংথোক্লি। ঐখোয়গী শান্নরোই অয়াম্বনা অপীকপা তাউন, সিতী অমসুং খুঙ্গংশিংগীনি। মরম অদুনা এক্সপোজরশিং ৱাৎপা হায়বসিসু মখোয়গী অচৌবা শিংনবা অমা ওইরি। করিগুম্বা মতমদা অনৌবা মফম, অনৌবা মীওই অমসুং মালেমগী ফীভমশিংনা ঐখোয়গী মোরেল পিকথহল্লি। মরম অদুনা ঐখোয়গী শান্নরোইশিংনা মসিগী মাইকৈদা ত্রেনিং ফংহন্নবা ৱারেপ লৌরে। তোকিও পেরালিম্পিক্সতা পাংথোকখিবা সেসন অহুম অদুনা নখোয়দা কান্নবা কয়ামরু ফংলমগনি হায়না ঐহাক্না থাজৈ।  

মরূপশিং,

নখোয়দা য়েংলগা ঐখোয়গী খুঙ্গংশিং অমসুং তাম্না লৈবা মফমশিংদা হৈ-শিংলবা কয়া অমা লৈরি। নখোয়না মসিগী অশেংবা খুদম্নি। রিসোর্সশিং অসিগা মরী লৈননা খুদোংচাবশিং অসি ফংলমদ্রবদি নখোয়গী মংলান করি থোক্লমগনি হায়না কয়ারক হন্না নখোয়গী ৱাখল্লোন্দা খল্লমগনি। ঐখোয়না লৈবাক অসিদা লৈরিবা নহারোল লাখ কয়াগীসু থৱাই ৱাফম থোকই। মেদল কয়ামরু লৌবা ঙমগদবা নহারোল কয়ামরুম লৈরি। ঙসিদি লৈবাক অসিনা মখোয়শিং অদুবু মশক খংবীনবা হোৎনরি অমসুং খুঙ্গংগী লমদমদা অখন্নবা মীৎয়েং চংলি। ঙসিদি লৈবাক অসিগী দিস্ত্রিক্ত ২৫০দা “খেলো ইন্দিয়া সেন্তর” ৩৬০ লোকেলগী থাক্তা তেলেন্ত লৈবশিং খন্দোক্তুনা খুদোংচাবা ফংহন্নবা লিংখৎখ্রে। লাক্কদবা মতমশিং অসিদা মসিগী সেন্তরশিংগী মশিং অসি ১,০০০দা হেনগৎলগনি। মসিগা মান্ননা রিসোর্সশিং অসি ঐখোয়গী শান্নরোইশিংগী অতোপ্পা শিংনবা ওইরি। মমাংদা অফবা গ্রাউন্দ শিং অমসুং ক্বালিতী ইকুইপমেন্ত লৈরমদে।   মসিনা শান্নরোইশিংগী মোরেলদা অপনবা পীরম্মি। মখোয়না অতোপ্পা লৈবাকশিংগী শান্নরোইশিংগী মমাংদা অকিবা ফাওরম্মি। অদুবু ঙসিদি লৈবাক অসিদা স্পোর্ত ইনফ্রাস্ত্রকচরশিং চাওথোক্লে। লৈবাক অসিনা শান্নরোই খুদিংমক পুকচেল শেংনা মতেং পাংলি। ‘তার্গেৎ ওলিম্পিক পোদিয়ম স্কিম’কী মখাদা লৈবাক অসিনা মথৌ তাবশিং শিল লাংদুনা পান্দমশিং থমলে অমসুং মসিগী ফলগী ঙসি ঐখোয়গী মাংদা লৈরে।

মরূপশিং,

লৈবাক অসিনা মশান্নশিংদা মকোক থোংবা মফম কন্নবা ঐখোয়গী অহল ওইরবা মীরোল অসিগী ৱাখল্লোন্দা লৈরিবা হান্নগী অকিবা অসি মাংহনবা তাই। করিগুম্বা অঙাং অমনা শান্না খোৎনবদা হেন্না পুক্নিং চংলবদি ইমুং মনুংগী মীওইশিংনা মহাক্না তুংদা করি তৌরগা হিংগনি হায়না পুক্নিং ৱাবা হৌরকই মরমদি মশান্না অমা নত্ত্রগা অনিদা শরুক য়াবনা মায় পাকপা নত্ত্রগা কেরিয়রগী পাম্বৈ অমা নত্তে হায়না খল্লি। হায়রিবা ৱাখল্লোন অমসুং ইন্সিক্যুর ওইনা ফাওবা অসিদগী লাপথোকপা হায়বসি ঐখোয়গী ওইনা য়াম্না মরুওইবা অমনি। 

মরূপশিং,

নখোয়না মশান্না অমহেক্তা শান্নরিবা অসিনা এক ভারত- শ্রেস্থা ভারত (ৱান ইন্দিয়া, সুপ্রিম ইন্দিয়া)গী ৱাখল্লোন্দা থৌনা হাপ্লি। নখোয়না করম্বা রাজ্যদগী লাকপগে, করি লোন ঙাংবগে, হায়বা মথৌ তাদে, মথৌ তারিবদি ঙসিদি নখোয় “তীম ইন্দিয়া’নি হায়বদুনি।  মসিগী ৱাখল্লোন অসি ঐখোয়গী সমাজগী শরুক খুদিংমক্কী থাক খুদিংমক্তা উবা ফংহনগদবনি। মান্নবা সমাজ অমসুং আত্মানির্ভর ভারতকী কেম্পেন অসিদা ঐহাক্কী দিব্যাং ইচিল ইনাও অমসুং ইচে ইচলশিং অসি লৈবাক অসিগী য়াম্না মরু ওইবা পার্তনরশিংনি। নখোয়না মীমান্নদবনা মরম ওইরগা পুন্সি     অসি কান্নফম খংদনা মাংলে হায়বদু অরানবনি হায়না উৎলে। মরম অদুনা নখোয় অসি লৈবাক অসিগী মীয়াম মরুওইনা হৌরক্লিবা মীরোলগী অচৌবা ইনোৎ অমনি।

মরূপশিং,

মমাংদা, দিব্যাং জন্দা খুদোংচাবা পীবা অসি নুঙাইনবা পীবা ওইনা লৌনরম্মি। অদুবু ঙসিদি লৈবাক অসিনা তৌফম থোকপা থৌদাং অমনি খল্লে। মরম অদুনা, পার্লিয়ামেন্তনা আইন অমা ‘দ রাইতস ফোর পর্সন ৱিথ দিসএবিলিতী এক্ত’ চৎনহন্দুনা দিব্যাং জন্দা আইনগী ওইবা খুদোংচাবা পীরি। ‘সুগম্যা ভারত অভিয়ানিস’ মসিগী চাওরবা খুদম অমনি। ঙসিদি সরকারগী বিল্দিং, রেলৱে স্তেসন লিশিং কয়া, ত্রেন কোচ লিশিং কয়া, দোমেস্তিক এয়রপোর্ত দজন কয়া দিব্যাংগা চুননবা শেমগৎলি। ইন্দিয়ন সাইন লেংগ্বেজকী স্তেন্দার্দ দিক্সনরী অমা শেম্নবা প্রোজেক্ত অসি খুমাসং চাওশিল্লি। এন.সি.ই.আর.তি.গী লাইরিকশিং সাইন লেংগ্বেজ ত্রান্সলেসন তৌরি।  হায়রিবা হোৎনরিবা অসিনা পুন্সি কয়া অমা হোংহল্লি অমসুং লৈবাক অসিগীদমক হৈ-শিংলবা কয়া অমদা করিগুম্বা খরা তৌরক্নবা থাজবা পীরি।

মরূপশিং,

লৈবাক অসিনা লেপ্পা লৈতনা হোৎনবনা মদুগী কান্নরবা মহৈশিং থুনা ফংলি অমসুং মদুনা ঐখোয়বু অচৌবা ৱাখল্লোন অমসুং ইনোবেৎ তৌনবা খনবদা ইথিল পীরি। ঐখোয়গী মায় পাকপা অমনা ঐখোয়গী অনৌবা পান্দমশিং ফংনবা লম্বী য়াৎলি। মরম অদুনা নখোয়না মচু অহুমগী ফীরাল পুদুনা তোকিওদা নখোয়গী খ্বাইদগী ফজরবা পর্ফোরমেন্স পীরবদি নখোয়না মেদল ফংবতা নত্তনা, নখোয়না ভারতকী অনীংবা অপাম্বা অদু খোংজেল য়াংনা ফংহনগদৌরিবনি। নখোয়না মসিগী অনীংবা অপাম্বশিং অসিদা অনৌবা থৌনা হাপতুনা মাংলোমদা পুগদৌরিবনি। নখোয়গী থৌনা ফবা অমসুং পুক্নিং লুপ্পা অদুনা তোকিওদা অনৌবা রেকোর্দ থম্লগনি হায়না ঐহাক্না থাজবা থম্মি। মসিগী থাজবা অসিগা লোইননা নখোয় পুম্নমক্তা মায় পাকপা পুরক্নবা য়াইফ-মঙ্গোল পীজরি। হন্না হন্না থাগৎচরি!

****