ভারতকী প্রধানমন্ত্রী

মপাল থৌরম মন্ত্রীশিং, ইন্তর্নেস্নেল ওর্গনাইজেসনশিংগী মকোকশিং, এক্সিলেন্সীশিং,

ঐহাক্না জি২০গী মপাল থৌরম মন্ত্রীশিংগী মীফমগীদমক ভারত্তা পুম্নমকপু তরাম্না ওকচরি। ভারতনা মাগী জি২০ প্রসিদেন্সীগীদমক ‘ৱান আর্থ, ৱান ফেমিলি, ৱান ফ্যুচর’ হায়বা থিম অসি খনখি। মসিনা য়ুনিতী ওফ পর্পস লোয়নন য়ুনিতী ওফ এক্সনগী মথৌ তাবা অদু তাক্লি। ঙসিগী মীফম অসিনা অপুনবা অমসুং অচৌবা পান্দমশিং থুংহন্নবগীদমক পুনশিন্নবগী ৱাখল্লোনগী মমি তাগনি হায়বগী ঐহাক্না থাজবা থম্মি।

এক্সিলেন্সীশিং,

ঙসি মলতিলেতরেলিজম অসি খুদোংথিবা ফীভম অমদা লৈরে হায়বা ঐখোয় পুম্নমক্না খঙফম থোকই। অনিশুবা লাঞ্জাওগী মতুংদা শেমখিবা গ্লোবেল গভর্নান্সকী আর্কিতেকচরনা তৌগদবা মপুং ওইবা মথৌদাং অনি লৈ। অহানবদা মসিনা কম্পিতিং ইন্তরেস্তশিং বেলেন্স তৌদুনা তুংলমচৎতা লানশিং থোকপদগী ঙাকথোকপা অমসুং অনিশুবদা অপুনবগী হীরমশিংদা থোকপা সমস্যাশিংদা ইন্তর্নেস্নেল কোওপরেসন লৈহনবা হায়বা অসিনি। হৌখিবা চহি খরগী এক্সপরিয়েন্স – ফাইনান্সিএল ক্রাইসিস, ক্লাইমেৎ চেঞ্জ, লাইচৎ, তেরোরিজম অমসুং লানশিং অসিনা গ্লোবেল গভর্নান্সকী মেন্দেৎ অনিমক থুংহনবা ঙমদ্রে উৎখি। মসিগী অশোইবা অসিগী লাইবক থীবা ফলশিংনা চাউখৎলক্লিবা লৈবাক পুম্নমক্তা অয়াম্বদা চৈথেং পীরি হায়বা ঐখোয়না য়াজবা তাই। মালেম্না চহি কয়া খুমাং চাউশিল্লক্লবা মতুংদা সস্তেনেবল দিবেলপমেন্তদা তুংহনবগী অকিবা ফীভমদা লৈরি। চাউখৎলক্লিবা লৈবাক কয়ানা মখোয়গী মীয়ামগীদমক ফুদ অমসুং ইনর্জী সেক্যুরিতী পীনবা হোৎনবগা লোয়ননা অনসস্তেনেবল দেবকী চৈথেং নংলি। শেল পাইবা লৈবাকশিংনা থোকহনবা গ্লোবেল ৱার্কমিংনা চাউখৎলক্লিবা লৈবাকশিংদা খ্বাইদগী চাউনা চৈথেং পীখি। মরম অসিনা ভারতকী জি২০ প্রসিদেন্সীনা গ্লোবেল সাউথতা ভোইস অমা পীনবা হোৎনখি। গ্রুপ অমত্তনা মখোয়গী ৱারেপশিংনা খ্বাইদগী শোকহল্লিবশিংগী ৱাকৎ তাদনা গ্লোবেল লীদরশিপকী থৌদাং লৌবা ঙমলোই।

এক্সিলেন্সীশিং,

ঙসিগী মীফম অসি অচৌবা গ্লোবেল দিবিজনশিং লাক্লিবা তানফমদা পাঙথোক্লি অমসুং মপাল থৌরম মন্ত্রীশিং ওইনা খন্ন-নৈনবসিং অসিদা ঙসিগী জিও-পোলিতিকেল তেন্সনশিংনা শোকহনবা হায়বা অসি মহৌশানি। তেন্সনশিং অসি করম্না ৱারোইশিন পুরক্কদগে হায়বগী মতাংদা ঐখোয়গী পোজিসন অমসুং ঐখোয়গী প্রর্সপেক্তিবশিং লৈ। অদুম ওইনমক মালেমগী মাংজিল থারিবা ইকনোমীশিং ওইনা কা অসিদা ঐখোয়গী ইরক্তা য়াওদবশিংগী থৌদাংসু ঐখোয়না লৌফম থোকই। মালেমনা জি২০বু গ্রোথকী শীংনবশিং কোকহন্নবা, দিবেলপমেন্ত পুরক্নবা, ইকনোমিক রেজিলিএন্স লৈহন্নবা, দিজাস্তর রেজিলিএন্স ওইহন্নবা, ফাইনান্সিএল স্তেবিলিতী লৈহন্নবা, ত্রান্সনেস্নেল ক্রাইম কোকহন্নবা, শেঞ্জা-থুমজা, তেরোরিজম লৈহনদনবা, অমসুং ফুদ অমদি ইনর্জী সেক্যুরিতী লৈহন্নবা থাজবা থম্লি। জি২০দা লম পুম্নমক্তা অমত্তা ওইনা য়ানবা পুরক্নবা অমসুং অফবা ফলশিং পুরক্নবা মতিক ময়াই লৈ। ঐখোয়না কোকহনবা ঙম্বা সমস্যাশিংগী লম্বেলদা ঐখোয়না পুন্না কোকহনবা ঙমলোইদবা সমস্যাশিং লাকহল্লোইদবনি। গান্ধী অমসুং বুদ্ধগী লমদমদা মীফম অসি পাঙথোকপা অসিদা ঐহাক্না ঐখোয়বু তোখাই-তোখাই তাহল্লিবশিংদা মীৎয়েং থম্বগী মহুৎ ঐখোয়বু পুনশিল্লিবদা মীৎয়েং থম্বগী ভারতকী সভ্যতাগী চৎনবী অসিদদগী ইথিল লৌনবা হায়জরি।

এক্সিলেন্সীশিং,

হন্দক্তা মহৌশাগী খুদোংথিবশিং অমসুং মালেম্না মায়োক্নখিবা তমথিরবা লাইচৎনা মরম ওইদুনা মীওই কয়াগী পুন্সি মাংখিবগে ঐখোয়না উবা ফংখি। ঐখোয়না গ্লোবেল সপ্লাই চেনশিংনা অৱাবা অমদি খুদোংথিবা মতমদা করম্না তৎখিবগে উবা ফংখি। ঐখোয়না স্তেবল ওইবা ইকনোমীশিং অসি খঙহৌদনা শেন্দোন অমসুং ফাইনান্সিএল ক্রাইসিস নংখিবা উবা ফংখি। মসিগী এক্সপরিয়েন্সশিং অসিনা ঐখোয়গী খুন্নাইশিং, ইকনোমীশিং, হেল্থকিয়র সিস্তেমশিং অমসুং ইনফ্রাস্ত্রকচরদা রেজিলিএন্স ওইহনবা মথৌ তাই হায়বা ময়েক শেংনা উৎখি। জি২০না নাকল অমদা গ্রোথ অমসুং ইফিসিএন্সী অমদি অমরোমদা রেজিলিএন্সকী মরক্তা অফবা বেলেন্স অমা পুরক্নবা হোৎনবদা অচৌবা থৌদাং লৈ। ঐখোয়না মসিগী বেলেন্স অসি পুন্না থবক তৌরবা মতমদা হেন্না লাইনা ফংবা ঙমগনি । মরম অসিনা নখোয়গী মীফম অসি মরু ওইরিবনি। নখোয়গী অপুনবা লৌশিল অমসুং তৌবা ঙম্বদা ঐখোয়না চাউনা থাজবা থম্মি। অমসুং ঙসিগী মীফম অসিনা কান্নবা, ইনক্লুসি অমসুং এক্সন-ওরিয়েন্তেদ ওইরক্কনি অমসুং খেন্নবশিং অদু তুংওইনরম্লগা ফিরেপশিং লৌবা ঙমগনি হায়না ঐহাক্না থাজৈ।

কান্নবা মীফম অসিগীদমক ঐহাক্না থাগৎচরি অমসুং পুম্নমক্তা য়াইফ মঙ্গোল পীজরি।

***